Ən çox qazanc əldə edən klubların siyahısı açıqlanıb

UEFA 2015-2016-cı illər mövsümündə Çempionlar Liqasında göstərdiyi nəticələrə və yayım hüququna görə ən çox qazanc əldə edən klubların siyahısını açıqlayıb. Azərtac xəbər verir ki, siyahıya 83 milyon 853 min avro gəlirlə “Mançester Siti” klubu başçılıq edir. İlk onluqda sonrakı yerləri “Real Madrid” (80 milyon 67 min avro), “Yuventus” (76 milyon 256 min avro), “Pari-Sen-Jermen” (70 milyon 803 min avro), “Atletiko Madrid” (69 milyon 665 min avro), “Çelsi” (69 milyon 174 min avro), “Roma” (68 milyon 461 min avro), “Bavariya” (64 milyon 391 min avro), “Barselona” (56 milyon 552 min avro) və “Arsenal” (53 milyon 423 min avro) klubları tutur.xeber100.com  

UEFA Avropa Liqasının qrup mərhələsində IV turun oyunları başlayır

Bu gün futbol üzrə UEFA Avropa Liqasının qrup mərhələsində IV turun oyunları keçiriləcək. Azərtac xəbər verir ki, Ağdamın “Qarabağ” klubu səfərdə Yunanıstanın PAOK komandasının qonağı olacaq. Bakıda keçirilən oyunda rəqibini məğlub edən (2:0) komandamız bunu Salonikidə də təkrarlamağa çalışacaq. “Qarabağ” heç-heçə sayəsində də qrupdakı vəziyyətini yaxşılaşdıra bilər. Komandamız səfərdə qazanılan bir xal sayəsində də PAOK-u qabaqlayaraq ikinci pilləyə yüksələ bilər. Qrupun digər oyununda “Fiorentina” İtaliyada “Slovan”ı (Çexiya) qəbul edəcək. Qeyd edək ki, PAOK-“Qarabağ” oyunu noyabrın 3-də Salonikidəki “Toumba” stadionunda Bakı vaxtı ilə saat 00:05-də start götürəcək.xeber100.com

Paralimpiya İdman Oyunları keçiriləcək

Noyabrın 11-də Sumqayıt Paralimpiya İdman Kompleksində II Uşaq Paralimpiya İdman Oyunları təşkil olunacaq. Azərtac xəbər verir ki, yarışlar Azərbaycan Milli Paralimpiya Komitəsinin (AMPK), “Azercell Telekom” MMC-nin və UNICEF-in Azərbaycan nümayəndəliyinin birgə təşkilatçılığı ilə keçiriləcək. Turnirdə respublikanın müxtəlif regionlarını təmsil edən uşaq paralimpiyaçılar idmanın beş növü (cüdo, üzgüçülük, masaüstü tennis, qolbol və boccia) üzrə güclərini sınayacaqlar. Yarışda sağlamlıq imkanları məhdud 60-dan çox uşaq mübarizə aparacaq. AMPK beynəlxalq təcrübədə ilk dəfə olaraq, sağlamlıq imkanları məhdud uşaqların kütləvi şəkildə idmana cəlb edilməsini himayəsinə götürərək, 2013-cü ilin sentyabrında Uşaq Paralimpiya Komitəsini yaradıb. Komitənin yaradılmasında məqsəd ehtiyat idmançıların hazırlanması ilə yanaşı, sağlamlıq imkanları məhdud uşaqların abilitasiya və reabilitasiya yolu ilə cəmiyyətə inteqrasiyasına dəstək verməkdir.xeber100.com

Boks üzrə Avropa çempionatına start veriləcək

Noyabrın 14-də Bolqarıstanın Sofiya şəhərində qadınlar arasında boks üzrə Avropa çempionatına start veriləcək. Azərtac xəbər verir ki, yarışa hazırlığı davam etdirən milli komandamız təlim-məşq prosesini Azərbaycan Boks Federasiyasında yekunlaşdırmaq üzrədir. Elbrus Rzayevin rəhbərliyi altında komandamız yarışa Əzizə Abbasova (48 kq), Anaxanım Ağayeva (51 kq), Anna Əlimərdanova (54 kq), Məhsəti Həmzəyeva (57 kq), Yana Alekseyeva (60 kq), Məryəm Cəbrayılova (64 kq), Şəhla Allahverdiyeva (75 kq), Leyla Cavadova (81 kq) və Aynur Rzayeva (81 kq-dan yuxarı) ilə hazırlaşır. Milli komandamız təlim-məşq toplanışının bir hissəsini Bolqarıstanda davam etdirəcək.xeber100.com

