2016-cı il üçün ilin fəsillərinin gəlmə vaxtı açıqlanıb

Azərbaycanda 2016-cı il üçün ilin fəsillərinin gəlmə vaxtı açıqlanıb. AMEA Şamaxı Astrofizika Rəsədxanasından Apa-ya verilən xəbərə görə, yayın Azərbaycana gəlişi iyunun 21-i Bakı vaxtı ilə saat 02:34-də olacaq. Payızın Azərbaycana gəlişi sentyabr 22-si Bakı vaxtı ilə 18:21, qışın gəlişi isə dekabrın 21-i  saat 14:44-ə təsadüf edəcək. Yaz fəsli bu il martın 20-də Bakı vaxtı ilə saat 08:30-da Azərbaycana daxil olub. Məlumatda bildirilir ki, təqvim üzrə mövsümlər – dünyanın əksər ölkəsində ilin hər biri 3 təqvim ayına bərabər olan 4 mövsümə bölünməsi qəbul edilib. Astronomik mövsümlər - gündönümündən (yay və qış) və gecə-gündüzün bərabərləşməsinə uyğun bölünür. Fenologiya - mövsümlərin müddəti təbiət hadisələrinə uyğun olaraq bölünür (təbiətdə iqlimin mövsümi dəyişikliyinə uyğun).xeber100.com  

Daxili işlər naziri vətəndaşları qəbul edəcək

Azərbaycan Respublikasının daxili işlər naziri, general-polkovnik Ramil Usubov iyunun 25-də saat 10:00-da Quba Rayon Polis Şöbəsində Quba, Qusar, Xaçmaz, Şabran, Siyəzən, Xızı şəhər və rayonlarının sakinlərini qəbul edəcək. Daxili İşlər Nazirliyinin mətbuat xidmətindən Azərtac-a bildiriblər ki, vətəndaşlar daxili işlər orqanları əməkdaşlarının fəaliyyətinə və qurumun səlahiyyətlərinə aid məsələlərlə bağlı müraciət etməklə qəbula yazıla bilərlər. Qəbula gələnlər şəxsiyyət vəsiqəsini təqdim etməlidirlər.xeber100.com

“Azərbaycan gəncləri həftəsi” təşkil edilib

Azərbaycanın Yunanıstandakı səfirliyi, Gənclər və İdman Nazirliyi, Krit və Pirey bələdiyyələri tərəfindən bu ölkədə “Azərbaycan gəncləri həftəsi” təşkil edilib. Tədbirlər əsasən, Yunanıstanın paytaxtı Afinada, Krit bölgəsinin Xanya, Retimno, İraklion və Sitia şəhərlərində keçirilib. Azərtac xəbər verir ki, məqsəd iki ölkə arasında gənclər sahəsində əməkdaşlığın inkişafına nail olmaq, milli mənəvi dəyərlərimizi, musiqi və rəqslərimizi xarici ölkələrdə təbliğ etməkdir. Tədbirlərdə Gənclər və İdman Nazirliyinin xətti ilə Afinaya ezam olunan gənc musiqiçilərimiz muğamlardan ibarət kompozisiyalar ifa edib, “Cəngi”, “İgidlər”, “İnnabı”, “Naz eləmə” və digər milli rəqslərimizi nümayiş etdiriblər. Konsertlərdə görkəmli bəstəkarlarımız Üzeyir Hacıbəylinin, Tofiq Quliyev və digərlərinin əsərləri də ifa olunub. Bununla yanaşı, gənc musiqiçilərimiz Afina Konservatoriyasında əcnəbi musiqiçilər üçün “Azərbaycanın milli musiqi alətləri” mövzusunda ustad dərsləri keçib, milli musiqimiz, rəqslərimiz, muğamlarımız haqqında ətraflı məlumat veriblər.xeber100.com

