“Neftçi” futbol klubu ilə qarşılaşacaq “Beşiktaş”ın heyəti açıqlanıb

UEFA Konfrans Liqasının III təsnifat mərhələsində “Neftçi” ilə qarşılaşacaq Türkiyənin “Beşiktaş” klubunun Bakıya gətirəcəyi heyət açıqlanıb. Xarici KİV-lər bildirir ki, bu gün Azərbaycana yollanacaq komandanın heyətində 23 oyunçu yer alacaq. Qapıçılar: 1. Ersin Destanoğlu, 34. Mert Günok, 97. Utku Yuvakuran. Müdafiəçilər: 3. Fransisko Montero, 4. Onur Bulut, 6. Omar Kolli, 12. Daniel Emerti, 24. Valentin Rosye, 77. Umut Meraş. Yarımmüdafiəçilər: 8. Salih Uçan, 17. Kərəm Kesgin, 19. Amir Haciahmetoviç, 20. Necip Uysal, 21. Dəmir Tıknaz, 23. Kartal Yılmaz, 41. Oğuzhan Akgün, 71. Cin Onana, 83. Gedson Fernandeş, 99. Emrecan Bulut. Hücumçular: 7. Ante Rebiç, 10. Vensan Abubakar, 40. Cekson Muleka, 90. Semih Kılıçsoy. Qeyd edək ki, avqustun 10-da “Neftçi Arena”da keçiriləcək “Neftçi” – “Beşiktaş” görüşü saat 21:00-da başlayacaq.xeber100.com

“Neftçi” futbol klubu növbəti oyunu barədə azərkeşlərinə müraciət edib

“Neftçi” UEFA Avropa Konfrans Liqasının III təsnifat mərhələsinin ilk oyunu çərçivəsində avqustun 10-da saat 21:00-da “Neftçi Arena”da qardaş Türkiyənin “Beşiktaş” klubu ilə qarşılaşacaq. Bununla əlaqədar olaraq “Neftçi” klubu bəyanat yayıb. Bəyanatda bildirilir ki, həm ölkəmizdə olan, həm də qardaş ölkədən gələcək azarkeşlərin təhlükəsizliyinin yüksək şəkildə təmin olunması və oyun zamanı azarkeşlər arasında yarana biləcək mümkün arzuolunmaz halların qarşısını almaq məqsədilə müvafiq preventiv tədbirlərin görülməsi planlaşdırılır. Oyuna böyük marağı nəzərə alaraq “Neftçi Arena”da keçiriləcək görüşdə İstanbul klubunun azarkeşləri üçün xüsusi sektor ayrılacaq. “Beşiktaş” azarkeşləri bu sektora bilet əldə etmək üçün qeyd edilən komandanın müvafiq qurumları ilə əlaqə yaratmalıdır. “Neftçi” azarkeşləri üçün nəzərdə tutulacaq digər sektorlarda isə təhlükəsizlik məqsədilə İstanbul klubunun forması və ya digər atributunu daşıyan azarkeşlərin, o cümlədən “Neftçi”yə aid olmayan, digər komandalara məxsus atributları daşıyan azarkeşlərin oyunu izləməsi məhdudlaşdırılacaq. Belə hallara rast gəlindikdə həmin azarkeşlər dərhal təhlükəsizlik əməkdaşları tərəfindən stadiondan çıxarılacaq. “Neftçi” PFK olaraq azarkeşlərin təhlükəsizliyi üçün nəzərdə tutulan bu tədbirlərin anlayışla qarşılanacağına inanırıq. Qeyd edək ki, oyunun biletləri bu gün “itikcet.az” saytında satışa çıxarılacaq.xeber100.com

Cüdo üzrə məşqçilik ixtisasına qabiliyyət imtahanı keçirilib

Cüdo üzrə məşqçilik ixtisasına qabiliyyət imtahanı keçirilib. Bu barədə Azərbaycan Cüdo Federasiyasından məlumat verilib. İmtahanlarda Dövlət İmtahan Mərkəzindən, Gənclər və İdman Nazirliyindən nümayəndələr, Azərbaycan Cüdo Federasiyasının qabiliyyət imtahanlarının keçirilməsi ilə bağlı təyin etdiyi imtahan komitəsinin üzvləri iştirak ediblər. İmtahanlar zamanı abituriyentlərin təhlükəsizliyi üçün müvafiq tədbirlər görülüb, cüdo üzrə normativlərin icrası üçün zəruri avandalıqlarla və tərəf müqabili ilə təmin olunublar. Abituriyentlərin qabiliyyət bacarıqlarının obyektiv qiymətləndirilməsinin keçirilməsində şəffaflıq təmin edilib.xeber100.com

