Art-House Film Festivalı davam edir

“Azərbaycanfilm”in istehsalı olan  “Çölçü” filmi (rej.Şamil Əliyev) Bloup Film Fest Çikaqo Beynəlxalq Art-House Film Festivalının (CHICAGO  INTERNATIONAL  ART-HOUSE  FILM FESTIVAL  BLOWUP  FILM  FEST )  müsabiqəsini uğurla adlayaraq finala çıxıb. Qeyd edək ki, “Çölçü” bu mərhələdə iki mükafat uğrunda namizəd kimi mübarizəyə qatılıb. Ən yaxşı bədii film – Antonioni mükafatı Ən yaxşı rejisor – Tarkovski mükafatı Xatırladaq ki, mükafatlandırma mərasimi 2017-ci il noyabrın 12-də keçiriləcək.      

Beynəlxalq Film Festivalının təşəbbüs qrupunun iclası keçirilib

“Azərbaycanfilm” kinostudiyasında Bakı Beynəlxalq Film Festivalının təşəbbüs qrupunun iclası keçirilib.Azərtac xəbər verir ki, kinostudiyanın direktoru Müşfiq Hətəmovun sədrliyi ilə keçirilən iclasda Azərbaycan Respublikası Kinematoqrafçılar İttifaqının birinci katibi C.Quliyev, kinoşünas Ayaz Salayev və b. iştirak ediblər.Festivalın nizamnaməsinin hazırlanması ilə bağlı işlərin aparıldığını deyən M.Hətəmov, maliyyə, təşkilati və informasiya dəstəyi verən qurumlarla danışıqların başlanıldığını qeyd edib: “Hazırda Azərbaycan filmləri artıq beynəlxalq festivallarda uğurla nümayiş olunur, mükafatlar qazanır. Bakı Beynəlxalq Film Festivalı Azərbaycan filmlərinin dünya kino mühitinə daha ciddi inteqrasiya olunmasında vacib addımdır”.Sonra beynəlxalq tədbirin təşkili ilə bağlı fikir mübadiləsi aparılıb, təkliflər səsləndirilib.xeber100.com  

“Dünya kino həftəsi” festivalı keçiriləcək

Noyabrın 1-dən 8-dək Seulda Koreya Respublikası Film Arxivinin təşkilatçılığı və Koreya Mədəniyyət, İdman və Turizm Nazirliyinin dəstəyi ilə “Dünya kino həftəsi” festivalı keçiriləcək. Gələn il PyonqÇanq şəhərində keçiriləcək Qış Olimpiya Oyunlarına həsr olunan festivalın məqsədi iştirakçı ölkələrin mədəniyyətlərinin Koreya ictimaiyyətinə tanıdılmasıdır.Ölkəmizin Koreya Respublikasındakı səfirliyindən Azərtac-a bildiriblər ki, festivalda Azərbaycan, Almaniya, Avstriya, Rusiya, Fransa, Ukrayna, Özbəkistan da daxil olmaqla 25 ölkə təmsil olunacaq.“Dünya kino həftəsi”ndə SEBA Azərbaycan – Koreya Mədəniyyət Mübadiləsi Assosiasiyası tərəfindən Koreya dilinə subtitrlə tərcümə etdirilmiş “Axınla aşağı” (rejissor Asif Rüstəmov) filmi nümayiş olunacaq.Qeyd edək ki, Koreyada “Dünya kino həftəsi” ilk dəfə ötən il 9 ölkənin iştirakı ilə keçirilib. Azərbaycan sözügedən festivalda ilk dəfə iştirak edəcək.xeber100.com

