“Nizami Gəncəvinin 880 illiyi” xatirə nişanının təqdimat mərasimi keçirilib

Azərbaycan Milli Kitabxanasında Mədəniyyət Nazirliyinin təsis etdiyi “Nizami Gəncəvinin 880 illiyi (1141 – 2021)” xatirə nişanının təqdimatı  keçirilib. Təqdimat mərasimindəxatirə nişanı “Nizami Gəncəvi İli”nə töhfə verən elm və incəsənət xadimlərinə təqdim edilib. Mədəniyyət nazirinin birinci müavini Elnur Əliyev qeyd edib ki, Azərbaycan Respublikası Prezidenti İlham Əliyevin “Azərbaycan Respublikasında 2021-ci ilin “Nizami Gəncəvi İli” elan edilməsi haqqında” 5 yanvar 2021-ci il tarixli Sərəncamına əsasən Azərbaycan Respublikası Nazirlər Kabinetinin müvafiq tarixli Sərəncamı ilə təsdiq edilmiş “Dahi Azərbaycan şairi və mütəfəkkiri Nizami Gəncəvinin 880 illik yubileyinin keçirilməsinə dair Tədbirlər Planı”nın icrası ilə əlaqədar Mədəniyyət Nazirliyi tərəfindən “Nizami Gəncəvinin 880 illiyi (1141 – 2021)” xatirə nişanı təsis edilib: “Xatirə nişanı Nizami irsinin təbliği və tanıdılmasında mühüm xidmətləri olan şəxslərə təqdim olunur. Keçirilən tədbirlər çərçivəsində xaricdə Nizami Gəncəvinin heykəli ucaldılıb, Nizaminin əsərləri üzərində qurulmuş tamaşalar səhnələşdirilib, son olaraq Nizami Gəncəvi Beynəlxalq Forumu keçirilib”. Daha sonra Elnur Əliyev tanınmış elm və incəsənət xadimlərinə “Nizami Gəncəvinin 880 illiyi (1141 – 2021)” xatirə nişanını təqdim edib. Xatirə nişanı ilə təltif olunanlar sırasında Bakı Bələdiyyə Teatrının  aktyorları -Nizami ili çərçivəsində teatrın hazırladığı “Sonsuz Tanrı məhəbbəti” tamaşasında yaratdıqları əsas rollara görə-Tural Əhməd Nizami Gəncəvi roluna, Zülfiyyə Məmmədova  Afaq roluna görə təltif olunublar.        

Aşıq Ələsgərə həsr edilmiş konsert proqramı təqdim edilib

“Dədə Ələsgər Ocağı” İctimai Birliyi, AMEA-nın Folklor İnstitutu və Beynəlxalq Muğam Mərkəzinin birgə təşkilatçılığı ilə Azərbaycan aşıq poeziyasının görkəmli nümayəndəsi, haqq aşığı Dədə Ələsgərin 200 illiyinə həsr olunmuş növbəti konsert proqramı təqdim edilib.Konsertdən əvvəl “Dədə Ələsgər Ocağı” İctimai Birliyinin sədri, Aşıq Ələsgərin nəticəsi Xətai Ələsgərli çıxış edərək ölkə başçısının müvafiq Sərəncamı ilə Aşıq Ələsgərin anadan olmasının 200 illiyinin ölkəmizdə silsilə tədbirlərlə qeyd edildiyini söyləyib. Vurğulayıb ki, ölkə başçısı eyni zamanda ustad Aşıq Ələsgərin Bakı şəhərində heykəlinin ucaldılması haqqında da Sərəncam verib. Bu sərəncamlar Azərbaycan aşıq poeziyasına verilən böyük bir dəyərin göstəricisidir.AMEA-nın Folklor İnstitutunun direktoru Muxtar İmanov, çıxış edərək bildirib ki, Aşıq Ələsgər yaradıcılığı Azərbaycan aşıq poeziyasında önəmli yer tutur və ustad aşığın əsərləri bu gün də öz aktuallığını qoruyub saxlayır.Tədbirdə ilk dəfə olaraq "Dədə Ələsgər Ocağı" İctimai Birliyinin yeni təsis etdiyi "Aşıq Ələsgər 200" yubiley medallarının təqdimetmə mərasimi keçirilib. Yubiley medalı Azərbaycan aşıq poeziyasının inkişafında xidmətləri olan şəxslərə təqdim edilib.Konsert proqramında tanınmış və gənc aşıqların ifaları dinlənilib.xeber100.com