UEFA Konfrans Liqasının III təsnifat mərhələsində

UEFA Konfrans Liqasının III təsnifat mərhələsində keçiriləcək “Neftçi” – “Beşiktaş” (Türkiyə) oyununun biletləri “iticket.az”da satışa çıxarılıb. Bu barədə “Neftçi” klubu məlumat yayıb. Bildirilib ki, “Neftçi Arena”da keçiriləcək qarşılaşmanın biletlərinin qiyməti 10 (1A, 2A, 4A, 5A, 1B, 2B), 15 (3B), 20 (3A) və 30 (VİP) manat təşkil edir. Qeyd edək ki, avqustun 10-da keçiriləcək oyun saat 21:00-da start götürəcək.xeber100.com

Azərbaycan Üzgüçülük Federasiyasının məlumatına görə…

MDB Oyunlarında üzgüçülük üzrə 5 idmançımız mübarizə aparacaq. Bu barədə Azərbaycan Üzgüçülük Federasiyasından məlumat verilib. Belarus Respublikasında keçirilən MDB Oyunlarına üzgüçülük üzrə Azərbaycanın yeniyetmələrdən ibarət yığma komandasının 5 üzvü qatılıb. Federasiyanın baş katibi Fəxri Həsənov bildirib ki, üzgüçülük növü üzrə ölkəmizi Tamilla Əliyeva, Anastasiya Povorokina, Səid Həmidov, Timur Beker və Orxan Əliyev təmsil edəcəklər. Komanda yarışlarda məşqçilər Nurəli Məmmədov və Elvin Hüseynovun rəhbərliyi ilə iştirak edəcək.xeber100.com

Gəncə şəhəri MDB ölkələrinin üçüncü Oyunlarına ev sahibliyi edəcək

Gəncə şəhəri MDB ölkələrinin üçüncü Oyunlarına ev sahibliyi edəcək. Bu barədə jurnalistlərə açıqlamasında gənclər və idman nazirinin müavini Mariana Vasileva bildirib. "Azərbaycanın Bakıdan sonra ikinci ən böyük şəhəri olan Gəncədə bu məqsədlə yeni müasir kompleks tikilir. Bölgələrdə yarışların keçirilə biləcəyi fikri xoşumuza gəldi. Şurada format müzakirə olunacaq. İstənilən ölkə daha çox inkişaf etmiş idmana önəm verir. Düşünürəm ki, biz əsas Olimpiya idman növlərinə və bütün ölkələr üçün ənənəvi qeyri-olimpiya idman növlərinə diqqət yetirəcəyik”, - deyə nazir müavini qeyd edib. Qeyd edək ki, III MDB Oyunlarının 2025-ci ildə keçirilməsi planlaşdırılır.xeber100.com

Şahmat üzrə Dünya Kubokunda III mərhələnin cavab görüşləri keçirilib

Bakıda keçirilən şahmat üzrə Dünya Kubokunda III mərhələnin cavab görüşləri keçirilib. Azərbaycan şahmatçılarından Teymur Rəcəbov İspaniya təmsilçisi Hayme Santosla bərabərə qalıb. Heç bir şahmatçının üstünlüyünün olmadığı partiya heç-heçə ilə yekunlaşıb. İlk görüşdə də heç-heçə qeydə alındığından tərəflər qalibi tay-brekdə müəyyənləşdirəcək. Nicat Abasov - Aniş Giri (Niderland) görüşündə də eyni nəticə rəsmiləşib. İlk görüşdə olduğu kimi cavab oyunu da heç-heçə ilə başa çatıb. Növbəti mərhələyə vəsiqənin sahibi sabah tay-brekdə məlum olacaq. FIDE adından çıxış edən Yan Nepomnyaşi ikinci görüşdə də Rauf Məmmədovla heç-heçəyə razılaşıb. Hər iki şahmatçı sabah tay-brekdə qarşılaşacaq. 20 yaşlılar arasında dünya çempionu Abdulla Qədimbəyli ABŞ şahmatçısı Rey Robsona uduzmaqla Dünya Kubokunda mübarizəni dayandırıb. Həmyerlimiz Qədir Hüseynovla Lenyer Dominges arasında partiya heç-heçə başa çatıb. İlk görüşdə qalib gələn ABŞ şahmatçısı ümumi nəticəyə əsasən növbəti mərhələyə vəsiqə qazanıb. Günün ən uzun davam edən partiyası çinli dünya çempionu Yu Vençjunla Azərbaycan şahmatçısı Ülviyyə Fətəliyeva arasında oynanılıb. 6 saatdan artıq davam edən görüşün ortalarında Ülviyyə üstünlük əldə etməsinə baxmayaraq istədiyi nəticəni əldə etməyib. Yekunda çinli şahmatçı qələbə qazanıb. Ülviyyə Fətəliyeva isə Dünya Kubokunda çıxışını dayandırıb.xeber100.com

