“PAŞA Sığorta” yeni sosial xarakterli müsabiqəyə başlayır

"PAŞA Sığorta" şirkəti "Sağlamlıq üçün addımla!" adlı yeni sosial xarakterli müsabiqəyə başlayır. Şirkətdən Azərtac-a bildiriblər ki, müsabiqənin keçirilməsində əsas məqsəd insanların fəal və sağlam həyat tərzinə cəlb olunmasıdır. Dörd həftə davam edəcək müsabiqədə hər həftə ən yüksək nəticə göstərmiş 3 şəxs müsabiqənin qalibi elan olunacaq və "PAŞA Sığorta" şirkəti tərəfindən "Amburan" istirahət mərkəzinə 2 nəfərlik hədiyyə kuponu əldə edəcək.xeber100.com

Əmək və Əhalinin Sosial Müdafiəsi Nazirliyinin məlumatı…

Əmək və Əhalinin Sosial Müdafiəsi Nazirliyinin (ƏƏSMN) “İş yerinə dair arayış” e-xidmətindən istifadə sayı ötən ayla müqayisədə iyul ayında 36 faiz artaraq 21 min 808-ə çatıb. Bu barədə Azərtac-a ƏƏSMN-in ictimaiyyətlə əlaqələr şöbəsindən məlumat verilib. Məlumatda bildirilir ki, “İş yerinə dair arayış” e-xidməti istifadəçiyə real vaxt rejimində öz iş yeri haqqında onun istəyinə uyğun olaraq ümumi təyinatlı, yaxud konkret bir quruma təqdim etmək üçün əmək haqqı göstərilməklə və ya göstərilmədən e-arayış əldə etmək imkanı verir. Portal tərəfindən avtomatik olaraq formalaşdırılan iş yerinə dair arayışı müvafiq təşkilata elektron şəkildə göndərmək, yaxud çap şəklində təqdim etmək mümkündür. Arayışda işçi və işəgötürənə aid məlumatlar, əmək müqaviləsinin bağlandığı tarix və s. əksini tapır. Bu e-xidmətdən istifadə nəticəsində istifadəçinin həmin arayışın alınması üçün işlədiyi müəssisənin aidiyyəti şəxslərinə müraciət etməsinə, bunun üçün vaxt və zəhmət çəkməsinə artıq ehtiyac qalmır. Eyni zamanda, arayışın təqdim edildiyi qurum arayışdakı ştrix-kod vasitəsilə və portaldakı müvafiq xidmətdən istifadə edərək bu sənəddə əksini tapan məlumatların həqiqiliyini yoxlaya bilir. “İş yerinə dair arayış” elektron xidməti 2014-cü ilin dekabr ayından əhalinin istifadəsindədir. Həmin vaxtdan avqustun 1-dək vətəndaşlar bu e-xidmətdən ümumilikdə 336 min 35 dəfə faydalanıblar.xeber100.com

“Dünya gəncliyin gözü ilə” adlı fotosərgi layihəsinə start verilib

Azərbaycan Respublikasının Prezidenti yanında Gənclər Fondunun maliyyə dəstəyi ilə “Dünya gəncliyin gözü ilə” adlı fotosərgi layihəsinə start verilib. Fərdi layihənin müəllifi Musa Əmrahovdur. Fonddan Azərtac-a bildiriblər ki, layihənin məqsədi yeniyetmə və gənclərin yeni media (xüsusilə foto) texnologiyalarından istifadəsini artırmaq, onların cəmiyyətə səmərəli inteqrasiyasına, foto işi vasitəsilə fikirlərini, sosial mesajlarını cəmiyyətə və ictimaiyyətə çatdırmağa kömək etməkdir. Layihə çərçivəsində daxil olan müraciətlər əsasında foto təlimləri üçün qrup formalaşdırılacaq, mövzu üzrə nəzəri və praktiki təlimlər keçiriləcək, yekunda isə fotosərgi təşkil ediləcək. Bu ilin oktyabrında başa çatacaq layihədən 1000-dən çox uşaq və gənc yararlanacaq.xeber100.com

