Azərbaycan Çinlə əməkdaşlıqda maraqlıdır

Çin pambıq istehsalı sahəsində Azərbaycanla əməkdaşlıq edəcək. "APA-Economics" xəbər verir ki, bu barədə Çin mətbuatı yazır. Bildirilir ki, Çin tərəfi Azərbaycanda müasir texnoloji avadanlıqlara əsaslanan istehsalat sahəsi yaratmaq niyyətindədir: "Azərbaycan hökuməti pambıqçılığın inkişafına təkan vermək niyyətindədir. Vaxtilə Azərbaycan SSRİ-nin aparıcı pambıq istehsalçısı olub. Lakin son illər ərzində Azərbaycanda pambıq istehsalı dəfələrlə azalıb. 2015-ci ildə Azərbaycanda 35 min ton pambıq yığılıb ki, bu 2014-cü illə müqayisədə 14,5% azdır. Çin isə dünyanın ən iri pambıq istehsalçısıdır. Çinin 24 əyalətində 300 milyon insan pambıq istehsalı ilə məşğuldur. Bu baxımdan Azərbaycan Çinlə əməkdaşlıqda maraqlıdır". Xəbər100

Dollar dəyişən bankomat

Kapital Bank 24/7 rejimində xidmət göstərən elektron xidmət mərkəzini istifadəyə verib. Müştərilərin rahatlığını təmin etmək məqsədilə yaradılan mərkəz paytaxtın Nərimanov rayonunda Ağa Nemətulla küçəsi 54 ünvanında yerləşir. Həftənin 7 günü, günün 24 saatı ərzində xidmət göstərən elektron xidmət mərkəzində maddi vəsaitin karta mədaxil olunması (cash in), vəsaitin nağdlaşdırılması üzrə valyuta əməliyyatları aparmaq mümkündür. “Cash in” əməliyyatı üzrə 1 dəfəyə karta maksimum 50 ədəd əskinas mədaxil etmək mümkündür. Vəsait hesabın açıldığı valyuta ilə karta mədaxil edildikdə heç bir komissiya haqqı tutulmur. Digər hallarda müvafiq konvertasiya faizləri tətbiq edilir. Tariflərlə buradan tanış olmaq olar. Valyuta mübadiləsi bankomatlarında AZN,USD,EUR valyutaları qəbul edilir, bunun müqabilində isə AZN,USD,EUR valyutasında əskinasları almaq mümkündür. Qeyd edilən ünvanda həmçinin ödəniş terminalları da quraşdırılıb. Ödəniş terminalları vasitəsilə müştərilər kredit və kommunal xidmət ödənişlərini də həyata keçirə bilərlər. Mərkəzdə, həmçinin Yol Hərəkəti Qaydalarının (YHQ) pozulmasına görə cərimələrin ödənişini etmək mümkündür. Qeyd edək ki, bundan əvvəl 24/7 elektron xidmət mərkəzi Bakı şəhəri, Azadlıq prospekti 16 ünvanında istifadəyə verilib. Bakı şəhərində 2 saylı “Səbail”, 2 saylı “Nizami” və “Mərkəz” filiallarının daxilində isə 24 saat xidmət göstərən ödəniş terminalları və bankomatlar müştərilərin ixtiyarındadır. Azərbaycanda ən böyük filial şəbəkəsinə malik olan Kapital Bank, 89 filialı və 5 şöbəsi ilə hər zaman müştərilərin xidmətindədir. Kapital Bankın müştəriləri kredit ödənişlərini “e-pul.az”, “kassam.az”, “hesab.az” portalları ilə yanaşı “eManat” və “MilliÖn” terminallarında, habelə Kapital Bankın filiallarında və pay.kapitalbank.az saytında həyata keçirə bilərlər. Bankın məhsul və xidmətləri barədə daha ətraflı məlumat almaq üçün www.kapitalbank.az saytına, 196 Sorğu Mərkəzinə və ya Bankın müxtəlif sosial şəbəkələrdə olan səhifələrinə müraciət edə bilərsiniz.xəbər100