Güləş üzrə U-17 dünya çempionatı sona çatıb

Türkiyənin İstanbul şəhərində keçirilən güləş üzrə U-17 dünya çempionatı sona çatıb. Yarışın 6-cı günündə daha 5 çəki dərəcəsində sərbəst güləşçilər mübarizəyə qoşulub. Cəfər Cəfərov (45 kq) təsnifat mərhələsində Əbubəkr Gürə 8:9 hesabı ilə məğlub olub. Sədrəddin Həsənov (51 kq) türkiyəli Kahraman Eskiyə 4:1 hesabı ilə qalib gələrək 1/4 finala yüksəlsə də, hindistanlı Rohit Rohitə uduzub - 0:4. Rəqib finala yüksəldiyi üçün Həsənov təsəlliverici görüşdə iştirak hüququ qazanıb. Sədrəddin ötən il dünya ikincisi olmuş amerikalı Kristian Kasiltyo üzərində inamlı qələbə qazanıb - 12:6. Güləşçimiz bürünc medal uğrunda qarşılaşmada rusiyalı Usman İndirbayevlə bacarmayıb - 2:10. Camal Abbasov (60 kq) qazaxıstanlı Yerali Jenissov (6:0), amerikalı Benjamin Davino (5:0) və türkmənistanlı Bekjan Ruslanov (10:0) üzərində inamlı qələbə qazanaraq yarımfinala yüksəlib. Abbasov yarımfinalda iranlı Səcad Pirdayehlə gərgin mübarizə şəraitində keçən qarşılaşmadan məyus ayrılıb – 2:3. Camal bürünc medal uğrunda Puerto-Riko təmsilçisi Yandro Rivera ilə güləşib və 6:0 hesablı qələbə ilə dünya üçüncüsü olub. İsmayıl Rəhimli (71 kq) monqolustanlı Bilguundalay Purevdaqvaya tam üstünlüklə (10:0) qalib gəlsə də, 1/4 finalda rusiyalı İslam Kajarova 0:4 hesabı ilə məğlub olub. Səid Paşayev (92 kq) 1/8 finalda yaponiyalı Genki Hokiyə müqavimət göstərə bilməyib - 3:14.xeber100.com

Azərbaycan Premyer Liqasında ilk tura yekun vurulub

Azərbaycan Premyer Liqasında ilk tura yekun vurulub. Bağlanış oyununda “Sabah” komandası “Qəbələ”ni qəbul edib. “Bank Respublika Arena”da keçirilən matçda meydan sahibləri 5:0 hesablı qələbə qazanıb. Qolları 21-ci dəqiqədə Emmanuel Apeh, 36-cı dəqiqədə Anatoli Nuriyev, 45-ci dəqiqədə Aleksey İsayev, 56-cı dəqiqədə Coy Lens Mikels və 79-cu dəqiqədə Tellur Mütəllimov vurublar. Bu qələbədən sonra 3 xalı olan “Sabah” vurulan qolların sayına görə liderliyə yüksəlib. Xalı olmayan “Qəbələ” isə buraxılan topların sayına görə sonuncu pillədə yer alıb. Qeyd edək ki, turun əvvəlki oyunlarında “Turan Tovuz” “Araz-Naxçıvan”ı 3:0, “Sumqayıt” “Səbail”i 4:1, “Zirə” “Qarabağ”ı, “Kəpəz” isə “Neftçi”ni 1:0 hesabı ilə məğlub edib.xeber100.com