Yeni layihəyə start verilib

Lənkəranda fəaliyyət göstərən “Maarifpərvərlik” Azərbaycan Gənclərinin İctimai Yardım Assosiasiyası” İctimai Birliyi cənub bölgəsində “Erkən nikahlar valideyn məsuliyyətsizliyinin və ictimai qınaqsızlığın nəticəsidir!” layihəsinin icrasına start verib.İctimai Birlikdən Azərtac-a bildiriblər ki, layihənin məqsədi təhsildən yayınma, ailədaxili zorakılığın, boşanmaların, körpə və ana ölümü hallarının artmasına səbəb olan erkən nikahlar və onun fəsadlarına qarşı mübarizəni gücləndirmək, cəmiyyətdə valideyn məsuliyyətini və ictimai qınağı artırmaqdır. Avqustun 10-dək davam edəcək layihə çərçivəsində seçilən 25 gənc üçün erkən nikahlar mövzusunda üçgünlük təlim kursları keçiriləcək. Kurslar iyulun 15-17-də Lənkərandakı “AB Qala” otelində təşkil olunacaq. Təlimdə iştirak etmək istəyən gənclər İctimai Birliyin internet səhifəsində (www.epsaya.az) təqdim olunan müvafiq ərizə formasını doldurub iyulun 3-də[email protected] elektron ünvanına göndərməlidirlər.xeber100.com

“Azərbaycan İctimaiyyətlə Əlaqələr Assosiasiyası”…

Bir sıra şirkətlərin ictimaiyyətlə əlaqələr (PR -public relations) mütəxəssislərinin toplantısında "Azərbaycan İctimaiyyətlə Əlaqələr Assosiasiyası" İctimai Birliyi (Azerbaijan Public Relations Association - APRA) təsis edilib. APRA-dan Azərtac-a bildiriblər ki, "AtaHolding", "Veysəloğlu", "Excelsior Hotel Baku", "Paşa Həyat Sığorta", "Bakcell", "AtaBank", "Caspian Development Bank", "Hed Akademi" şirkətlərinin PR menecerləri və "Alibayov Kommunikasiya & Konsaltinq" şirkətinin rəhbərinin iştirak etdikləri görüşdə APRA-nın təsis edilməsi ilə bağlı məsələlər və assosiasiyanın qarşısında duran vəzifələr müzakirə olunub. "Veysəloğlu" Şirkətlər Qrupunun ictimaiyyətlə əlaqələr şöbəsinin müdiri, APRA-nın sədri İlham Məmmədov bildirib ki, yeni təsis edilən Azərbaycan İctimaiyyətlə Əlaqələr Assosiasiyası Azərbaycanın PR sahəsinin inkişafına öz töhfəsini verəcək. Assosiasiya beynəlxalq PR assosiasiyalarına da üzv olacaq. Təşkilatın yaradılmasında əsas məqsəd ölkədə ictimaiyyətlə əlaqələr sahəsində tədrisin mükəmməlləşdirilməsi, kadr potensialının artımı üçün şəraitin yaradılması və bu sahənin hərtərəfli, keyfiyyət və kəmiyyət baxımdan inkişafına nail olmaqdır. "AtaHolding" korporativ kommunikasiyalar şöbəsinin rəisi Dilarə Zamanova qeyd edib ki, biz assosiasiyanın qarşıdakı fəaliyyətində uzun müddət ictimai əlaqələr sahəsində topladığımız bilik və təcrübəmizdən istifadə edəcəyik. Assosiasiya PR tətbiqi sahəsində yüksək peşəkar və etik standartlara riayət edilməsinə kömək edəcək. İctimaiyyətlə əlaqələr üzrə yerli mütəxəssislərin keyfiyyətli artımı üçün şərait yaradacaq. Assosiasiya üzvlərinin tədrisi məqsədilə onlar üçün müxtəlif kurslar, treninqlər, seminarlar, konfranslar təşkil ediləcək. Müvafiq hökumət və qeyri-hökumət təşkilatları, dövri nəşrlər və elektron kütləvi informasiya vasitələri ilə münasibətlər qurulacaq, onlarla əməkdaşlıq və müştərək layihələr həyata keçiriləcək.xeber100.com

