ATƏT bu məsələdə mövqeyini ortaya qoymalıdır

“Avropa Şurası Parlament Assambleyasının (AŞ PA) yanvar sessiyası ərəfəsində ATƏT-in Minsk Qrupunun həmsədrlərinin Avropa Şurasına AŞ PA-da Dağlıq Qarabağla bağlı qətnamə qəbul edilməməsi ilə əlaqədar çağırışı Ermənistanın dünənki və srağagünkü təxribatlara yol verməsinə əlverişli şərait yaratmışdı”.  Bunu APA-ya Azərbaycanın AŞ PA-dakı nümayəndə heyətinin rəhbəri Səməd Seyidov deyib.  O bildirib ki, AŞ PA-da həmin qətnamə qəbul edilsəydi, bəlkə də ermənilər beynəlxalq səviyyədə növbəti qınaq sənədi ortaya çıxdığı üçün təxribatlara heç getməz, ehtiyat edərdilər: “Ancaq gördülər ki, ATƏT-in Minsk Qrupunun həmsədrləri onlara dəstək verir. Həm də Azərbaycanın belə yüksək səviyyədə fəaliyyəti göz qabağında olanda təxribata yol verməliydilər”. Seyidovun fikrincə, Ermənistan köhnə üsullardan istifadə edərək təxribatlara edir ki, Azərbaycanı beynəlxalq səviyyədə mənfi imicdə təqdim etsin: “Təxribat törətmiş Ermənistan layiqli cavab alaraq işğal altında saxladığı ərazilərin bir qismini itirib. Həmin əraziləri itirməsi də ona dəlalət edir ki, artıq Ermənistanın normal hərbi potensiala malik deyil. Beynəlxalq təşkilatlar, qurumlar da erməni yalanından beziblər. Serj Sərkisyan dünən isterika vəziyyətində beynəlxalq təşkilatlara müraciət edirdi. Onlar nə qədər nəsə etməyə çalışsalar da, dünya ictimaiyyəti reallığı çox gözəl bilir. Prezident İlham Əliyev Vaşinqtonda dünya liderlərinin iştirak etdiyi nüvə təhlükəsizliyi sammitində bir daha bəyan etdi ki, Dağlıq Qarabağ Azərbaycanın əzəli torpağıdır, işğal altındadır, azad edilməlidir. Əminəm ki, işğalçının ifşa olunması prosesi beynəlxalq təşkilatlar səviyyəsində daha yüksək səviyyədə təşkil olunacaq. Biz isə həm Azərbaycanın Avropa Şurası Parlament Assambleyasındakı nümayəndə heyəti olaraq, Avropa Şurasına, həm də Milli Məclisin Beynəlxalq münasibətlər və parlamentlərarası əlaqələr komitəsi olaraq müxtəlif beynəlxalq təşkilatlara, ATƏT-ə, Avropa Parlamentinə sənədləri rəsmi qaydada sübutlarla göndərəcəyik”. Milli Məclis sədrinin müavini, Azərbaycanın ATƏT Parlament Assambleyasındakı nümayəndə heyətinin rəhbəri Bahar Muradova isə APA-ya bildirib ki, aprelin 15-16-da ATƏT-in fəaliyyətdə olan sədri Almaniyanın rəsmi təşkilatçılığı ilə “dondurulmuş” münaqişələrə dair seminar keçiriləcək: “ATƏT Parlament Assambleyasının yaz sessiyası nəzərdə tutulmayıb. Amma seminar ATƏT Parlament Assambleyasını xətti ilə keçiriləcək. Almaniyanın təcrübəsinin öyrənilməsi baxımından seminar “dondurulmuş” münaqişələrə həsr olunacaq. ATƏT-in fəaliyyətdə olan sədri “dondurulmuş” münaqişələrə diqqəti yönəltmək üçün belə bir seminar keçirir.  Biz həmin seminarda Ermənistanın təmas xəttindəki təxribatları ilə bağlı məsələni qaldıracağıq. Dağlıq Qarabağ münaqişəsinin nə vaxtsa alovlanacağı və bölgə, ATƏT regionu üçün təhlükəli həddə gəlib çatacağı barədə proqnozlarla əlaqədar əlamətlər artıq ortadır. Ona görə də düşünürəm ki, ATƏT vasitəçi təşkilat kimi bu məsələdə mövqeyini ortaya qoymalıdır”.   .

