ISESCO üzrə Azərbaycan Milli Komissiyasının ilk iclası

Mədəniyyət və Turizm Nazirliyindən verilən məlumata görə, yanvarın 25-də mədəniyyət və turizm naziri Əbülfəs Qarayevin sədrliyi ilə İslam Təhsil, Elm və Mədəniyyət Təşkilatı (ISESCO) üzrə Azərbaycan Respublikasının Milli Komissiyasının yaradılması haqqında Azərbaycan prezidentinin 14 yanvar 2016-cı il tarixli sərəncamından irəli gələn vəzifələrin yerinə yetirilməsi ilə bağlı komissiyanın ilk iclası keçirilib. Nazir ISESCO-nun 12-ci Baş Konfransı və İcraiyyə Şurasının 2015-ci ilin 23-27 noyabr tarixlərində keçirilmiş iclasında Azərbaycanın növbəti üç il müddətinə Baş Konfransın sədri seçilməsi münasibətilə görüş iştirakçılarını təbrik edib. Komissiya üzvlərinin təsdiq edilməsini ölkə rəhbərinin göstərdiyi böyük etimad kimi dəyərləndirən Ə.Qarayev bu sərəncamın komissiya üzvlərinin üzərinə böyük bir məsuliyyət qoyduğunu xüsusi vurğulayıb. Bildirilib ki, son illər ölkə rəhbərliyinin göstərdiyi səylər nəticəsində Azərbaycanın islam mədəniyyətinə inteqrasiyası çox fəal şəkildə həyata keçirilir. Komissiya üzvləri bu işin davamına və münasibətlərin daha yüksək səviyyədə qurulmasına öz töhfələrini əsirgəməməli, daha da geniş miqyasda fəaliyyət göstərməlidirlər. 2009-cu ildə Bakı, 2018-ci ildə isə Naxçıvan şəhərlərinin islam mədəniyyətinin paytaxtı elan edilməsini Azərbaycan xalqının zəngin tarixi-mədəni irsinə İslam aləmində verilən yüksək qiymət kimi dəyərləndirən nazir bu yöndə işlərin artıq bu gündən başlanılmasının, Muxtar Respublikanın rəhbərliyi və əlaqədar təşkilatları ilə müvafiq tədbirlərin həyata keçirilməsinin vacibliyini vurğulayıb. 2015-ci ilin 23-27 noyabr tarixlərində paytaxt Bakıda uğurla keçirilmiş ISESCO-nun 12-ci Baş Konfransı və İcraiyyə Şurasının 36-cı sessiyası barədə görüş iştirakçılarını məlumatlandıran nazir ISESCO Baş Konfransına sədrliyin ölkəmiz üçün vacib nüanslarını da diqqətə çatdırıb. Görüş "dəyirmi masa" ətrafında müzakirələrlə davam edib.    

“Yuğ” Kukla Teatrına köçürülür

Yasamal rayonu ərazisindəki söküntü işləri ilə bağlı həmin ərazidə yerləşən Azərbaycan Dövlət “Yuğ” teatrının binasının da sökülməsi nəzərdə tutulub. Mədəniyyət və Turizm Nazirliyindən verilən məlumata görə,  nazirliyin müvafiq qərarına əsasən, bu ilin fevralın 1-dən etibarən “YUĞ” Dövlət Teatrı yaradıcılıq fəaliyyətini Azərbaycan Dövlət Kukla Teatrında davam etdirəcək.  

Əliheydər Ələkbərov- 100

Fevralın 3-də Azərbaycan Dövlət Akademik Milli Dram Teatrında rejissor Əliheydər Ələkbərovun 100 illik yubileyi münasibəti ilə tədbir keçiriləcək. Teatrın mətbuat xidmətindən verilən məlumata görə, Mədəniyyət və Turizm Nazirliyinin təşkilatçılığı ilə baş tutacaq yubiley tədbirinin rejissoru xalq artisti Mərahim Fərzəlibəyovdur. Gecədə Akademik Milli Dram Teatrının bədii rəhbəri və direktoru, xalq artisti Azər Paşa Nemət, xalq artistləri Hacı İsmayılov, Ağakişi Kazımov və başqaları Ə. Ələkbərovun həyat və yaradıcılığından danışacaq, Azərbaycan teatrının inkişafındakı xidmətlərindən bəhs edəcəklər. Qeyd edək ki, Ə. Ələkbərov 1915-ci il iyulun 26-da anadan olub. Yaradıcılığı əsasən Akademik Milli Dram Teatrı ilə bağlıdır. 1960-1967-ci illərdə Musiqili Komediya Teatrında baş rejissor işləyib. O, 1975-ci il martın 3-də vəfat edib.