“CinemaPlus Azerbaijan” kinoteatrında Film Festivalının açılışı olub

Oktyabrın 1-də “CinemaPlus Azerbaijan” kinoteatrında ABŞ-ın ölkəmizdəki səfirliyi, “Desperado” musiqi məktəbi və “Azerbaijan Alumni Association”un dəstəyi ilə 4-cü Azərbaycan Gənclər Film Festivalının açılışı olub.Azərtac xəbər verir ki, ABŞ-ın Azərbaycandakı səfirliyinin mədəniyyət məsələləri üzrə müşaviri Haydi Smit çıxış edərək əsas məqsədlərinin iki ölkə arasında qarşılıqlı anlaşmanın və mədəniyyətlərarası dialoqun inkişafına töhfə verməkdən ibarət olduğunu bildirib. O deyib ki, builki film festivalı da bu istiqamətdə atılan addımlardan biridir və ölkəsi belə layihələrin həyata keçirilməsindən qürur duyur.Azərbaycanlı gənc rejissorların çox istedadlı olduğunu vurğulayan festivalın direktoru Mayk Reyborn onların gələcəkdə amerikalı rejissorlarla birgə beynəlxalq festivallarda uğurlar əldə edəcəklərinə əminliyini ifadə edib. O bildirib ki, builki festivalda 40-dan çox gənc azərbaycanlı rejissorun ekran işi nümayiş olunacaq və sonda üç qalib filminin müəllifi mükafatlandırılacaq.Kann Film Festivalının iştirakçısı, rejissor Pablo Mahave isə hazırda informasiya texnologiyaların inkişafı ilə əlaqədar telefon vasitəsilə də yüksək keyfiyyətli filmlərin çəkilişinin mümkünlüyünü qeyd edib. Diqqətə çatdırıb ki, bu yaxınlarda “iPhone”la çəkilən film beynəlxalq film festivalının qalibi olub.Daha sonra qaçqın və məcburi köçkünlərə həsr olunmuş qısametrajlı filmlər nümayiş olunub.Qeyd edək ki, festivalın builki mövzusu “Öz hekayəni danış”dır.Oktyabrın 3-dək davam edəcək festivalda Azərbaycan, Amerika və Avropa istehsalı olan ekran əsərləri nümayiş etdiriləcək.Festivalda bölgələrdən - Gəncə, İmişli, Quba, Xaçmaz, Balakən və Zaqataladan olan gənc rejissorların filmləri də birincilik uğrunda mübarizə aparacaq.Festival çərçivəsində ustad dərslərinin təşkili də nəzərdə tutulur.xeber100.com

“Çölçü” Kəlküttə Beynəlxalq Film Festivalında

“Azərbaycanfilm”in istehsalı “Çölçü” Kəlküttə Beynəlxalq Cult Filmləri Festivalının Golden Fox Awards (Calcutta International Cult Film Festival) mükafatının nominantı elan olunduğu üçün filmin rejissoru Şamil Əliyev 2017-ci il dekabrın 5-6-da adı çəkilən mükafatın Hindistanın Kəlküttə şəhərində keçiriləcək təqdim etmə mərasiminin QALA gecəsinə rəsmi dəvət alıb.Xatırladaq ki, “Çölçü” bədii filmi indiyədək 32 Beynəlxalq kinofestivalında və forumlarda iştirak etmiş müxtəlif mükafatlara, o cümlədən diplomlara layiq görülüb.xeber100.com

“Future Shorts” qısametrajlı film festivalı keçiriləcək

Sentyabrın 20-dən Yay qalereyasında açıq səma altında “Future Shorts” qısametrajlı film festivalı başlanır.Azərtac xəbər verir ki, iki gün davam edəcək festivalda 8 filmin nümayişi nəzərdə tutulur. Filmlər rus dilində subtitrlər vasitəsilə təqdim olunacaq.“Future Shorts” festivalı 40 ölkə, 100 şəhər, 6 qitəni əhatə edərək bir il ərzində bütün dünya üzrə 1400 baxış təklif edir. On iki ildir keçirilən festival Yaponiyadan tutmuş Braziliyaya qədər böyük ərazidə kino pərəstişkarlarının rəğbətini qazanıb. Festival peşəkarlara və debütantlara beynəlxalq kinematoqrafiya birliyinin bir hissəsinə çevrilməyə şərait yaradır. Qeyd edək ki, giriş dəvətnamə ilədir.xeber100.com

XIII Beynəlxalq Müsəlman Kino Festivalı davam edir

Kazanda XIII Beynəlxalq Müsəlman Kino Festivalı davam edir. Müsabiqə proqramında Azərbaycan - Teymur Daiminin “Bu sevgidir” filmi “qısametrajlı sənədli film”, Dariuş Nəcəfin “Səs” filmi “qısametrajlı oyun filmi” nominasiyasında təqdim edilib. Natiq Axundovun “Ramazan payı” filmi müsabiqədənkənar təqdim olunub.Azərtac festivalın saytına istinadla xəbər verir ki, bu il seçim komissiyasına 61 ölkədən 782 müraciət daxil olub. Müsabiqə proqramına 27 ölkədən 60 film seçilib. Bu, Azərbaycan, Albaniya, Əfqanıstan, Banqladeş, Belçika, Macarıstan, Danimarka, Misir, Hindistan, İran, İtaliya, Qazaxıstan, Kanada, Qətər, Qırğızıstan, Malta, Mərakeş, Nepal, Niger, Rusiya, ABŞ, Tacikistan, Türkiyə, Özbəkistan, Fransa, İsveç və Estoniyadır.Sentyabrın 11-də M.Cəlil adına Opera və Balet Teatrında keçiriləcək bağlanış mərasimində laureatların adları açıqlanacaq. Nominasiyalar üzrə mükafatlarla yanaşı, xüsusi mükafatlar da olacaq.Festivalın münsiflər heyətinə Rusiyanın Xalq Artisti, rejissor Nikolay Dostal sədrlik edir. Münsiflər heyətində Azərbaycandan Ülvi Mehdi təmsil olunur. O, ən yaxşı sənədli filmi (qısa və tammetrajlı) seçəcək.xeber100.com