“Bir dayan! Tətil” çoxhissəli animasiya filminin premyerası keçiriləcək

Dekabrın 17-də “Bir dayan! Tətil” çoxhissəli animasiya filminin premyerası keçiriləcək. Tamaşaçılara dörd yeni seriya təqdim olunacaq.TASS agentliyi xəbər verir ki, bu barədə “Soyuzmultfilm” studiyasından bildirilib. “Soyuzmultfilm”in direktorlar şurasının sədri Yuliana Slaşeva serialın premyerasını kinostudiyanın müasir tarixində ən məsuliyyətli və həyəcanlı hadisələrdən biri adlandırıb: “Uzun onilliklərdən sonra əfsanəvi qəhrəmanlar indiki uşaqlara öz unikal yumorunu, cazibəsini və bacarıqlarını bəxş etmək üçün ekranlara qayıdıblar. Yeni “Bir dayan! Tətil” keçmişlə gələcək arasında körpüdür, bütün ailə ilə ekranlara toplaşmaq üçün gözəl fürsətdir”. Qeyd edək ki, “Lunapark” adlı ilk seriya “MAER” media holdinqinin Moskva, Moskva vilayəti, Sankt-Peterburq, Nijni Novqorod, Volqoqrad, Samara, Soçi, Tümen, Yekaterinburq, Çelyabinsk, Novosibirsk, Perm və Ufa şəhərlərinin küçələrində yerləşdirdiyi 79 iriölçülü ekranları vasitəsilə nümayiş olunacaq. Həmin gün, dekabrın 17-də “Lunapark”, “Çamadanlarda”, “Daha sürətli, daha yüksək, daha güclü” və “Çimərlik” epizodları “Okko” kino xidmətinin abunəçilərinin ixtiyarına veriləcək.xeber100.com  

Milli Məclisin iclasında “Turizm haqqında” qanun layihəsi təsdiq edilib

Milli Məclisin dekabrın 14-də keçirilən plenar iclasında “Turizm haqqında” qanun layihəsi birinci oxunuşda təsdiq edilib.Azərtac xəbər verir ki, “Turizm haqqında” qanun layihəsi bütövlükdə, turizm sənayesi subyektləri üzərində ağır öhdəliklər yaratmadan turizm bazarının tənzimlənməsinə, turizm sahəsində sahibkarlıq fəaliyyətinin dəstəklənməsinə, ölkənin turizm xidmətlərinin keyfiyyətinin yüksəldilməsinə və turist məmnunluğunun təmin edilməsinə istiqamətlənib. Beş fəsil, 22 maddədən ibarət layihədə əsas anlayışların mənaları verilib, turizmin forma və növləri, bu sahədə qanunvericiliyin çərçivəsi öz əksini tapıb, turizm sahəsində dövlət siyasətinin əsas istiqamətlərinə, vəzifələrinə aydınlıq gətirilib. Layihədə dövlətin üzərinə turizm sahəsində əlverişli investisiya mühiti yaratmaq, sahibkarların maliyyə vəsaitlərinə çıxış imkanlarını genişləndirmək və rəqabətin məhdudlaşdırılmasının qarşısını almaq, turizm sənayesi subyektlərinin və turistlərin hüquqlarını, qanuni maraqlarını qorumaq kimi bir sıra öhdəliklər qoyulub. Layihədə turizmin xidmət keyfiyyətinin yüksəldilməsi, turizm iştirakçıları, onların etik davranış qaydaları, reyestrdə qeydiyyatı, hüquq və vəzifələri, təhlükəsizliyi, turizm vizalarının verilməsi kimi mütərəqqi yeniliklər təsbit edilib, turizm sahəsinin maliyyə mənbələri açıqlanıb.xeber100.com

