2030-cu ildə dünya çempionatına ev sahibliyi etmək barədə razılıq…

Argentina və Uruqvay 2030-cu ildə keçiriləcək dünya çempionatına birgə ev sahibliyi etmək üçün ərizə verəcəklər. “Associated Press” agentliyi xəbər verir ki, artıq həmin ölkələrin rəhbərləri bu barədə razılığa gəliblər. Argentina Prezidenti Maurisio Makri Buenos-Ayresdə uruqvaylı həmkarı Tabare Vaskes ilə görüşdən sonra keçirilən birgə mətbuat konfransında mundialın birlikdə təşkili ilə bağlı məsələnin müzakirə edildiyini bildirib. O, bu məsələ ilə bağlı birgə müraciət etmək barədə razılığın əldə olunduğunu deyib. 2030-cu ildə nüfuzlu futbol turnirinin yüz illiyi qeyd ediləcək. İlk dünya çempionatı 1930-cu ildə Uruqvayda keçirilib. Həmin vaxt ev sahibləri finalda Argentina millisinə 4:2 hesabı ilə qalib gələrək çempion olub. Argentina isə mundiala 1978-ci ildə ev sahibliyi edib.xeber100.com

Akrobatika gimnastikası üzrə Azərbaycan birinciliyi keçiriləcək

Noyabrın 7-8-də Milli Gimnastika Arenasında akrobatika gimnastikası üzrə 23-cü Bakı çempionatı, həmçinin batut və tambliq üzrə 14-cü Azərbaycan birinciliyi və Bakı çempionatı keçiriləcək. Azərtac Azərbaycan Gimnastika Federasiyasının saytına istinadla xəbər verir ki, akrobatların start verəcəyi yarışların ilk günündə qadın cütlükləri (uşaqlar – 2000-2007-ci il təvəllüdlü), kişi cütlükləri (böyüklər - 2002-ci il təvəllüdlü və daha böyüklər), qarışıq cütlüklər (böyüklər - 2002-ci il təvəllüdlü və daha böyüklər, uşaqlar – 2000-2007-ci il təvəllüdlü, balacalar – 2002-2010-cu il təvəllüdlü) və qadın qrupları (yeniyetmələr 1998-2006-ci il təvəllüdlü, uşaqlar – 2000-2007-ci il təvəllüdlü, balacalar – 2002-2010-cu il təvəllüdlü) medallar uğrunda öz qüvvələrini sınayacaqlar. Əllidən çox idmançının iştirak edəcəyi yarışlarda Bakı Gimnastika Məktəbi, “Ocaq Sport” klubu, “Neftçi” idman klubu və Nizami rayonu 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi təmsil olunacaq. Yarışların ikinci günü isə batut və tamblinqçilərin çıxışları ilə davam edəcək. Kiçiklər (2008-2010-cu il təvəllüdlü), uşaqlar (2006-2007-ci il təvəllüdlü), balacalar (2003-2005-ci il təvəllüdlü), böyüklər (1999-cu il təvəllüdlü və daha böyük) yaş kateqoriyasında 30-dan çox batutçu və balacalar (2007-ci il təvəllüdlü və daha kiçik), yeniyetmələr (2003-2006-cı il təvəllüdlü), gənclər (2000-2002-ci il təvəllüdlü) və böyüklər (1999-cu il təvəllüdlü və daha böyük) yaş kateqoriyasında isə 20-dən yuxarı tamblinqçi öz çıxışları ilə Bakı Gimnastika Məktəbi və “Ocaq Sport” klubunu təmsil edəcəklər. Yarışları Azərbaycan Gimnastika Federasiyasının rəsmi saytında (www.agf.az) canlı yayım vasitəsilə izləmək mümkün olacaq.xeber100.com

Kadr siyasətinin optimallaşdırılması ilə bağlı qərar qəbul edilib

“Neftçi” klubu inzibati heyət və kadr siyasətinin optimallaşdırılması ilə bağlı qərar qəbul edib. Azərtac xəbər verir ki, bu barədə klubun rəsmi saytında məlumat yayılıb. Qərara görə, Orxan Hüseynzadə icraçı direktor vəzifəsinə təyin olunub. O.Hüseynzadə, həmçinin idman direktoru vəzifəsini də yerinə yetirəcək. İcraçı direktorun maliyyə məsələləri üzrə müavini vəzifəsinə isə Elnur Eyvazov təyin edilib.xeber100.com

