“Rio-2016”nın rəsmi saytının məlumatına əsasən…

Braziliyanın məşhur müğənnisi Gilberto Gil “Rio-2016” Yay Olimpiya Oyunlarının açılış mərasimində iştirak edəcək. “Rio-2016”nın rəsmi saytı xəbər verir ki, gitara ifaçısı olan G.Gil bir sıra məşhur mahnıların sözlərinin müəllifidir. Onun bəstələdiyi mahnı “Rio-2016”nın açılış videosunda səslənəcək. Maraqlı tarixçəsi olan mahnını müğənni 1969-cu ildə bəstələyib. Mübarizə ruhunda yazılan mahnıda həmin dövrdə Braziliyadakı hərbi diktatura rejimi tənqid olunur. Sonradan siyasətlə də məşğul olan G.Gil 2003-2008-ci illərdə Braziliyanın mədəniyyət naziri vəzifəsində çalışıb.xeber100.com

Futbol üzrə yeni mövsüm başlayır

Bu gün futbol üzrə Azərbaycan çempionatında 2016/2017-ci il mövsümünə start veriləcək. Azərtac xəbər verir ki, açılış turunun ilk günündə iki qarşılaşma oynanılacaq. Yubiley – 25-ci birinciliyin ilk oyunu “AZAL Arena”da keçiriləcək. Meydan sahibi AZAL-ın qonağı “Neftçi” olacaq. Ötən mövsüm avrokuboklar uğrunda sonadək mübarizə aparan rəqiblər bu dəfə də kimin güclü olmasını aydınlaşdıracaqlar. Günün ikinci qarşılaşması isə Zirə İdman Kompleksinin stadionunda keçiriləcək. Ötən il debüt mövsümündə “gümüş”ə yiyələnən “Zirə” “Sumqayıt”ı qonaq edəcək. Qitə miqyaslı turnirlərdə çıxış etməyən komandalar mövsümə uğurlu start vermək istəyirlər. Bundan əlavə hər iki klubun heyətində kifayət qədər dəyişiklik olub və bu matçı həm də yenilənmiş heyətə bir baxış kimi də xarakterizə etmək olar. Adil Şükürovun komandası ötənilki ikinciliyin təsadüfi olmadığını sübut etməli, sumqayıtlılar isə səfərdən xalla dönərək Premyer Liqanın yeni mövsümünə qələbə ilə başlamaq arzusundadırlar.xeber100.com

Küveyt yığması Rio-de-Janeyro Yay Olimpiya Oyunlarından uzaqlaşdırıldı

Küveyt yığması 2016-cı il Rio-de-Janeyro Yay Olimpiya Oyunlarında iştirak etməyəcək.  “New Straits Times”ə istinadən verdiyi məlumata görə, İsveçrənin Vaadt kantonunun (vilayəti) məhkəməsi Küveytin Beynəlxalq Olimpiya Komitəsinə (İOC) qarşı iddiasını təmin etməyib. İOC ərəb ölkəsini idmana siyasi müdaxilə səbəbindən olimpiadadan kənarlaşdırıb. İdmançılar Küveytin yox, beynəlxalq idman federasiyaları icazə verəcəkləri təqdirdə, neytral bayraq altında çıxış edə bilərlər.Ərəblər İOC-dan komandanın olimpiadaya bərpası və mənəvi ziyanın qarşılığı olaraq, 886 milyon dollar ödəməsini tələb ediblər. Lakin məhkəmə buna rədd cavabı verib. İndi Küveytin 30 gün ərzində daha yuxarı instansiyaya şikayət etmə hüququ var. Qeyd edək ki, “Rio-2016” avqustun 5-də start götürəcək.xeber100.com

Yay Olimpiya Oyunlarının proqramına 5 yeni idman növü daxil edilib

Beynəlxalq Olimpiya Komitəsi (BOK) 2020-ci ildə Tokioda keçiriləcək Yay Olimpiya Oyunlarının proqramına 5 yeni idman növü daxil edib. Bu barədə BOK-un Rio-de-Janeyroda keçirilən 129-cu sessiyasında qərar qəbul olunub. Bunlar beysbol/softbol, karate, skeytbordinq, qayalara dırmanma və sörfinq idman növləridir.xeber100.com

Güləşçilərin yeni reytinq siyahısı açıqlanıb

Dünya Güləş Birliyi “Rio-2016” Yay Olimpiya Oyunları öncəsi güləşçilərin yeni reytinq siyahısını açıqlayıb. Azərtac xəbər verir ki, sərbəst güləşçilərdən Hacı Əliyev, qadınlardan Mariya Stadnik, yunan-Roma güləşçilərindən isə Rəsul Çunayev reytinq siyahısında birinciliyini qoruyub. İlk onluqda yer alan sərbəst güləşçilərdən Xetaq Qazyumov üçüncü, Toğrul Əsgərov, Aleksandr Qostiyev və Cəmaləddin Məhəmmədov beşinci, Cəbrayıl Həsənov, Nurməhəmməd Hacıyev və Hacımurad Ömərov səkkizinci sırada qərarlaşıblar. Qadın güləşçilərin onluğunda Tatyana Omelçenko altıncı, Nataliya Sinişin səkkizinci, Yuliya Ratkeviç doqquzuncu yerdədir. Yunan-Roma güləşçilərinin reytinq siyahısında isə onluğa daxil olanlardan Rövşən Bayramov ikinci, Rafiq Hüseynov dördüncü və Saman Təhmasibi beşinci sırada qərarlaşıblar. Qeyd edək ki, Braziliyanın Rio-de Janeyro şəhərində keçiriləcək XXXI Yay Olimpiya Oyunlarında güləş yarışları avqustun 14-21-də baş tutacaq. Güləş yığmamız Olimpiadada 14 (sərbəst 6, yunan-Roma 5, qadın 3) idmançı ilə təmsil olunacaq.xeber100.com

