Azərbaycan Dövlət Kukla Teatrı müsabiqə elan edib

Abdulla Şaiq adına Azərbaycan Dövlət Kukla Teatrı 85 illik yubileyi münasibətilə balaca istedadlar arasında müsabiqə elan edib. Belə ki, teatrın nəzdində fəaliyyət göstərən “Oyuq” teatr-studiyasına istedadlı uşaqların qəbuluna başlanılıb. Teatrın mətbuat xidmətindən Azərtac-a bildirilib ki, sentyabrın 6-dan 26-dək davam edəcək müsabiqədə 5-15 yaşlı uşaqlar iştirak edə bilərlər. Teatr üçün həvəskar aktyorların yetişdirilməsi məqsədilə keçirilən müsabiqədə iştirak etmək istəyənlər Azərbaycan Dövlət Kukla Teatrına (saat 13:00-15:00) müraciət etməlidirlər. Peşəkar aktyorluq və rejissorluq, xoreoqrafiya və vokal üzrə pedaqoqların seçəcəyi uşaqlardan tələb olunan əsas keyfiyyətlər səhnədə özünü sərbəst ifadə, səs və xoreoqrafiya bacarıqlarıdır. Qeyd edək ki, fəaliyyətində “Azərbaycan teatrı 2009-2019-cu illərdə” Dövlət Proqramındakı teatr-studiyaları ilə bağlı bəndi rəhbər tutan “Oyuq” illərdi keçdiyi uğurlu yaradıcılıq yolu ilə öz fərqini göstərə bilib. Belə ki, studiyanın yetirmələri Türkiyə, Rusiya, Makedoniya və Bolqarıstanda təşkil olunan beynəlxalq festival və müsabiqələrdə uğurla təmsil olunaraq dəfələrlə yüksək mükafatlara layiq görülüblər.xeber100.com

Milli Dram Teatrı beynəlxalq festivalda…

Azərbaycan Dövlət Akademik Milli Dram Teatrı sentyabrın 15-də keçiriləcək II Şəki beynəlxalq teatr festivalında “Ölülər” tamaşasını göstərəcək. Teatrın mətbuat xidmətinin məlumatına görə, Cəlil Məmmədquluzadənin “Ölülər” pyesi əsasında hazırlanan səhnə əsərinin quruluşçu rejissoru teatrın bədii rəhbəri və direktoru, Xalq Artisti Azərpaşa Nemətdir. Tamaşada bəstəkar Qara Qarayevin “Ölülər” əsəri üçün bəstələdiyi musiqi yeni versiyada təqdim olunur. Baş rolları Xalq Artisti Nurəddin Mehdixanlı və aktyor Anar Heybətov ifa edəcəklər.xeber100.com  

“Bal-Maskarad” operasının premyerası keçiriləcək

Opera və Balet Teatrında Cüzeppe Verdinin “Bal-Maskarad” operasının premyerası keçiriləcək. Teatrın mətbuat xidmətindən Apa-ya verilən məlumata görə, opera sentyabrın 24-də VIII Beynəlxalq Üzeyir Hacıbəyli Musiqi Festivalı çərçivəsində tamaşaçılara təqdim olunacaq. Səhnə əsərinin əsas partiyalarında Belarusun əməkdar artisti Stanislav Trifonov, Azərbaycanın əməkdar artistləri Fərid Əliyev, İlahə Əfəndiyeva, İnarə Babayeva, Səbinə Vahabzadə, solistlər Tural Ağasıyev, Əliəhməd İbrahimov və Tələt Hüseynov çıxış edəcəklər. Tamaşanın musiqi rəhbəri və dirijoru beynəlxalq müsabiqələr laureatı Əyyub Quliyev, xormeysteri əməkdar incəsənət xadimi Sevil Hacıyeva, konsertmeysteri Nərgiz Ağayevadır. “Bal-Maskarad” operasının ilk premyerası 17 fevral 1859-cu ildə Romanın Apollo teatrında baş tutub. Operanın librettosu fransız dramaturqu Ejen Skribanın tarixi faktlar əsasında qələmə aldığı pyesin motivləri əsasında yazılıb.

