Milli Basketbol Assosiasiyasının pley-off mərhələsində növbəti oyunlar keçirilib

Milli Basketbol Assosiasiyasının (MBA) pley-off mərhələsində növbəti oyunlar keçirilib.Azərtac xəbər verir ki, “Mayami Hit” komandası “Miluoki Baks”la seriyanın 2-ci görüşündə qarşılaşıb. İlk oyunu qələbə ilə başa vuran mayamililər bu dəfə də qalib gələrək seriyada üstünlüklərini möhkəmləndiriblər. Böyük fasiləyə kimi onlar 66:60 hesabı ilə önə keçiblər. Qalan hissələrdə Miluoki basketbolçuları fərqi azaltsalar da, məğlubiyyətdən xilas ola bilməyiblər. Beləliklə “Mayami Hit” 116:114 hesabı ilə qələbə qazanıb. Bununla da seriyada hesab 2:0 olub. Miluoki təmsilçisi məğlub olsa da, komandanın ulduzu Yannis Adetokunbo 29 xal, 19 ribaund, 3 məhsuldar ötürmə ilə fərqlənib.Digər oyunda isə “Hyuston Rokets” və “Oklahoma Siti Tander” üz-üzə gəliblər. Seriyada hesab 3:3 olduğundan yeddinci qarşılaşma həlledici rol oynayıb. Hyuston basketbolçuları bu dəfə 104:102 hesabı ilə qələbə qazanaraq dörddəbir finala çıxan sonuncu komanda kimi yadda qalıb. Hyustonlular bu mərhələdə “Los Anceles Leykers”lə görüşəcəklər. İlk oyun sentyabrın 5-də keçiriləcək.xeber100.com    

“US Open” beynəlxalq tennis turnirində ikinci mərhələnin görüşləri keçirilir

ABŞ-da “Böyük dəbilqə” seriyasından “US Open” beynəlxalq tennis turnirində ikinci mərhələnin görüşləri keçirilir.Azərtac xəbər verir ki, kişi tennisçilərin mübarizəsində favoritlərdən Novak Cokoviç böyük britaniyalı Kayl Edmunda qalib gəlib. Görüş 3:1 hesabı ilə serbiyalı raketka ustasının xeyrinə olub. Serbiyalı tennisçi növbəti mərhələdə almaniyalı Yan Lennard Ştrufla görüşəcək. İddialılardan Stefanos Sitsipas daha inamlı qələbə qazanıb. O, yerli idmançı Maksim Kressini 3 setdə məğlub edib. Yunanıstanlı raketka ustası növbəti mərhələdə xorvatiyalı Borna Çoriçlə qarşılaşacaq. Belçikalı David Qoffen də etimadı doğruldub. O, Cənubi Afrika Respublikasından olan Lloyd Harrislə oyunda 4 setdə qələbəni təmin edərək növbəti mərhələyə adlayıb və serbiyalı Filip Krayinoviçə rəqib olub.Qadınların turnirinə gəlincə, ali mükafatı qazanmağa əsas namizədlərdən hesab olunan çexiyalı Karolina Plişkova gözlənilmədən uduzub. Fransalı Karolin Qarsiya güclü rəqibindən 2 setdə üstün olub. O, növbəti mərhələdə amerikalı Cennifer Breydi ilə görüşəcək. Plişkovanın həmvətəni Petra Kvitova isə üçüncü mərhələyə vəsiqə qazana bilib. O, ukraynalı Katerina Kozlovanı 2 setin yekununa əsasən məğlub edərək növbəti mərhələyə adlayıb. K.Kvitovanın rəqibi yerli idmançı Cessika Pequla olacaq. Yaponiyalı Naomi Osaka da italiyalı Kamila Corcini çətinlik çəkmədən 2 setdə məğlub edib. N.Osaka növbəti görüşünü ukraynalı Marta Kostyuka qarşı keçirəcək.xeber100.com

“Səbail” futbol klubu millimizin üzvü ilə bir illik müqavilə imzalayıb

2019/2020-ci il mövsümünün sonunda "Keşlə" klubundan ayrılan Əfran İsmayılovun yeni komandası müəyyənləşib.Azərtac xəbər verir ki, "Səbail" futbol klubu millimizin üzvü ilə birillik müqavilə imzalayıb.Otuz iki yaşlı yarımmüdafiəçi daha əvvəl "Turan", "Qarabağ", "Bakı", "Xəzər Lənkəran", "İnter" və "Sumqayıt" klublarında da çıxış edib. O, Azərbaycan millisinin heyətində 39 oyun keçirib.xeber100.com