Uşaq-Gənclər Şahmat məktəbləri komandalarının final yarışları başa çatıb

Təhsil Nazirliyi sistemində fəaliyyət göstərən Uşaq-Gənclər Şahmat məktəbləri komandalarının final yarışları başa çatıb. Nazirlikdən Azərtac-a bildiriblər ki, Xaçmaz Olimpiya Kompleksində keçirilən final mərhələsi üzrə zona yarışlarında I, II və III yerləri tutmuş komandalar mübarizə aparıb. Yarışın nəticəsinə əsasən, birinci yeri Quba rayon İxtisaslaşdırılmış Olimpiya Ehtiyatları Uşaq-Gənclər Şahmat Məktəbi, ikinci yeri “Təhsil” Respublika İdman Mərkəzinin Respublika İxtisaslaşdırılmış Olimpiya Ehtiyatları Uşaq-Gənclər Şahmat Məktəbi, üçüncü yeri isə Gəncə şəhər Uşaq-Gənclər Şahmat Məktəbinin komandaları tutub. Birinciliyin keçirilməsinin əsas məqsədi Təhsil Nazirliyi sistemində fəaliyyət göstərən şahmat məktəblərinin perspektivli şahmatçılarını aşkara çıxarmaq və mərkəzin yığma komandasını formalaşdırmaqdır. Qaliblər “Təhsil” Respublika İdman Mərkəzinin kubok və diplomları ilə təltif ediliblər.xeber100.com

Cüdo Federasiyasının təşkilatçılığı ilə…

Azərbaycan Cüdo Federasiyasının təşkilatçılığı ilə regionlarda keçirilən yarışlar davam edir. Azərtac xəbər verir ki, “Şimal-Qərb bölgəsi” çempionatına Zaqatala ev sahibliyi edir. Yarışda 2002-2005-ci il təvəllüdlü 214 cüdoçu birincilik uğrunda mübarizə aparır. Zaqatala Olimpiya İdman kompleksində keçirilən turnirdə Mingəçevir, Zaqatala, Qax və Şəkidən olan idmançılar - 30, 34, 38, 42, 46, 50, 55, 60, 66 və 66 kiloqramdan yuxarı çəki dərəcələrində mübarizə aparırlar.xeber100.com

Sambo üzrə açıq Bakı birinciliyi keçirilib

Bakı Şəhər Gənclər və İdman Baş İdarəsi (BŞGİBİ) tərəfindən Hövsan Olimpiya İdman Kompleksində gənclər arasında sambo üzrə açıq Bakı birinciliyi keçirilib. BŞGİBİ-dən Azərtac-a bildiriblər ki, birincilikdə 110 idmançı mübarizə aparıb. Yarışda Sabir Ağayev (48 kq), Sübhan İsrafilov (52 kq), Rəşad Dünyamalıyev (57 kq), Fuad Məmmədov (62 kq), Elton Quliyev (68 kq), Elvin Cəlilov (74 kq), Zöhrab Qurbanov (82 kq), Cavid Muradov (90 kq), Elvin Tarverdiyev (100 kq) və Hüseyn Quliyev (100 kq-dan yuxarı) qızıl medala sahib olublar. İlk üç yeri tutan idmançılar Baş İdarə tərəfindən müvafiq dərəcəli diplom və xatirə hədiyyələri ilə təltif olunublar.xeber100.com

Topaz Premyer Liqasında IX tura yekun vurulub

Oktyabrın 25-də futbol üzrə Topaz Premyer Liqasında IX tura yekun vurulub. Azərtac xəbər verir ki, turun sonuncu matçında “Qarabağ” komandası “Neftçi”ni 2:0 hesabı ilə məğlub edib. “Bakcell Arena”da keçirilən oyunda hesab matçın 29-cu dəqiqəsində açılıb. Rahid Əmirquliyev adını tabloya yazdırıb. Oyunun 90-cı dəqiqəsində isə “Qarabağ”ın hücumu zamanı “Neftçi”nin futbolçusu Jayro Rodriges topu öz qapısına göndərib - 0:2. Bundan sonra qapılara qol vurulmayıb və Qurban Qurbanovun komandası oyundan üç xalla ayrılıb. Beləliklə, doqquz turdan sonra turnir cədvəlinə aktivində 21 xalı olan “Qəbələ” komandası başçılıq edir. Xal ehtiyatını 19-a çatdıran “Qarabağ” ikinci pilləyə yüksəlib. Hesabında 16 xal olan “İnter” üçüncü sırada qərarlaşıb. Hər birinin hesabında 11 xal olan “Kəpəz” və “Zirə” dördüncü və beşinci pilləni bölüşdürür. “Sumqayıt” (9 xal) altıncı, “Neftçi” (6 xal) yeddincidir. Doqquz oyundan cəmi üç xal toplayan AZAL isə sonuncu sıradadır. Topaz Premyer Liqasının növbəti – onuncu turunun oyunları oktyabrın 29-30-da keçiriləcək.xeber100.com