Mülayim şimal-qərb küləyi əsəcək, gündüz şimal-şərq küləyi ilə əvəzlənəcək

Azərbaycanda avqustun 6-na gözlənilən hava proqnozu açıqlanıb. Ekologiya və Təbii Sərvətlər Nazirliyinin Milli Hidrometeorologiya Xidmətindən verilən məlumata görə, Bakıda və Abşeron yarımadasında havanın dəyişkən buludlu olacağı, əsasən yağmursuz keçəcəyi gözlənilir. Mülayim şimal-qərb küləyi əsəcək, gündüz şimal-şərq küləyi ilə əvəzlənəcək. Havanın temperaturu gecə 22-27°, gündüz 31-36° isti olacaq. Abşeron çimərliklərində mülayim şimal-qərb küləyi əsəcək, gündüz şimal-şərq küləyi ilə əvəzlənəcək. Dəniz suyunun temperaturunun şimal çimərliklərində - Sumqayıt, Novxanı, Pirşağı, Nardaran, Bilgəh, Zuğulbada 24-25°, cənub çimərliklərində - Türkan, Hövsan, Sahil, Şıxda 25-26° isti olacağı proqnozlaşdırılır. Naxçıvan şəhərində, Culfa, Ordubad, Sədərək, Şahbuz və Şərur rayonlarında hava əsasən yağmursuz keçəcək. Lakin gündüz dağlıq ərazilərdə qısamüddətli yağış yağacağı, şimşək çaxacağı ehtimalı var. Mülayim şərq küləyi əsəcək. Havanın temperaturu gecə 19-24°, gündüz 33-38° isti olacaq. Xankəndi şəhərində, Şuşa, Xocalı, Xocavənd, Ağdam, Daşkəsən, Gədəbəy rayonlarında hava əsasən yağmursuz keçəcək. Lakin gündüz dağlıq ərazilərdə qısamüddətli yağış yağacağı, şimşək çaxacağı ehtimalı var. Gecə və səhər bəzi rayonlarda duman olacaq. Mülayim şərq küləyi əsəcək. Havanın temperaturunun gecə 11-16°, gündüz 18-23°, bəzi yerlərdə 26° isti olacağı proqnozlaşdırılır. Şərqi Zəngəzur: Cəbrayıl, Kəlbəcər, Qubadlı, Laçın, Zəngilan rayonlarında hava əsasən yağmursuz keçəcək. Lakin gündüz bəzi dağlıq ərazilərdə qısamüddətli yağış yağacağı, şimşək çaxacağı gözlənilir. Gecə və səhər bəzi rayonlarda duman olacaq. Mülayim şərq küləyi əsəcək. Havanın temperaturunun gecə 10-15°, gündüz 18-23°, bəzi yerlərdə 25-28° isti olacağı bildirilir. Gəncə şəhərində, Qazax, Goranboy, Tərtər, Füzuli rayonlarında hava əsasən yağmursuz keçəcək. Lakin gündüz bəzi dağlıq ərazilərdə şimşək çaxacağı, qısamüddətli yağış yağacağı gözlənilir. Gecə və səhər bəzi rayonlarda duman olacaq. Mülayim şərq küləyi əsəcək. Havanın temperaturunun gecə 19-24°, gündüz 30-35° isti olacağı ehtimal edilir. Mingəçevir şəhərində, Balakən, Zaqatala, Qax, Şəki, Oğuz, Qəbələ, İsmayıllı, Ağsu, Ağdaş, Göyçay, Şamaxı, Siyəzən, Şabran, Xızı, Quba, Xaçmaz, Qusar rayonlarında hava əsasən yağmursuz keçəcək. Lakin gündüz bəzi dağlıq ərazilərdə qısamüddətli yağış yağacağı gözlənilir. Ayrı-ayrı yerlərdə şimşək çaxacağı, dolu düşəcəyi ehtimalı var. Gecə və səhər bəzi rayonlarda duman olacaq. Mülayim şərq küləyi əsəcək. Havanın temperaturunun gecə 18-23°, gündüz 29-34° isti, dağlarda gecə 14-19°, gündüz 23-28° isti olacağı ehtimalı var. Şirvan şəhərində, Yevlax, Ağdaş, Kürdəmir, İmişli, Ağcabədi, Beyləqan, Sabirabad, Saatlı, Hacıqabul, Zərdab, Salyan, Neftçala rayonlarında hava əsasən yağmursuz keçəcək. Şərq küləyi əsəcək. Havanın temperaturunun gecə 20-25°, gündüz 31-36° isti olacağı gözlənilir. Masallı, Yardımlı, Lerik, Lənkəran, Astara, Biləsuvar, Cəlilabad rayonlarında hava əsasən yağmursuz keçəcək. Gecə və səhər bəzi rayonlarda duman olacaq. Şərq küləyi əsəcək. Havanın temperaturu gecə 20-24°, gündüz 30-35° isti, dağlarda gecə 19-21°, gündüz 23-28° isti olacaq.xeber100.com