“Azərbaycanın Olimpiya Odisseyası” layihəsi çərçivəsində

“Könüllülər ili”ndə Gənclər və İdman Nazirliyinin, Milli Olimpiya Komitəsinin, Azərbaycan Məktəb İdmanları Federasiyasının, “Azərbaycan İdman Könüllüləri” və “Azərbaycan İdmançıları” İctimai birliklərinin təşkilatçılığı ilə reallaşdırılan “Azərbaycanın Olimpiya Odisseyası” layihəsi çərçivəsində növbəti onlayn görüş keçirilib.“Azərbaycan İdman Könüllüləri” İctimai Birliyindən Azərtac-a bildiriblər ki, tədbirdə Olimpiya Oyunlarının mükafatçısı, sabiq peşəkar boksçu və “Tərəqqi” medallı Fuad Aslanovun idman ictimaiyyəti, gənclər və könüllülərlə görüşü təşkil olunub.Fuad Aslanov tədbir iştirakçılarına boks idman növünün dərinlikləri, idmana gəlişi və karyerası ərzində qarşılaşdığı çətinliklər, eləcə də üzləşdiyi problemlərin həll yolları, qazandığı nailiyyətlər və qarşıdakı hədəflərdən bəhs edib. O, pandemiya dövründə gənclərin və yeniyetmələrin idmandan geri qalmamaları və onların gələcək karyeralarında önəmli rol oynayacaq məsələlərlə bağlı tövsiyələrini və fikirlərini iştirakçılarla bölüşüb.Sonra Fuad Aslanov idman ictimaiyyətinin, gənclərin və könüllülərin suallarını cavablandırıb, onlara tövsiyələrini verib.xeber100.com

Milli Basketbol Assosiasiyasının pley-off mərhələsində

Milli Basketbol Assosiasiyasının (MBA) pley-off mərhələsində mübarizə davam edir.Azərtac xəbər verir ki, mərhələ çərçivəsində “Toronto Reptors” klubu “Boston Seltiks”lə qarşılaşıb.Orlandoda keçirilən görüşə Boston basketbolçuları daha yaxşı başlayaraq böyük fasiləyə 2 xal fərqi ilə öndə yollanıblar – 50:48. Üçüncü hissədə Toronto komandası üstün olsa da, yekunda 102:99 hesabı ilə məğlub olub.Oyunun ən yaxşısı Ceyson Teytum olub. “Boston Seltiks”in basketbolçusu 34 xal, 8 ribaund, 6 məhsuldar ötürmə ilə yadda qalıb. Beləliklə, “Boston Seltiks” seriyada 2:0 hesabı ilə öndədir.xeber100.com

UEFA Millətlər Liqasının qrup mərhələsinin ikinci turunda

UEFA Millətlər Liqasının qrup mərhələsinin ikinci turunda Azərbaycan millisini qəbul edəcək Kipr yığması daha bir itki ilə üzləşib.Azərtac xəbər verir ki, Qazaxıstanın “Astana” futbol klubunun hücumçusu Pieros Sotiriu zədələnib. İyirmi yeddi yaşlı hücumçunun durumuna tibbi müayinədən sonra aydınlıq gələcək. Onun toplanışdan kənarlaşdırılacağı gözlənilir.Daha əvvəl Aleksander Qogiç və Giorqos Efrem millidən kənarlaşdırılmışdı.Qeyd edək ki, sentyabrın 8-də Nikosiyadakı GSP stadionunda keçiriləcək Kipr–Azərbaycan matçı Bakı vaxtı ilə 22:45-də başlayacaq.xeber100.com

Avropa Şahmat Birliyi qitə çempionatının keçiriləcəyini elan edib

Avropa Şahmat Birliyi (ECU) oğlan və qızlar arasında onlayn qitə çempionatının keçiriləcəyini elan edib.Azərtac xəbər verir ki, yarış sentyabrın 18-20-də keçiriləcək.Turnirdə 18 yaşadək (U-12, U-14, U-16, U-18) şahmatçılar iştirak edəcəklər.xeber100.com