Ekologiya və Təbii Sərvətlər Nazirliyinin məlumatına görə…

Avqustun 8-də Bakı və Abşeron yarımadasında hava şəraiti yağmursuz keçəcək, şimal-şərq, şərq küləyi əsəcək. Ekologiya və Təbii Sərvətlər Nazirliyinin mətbuat xidmətindən Apa-ya verilən məlumata görə, havanın temperaturu yarımadada gecə 22-25, gündüz 34-38, Bakıda gecə 23-25, gündüz 36-38 dərəcə isti olacağı gözlənilir. Atmosfer təzyiqi 757 mm civə sütunu, nisbi rütubət gecə 50-60%, gündüz 20-30% təşkil edəcək. Abşeron çimərliklərində dəniz suyunun temperaturu Sumqayıt, Novxanı, Pirşağı, Nardaran, Bilgəh, Zaqulbada 24-25, Buzovna, Mərdəkan, Şüvəlanda 25-26, Türkan, Hövsan, Sahil, Şıxda 27-28 dərəcə isti olacağı gözlənilir. Azərbaycanın rayonlarında hava yağmursuz keçəcək, şərq küləyi əsəcək. Havanın temperaturu gecə 20-25, gündüz 35-40, bəzi yerlərdə 42 dərəcə, dağlarda gecə 15-20, gündüz 27-32 dərəcə isti olacağı gözlənilir.xeber100.com

“Etik kadrlar” sosial çarx müsabiqəsinə start verilib

Prezident yanında Gənclər Fondunun maliyyə, Azərbaycan Tələbə Gənclər Təşkilatları İttifaqının təşkilati dəstəyi ilə “Etik kadrlar” sosial çarx müsabiqəsinə start verilib. Fonddan Azərtac-a bildiriblər ki, layihənin məqsədi gənclər arasında ictimai davranış qaydalarının təbliği, onların maarifləndirilməsi və gənc istedadların üzə çıxarılmasıdır. Müsabiqə üçün hazırlanan sosial çarxlarda ictimai davranış qaydalarında mövcud problemlər gənclərin gözü ilə təqdim olunacaq və onların aradan qaldırılması yolları araşdırılacaq. Ekspertlər tərəfindən seçiləcək ən yaxşı üç sosial çarxın sahibləri diplomla təltif olunacaq.xeber100.com

Hidrometeorologiya Departamenti xəbərdarlıq edir

Azərbaycanda isti hava şəraiti ilə bağlı növbəti xəbərdarlıq edilib. Ekologiya və Təbii Sərvətlər Nazirliyinin Milli Hidrometeorologiya Departamentindən Apa-ya verilən xəbərə görə, avqust ayının birinci ongünlüyündə isti hava şəraiti davam edəcək. Havanın maksimal temperaturu Bakıda və Abşeron yarımadasında 34-39 dərəcə  isti olacağı gözlənilir. Avqust ayının birinci ongünlüyündə ölkə ərazisində isti hava şəraiti davam edəcək. Havanın maksimal temperaturu 35-40 dərəcə, Naxçıvan MR-da və Mərkəzi-Aran rayonlarının bəzi yerlərində 42 dərəcə isti olacağı gözlənilir.xeber100.com

Qlobal iqlim dəyişikliyi…

Təbii mövsüm dəyişikliyi təhlükə altındadır. Qlobal iqlim dəyişikliyi artıq o qədər ciddidir ki, alimlər fəsillərin dəyişməsinin təbii və normal olmadığını proqnozlaşdırırlar. ecoportal.ru saytının verdiyi xəbərə görə, bu barədə kanadalı alimlər Robert Skraybler və Polo Bekvit bildiriblər. Onların məlumatına görə, Şimal yarımkürəsi artıq ekvatordan kənara çıxır. Bu isə gələcəkdə yay və qışın yerini dəyişməsinə gətirib çıxaracaq. Məhz iki okean cərəyanı arasındakı baryeri qış və yay arasında olan dəqiq fərq tənzimləyir. Bu tarazlığın pozulması təbii fəlakətlərə, o cümlədən ərzaq böhranına səbəb olacaq.xeber100.com