“Narkomaniya bəşəriyyətin bəlasıdır” mövzusunda tədbir keçirilib

Suraxanı rayonundakı Heydər Əliyev Mərkəzində rayon icra hakimiyyətinin və rayon polis idarəsinin birgə təşkilatçılığı ilə “Narkomaniya bəşəriyyətin bəlasıdır!” mövzusunda tədbir keçirilib. Tədbirdə Suraxanı Rayon Polis İdarəsinin rəisi Namiq Həsənov bildirib ki, hazırda bəşəriyyəti narahat edən məsələlərdən biri də narkomaniyadır. Artıq “ağ ölüm” kimi az qala bütün dünyanı ağuşuna alan bu sosial bəla hər il çoxlu sayda insanın ölümünə səbəb olur. Azərbaycan da narkomaniyanın acı nəticələrindən ziyan çəkir. Azərbaycan hökuməti ümumbəşəri problemə çevrilən narkomaniyanın yayılmasının qarşısının alınması məqsədilə tədbirlər görür, ona qarşı mübarizədə dünya ölkələri və beynəlxalq təşkilatlarla birgə fəaliyyət göstərir. Narkomaniyaya meyil əsasən gənclik dövründə başlanır. Buna görə də məktəb dövründən profilaktik tədbirlərə başlanmalıdır. Gənclər arasında narkomanlığın yayılmasının səbəbləri savadsızlıq, narkotik satıcılarının himayə edilməsi, narkotik biznesidir. Narkomaniya ilə bağlı mövcud problemlər daim nəzarətdə və ictimaiyyətin diqqətində saxlamaq üçün BMT-nin təşəbbüsü ilə 1987-ci il iyunun 26-dan etibarən Beynəlxalq Narkomaniya ilə Mübarizə Günü təsis edilib. Tədbirdə rayon icra hakimiyyəti başçısının müavini Afət Həsənova qeyd edib ki, narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığın yayılması ilə mübarizə istiqamətində dünyanın bir çox ölkəsində qeyri-hökumət təşkilatları minlərlə proqramlar təşkil edir. Bu gün ölkəmizdə narkotiklərin qanunsuz dövriyyəsinə qarşı mübarizə üzrə normativ-hüquqi bazanın təkmilləşdirilməsi, bu sahədə hüquq-mühafizə orqanlarının fəaliyyətinin gücləndirilməsi və beynəlxalq əməkdaşlığın genişləndirilməsi hüquq mühafizə orqanlarının daim diqqət mərkəzindədir. Narkomanlıq və narkobiznesin cəmiyyətin mənəvi, əxlaqi dəyərlərini sarsıtdığını deyən Suraxanı rayon prokuroru Rəhim Əliyev vurğulayıb ki, bu bəla sosial-iqtisadi inkişafa mənfi təsir göstərir, insanların həyat və sağlamlığına ciddi təhlükə yaradır və cinayətkarlığın artmasına səbəb olur. Narkotik vasitələrin qanunsuz dövriyyəsinin artması, narkotiklərlə bağlı cinayətlərin getdikcə daha çox ciddi problemə çevrilməsi və narkotik vasitələrə aludə olanlar arasında yeniyetmə və gənclərin olması təəssüf hissi doğurur. Rayon polis idarəsinin narkotiklərlə mübarizə bölməsinin rəisi Anar Rüstəmov deyib ki, bu ilin beş ayı ərzində 27 fakt aşkar olunub. Cinayətkarlardan müsadirə olunaraq dövriyyədən çıxarılmış narkotik vasitələrin ümumi çəkisi 12 kiloqram 405 qram təşkil edib. Ötən ilin müvafiq dövrü ilə müqayisədə cinayət faktlarının sayı azalıb, lakin müsadirə edilmiş narkotik vasitələrin ümumi çəkisi artıb. Sonda “Narkomaniya bəşəriyyətin bəlasıdır!” adlı videoçarx nümayiş olunub.xeber100.com