“Nizami Gəncəvi İli” çərçivəsində “Xəmsə”yə müraciət

Dekabrın 10-da Bakı Bələdiyyə Teatrı “SONSUZ TANRI MƏHƏBBƏTİ” tamaşasını geniş tamaşaçı auditoriyasına təqdim etdi. Azərbaycan Respublikasının Prezidenti İlham Əliyevin sərəncamına əsasən dünya ədəbiyyatının görkəmli nümayəndəsi, Azərbaycanın dahi şairi və mütəfəkkiri Nizami Gəncəvinin anadan olmasının 880 illiyi münasibətilə 2021-ci ilin “Nizami Gəncəvi İli” elan edilməsi münasibətilə silsilə tədbirlər planı çərçivəsində Bakı Bələdiyyə Teatrı da Nizami Gəncəvi yaradıcıllığına müraciət edərək “SONSUZ TANRI MƏHƏBBƏTİ”  tamaşasını hazırlamışdır. Qeyd edək ki, Nizami Gəncəvinin bеş poеması -"Sirlər xəzinəsi", "Xosrov və Şirin", "Lеyli və Məcnun", "Yеddi gözəl", "Isgəndərnamə" - dünya ədəbiyyatına yеni bir poеtik səs, nəfəs gətirmiş və sonralar "Xəmsə" -"Bеşlik" adı altında birləşdirilərək bu adla da Yaxın və Orta Şərq xalqlarının ədəbiyyatlarında məşhur olmuşdur. Görkəmli rejissor Mərahim Fərzəlibəyov yardıcılığı dövründə ilk dəfə 1980-ci illərdə Nizami Gəncəvi yaradıcılığına müraciət etmiş, ikinci dəfə isə Bakı Bələdiyyə Teatrının kollektivi ilə “Xəmsə” əsasında “SONSUZ TANRI MƏHƏBBƏTİ” tamaşasını hazırlamışdır. Yeri gəlmişkən, tamaşa Bakı Bələdiyyə Teatrının 2021  - “Nizami Gəncəvi ili” çərçivəsində nümayiş etdirdiyi yekun tamaşadır. Çoxsaylı qonaqların, media nümayəndələrinin dəvət olunduğu tamaşanın nümayişi anşlaqla keçdi. Qonaqlar sırasında Azərbaycan Respublikasının əməkdar incəsənət xadimi, Azərbaycan Silahlı Qüvvələrinin polkovniki Abdulla Qurbani, Nizami Gəncəvi adına Ədəbiyyat İnstitutunun filologiya üzrə fəlsəfə doktoru, nizamişünas Təhminə Bədəlova, “Birlik” studiyasının rəhbəri, Əməkdar incəsənət xadimi, rejissor Firəngiz Qurbanova, Azərbaycan Dövlət Akademik Milli Dram Teatrının aparıcı aktyoru, Xalq artisti Əli Nur, sənətşünas Seymur Elsevər və başqaları var idi. Nizamişünas Təhminə Bədəlova və polkovnik Abdulla Qurbaninin çıxışından sonra söz səhnəyə-aktyorlara verildi. Bir neçə saat ərzində tamaşaçı salonu Nizami dühasının işığına sığındı. “SONSUZ TANRI MƏHƏBBƏTİ” tamaşasının quruluşçu rejissoru və səhnələşdirəni, Xalq artisti Mərahim Fərzəlibəyov, quruluşçu rəssamı İlham Əsgərov, musiqi hissə müdiri Nazim Əbidov, işıqçı rəssamı Tərlan Ələsgərli, kostyum sexinin müdiri Leyla Əkbərova, dizayn işləri üzrə tərtibatçısı Elnur Əliyevdir. Tamaşada iştirak edirlər: Nizami Gəncəvi-Tural Əhməd, Qızıl Aslan-Tural Baxış, Afaq-Zülfiyyə Məmmədova, Qarı-Səmayə Sadıqova(Əməkdar artist)  Sultan Səncər-Əhməd Salahov(Əməkdar artist), Vəzir-İsmayıl Atakişiyev, Dayə- Şaxzadə Babayeva(Əməkdar artist), Qoca-Rafiq İbrahimov(Əməkdar artist), Oğlan-Məmmədağa Əlicanzadə, Sözçülər: Hüsniyyə Mürvətova(Əməkdar artist), Toğrul Rza, Ülviyyə Rza, Elçin Muradov, Günel Həmidova, Əzizə Həşimova. Xatırladaq ki, Bakı Bələdiyyə Teatrı 1992-ci ildə unudulmaz sənətkarlar, görkəmli teatr və kino xadimləri, Xalq artistləri Amaliya Pənahova və Yusif Muxtarov tərəfindən yaradılmış və  yarandığı gündən bu günə kimi saysız-hesabsız səhnə əsərləri ilə milli teatr mədəniyyətini Azərbaycanda, eyni zamanda dünya ölkələrində təbliğ edir.      