Aprel 3, 2016 5:13

Ermənistan təxribat törədərək sülh prosesinə zərbə vurur

  “Ermənistanın əsas məqsədi status-kvonun dəyişməz qalmasıdır. Təəssüflər olsun ki, ATƏT-in Minsk Qrupuna həmsədrlik edən ölkələrin dövlət başçılarının çoxsaylı bəyanatları Ermənistan rəhbərliyinə heç bir təsir göstərmir”. APA-nın məlumatına görə, bunu aprelin 2-də  Azərbaycan prezidenti İlham Əliyev Təhlükəsizlik Şurasının iclasında söyləyib. Dövlət başçısı deyib ki, Rusiya, ABŞ və Fransa dövlət başçıları dəfələrlə bildiriblər ki, status-kvo qəbuledilməzdir, status-kvo dəyişməli və məsələ tezliklə öz həllini tapmalıdır: “Status-kvonun dəyişdirilməsi o deməkdir ki, tezliklə işğal olunmuş torpaqlardan işğalçılar çıxmalıdır. Ermənistan rəhbərliyi bunu istəmir. Əsas məsələ bundan ibarətdir. Onlar istəyirlər ki, bu, sonu olmayan prosesə çevrilsin. İstəyirlər ki, danışıqlar bundan sonra 20 il də davam etsin. Özlərini danışıqlar masası arxasında qeyri-səmimi aparılar. Bu yaxınlarda Rusiya prezidenti və xarici işlər naziri digər həmsədrlərlə birlikdə müəyyən təkliflər irəli sürüblər. Biz bunu alqışlayırıq. Həm görüş əsnasında, həm də rəsmi bəyanatlarda Azərbaycanın ərazi bütövlüyü ilə bağlı öz fikirlərini bildiriblər. Azərbaycanın ərazi bütövlüyünə böyük dəstək göstərilib. Görüşlər onu göstərir ki, ABŞ tərəfi münaqişənin tezliklə həll olunmasında çox maraqlıdır. Bilirəm ki, Ermənistan rəhbərliyinə də müəyyən mesajlar, siqnallar verilib. Yəni son vaxtlar Minsk Qrupunun həmsədri olan dövlətlərin başçıları məsələnin həll olunmasına çalışırlar. Amma nüvə sammiti hələ başa çatmamış Ermənistan bu çirkin təxribatı törədir, sülh prosesinə çox böyük zərbə vurur. Bundan istifadə etməyə çalışır ki, Azərbaycanı günahlandırsın. Onların sərəncamında olan satqın KİV-lər, satqın siyasətçilər, korrupsiyaya uğramış politoloqlar, şərhçilər indi sıraya düzülüblər ki, Azərbaycanı ittiham etsinlər. İndi bəzi ölkələrin mətbuatlarına nəzər salsanız görərsiniz ki, birtərəfli məlumat yayılır, Azərbaycan ittiham olunur, döyüşlərlə bağlı təhrif edilmiş məlumatlar verilir. Ermənistan ordusu bu gün çox böyük zərbə alıb. Atəşkəs rejimindən sonra ilk dəfədir ki, Ermənistan ordusuna belə sarsıdıcı zərbə vuruldu. Bunun günahkarı onlar özləridir. Ancaq çalışırlar ki, həm ölkələrində ictimai rəyi çaşdırsınlar, itkiləri gizlətsinlər. Eşitdim ki, Ermənistan rəhbərliyi itkilərlə bağlı ictimaiyyətə qeyri-dəqiq məlumat ötürməyə çalışır. Bu, açıq-aydın göstərir ki, onlar sadəcə, öz xalqlarını aldatmaq istəyirlər”. Prezident İlham Əliyev bir daha qeyd edib ki, Azərbaycan, sadəcə, təxribata cavab verib : "Biz sadəcə bu təxribata cavab vermişik, düz də etmişik. Bizə qarşı yenə təxribat törədərlərsə, yenə də öz cəzalarını alacaqlar. İkincisi, biz öz torpağımızda vuruşuruq, Ermənistan torpağını işğal etməmişik. Əgər erməni əsgəri ölmək istəmirsə, Azərbaycan torpağından rədd olsun. Mən bunu dəfələrlə demişəm, bir də demək istəyirəm. Ermənistan bütün beynəlxalq normaları pozub, BMT Təhlükəsizlik Şurasının qətnamələrinə məhəl qoymur, digər beynəlxalq təşkilatların qərar və qətnamələrini saymır. Vəhşi kimi işğal olunmuş torpaqlarda bütün binaları, tarixi abidələri, dini abidələrimizi dağıdıb. ATƏT-in Faktaraşdırıcı Missiyası iki dəfə işğal edilmiş torpaqlarda olub, onların məlumatları bizdə var. Bizim məscidlərimiz, qəbirlərimiz, tarixi abidələrimiz, binalarımız, muzeylərimiz dağıdılıb, bütün qiymətli əşyalar talan edilib. Bu, misli görünməmiş vəhşilikdir”.    