31 vaqon Türkmənbaşı limanına yola salınacaq

Ukrayna Transxəzər Beynəlxalq Nəqliyyat Marşrutuna qoşulduqdan sonra bu ölkədən gələn ikinci yük qatarı bu gün səhər Bakı Beynəlxalq Dəniz Ticarət Limanına çatıb. Azərbaycan Xəzər Dəniz Gəmiçiliyindən AZƏRTAC-a bildirilib ki, ərzaq məhsulları və metal məmulatlarla yüklənmiş 32 vaqondan ibarət qatar fevralın 7-də bərə ilə İliçevck (Ukrayna) limanından çıxaraq Ukrayna-Qara dəniz-Gürcüstan-Azərbaycan-Xəzər dənizi-Mərkəzi Asiya marşrutu ilə hərəkət edir. Qatarın 31 vaqonu bu gün Azərbaycan Xəzər Dəniz Gəmiçiliyinin “Qarabağ” bərəsi ilə Türkmənbaşı limanına yola salınacaq. Daha bir vaqon isə Qazaxıstana ünvanlandığına görə Aktau limanına gedəcək ilk bərə ilə göndəriləcək. Xatırladaq ki, birinci sınaq qatarı yanvarın 15-də İliçevskdən çıxmış, yanvarın 22-də Xəzər Dəniz Gəmiçiliyinin “Azərbaycan” bərəsi ilə yola salınmış və yanvarın 23-də Aktauya çatdırılmışdı. Bu zaman heç bir ləngiməyə yol verilməmişdi. Daha sonra Qazaxıstan ərazisi ilə hərəkət edən qatar yanvarın 31-də Çində səfərini başa vurmuşdu. Ukrayna hökuməti yüklərin Transxəzər Beynəlxalq Nəqliyyat Marşrutu ilə hərəkətini daha da sürətləndirmək məqsədi ilə Mərkəzi Asiya ölkələri ilə müvafiq danışıqlar aparıb və ikinci qatarın Çinə 10 günə çatdırılmasını qarşıya məqsəd qoyub.

Əməkdaşlıq perspektivləri

Bu gün Bakıda Azərbaycan Sahibkarlar Təşkilatları Milli Konfederasiyası (ASK) və Hindistanın Azərbaycandakı səfirliyinin birgə təşkilatçılığı “Make in İndia” adlı tədbir keçirilib. "Report" xəbər verir ki, tədbirdə rəsmi şəxslərlə yanaşı, hər iki ölkədə fəaliyyət göstərən 70-dən çox iş adamı və KİV nümayəndələri iştirak ediblər. Tədbirdə hər iki ölkədə sahibkarlığın mövcud vəziyyəti, investisiya, tərəfdaşlıq imkanları barədə təqdimatlar dinlənilib, gələcək əməkdaşlığa dair müzakirələr aparılıb. Tədbiri giriş sözü ilə açan ASK-nın prezidenti Məmməd Musayev bildirib ki, hər iki ölkə arasında iqtisadiyyatın müxtəlif sahələrində əməkdaşlıq imkanları böyükdür. Onun sözlərinə görə, hazırda Azərbaycanda sahibkarlığın inkişafı üçün əlverişli şərait yaradılıb. Hindistanın Azərbaycandakı səfiri Sanjay Rana isə ölkəsi haqqında məlumat verərək deyib ki, ölkəsində 100-ə qədər smart şəhərlərin salınması qərara alınıb və bu da ölkəyə sərmayə qoyuluşu imkanlarını artırıb. S.Rana bildirib ki, o, bu həftənin əvvəlində Lənkəran və Astarada olub və həmin şəhərlərlə Hindistanın şəhərləri arasında əməkdaşlıq perspektivləri araşdırılır.

İqtisadi əlaqələr

Hindistan Azərbaycanla mal dövriyyəsini artırmaqda maraqlıdır. Bu barədə Hindistanın Azərbaycandakı səfiri Sancay Rana deyib. Səfirin sözlərinə görə, ötən il ölkələr arasında mal dövriyyəsi 800 milyon dollar təşkil edib və mən hesab edirəm ki, bu, bizim ölkələr üçün böyük göstərici deyil. xəbər100.com  