Opera və Balet Teatrı 108-ci mövsümü açmağa hazırlaşır

Azərbaycan Dövlət Akademik Opera və Balet Teatrı 108-ci mövsümü “Leyli və Məcnun”la açacaq.  Teatrın sentyabr ayı üçün repertuarını təqdim edirik: 18 sentyabr – “Leyli və Məcnun” (3 pərdəli opera) 24 sentyabr – “Bal-maskarad” (premyera, konsert ifasında opera) 25 sentyabr – “Min bir gecə” (2 pərdəli balet) 28 sentyabr – “Şah İsmayıl” Tamaşalar saat 19:00-da başlanır.

Milli Teatrın sentyabr repertuarı açıqlanıb

Azərbaycan Dövlət Akademik Milli Dram Teatrının sentyabr ayına olan repertuarı açıqlanıb. Azərtac teatrın sentyabr ayı üçün repertuarını təqdim edir. 15 sentyabr - “Ölülər”; 17, 18 sentyabr - “Qarabağnamə”; 23 sentyabr - “21.15 qatarı”; 24 sentyabr - “Danışan gəlincik”, “Müfəttiş”; 25 sentyabr - “Anamın kitabı”, “Şah Qacar”; 30 sentyabr - “Şekspir”. Tamaşalar saat 12.00 və 19.00-da nümayiş olunacaq.

Dövlət Pantomima Teatrının məlumatına görə…

Azərbaycan Dövlət Pantomima Teatrı bu dəfə də ənənəsinə sadiq qalaraq mövsümü maraqlı tamaşa ilə açacaq. Teatrdan verilən məlumata görə, sənət ocağı sentyabrın 17-də “Adagio” tamaşasını təqdim edəcək. Səhnə əsərinin quruluşçu rejissoru, Xalq Artisti Bəxtiyar Xanızadə, rəqslərin quruluşu isə Elnur İsmayılova məxsusdur. Tamaşada rolları teatrın aktyorları canlandıracaqlar. Qeyd edək ki, səhnə əsərində müxtəlif şairlərin şeirlərindən istifadə olunub. Bu şeirlərdə qadın düşüncəsi, qadın duyğusu əsas yer tutur.xeber100.com

Mahnı Teatrında “O mənimdir” adlı tamaşanın premyerası olub

Rəşid Behbudov adına Dövlət Mahnı Teatrının səhnəsində “O mənimdir” adlı tamaşanın premyerası olub. Səhnə əsəri yeni yaradılan müstəqil “M.Teatr”a (“Mənim teatrım”) məxsusdur.  “M.Teatr”ın “facebook”dakı səhifəsində yazılıb ki, “Yuğ” Dövlət Teatrının baş rejissoru Gümrah Ömərin fransız yazıçısı Antuan De-Sent Ekzuperinin “Balaca Şahzadə” əsəri əsasında səhnələşdirdiyi tamaşada rolları aktyorlar Ziya Ağa, Günay Əhməd, Nigar İsayeva, Elgün Həmidov, Oktay Mehdiyev, Amid Qasımov və Vüqar Hacıyev ifa ediblər. Tamaşanın bədii rəhbəri Əməkdar Artist Vidadi Həsənovdur.xeber100.com