Aprel 3, 2016 4:53

Təxribatla bağlı cinayət işi

Son günlər Ermənistan Silahlı Qüvvələri tərəfindən atəşkəs rejimi və beynəlxalq hüququn tələbləri kobud şəkildə pozularaq Azərbaycanın cəbhəboyu, həmçinin, təmas xəttinə yaxın olmayan yaşayış məntəqələri və mülki obyektlər iriçaplı silahlardan, mina və qumbaraatanlardan, artilleriya qurğularından intensiv atəşə tutulur. Baş Prokurorluq və Daxili İşlər Nazirliyinin mətbuat xidmətlərindən APA-ya daxil olan birgə məlumatda qeyd olunur ki, aprelin 2-də törədilmiş növbəti belə təxribat və diversiya aktları nəticəsində mülki əhalinin milli zəmində düşmənçilik niyyəti ilə qəsdən öldürülməsi, öldürülməsinə cəhd edilməsi, vətəndaşlara məxsus əmlakın məhv edilməsi ilə müşayiət olunan xüsusilə ağır və ağır cinayət əməlləri qeydə alınıb. Dinc sakinlərdən 2-si ölüb, 10 nəfər müxtəlif dərəcəli bədən xəsarətləri alıb. Vətəndaşlara külli miqdarda maddi və mənəvi ziyan vurulub. Bir orta məktəb binası, çoxsaylı evlər, obyektlər, istehsal müəssisələri düşmənin artilleriya zərbələrinə tuş gəlib, nəqliyyat vasitələri, yüksək gərginlikli elektrik xətləri sıradan çıxıb. Həmin gün saat 08 radələrində Tərtər rayonunun Qarağacı kəndi ərazisinə atılmış mərmilərdən biri kənddə məskunlaşmış Rəhimov Cəlal Saday oğlunun idarə etdiyi «VAZ-2107» markalı avtomobilin üzərinə düşüb. Nəticədə avtomobildə olan sərnişin, 1993-cü il təvəllüdlü Rəhimov Orxan Valeh oğlu hər iki ayağını itirərək yerindəcə qanaxmadan ölüb. Avtomobilin sürücüsü Cəlal Rəhimov və yaxınlıqda olan 1990-cı il təvəllüdlü Əhmədov Ramin Rafiq oğlu çoxsaylı qəlpə yaraları alıblar. Saat 12.00 radələrində düşmənin artilleriya atəşləri nəticəsində mərmilərdən biri də həmin qəsəbədə məskunlaşmış Əhmədov İsa Əli oğlunun yaşadığı mənzilə düşüb. Çoxsaylı qəlpə yaraları alan İ.Əhmədov Bərdə Mərkəzi rayon xəstəxanasına yerləşdirilib. Saat 19:20 radələrində rayonun Şıxarx qəsəbəsi ərazisinə atılmış mərmilərdən biri də 1987-ci il təvəllüdlü Əliyev Sadiq Natiq oğlunun idarə etdiyi «Niva-2121» markalı avtomobilin üstünə düşüb. Nəticədə avtomobildə olan sərnişin, 1992-ci il təvəllüdlü Əsədli Fərman Elçin oğlu çoxsaylı qəlpə xəsarətləri alaraq qanaxmadan ölüb. Sürücü və digər sərnişin, 1982-ci il təvəllüdlü Rəhimov Mübariz Vaqif oğlu çoxsaylı qəlpə yaraları alıblar. Saat 20.00 radələrində yaşadığı evin yaxınlığına erməni hərbi birləşmələrinin atdığı top mərmisinin partlaması nəticəsində Ağdam rayonunun Əfətli kənd sakini, 1953-cü il təvəllüdlü Hüseynov Cümşüd İslam oğlu bel nahiyəsindən ağır xəsarət alıb və o, dərhal xəstəxanaya yerləşdirilib. Saat 21.00 radələrində Seydimli kəndi ərazisinə atılmış mərmilərdən biri kənd sakini, 1951-ci il təvəllüdlü Vəliyev Vahid Vəli oğlunun yaşadığı mənzilə düşərək onu və azyaşlı nəvəsi, 2003-cü il təvəllüdlü Sənan Vəlizadəni ağır yaralayıb. Aprelin 2-də Goranboy rayonunun Qarqucaq kənd sakini, 1938-ci il təvəllüdlü İbrahimov Əbdüləzim Mürsəl oğlu və Tapqaraqoyunlu kəndində yaşayan 1974-cü il təvəllüdlü Allahverdiyev Abbas Şiraslan oğlu da düşmənin atdığı mərmiyə tuş gələrək ağır yaralanıblar. Ermənistan Silahlı Qüvvələri tərəfindən atılmış mərmilərdən biri də Tərtər şəhər sakini, 1949-cu il təvəllüdlü Kruqlova Olqa İvanovnanın yaşadığı mənzili tamamilə dağıdıb. Göstərilən bütün faktlarla bağlı Cinayət Məcəlləsinin müvafiq maddələri ilə cinayət işləri başlanılıb, istintaq aparılır. Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin Təhlükəsizlik Şurasının iclasında qarşıya qoyduğu tapşırıqların icrasının, həmçinin döyüş əməliyyatları aparılan rayonların ərazisində ictimai asayişin qorunması, dinc əhalinin təhlükəsizliyinin təmin edilməsi üçün hüquq mühafizə orqanları tərəfindən bütün tədbirlər görülür, əməliyyat şəraiti nəzarətdə saxlanılır.      