ICESCO İcraiyyə Komitəsinin 42-ci sessiyası keçirilib

Misir paytaxtında İslam Dünyası Elm, Təhsil və Mədəniyyət Təşkilatı (ICESCO) İcraiyyə Komitəsinin 42-ci sessiyası keçirilib.Azərtac xəbər verir ki, 51 üzv ölkədən 49 nümayəndənin iştirak etdiyi tədbirdə Azərbaycanı Mədəniyyət Nazirliyinin beynəlxalq əlaqələr şöbəsinin müdiri Aqil Günəşov təmsil edib.Sessiyanın açılışında çıxış edən Misirin ali təhsil və elmi tədqiqatlar naziri Xalid Əbdel Ğaffar Misir hökuməti adından iştirakçıları salamlayıb və dekabrın 8-9-da keçiriləcək ICESCO Baş Konfransının İslam dünyasında elm, təhsil və mədəniyyət sahələrində əməkdaşlığa töhfə olacağını vurğulayıb.ICESCO-nun Baş direktoru Salim bin Məhəmməd Əl-Malik təşkilatın 2021-ci ildə fəaliyyəti haqqında ətraflı məlumat verib. O vurğulayıb ki, COVID-19 pandemiyası şəraitində yüksək texnologiyaların tətbiqi, innovativ təşəbbüslər, şəffaflıq, həmrəylik və tərəfdaşlıq ICESCO üçün prioritet vəzifələr olub.xeber100.com

Azərbaycan Dövlət Pantomima Teatrı dekabr repertuarını açıqlayıb

Azərbaycan Dövlət Pantomima Teatrı dekabr repertuarını açıqlayıb.Teatrdan bildirilib ki, sənət ocağının repertuarında xüsusi yer tutan “6 nömrəli palata” dekabrın 4, 5-də, “Ağ bığlılar” 11-də, “Son ştrix” isə 18, 19-da teatrsevərlərin ixtiyarına veriləcək. Bundan başqa, dekabrın 25, 26-da “Dejevü” tamaşası göstəriləcək.Səhnə əsərləri bir qayda olaraq saat 18:00-da nümayiş olunacaq.xeber100.com

Mədəniyyət Nazirliyi müsabiqə elan edib

Azərbaycan Respublikasının Mədəniyyət Nazirliyi “Tammetrajlı bədii film layihələrinə dəstək 2022” müsabiqəsini elan edib.Nazirlikdən bildirilib ki, müsabiqə milli kinematoqrafiya sahəsində fəaliyyət göstərən yaradıcı şəxslərə dəstək olmaq, bu istiqamətdə çalışan müstəqil prodüser mərkəzlərinin və istehsal şirkətlərinin fəaliyyətini stimullaşdırmaq, milli-mənəvi və ümumbəşəri dəyərləri filmlərlə təbliğ etmək, kino peşəkarlarının təcrübələrini daha da artırmaq məqsədilə təşkil olunub.Müsabiqə ilə bağlı daha ətraflı məlumatı bu linkdən əldə etmək mümkündür: http://mct.gov.az/az/bfdestek2022