Böyük Teatrın ilk beynəlxalq turnesi…

Londonda Rusiyanın məşhur Böyük Teatrının ilk beynəlxalq turnesinin 60 illiyinə həsr edilmiş yubiley qastrolları keçirilir. Həm 1956-cı ildə Kovent-Qarden kral teatrında baş tutmuş ilk qastrolun, həm də indiki yubiley çıxışları “Don Kixot” tamaşası ilə başlayıb. TASS İnformasiya Agentliyinin verdiyi xəbərə görə, iyulun 29-dan etibarən isə yerli tamaşaçılar “Qu quşu gölü”nü Böyük Teatr truppasının ifasında izləyə bilirlər. Çaykovskinin musiqisinə yazılmış və Yuri Qriqoroviçin xoreoqrafik quruluş verdiyi balet tələbkar Britaniya tamaşaçısının və peşəkar balet tənqidçilərini valeh edib. Mötəbər balet tənqidçisi Klement Krisl “Financial Times” qəzeti üçün yazdığı məqaləsini “London kral operasının səhnəsindəki “Qu quşu gölü”: cəzbedicidir” başlığı ilə verərək 60 il öncə də şahidi olduğu ilk tamaşa kimi valehedici olduğunu bildirib. Avqustun 13-dək davam edəcək qastrol çıxışlarında moskvalı truppa “Paris atəşi”, “İnadkarın ram edilməsi” və “Korsar” baletlərini də tamaşaçılara təqdim edəcək.xeber100.com

88-ci teatr mövsümünün yekunlarına həsr olunmuş hesabat iclası keçirilib

Azərbaycan Dövlət Gənc Tamaşaçılar Teatrında 88-ci teatr mövsümünün yekunlarına həsr olunmuş hesabat iclası keçirilib. Teatrın mətbuat xidmətindən Azərtac-a bildirilib ki, iclası giriş sözü ilə açan teatrın direktoru, Əməkdar Artist, ASSİTEJ – Azərbaycan Milli Mərkəzinin prezidenti Mübariz Həmidov mövsüm ərzində əldə edilən uğurlar, təqdim olunan yeni tamaşalar, beynəlxalq qastrol və festivallar, müxtəlif ölkələrlə teatrımız arasında həyata keçirilmiş aktyor və rejissor mübadilələri haqqında ətraflı məlumat verib. Direktor 88-ci teatr mövsümünün nailiyyətləri ilə yanaşı, yeni – 89-cu teatr mövsümü üçün nəzərdə tutulmuş yaradıcılıq planlarından, hazırlanacaq tamaşalar, beynəlxalq qastrol və festivallar, yeni layihələrdən də söz açıb. Daha sonra Teatr və ASSİTEJ – Azərbaycan Milli Mərkəzinin təsis etdiyi “Sima” mövsümi Teatr Mükafatı öz sahiblərinə təqdim olunub. Qaliblərə diplomlar və pul mükafatları təqdim edilib. Mükafatlandırma mərasimindən sonra tədbir möhtəşəm konsert proqramı ilə davam etdirilib.xeber100.com

Lənkəran Dövlət Dram Teatrı mövsümü başa vurub

Lənkəran Dövlət Dram Teatrı  özünün 125-ci mövsümünü başa vurub. Apa-nın cənub bürosunun  məlumatına görə, bu münasibətlə keçirilən mərasimdə teatrın direktoru Tofiq Heydərov, baş rejissoru Tural Mustafayev,  respublikanın xalq artisti Böyükxanım Əliyeva, əməkdar artistlər Təvəkkül Əliyev və Zemfira Nəcəfova çıxış edərək cari mövsümdə qazanılmış uğurlar və növbəti mövsümdə qarşıda duran vəzifələrdən söz açıblar. Daha sonra teatrın bir qrup əməkdaşı qazandığı nailiyyətlərə görə diplomlarla təltif olunub. Rəsmi hissədən sonra teatrın truppasının ifasında yazıçı-dramaturq Əli Əmirlinin “Köhnə ev” tamaşasına baxış olub. Əməkdar artist Adil Zeynalovun quruluş verdiyi səhnə əsərində ata və övladın qarşılıqlı münasibətlərindən bəhs edilir. Tamaşanın səhnə tərtibatı rəssam Məzaim Qurbanovun, musiqi tərtibatı Fərahim Fərəcovundur. Rolları xalq artisti Qabil Quliyev, aktyorlardan Şahrud Mehdiyeva, Təranə Fərəcova, Sayad Əliyev və digərləri ifa ediblər.xeber100.com