Bakıda yunan poeziya axşamı

Mədəniyyət və Turizm Nazirliyindən verilən məlumata görə, bakıda  yunan poeziya axşamı qeyd olunacaq. Həmin tədbirdə Yunanıstanın Azərbaycandakı Fövqəladə və Səlahiyyətli Səfir cənab Dimitrios Tsounqas iştirak edəcək. Layihənin məqsədi Azərbaycan yazıçı və şairlərinin həm ölkə daxilində, həm də beynəlxalq ədəbi mühitdə tanıdılması, cəmiyyətdə ədəbiyyata, ədəbi ənənələrə, poetik axşamlara marağın və diqqətin artırılması, həmçinin, ədəbi inkişafın stimullaşdırılmasına yönəldilib. Layihə ölkəmizin mədəniyyətinin təbliğinə, klassik və müasir ədəbiyyatının dünyada tanıdılmasına və yeni istedadlı yazarların aşkar olunması baxımından əhəmiyyətlidir..

“Eurovision 2016” hazırlığı

İsveçdə “Eurovision 2016” mahnı müsabiqəsinin püşkü atılıb. Həmin püşkə əsasən, birinci yarımfinalda Azərbaycan, Rusiya, Ermənistan, ikinci yarımfinalda isə Gürcüstan, Belarus, Polşa və digər ölkələrin təmsilçiləri çıxış edəcəklər. Xatırladaq ki, Azərbaycan bu müsabiqədə 2008-ci ildən təmsil olunur.

Maykl Ceksonun son günləri

Yanvarın sonunda "Sandens" kinofestivalında rejissor Spayki Li "Michael Jackson´s Journey From Motown to Off the Wall" sənədli filmini nümayiş edəcək. Filmdə pop-musiqi kralının həyatının ən vacib anlarından biri təsvir olunur. Rejissor Maykl Ceksonun 1979-cu ildə "Of the Wall" albomunun yaradılması zamanı "Motown" səsyazma studiyası ilə münasibətlərinin necə olduğunu göstərir. Filmdə Cekson ailəsi üzvlərinin, Farrel, Li Deniels, Con Lecendin müsahibəsi və arxiv materialları var. Filmin premyerası 2016-cı ilin yanvar ayına planlaşdırılıb. Xatırladaq ki, Spayk Linin filmi Maykl Cekson haqqında yeganə lent deyil. "Warner Brothers" şirkəti pop-musiqi kralının həyatının son 4 ayı barədə serial hazırlayır. Süjet Tevis Smaylinin "Siz məni mühakimə etməzdən əvvəl: Maykl Ceksonun son günlərinin triumfu və faciəsi" kitabı əsasında qurulub. Premyeranın tarixi hələ ki, məlum deyil.

V.Y.Axundov-100

Ölkə başçısı Akademik V.Y.Axundovun 100 illik yubileyinin keçirilməsi haqqında sərəncam imzalayıb. Sərəncamda bildirilir ki: 2016-cı ilin may ayında Azərbaycanın görkəmli alimi və tanınmış ictimai-siyasi xadimi, akademik Vəli Yusif oğlu Axundovun anadan olmasının 100 illiyi tamam olur. Vəli Axundov uzun illər dövlət idarəçiliyi sahəsində ən məsul vəzifələrdə çalışarkən təqdirəlayiq fəaliyyət göstərmiş və tibb alimi kimi respublikada səhiyyə işinin təşkilinə töhfələr vermişdir. Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan elminin inkişafında və ölkənin ictimai-siyasi həyatında mühüm xidmətləri olan akademik Vəli Axundovun 100 illik yubileyinin dövlət səviyyəsində keçirilməsini təmin etmək məqsədi ilə qərara alıram: 1. Azərbaycan Respublikasının Mədəniyyət və Turizm Nazirliyi Azərbaycan Respublikasının Səhiyyə Nazirliyi və Azərbaycan Milli Elmlər Akademiyası ilə birlikdə akademik Vəli Axundovun 100 illik yubileyinə həsr olunmuş tədbirlər planını hazırlayıb həyata keçirsin. 2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.