“Marca” qəzeti yazır…

Vaxtilə “Real” klubunda forma geyinmiş ingiltərəli futbol ulduzu Devid Bekhem yenidən Madrid klubu üçün çalışacaq. “Marca” qəzeti xəbər verir ki, 41 yaşlı mütəxəssis “kral klubu”nda səfir vəzifəsini icra edəcək. D.Bekhem Madrid təmsilçisinin ABŞ-dakı səfiri olması təklifini qəbul edib. Məlum olub ki, o, Amerikada İspaniya nəhənginin marka reklamı ilə məşğul olacaq. Qeyd edək ki, 2003-2007-ci illərdə “Real”ın formasını geyinmiş Bekhem 2007-2012-ci illərdə ABŞ-ın “Los-Anceles Qalaksi” klubunda çıxış edib və hazırda bu ölkədə yaşayır.xeber100com

2016-cı ilin ən yaxşı futbolçuları müəyyənləşib

“Qızıl top” mükafatına daha 15 namizədin adı açıqlanıb. Azərtac xəbər verir ki, “France Football”un 2016-cı ilin ən yaxşı futbolçusu adına yekun “30-luğ”u müəyyənləşib. Namizədlər aşağıdakılardır: Serxio Aquero (Argentina / “Mançester Siti”) Pyerr-Emerik Obameyanq (Qabon / “Borussiya” Dortmund) Qaret Beyl (Uels / “Real”) Canluici Buffon (İtaliya / “Yuventus”) Kriştianu Ronaldo (Portuqaliya / “Real”) Kevin de Bruyne (Belçika / “Mançester Siti”) Paulo Dibala (Argentina / “Yuventus”) Dieqo Qodin (Uruqvay / “Atletiko”) Antuan Qrizmann (Fransa / “Atletiko”) Qonzalo İquain (Argentina / “Yuventus”) Zlatan İbrahimoviç (İsveç / “Mançester Yunayted”) Andres İnyesta (İspaniya / “Barselona”) Koke (İspaniya / “Atletiko”) Toni Kroos (Almaniya / “Real”) Robert Levandovski (Polşa / “Bavariya”) Uqo Lloris (Fransa / “Tottenhem”) Riyad Mahrez (Əlcəzair / “Lester”) Lionel Messi (Argentina / “Barselona”) Luka Modriç (Xorvatiya / “Real”) Tomas Müller (Almaniya / “Bavariya) Manuel Noyer (Almaniya / “Bavariya”) Neymar (Braziliya / “Barselona”) Dmitri Paye (Fransa / “Vest Hem”) Pol Poqba (Fransa / “Mançester Yunayted”) Pepe (Portuqaliya / “Real”) Rui Patrisio (Portuqaliya / “Sportinq”) Serxio Ramos (İspaniya / “Real”) Luis Suares (Uruqvay / “Barselona”) Ceymi Vardi (İngiltərə / “Lester”) Arturo Vidal (Çili / “Bavariya”) Xatırladaq ki, bu il ilk dəfə olaraq “Qızıl top”un sahibi yalnız jurnalistlərin səsverməsinə əsasən seçiləcək. “Qızıl top”a bu il əsas namizəd “Real”la Çempionlar Liqası və Portuqaliya yığması ilə Avropa çempionluğunu qazanan 31 yaşlı Ronaldo sayılır. Bu mükafatı son dəfə Messi qazanıb.xeber100.com

Avropa çempionatına yekun vurulub

Parisdə velosiped idmanının trek növü üzrə Avropa çempionatına yekun vurulub. Azərtac xəbər verir ki, yarışda ölkəmiz bir idmançı ilə - keyrin növündə mübarizə aparan Sergey Omelçenko ilə təmsil olunub. Otuz iki idmançının iştirak etdiyi bu növdə Sergey Omelçenko birinci mərhələni uğurla adlayıb. O, Litva, Fransa, Hollandiya və Belarus təmsilçiləri ilə eyni xətdə yer alıb və hamını qabaqlamaqla qrup birincisi kimi birbaşa yarımfinala vəsiqə qazanıb. Finala çıxmaqla medallar uğrunda mübarizə aparmaq üçün Sergey Omelçenkoya yarımfinal yürüşündə cəmi bir neçə santimetr çatmayıb. Polşa, İspaniya, Fransa, həmçinin Çexiyanın 2 idmançısı ilə mübarizənin yekununda ilk üçlükdən kənar qalan təmsilçimiz 4-cü olub və bununla da 7-12-ci yerlər uğrunda yarışmalı olub. Son yürüşdə Böyük Britaniya və Çexiya idmançılarından geri qalan, amma İspaniya və Yunanıstanın 2 velosipedçisini qabaqlayan S.Omelçenko bununla da Avropa çempionatını 9-cu pillədə başa vurmaqla aktivinə 300 reytinq xalı yazdırıb. Qeyd edək ki, reytinq xalları idmançımıza gələn ay başlayacaq və 4 mərhələdən ibarət olacaq dünya kuboku yarışlarında iştirak baxımından olduqca böyük əhəmiyyət daşıyır.xeber100.com