Bu gün Ümumdünya Ətraf Mühit Günüdür

5 iyun - Ümumdünya Ətraf Mühit Günüdür. Ekologiya və Təbii Sərvətlər Nazirliyinin mətbuat xidmətindən Apa-ya verilən məlumata görə, ətraf mühitin mühafizəsi və ekoloji problemlər Azərbaycanda da diqqət mərkəzindədir. Ekologiya və Təbii Sərvətlər Nazirliyi hər il 5 iyun - Ümumdünya Ətraf Mühit Günü ərəfəsində ətraf mühitin qorunması, təbiətdən, yeraltı sulardan, mineral xammal ehtiyatlarından və yerüstü sərvətlərdən səmərəli istifadə edilməsi, onların bərpası və mühafizəsi, bioloji müxtəlifliyin qorunub saxlanılması məqsədilə müxtəlif tədbirlər həyata keçirir. Ekoloji təhlükəsizliyin təmin olunması üçün ətraf mühitin çirklənməsinin minimuma endirilməsi və mühafizəsinin təkmilləşdirilməsi, indiki və gələcək nəsillərin tələbatını ödəmək məqsədilə təbii sərvətlərdən səmərəli istifadə, alternativ enerji mənbələrindən yararlanmaq və enerji effektivliyinə nail olmaq, qlobal ekoloji problemlər üzrə milli səviyyədə tələbatların qiymətləndirilməsi və həlli yollarının müəyyənləşdirilməsi, beynəlxalq təşkilatlarla əlaqələrin genişləndirilməsi bu gün də Azərbaycan dövlətinin ekoloji siyasətinin əsas istiqamətləridir. Prezident İlham Əliyevin imzaladığı fərmanlarda, təsdiq etdiyi dövlət proqramlarında ekoloji mühitin sağlamlaşdırılması məqsədilə nəzərdə tutulan hədəflərin reallaşması üçün yerinə yetirilməsi zəruri olan vəzifələr müəyyənləşdirilib, biomüxtəlifliyin mühafizəsi, meşələrin inkişafı, yaşıllıqların artırılması, su ehtiyatlarının davamlı idarə olunması sahəsində nəzərəçarpacaq nailiyyətlər əldə olunub. Qeyd edək ki, 1972–ci ildə Birləşmiş Millətlər Təşkilatı Baş Assambleyasının İsveçin paytaxtı Stokholmda keçirilən iclasında 5 iyun tarixinin Ümumdünya Ətraf Mühit Günü kimi qeyd olunmasına qərar verilib. O vaxtdan etibarən bu gün bütün dünyada təntənəli şəkildə qeyd olunur. Builki Beynəlxalq Ətraf Mühit Günü “Vəhşi heyvanların qanunsuz ticarəti ilə mübarizə” mövzusuna həsr olunub.xeber100.com

Milli Hidrometeorologiya Departamentinin verdiyi xəbərə görə…

İyunun 5-də Bakı və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Səhər bəzi yerlərdə zəif duman olacağı, gecəyə doğru yarımadanın bəzi yerlərində qısamüddətli yağış yağacağı ehtimalı var. Mülayim şimal-qərb küləyi əsəcək. Ekologiya və Təbii Sərvətlər Nazirliyinin Milli Hidrometeorologiya Departamentindən  verilən xəbərə görə, havanın temperaturu Abşeron yarımadasında gecə 17-21 dərəcə isti, gündüz 25-30 dərəcə isti, Bakıda gecə 18-20 dərəcə isti, gündüz 27-29 dərəcə isti olacaq. İyunun 5-də Azərbaycanın rayonlarında – əsasən gecə və axşam bəzi yerlərdə şimşək çaxacağı, arabir yağış yağacağı gözlənilir. Ayrı-ayrı yerlərdə intensiv olacağı, dolu düşəcəyi ehtimalı var. Qərb küləyi ayrı-ayrı yerlərdə arabir güclənəcək. Havanın temperaturu Aran rayonlarında gecə 17-22 dərəcə isti, gündüz 29-33 dərəcə isti, dağlarda gecə 9-14 dərəcə isti, gündüz 18-23 dərəcə isti olacağı gözlənilir.xeber100.com

Nərimanov rayonunda hərəkət qismən məhdudlaşdırılacaq

İyunun 2-də saat 11:00-dan etibarən Nərimanov rayonu Əliyar Əliyev, axşam saat 23:00-dan isə Ağa Nemətulla küçələrində rənglənmə işləri aparılacaq. Bu barədə  Azərtac-a  “Azəravtoyol” ASC-nin mətbuat xidmətindən bildirilib. Bir neçə saat ərzində davam edəcək işlər zamanı sözügedən küçələrdə hərəkət hissə-hissə qismən məhdudlaşdırılacaq. Sürücülərdən həmin küçələrdə sıxlığın yaranmaması üçün alternativ yollardan istifadə etmələri tövsiyə olunur.xeber100.com