Hökumətlərarası Komissiyasının iclası

Londonda Böyük Britaniya-Azərbaycan iqtisadi əməkdaşlıq üzrə Hökumətlərarası Komissiyası çərçivəsində fəaliyyət göstərən Ticarət və İnvestisiyalar, Maliyyə və Peşəkar Xidmətlər üzrə birgə işçi qruplarının iclası və Təhsil Forumu keçirilib. İqtisadiyyat Nazirliyinin verdiyi xəbərə görə, iclaslarda Azərbaycan və B.Britaniya arasında iqtisadi əlaqələr və müvafiq sahələrdə əməkdaşlıq perspektivləri, eləcə də Komissiyanın iclasına hazırlıq məsələləri müzakirə edilib. Bu gün isə Neft və Qaz üzrə işçi qrupunun iclası və B.Britaniya-Azərbaycan iqtisadi əməkdaşlıq üzrə Hökumətlərarası Komissiyasının ilk iclası keçiriləcək. Komissiyanın iclasında iştirak etmək məqsədilə İqtisadiyyat naziri, komissiyanın həmsədri Şahin Mustafayevin rəhbərliyi ilə rəsmi şəxslərdən və iş adamlarından ibarət nümayəndə heyəti Londonda səfərdədir. Komissiyanın B.Britaniya tərəfindən həmsədri isə bu ölkənin ticarət və investisiyalar üzrə dövlət naziri Fransis Moddur.      

BP-nin qərarı açıqlandı

"BP-Azerbaijan" şirkəti 2016-cı ildə Azərbaycanın "Şahdəniz" yatağında qaz hasilatının səviyyəsini ötən ilin səviyyəsində saxlamağı planlaşdırır. Bunu şirkətin rəhbəri Qordon Birrell "Natural Gas Europe"yə müsahibəsində deyib. Onun sözlərinə görə, ötən il "Şahdəniz"dən təqribən 10 milyard kubmetr qaz və 2,3 milyon ton kondensat hasil edilib: "Gözləyirik ki, 2016-cı ildə hasilat belə yüksək səviyyədə qalacaq". Qeyd edək ki, "Şahdəniz" yatağının qaz ehtiyatları 1,2 trilyon kubmetr həcmində qiymətləndirilir.  

30 illik lisenziya

  "SOCAR Turkey LNG Satıs AS" Türkiyədə maye təbii qazın satışı üzrə 30 il müddətinə lisenziya alıb. Bu barədə Trend Türkiyənin Enerji Bazarı Tənzimləmə Qurumuna (EPDK) istinadən məlumat verir. Lisenziya şirkətə 28 yanvar 2016-cı il tarixində verilib. Qeyd edək ki, EPDK ötən ilin dekabrında "SOCAR Turkey LNG Satis AS"-ın maye təbii qazın idxalı üçün lisenziyasını ləğv etmişdi. Xatırladaq ki, lisenziya 2014-cü il martında 30 il müddətinə verilmişdi.  

Protokol imzalanacaq

  Kırşehir vilayətinin rəhbərliyi Trans-Anadolu Boru Kəmərinin (TANAP) çəkilməsi ilə məşğul olan "TANAP Doğalgaz İletim A.Ş." şirkəti ilə protokolun imzalanmasına dair qərar qəbul edib. Bu barədə Kırşehir vilayətinin ümumi məclisinin rəhbəri Şuayip Soysal yazılı açıqlama yayıb. Ş.Soysalın sözlərinə görə, protokol həmin vilayətdəki infrastrukturun bərpası ilə bağlı məsələləri əhatə edir: "Protokol çərçivəsində "TANAP Doğalgaz İletim A.Ş." vilayətin sərhədləri daxilində TANAP-ın çəkilməsi zamanı dağıdılan yolların, su və kanalizasiya xətlərini bərpa edərək yenidən əvvəlki vəziyyətə qaytaracaq".  

Qızıl bahalaşdı?

Fevralın 8-də Amerika fond bazarında Dow Jones indeksi 1,10% ucuzlaşaraq 16 027,05 bənd, S&P 500 1,42% azalaraq 1 853,44 bənd, Nasdaq isə 1,82% geriləyərək 4 283,75 bənd təşkil edib. Dünya mətbuatının yaydığı məlumata görə,  Avropa fond bazarlarında FTSE 100 indeksi 2,71% ucuzlaşaraq 5 689,36 bənd, Fransa CAC-40-ı 3,20% azalaraq 4 066,31 bənd, Almaniya DAX-ı isə 3,30% geriləyərək 8 979,36 bənd olub. COMEX-də qızılın bir unsiyasının qiyməti 0,32%, yaxud 3,83 dollar artaraq 1 193, 06 dollar olub. Dünya bazarında avronun dollara qarşı məzənnəsi isə 1,1209 (+0,14%) təşkil edib.