“Qalatasaray” futbol klubu heyətinə yeni futbolçu cəlb edib

UEFA Avropa Liqasının ikinci təsnifat mərhələsində paytaxtın “Neftçi” komandası ilə qarşılaşacaq Türkiyənin “Qalatasaray” klubu heyətinə yeni futbolçu cəlb edib.Azərtac klubun rəsmi saytına istinadla xəbər verir ki, “sarı-qırmızılılar” aşağı liqa təmsilçisi “Ərzincanspor”un futbolçusu Kərəm Aktürkoğlunu transfer edib.İyirmi iki yaşlı yarımmüdafiəçi ilə dörd illik müqavilə imzalanıb.“Başakşehir”, “Bodrumspor”un da aşağı liqalarında oynayan futbolçu ötən mövsüm 34 görüşdə 20 qol vurub.Qeyd edək ki, sentyabrın 17-də “Bakcell Arena”da təşkil olunacaq “Neftçi” – “Qalatasaray” matçı saat 20:00-da başlayacaq.xeber100.com

Tokio Yay Olimpiya və Paralimpiya Oyunlarının məşəli təqdim olunub

Gələn ilin yayınadək təxirə salınmış Tokio Yay Olimpiya və Paralimpiya Oyunlarının məşəli Yaponiya paytaxtının ictimaiyyətinə təqdim olunub.Azərtac xəbər verir ki, bu münasibətlə keçirilən mərasimdə Yaponiya hökumətinin, Milli Olimpiya Komitəsinin, Tokio administrasiyasının və Oyunların təşkilat komitəsinin üzvləri və ictimaiyyət nümayəndələri iştirak ediblər.Xatırladaq ki, Olimpiya məşəli Yunanıstandan Yaponiyaya martın 20-də, Oyunların gələn ilədək təxirə salınması barədə qərarın qəbulundan dörd gün əvvəl gətirilib. Məşəl Tokionun Şincuku rayonunda yerləşən Yaponiya Olimpiya Muzeyində nümayiş etdirilir.Mərasimdə çıxış edən Yaponiya Milli Olimpiya Komitəsinin sədri Yamaşita Yasuhiro bildirib ki, Olimpiya və Paralimpiya Oyunlarına qatılmaq istəyən idmançılar hazırda yorulmadan məşq edirlər. Tokioda Olimpiya məşəlinin ictimaiyyətə təqdim edilməsi bu idmançılara emosional dəstəkdir.Yaponiya Olimpiya və Paralimpiya Oyunları naziri xanım Haşimoto Seyko isə bildirib ki, məşəl ümid deməkdir. Yaponiya hökuməti koronavirusun yayılmasının qarşısını almaq və Oyunların yüksək səviyyədə təşkili üçün əlindən gələni edəcək.Qeyd edək ki, Olimpiya məşəlinə baxmaq istəyənlər əvvəlcədən bron götürməlidirlər. Eyni zamanda, muzey koronavirus pandemiyası ilə əlaqədar tamaşaçıların sayını azaltmağa çalışır. Muzeyə girişin qiyməti 500 yen (təqribən 5 dollar) olsa da, uşaqlar və məktəblilər üçün biletlər ödənişsizdir.Olimpiya məşəli ziyarətçilərə noyabrın 1-dək nümayiş etdiriləcək.xeber100.com

Beynəlxalq Şahmat Federasiyası reytinq siyahısını açıqlayıb

Beynəlxalq Şahmat Federasiyası (FIDE) sentyabrın 1-nə olan reytinq siyahısını açıqlayıb.Azərtac xəbər verir ki, yeni reytinq siyahısına görə, şahmatçılarımızın mövqeyində cüzi dəyişiklik olub. Belə ki, təmsilçimiz Teymur Rəcəbov (2765) əvvəlki kimi 9-cu, Şəhriyar Məmmədyarov isə 11-ci pillədə (2764) qərarlaşıblar.Şahmatçılarımız Qədir Hüseynov (2665, 71-ci yer) və Nicat Abasov (2664, 73-cü) bir pillə irəliləyiblər. Rauf Məmmədovun (2654) mövqeyi isə dəyişməz qalıb (91-ci yer).Siyahıda ilk üçlükdə hazırkı dünya çempionu, norveçli Maqnus Karlsen (2863), amerikalı Fabiano Karuana (2835) və çinli Liren Dinq (2791) qərarlaşıblar.Qadınların reytinq cədvəlinə çinli Hou Yifan (2658) başçılıq edir. Hindistan şahmatçısı Humpi Koneru (2586) ikinci, rusiyalı Aleksandra Qoryaçkina (2582) isə üçüncüdür.Qadın şahmatçılarımızdan Günay Məmmədzadə mövqeyini qoruyub (2443, 29-cu yer). İlk yüzlükdə yer alan digər iki şahmatçımız iki pillə irəliləyiblər. Belə ki, Gülnar Məmmədova (2382) 73-cü, Xanım Balacayeva (2376) 85-ci yerə yüksəliblər.xeber100.com