Aprel 3, 2016 4:46

Ordumuz işğal olunan əraziləri azad etmək iqtidarındadır

  "Hazırda Azərbaycan Ordusu birtərəfli qaydada ATƏT-in Minsk Qrupunun həmsədrlərinin, o cümlədən Minsk Qrupuna həmsədr olan ölkələrin və digər beynəlxalq təşkilatların müraciətlərini nəzərə alaraq, aktiv hərbi əməliyyatları dayandırıb, öz mövqelərini möhkəmlədərək atəşkəs rejiminə əməl edir. Sadəcə, silahlı qüvvələrimiz ermənilərin hələ də davam edən hücum cəhdlərindən müdafiə olunur və lazımi cavab verir". Bunu APA-ya müsahibəsində Azərbaycan prezidentinin ictimai-siyasi məsələlər üzrə köməkçisi Əli Həsənov deyib. Ə. Həsənov bildirib ki, aprelin 2-də Ermənistanın Azərbaycan ordusunun mövqelərini, ətraf kəndləri, qaçqın düşərgələrini intensiv atəşə tutmasına cavab olaraq silahlı qüvvələrimiz hücuma keçmiş və vacib, strateji əhəmiyyət kəsb edən yüksəkliklərə nəzarəti ələ keçirmişdir. Hazırda isə ordumuz fəal hərbi əməliyyatları dayandırıb, yalnız müdafiə tədbirləri görür: "Amma ermənilər hələ də Azərbaycan mövqelərinə hücum edir, hətta bəzən daha intensiv şəkildə, bütün növ silahlardan atəş açırlar. Bu da onu göstərir ki, Ermənistan beynəlxalq təşkilatların, o cümlədən ATƏT-in Minsk Qrupunun çağırışlarına məhəl qoymur, mövcud qarşıdurmanı davam etdirmək istəyir". Ə. Həsənovun sözlərinə görə, prezident İlham Əliyevin rəhbərliyi ilə keçirilmiş Təhlükəsizlik Şurasının iclasında da vurğulanıb ki, Ermənistan növbəti dəfə təxribata əl atıb və bu təxribat cəbhə bölgələrində silahlı qarşıdurmaya şərait yaradıb: " Azərbaycan ordusu müdafiə olunub, sonra da əks-hücuma keçərək bu təxribata kifayət qədər layiqli cavab verib. Azərbaycan ordusu bu gün işğal altındakı əraziləri azad etmək iqtidarındadır. Bu reallığı biz davamlı olaraq təxribatçı Ermənistana nümayiş etdirmişik və gələcəkdə də nümayiş etdirəcəyik. Azərbaycan bütün lazımi tədbirləri görməklə bərabər, ATƏT çərçivəsində danışıqların bərpa olunmasına və məsələnin sülh yolu ilə həllinə hazırdır". Prezidentin köməkçisi onu da bildirib ki, Azərbaycan son proseslərlə bağlı həm beynəlxalq medianın, həm də sosial şəbəkə istifadəcilərinin obyektiv məlumat alması üçün zəruri tədbirlər görür: "Biz Azərbaycanın mövqeyi, baş vermiş hadisələrin təfsilatı ilə bağlı lazımi informasiyaları hər yerə çatdırırıq. Biz ermənilərin həm cəbhədəki, həm də informasiya məkanındakı təxribatına layiqli cavab veririk”.