Metropolitendə təcrübə kursları başlayıb

“Bakı Metropoliteni” QSC-nin təlim-tədris mərkəzində ölkənin ali təhsil müəssisələrinin savadlı, bacarıqlı və hazırlıqlı tələbələrindən ibarət SABAH qrupu iştirakçılarının metropolitendə təcrübə kurslarına başlanılıb. QSC-nin mətbuat xidmətindən Azərtac-a bildirilib ki, məqsəd tələbələrin fərdi və peşəkar inkişafına dəstək olmaq, həmçinin akademik və iş mühitləri arasında əlaqələri möhkəmlətmək üçün “Bakı Metropoliteni” QSC-nin müvafiq struktur bölmələrində onların yiyələnəcəkləri ixtisaslar üzrə təcrübə toplamasıdır. Layihəyə uyğun olaraq, metropolitenin müvafiq struktur bölmələrində Azərbaycan Dövlət İqtisad Universiteti, Azərbaycan Dövlət Neft və Sənaye Universiteti, Azərbaycan Texniki Universiteti və Azərbaycan Memarlıq və İnşaat Universitetinin SABAH qrupuna daxil olan tələbələrinə ixtisasları üzrə müvafiq sahələrdə təcrübə toplaması üçün bütün şərait yaradılıb. Təcrübə bir ay müddətində davam edəcək. Kursun sonunda iştirakçılara “Bakı Metropoliteni” QSC-də təcrübə keçmələrinə dair xasiyyətnamə təqdim olunacaq ki, bu da metropolitendə çalışmaq arzusunda olan gənclərə verilən növbəti dəstəkdir. Ümumiyyətlə, “Bakı Metropoliteni” QSC artıq iki ildir ki, ölkənin aparıcı ali təhsil ocaqları ilə qarşılıqlı razılaşma əsasında əhəmiyyətli tədbirlər həyata keçirir. Hazırda “Bakı Metropoliteni” QSC ilə Azərbaycan Texniki Universiteti, Azərbaycan Dövlət Neft və Sənaye Universiteti, Azərbaycan Memarlıq və İnşaat Universiteti arasında qarşılıqlı əməkdaşlıq müqavilələri mövcuddur.xeber100.com

Azəravtoyol” ASC-nin məlumatına əsasən…

Bakı şəhərində avtonəqliyyat vasitələrinin hərəkətinin tənzimlənməsi məqsədi ilə yol cizgi və yol göstərici xətlərinin, həmçinin, piyada keçidlərinin (zolaqların) yenidən rənglənməsi işləri davam etdirilir. “Azəravtoyol” ASC-dən verilən məlumata görə, axşam saat 22:00-dan etibarən səhər saatlarına qədər, Neftçilər prospektinin, Azneft dairəsindən Bakı Dəniz Vağzalının qarşısına qədər olan hissəsində yol cizgi və yol göstərici xətlərinin rənglənməsi işləri aparılacaq. Bununla əlaqədar olaraq sözügedən prospektdə avtonəqliyyat vasitələrinin hərəkəti məhdudlaşdırılacaq.Baş verə biləcək narahatlığa görə vətəndaşlardan üzr istəyirik və sürücülərdən hərəkət istiqamətlərinə uyğun olaraq öncədən alternativ yollar seçməklərini tövsiyyə edirik.xeber100.com

Əmək və Əhalinin Sosial Müdafiəsi Nazirliyinin məlumatına görə…

Əmək və Əhalinin Sosial Müdafiəsi Nazirliyinin Protez-Ortopedik Bərpa Mərkəzi, onun Gəncə şəhərindəki filialı və Naxçıvan istehsalat sahəsi tərəfindən cari ilin yanvar-iyul aylarında əlilliyi olan 8 min 379 şəxsə protez-ortopedik bərpa xidmətləri göstərilib. Həmin şəxslərdən 987 nəfərini ölkəmizin ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlil olmuş şəxslər təşkil edib. Bu barədə Azərtac-a nazirliyin ictimaiyyətlə əlaqələr şöbəsindən məlumat verilib. Məlumata görə, bu dövrdə əlilliyi olan şəxslər ümumilikdə 20 min 501 protez-ortopedik məmulat və reabilitasiya vasitəsilə təmin ediliblər. Onlardan 1034 ədədi əlil arabası, 646 ədədi aşağı və yuxarı ətraf protezi, 781 ədədi aşağı və yuxarı ətraf ortezi, 1750 ədədi dirsəkaltı və qoltuqaltı ağac, 578 ədədi dördayaqlı dayaq vasitəsi, 489 ədədi bel və boyun nahiyəsi üçün korset olub. Həmçinin 386 ədəd eşitmə aparatı, 1675 ədəd əsa, 1967 cüt protez ayaqqabı, 2 min 602 cüt ortopedik ayaqqabı, 5 min 467 ədəd müxtəlif yardımçı reabilitasiya vasitəsi və s. onların istifadəsinə verilib. Bununla yanaşı, əlilliyi olan şəxslərə məxsus 557 ədəd reabilitasiya vasitəsi və protez-ortopedik məmulatın təmiri işləri aparılıb. Mərkəzin və onun Gəncə şəhərindəki filialının stasionar bölmələrində ötən yeddi ayda əlilliyi olan 431 şəxsə müvafiq xidmətlər göstərilib.xeber100.com