Avropa Liqasının seçmə mərhələsi üçün heyət müəyyənləşib

Çimərlik futbolu üzrə Azərbaycan milli komandası avqustun 9-dan 15-dək Macarıstanın Siofok şəhərində keçiriləcək Avropa Liqasının seçmə mərhələsində çıxış edəcək. Azərtac xəbər verir ki, millimizin heyətində Vaqif Şirinbəyov, Elçin Qasımov, Renat Sultanov, Elvin Quliyev, Amid Nəzərov, Orxan Məmmədov, İlkin Hacıyev, Asif Zeynalov, Ramil Əliyev, Sabir Allahquliyev, Əbdül Əliyev və Hikmət Bağırov yer alıblar.xeber100.com

Şahmatçılar arasında yoldaşlıq oyunu keçiriləcək

Bakı Şahmat Olimpiadasına hazırlaşan əsas yığma komandalarımız yoldaşlıq görüşündə iştirak edəcəklər. Bakı Şahmat Olimpiadasının mətbuat xidmətindən Azərtac-a bildiriblər ki, artıq bununla bağlı Azərbaycan və Gürcüstan Şahmat federasiyaları arasında yekun razılıq əldə olunub. Kişi və qadın şahmatçılardan ibarət Azərbaycan millisi avqustun 9-da baş tutacaq son hazırlıq toplanışında əvvəlcədən planlaşdırıldığı kimi həm də yoldaşlıq görüşü keçirəcək. Mötəbər yarışda iştirak edəcək bütün komandalarımız (3 kişi və 3 qadın komandamız) avqustda təlim-məşq toplanışı keçirəcəklər.xeber100.com

“Qarabağ” futbol klubu “Viktoriya Plzen” komandası ilə qarşılaşacaq

Futbol üzrə UEFA Çempionlar Liqası turnirinin üçüncü təsnifat mərhələsinin cavab oyunları çərçivəsində Ağdamın “Qarabağ” klubu bu gün Çexiyanın “Viktoriya Plzen” komandası ilə qarşılaşacaq. Azərtac xəbər verir ki, Tofiq Bəhramov adına Respublika stadionunda keçiriləcək qarşılaşmanı türkiyəli hakimlər briqadası idarə edəcək. Görüşün baş hakimi Hüseyin Göçek olacaq. Ona həmyerliləri Mustafa Eyisoy və Kemal Yılmaz kömək edəcəklər. Dördüncü hakim funksiyasını Barış Şimşek yerinə yetirəcək. Görüşün UEFA nümayəndəsi Andreas Akkelides (Kipr), hakim-inspektoru isə İqor Satçi (Makedoniya) olacaq. Oyun saat 20:30-da başlayacaq. Qeyd edək ki, komandalar arasında bir həftə əvvəl Çexiyada təşkil olunan ilk oyunda hesab açılmamışdı.xeber100.com

“Neftçi” futbol klubu müqavilə imzalayıb

Bakının “Neftçi” futbol klubu rumıniyalı hücumçu Katalin Tira ilə müqavilə imzalayıb. Klubdan Azərtac-a bildiriblər ki, gənc hücumçu növbəti 1 il ərzində Bakı təmsilçisinin formasını geyinəcək. 2009-2010-cü illərdə İtaliyanın “Udineze”, 2010-2013-cü illərdə isə "Latsio” klublarının formasını geyinmiş hücumçu, 2013-cü ildə Rumıniyanın 21 yaşadək futbolçulardan ibarət yığma komandasına dəvət alıb. 2013/2014-cü illər mövsümünü Hollandiyanın "Den Haaq” klubunda keçirmiş Tira daha sonra vətəninə qayıdıb. 2014-2016-cı illərdə Rumıniyanın "Braşov” və "Konkordia” klublarında çıxış etmiş gənc hücumçunun son klubu Buxarest "Rapid”i olub.xeber100.com

UEFA Çempionlar Liqasının üçüncü təsnifat mərhələsi çərçivəsində…

Futbol üzrə UEFA Çempionlar Liqasının üçüncü təsnifat mərhələsi çərçivəsində “Qarabağ” klubu ilə Çexiya çempionu “Viktoriya” arasında keçiriləcək cavab oyununa bilet satışı davam edir. Azərtac xəbər verir ki, artıq qarşılaşmaya 15 mindən çox bilet satılıb. Matçın sabah keçiriləcəyini nəzərə alsaq, bu gün və matç günündə daha çox bilet alışı gözlənilir. Tofiq Bəhramov adına Respublika Stadionunda keçiriləcək qarşılaşma saat 20:30-da başlayacaq. Qeyd edək ki, Çexiyada keçirilmiş ilk oyunda qolsuz bərabərlik qeydə alınıb.xeber100.com