Aprel 3, 2016 4:35

Növbəti təxribat…

Müdafiə Nazirliyininmətbuat xidmətindən verilən məlumata görə, hərbi cəhətdən iflasa uğrayan Ermənistan kriminal rejimi son vaxtlar cəbhədəki uğursuzluqlarının, canlı qüvvə və döyüş texnikası sarıdan xeyli itkisinin əvəzini çıxmaq məqsədilə növbəti dəfə təxribat törətməyə çalışıb. Aprelin 2-nə keçən gecə bütün cəbhəboyu mövqelərimiz iriçaplı silahlar, minaatanlar, qumbaraatan və artilleriya qurğularından intensiv atəşə tutulub. Eyni vaxtda qoşunların təmas xəttinə yaxın mülki əhalinin kompakt yaşadığı bir sıra yaşayış məntəqələri də düşmən atəşinə məruz qalıb. Qarşı tərəfin hərbi aktivliyini genişləndirməyə imkan verməmək, onun fəaliyyətinin qarşısını almaq məqsədilə Silahlı Qüvvələrimizin komandanlığı tərəfindən əməliyyat şəraiti qiymətləndirilərək dərhal cavab tədbirlərinin görülməsi üçün qərar verilib. Cəbhənin ən gərgin Ağdərə-Tərtər-Ağdam və Xocavənd-Füzuli istiqamətində yerləşən birliklər, artilleriya bölmələri və digər qoşun növlərinin birgə, əlaqəli fəaliyyəti nəticəsində qısa müddətdə Ermənistan silahlı bölmələrinə qarşı cavab tədbirləri həyata keçirilir. Cəbhəboyu zonada baş verən hadisələrlə bağlı mətbuata və ictimaiyyətə əlavə məlumat veriləcək. Kütləvi informasiya vasitələri nümayəndələrini rəsmi olmayan, dəqiqləşdirilməmiş və qeyri-obyektiv məlumatlardan istifadə etməməyə çağırırıq.

Aprel 2, 2016 5:20

Döyüş təcrübəsində əldə edilən biliklərin mübadiləsi

Martın 30-da Azərbaycan Respublikasının müdafiə naziri, general-polkovnik Zakir Həsənov ölkəmizdə səfərdə olan Misir Ərəb Respublikası Müdafiə Nazirliyi Sərhəd Qoşunlarının Komandanı, general-mayor Əhməd İbrahim Məhəmməd İbrahiminin başçılıq etdiyi nümayəndə heyəti ilə görüşüb. Müdafiə Nazirliyinin mətbuat xidmətindən AZƏRTAC-a bildiriblər ki, nazir qonaqlara regiondakı hərbi-siyasi vəziyyət, Ermənistan-Azərbaycan, Dağlıq Qarabağ münaqişəsi barədə ətraflı məlumat verib, müxtəlif sahələrdə inkişaf edən ikitərəfli münasibətləri yüksək qiymətləndirib. İki ölkənin hərbi sahədə əlaqələrinə toxunan general-polkovnik Zakir Həsənov ölkələrimizin müvafiq qurumları arasında həyata keçirilən uğurlu əməkdaşlığın perspektivlərini xüsusi qeyd edib. General-mayor Əhməd İbrahim Məhəmməd İbrahimi Misirin dostluq münasibətlərində olduğu Azərbaycan ilə əməkdaşlığı daha da inkişaf etdirmək istəyini, bunun üçün geniş imkanların mövcudluğunu diqqətə çatdırıb. Görüşdə Azərbaycan ilə Misir arasında hərbi, hərbi-texniki istiqamətlərdə münasibətlərin genişləndirilməsinin vacibliyi, eləcə də terrorizmə qarşı birgə mübarizə, döyüş təcrübəsi sahəsində əldə edilən biliklərin mübadiləsi və qarşılıqlı maraq doğuran digər məsələlər müzakirə olunub.  

Mart 31, 2016 1:06