XIII Kazan Beynəlxalq Müsəlman Kino Festivalı başlayır

Bu gün Rusiya Federasiyası Tatarıstan Respublikasının paytaxtında XIII Kazan Beynəlxalq Müsəlman Kino Festivalı başlayır.Azərtac festivalın saytına istinadla xəbər verir ki, sentyabrın 11-dək davam edəcək festivalın ideyası sülhməramlılıq, dini tolerantlıq və dözümlülükdür.Ölkəmizin də təmsil olunduğu müsabiqənin şort-listinə 27 ölkədən 60 film daxildir. Müsabiqə proqramı tammetrajlı və qısametrajlı (bədii və sənədli) filmlərə bölünür.Azərbaycan film festivalına İranla birgə istehsalı olan "Səs" qısametrajlı bədii filmini təqdim edəcək. Azərbaycan dilində olan filmin çəkilişləri İranda aparılıb.xeber100.com

74-cü Venesiya Beynəlxalq Kino Festivalı açılır

Bu gün ən qocaman kinofestivallardan və kinematoqraf dünyasının ən əlamətdar hadisələrindən biri olan 74-cü Venesiya Beynəlxalq Kino Festivalı açılır.“calend.ru” saytı xəbər verir ki, hər il İtaliyanın Lido adasında keçirilən bu festival təqribən iki ay davam edir.Venesiya Festivalı İtaliya diktatoru Benito Mussolininin təşəbbüsü ilə 1932-ci ildə təsis edilib. Onun keçirilməsində, qısa müddət də olsa, iki dəfə fasilə yaranıb: İkinci Dünya müharibəsi illərində və 1960-cı illərin sonunda. Bu gün kino dünyasında dəbi, demək olar, Venesiya Kino Festivalı müəyyən edir. Əsas müsabiqə proqramı üçün tammetrajlı bədii filmlər seçilir. Adətən filmlərin sayı 20-dən çox olmur. Onların seçimi ilə festivalın direktoru və beş ekspertdən ibarət komissiya, habelə xarici mütəxəssislərdən ibarət məsləhətçilər qrupu məşğul olur. Seçilmiş filmlər onların adları rəsmi elan edilənə qədər tam məxfi saxlanılır. Festivalın əsas müsabiqəsinin beynəlxalq tərkibli münsiflər heyətinə təxminən 7-9 adam – kino, incəsənət və mədəniyyət xadimləri daxildir.Festivalın baş mükafatı - “Qızıl şir” ən yaxşı filmə görə təqdim edilir. Ən yaxşı rejissora “Gümüş şir”, ən yaxşı kişi roluna və ən yaxşı qadın roluna görə Volpi Kuboku, ən yaxşı gənc aktyora, yaxud aktrisaya Marçello Mastroyanni mükafatı, ən yaxşı ssenariyə, operator işinə, böyük texniki nailiyyətlərə görə “Osella” mükafatı da təqdim edilir. Bundan əlavə, gənc kinematoqrafçıların ən yaxşı birinci və ikinci işləri mükafatlandırılır, ən yaxşı peşəkar-yaradıcı əməkdaşlığa görə mükafat və festivalın bütün seksiyalarının işinin yekunlarına görə Luici Di Laurentis mükafatı təqdim edilir.xeber100.com

41-ci Montreal Beynəlxalq Film Festivalında

Babək Şirinsifətin “Üçüncü günün adamı” bədii filmi beynəlxalq film festivalına dəvət alıb.“Azərbaycanfilm” kinostudiyasından Azərtac-a bildirilib ki, yeni ekran əsərinin beynəlxalq təqdimatı 41-ci Montreal Beynəlxalq Film Festivalında baş tutacaq. Festival avqustun 24-dən sentyabrın 4-dək Kanadada keçiriləcək.Qeyd edək ki, Montreal Film Festivalı Şimali Amerikada FIAPF (Kinoprodüserlər Birliklərinin Beynəlxalq Federasiyası) tərəfindən tanınan yeganə müsabiqə film festivalıdır.“Üçüncü günün adamı” tammetrajlı bədii filmi Qarabağ mövzusundadır.xeber100.com