Dünya Tütünsüz Günü qeyd edilib

Mayın 31-i hər yerdə Dünya Tütünsüz Günü (World No Tobacco Day) qeyd edilir. Bu gün Dünya Səhiyyə Təşkilatı (DST) Assambleyasının 42-ci sessiyasında 1988-ci il 19 nömrəli qətnamə əsasında təsis olunub. DST və tərəfdaşları hər il bu günü qeyd edir, tütündən istifadənin sağlamlıq üçün yaratdığı təhlükələrə diqqət yönəldir və dövlətləri tütün istehlakının miqyasının azaldılması üzrə effektiv siyasət aparmağa çağırır. Dünya Tütünsüz Günündə Azərbaycanda da bir sıra tədbirlər həyata keçirilir. Bakının 189-190 nömrəli tam orta məktəbində Səhiyyə Nazirliyinin İctimai Səhiyyə və İslahatlar Mərkəzi (İSİM) Səbail Rayon İcra Hakimiyyətinin birgə təşkilatçılığı ilə media nümayəndələri üçün brifinq keçirib. Tədbir çərçivəsində bu məktəbin şagirdləri arasında asfalt üzərində “Tütünsüz dünya yarat!” devizi altında rəsm müsabiqəsi təşkil olunub. Azərtac xəbər verir ki, tədbirdə çıxış edən məktəbin direktoru Ceyran Quliyeva, İSİM-in layihələrin əlaqələndirilməsi şöbəsinin müdiri Səbinə Babazadə, Səhiyyə Nazirliyi Elmi-Tədqiqat Ağciyər Xəstəlikləri İnstitutunun direktor müavini İradə Axundova, ekspert Şəhla Mirzəzadə və Milli Onkologiya Mərkəzinin torakal onkologiya bölməsinin elmi işçisi Arif Hətəmov sağlam həyat tərzinin xüsusilə gənclər arasında aktual məsələ olduğunu bildiriblər. Diqqətə çatdırılıb ki, müasir cəmiyyətdə siqaret, narkomaniya və alkoqolla bağlı problemlər kəskinləşib. Bu zərərli vərdişlər hər il minlərlə insanın səhhətinə sağalmaz ziyan vurur. Problemin aktuallığı nəzərə alınaraq Azərbaycan Prezidentinin 2015-ci il 23 dekabr tarixli Sərəncamı ilə “Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün Strategiya” təsdiq edilib. Bu Sərəncamın icrası ilə əlaqədar ictimaiyyət üçün maarifləndirmə tədbirləri və gənclər arasında sağlamlıq məsələlərinə dair forumlar keçirilir. Məlumat verilib ki, İSİM tütün üzrə tədqiqat aparıb və Bakı şəhərinin təhsil müəssisələrində “Tütünsüz həyat: seçim et!” mövzusunda təqdimat keçirib. 2012-ci ildə İSİM ABŞ Xəstəliklərə Nəzarət və Profilaktika Mərkəzinin dəstəyi ilə Azərbaycanda 13-15 yaşlı gənclər arasında tütündən istifadə üzrə qlobal tədqiqatın nəticələrini (GYTS) açıqlayıb. Bu tədqiqat orta məktəblərdə 2000-dən çox şagirdi əhatə edib. Sorğunun nəticələrinə əsasən, şagirdlərin 94 faizi ictimai yerlərdə siqaret çəkməyə qadağa qoyulmasını lazım bilir. DST-nin məlumatına görə, hər il 6 milyon insan tütünün yaratdığı xəstəliklər nəticəsində həyatını itirir. Qeyd edilib ki, Azərbaycanda kişilərin 40-60, qadınların 2-10 faizi siqaret çəkir. Əksəriyyət siqaret çəkməyə 12-16 yaşında başlayır və siqaretə qarşı mübarizəni uşaqlar arasından başlamaq lazımdır. Tədbirdə məktəblilərə İSİM-in bukletləri, müxtəlif tematik nəşrləri paylanılıb. Sonda asfalt üzərində rəsm müsabiqəsinin qaliblərinə qiymətli hədiyyələr təqdim edilib.xeber100.com