“Araxçın” animasiya filmi beynəlxalq mükafatın finalçıları arasında

Türkiyə Mədəniyyət və Turizm Nazirliyinin Kino Baş İdarəsinin dəstəyi ilə Kino və Televiziya Peşəkar Assosiasiyası tərəfindən təşkil edilən IX “İpək Yolu" Beynəlxalq Film Festivalının finalçıları müəyyənləşib. Türkiyə, Çin, Qırğızıstan, Özbəkistan, Azərbaycan, Qazaxıstan, İtaliya, Suriya, Hindistan, İraq, Yunanıstan, İran, Əfqanıstan və Pakistan kinematoqrafiyasından 3089 filmin iştirak etdiyi festivalda Münsiflər heyətinin ilkin baxışının yekunlarına əsasən milli və beynəlxalq dərəcəli finalçılar seçilib. 3089 müraciətin yer aldığı festivala Azərbaycandan rejissor Firəngiz Qurbanovanın “Araxçın” animasiya filmi beynəlxalq mükafatın finalçıları arasında yer alıb. Xatırladaq ki, “Birlik” studiyasında istehsal olan “Araxçın” cizgi filmi Braziliyada keçirilən 16-cı Beynəlxalq Cizgi Filmləri Festivalında – 2021-ci ildə “Dünya Mədəniyyəti”nin peşəkar filmləri kateqoriyası ilə iştirak edəcək. Filmin ssenari müəllifi və quruluşçu rejissoru Firəngiz Qurbanova,  rəssam-animator Zema Əhədovadır.xeber100.com  

29 yaşın Zəfər yürüşü

Sarıqamışda əsir düşən hərbçilərin xatirəsinə həsr olunan “Nargin faciəsi” tarixi dramı Bakı Bələdiyyə Teatrının təqdimatında geniş tamaşaçı auditoriyasına təqdim olundu. Bakı Bələdiyyə Teatrının 29 yaşı münasibətilə hazırlanan təqdimat, eyni zamanda Azərbaycanın Zəfər bayramına həsr olunmuşdur. Bayram tədbirində Azərbaycanın tanınmış simaları, ictimai-siyasi xadimləri, eləcə də qonaqlar iştirak edirdi. Tədbirdə Xalq artisti, rejissor Mərahim Fərzəlibəyov çıxış edərək öncə qonaqları salamlayaraq tamaşa haqqında ümumi məlumat verdi, daha sonra sözü Azərbaycan Silahlı Qüvvələrinin polkovniki, Əməkdar incəsənət xadimi Abdulla Qurbaniyə verdi. A.Qurbani çıxışında qonaqları Şəhidlərin xatirəsini 1 dəqiqəlik sükutla yad etməyə dəvət etdi. Azərbaycan himninin möhtəşəm sədaları altinda şəhidlərimiz dərin ehtiramla yad edildi. Abdulla Qurbani daha sonra öz çıxışında Azərbaycan-Türkiyə dostluğundan bəhs edərək, bu dostluğun qədim tarixi keçmişə dayandığını xüsusuilə vurğuladı. Sonra meydan aktyorlara verildi, tamaşaçılar böyük həyəcanla “Nargin faciəsi”ni izlədi. Xatırladaq ki, Yazıçı Rəfail Oğuztürk Dağlının “Nargin faciəsi” əsəri əsasında hazırlanan “Nargin faciəsi” tamaşası 1914-1915-ci illərdə rus-türk cəbhəsində Sarıqamış əməliyyatında əsir düşmüş və Nargin adasında çox ağır şəraitdə saxlanıldıqlarına görə əksəriyyəti həlak olmuş minlərlə türk əsgərinin və azərbaycanlı mülki şəxslərin xatirəsinə ithaf edilib. Tamaşanın ideya rəhbəri Amaliya Pənahova, rejissoru isə Tural Ağayevdir. Rolları Əməkdar artistlər Rafiq İbrahimov, Tofiq Bayramov, Əfqan Soltanov, Əhməd Salahov, “Humay” mükafatı laureatları Zülfiyyə Qurbanova, Tural Əhmədov, Cövdət Şükürov, Toğrul Rza, Asif Rəhimov, Rəşid Soltanov və Namiq Cavadov ifa ediblər. Tamaşa bayram iştirakçıları tərəfindən alqışlarla qarşılandı.xeber100.com