“Qarabağ” klubu haqda süjet hazırlanıb

UEFA Ağdamın “Qarabağ” futbol klubu haqda süjet hazırlayıb. Azərtac xəbər verir ki, UEFA-nın əməkdaşları Ağdam klubunun futbolçuları Qara Qarayev və Maksim Medvedev ilə görüşüb, Tofiq Bəhramov adına Respublika stadionunda olublar. Qara Qarayev qonaqlarla görüşündə “Qarabağ”da oynamağından qürur duyduğunu deyib: “Mən 1992-ci ildə Füzuli rayonunda anadan olmuşam. Bizim kəndimiz düşmən tərəfindən işğal olunduqdan sonra Bakıya gəldik. Həmin vaxt mənim bir yaşım var idi. Biz torpaqlarımızı itirdik. İndi fəxr edirəm ki, “Qarabağ”da forma geyinirəm. “Qarabağ”ın bir hissəsi olduğum üçün çox xoşbəxtəm”. Qara Qarayev UEFA Avropa Liqasının qrup mərhələsindəki çıxışlarından da danışıb. Maksim Medvedev də avroliqadakı mübarizəsindən söhbət açıb: “Fiorentina”ya 1:5 hesabı ilə uduzanda çox məyus olmuşduq. Ancaq uşaqlar özlərini ələ almağı bacardılar. Baş məşqçimizin düzgün göstərişləri nəticəsində oyunumuzu düzəltdik. PAOK ilə yaxşı oynadıq. Rəqibi düzgün qiymətləndirdik və qələbə qazandıq. “Qarabağ” qəlbimin bir parçasıdır. Bu klub mənə addım atmaqda və düzgün insan kimi yetişməkdə kömək edib”.xeber100.com

UEFA Çempionlar Liqasının qrup mərhələsində dördüncü tura start verilib

Noyabrın 1-də UEFA Çempionlar Liqasının qrup mərhələsində dördüncü tura start verilib. Azərtac xəbər verir ki, ilk oyun günündə A, B, C və D qruplarında matçlar keçirilib. Ümumilikdə dörd qrup üzrə səkkiz qarşılaşmada aşağıdakı nəticələr qeydə alınıb: A qrupu “Ludoqorets” (Bolqarıstan) – “Arsenal” (İngiltərə) - 2:3 “Bazel” (İsveçrə) – PSJ (Fransa) - 1:2 B qrupu “Beşiktaş” (Türkiyə) – “Napoli” (İtaliya) - 1:1 “Benfika” (Portuqaliya) – “Dinamo” (Kiyev, Ukrayna) - 1:0 C qrupu “Mançester Siti” (İngiltərə) – “Barselona” (İspaniya) - 3:1 “Borussiya” (Mönxenqladbax, Almaniya) – “Seltik” (Şotlandiya) - 1:1 D qrupu “PSV Eyndhoven” (Hollaniya) – “Bavariya” (Almaniya) - 1:2 “Atletiko” (İspaniya) – “Rostov” (Rusiya) - 2:1 Turun digər qrup oyunları noyabrın 2-də keçiriləcək.

“Femine Vize” həndbol klubu heyətini açıqlayıb

Belçikanın “Femine Vize” həndbol klubu Bakının ABU komandası ilə oyun üçün heyətini açıqlayıb. Azərtac xəbər verir ki, “Çelenc Cup” turnirinin üçüncü təsnifat mərhələsində Bakı təmsilçisi ilə qarşılaşacaq “Femine Vize” 19 oyunçu sifariş edib. Son mövsümdə Belçika çempionatının gümüş medalını qazanan baş məşqçi Linde Panisin rəhbərlik etdiyi komandanın heyətində Boons Fyen, Brihe Lauran, Dubuç Koralin, Hoq Aliks, Jolli Maud, Leonaers Kristin, Loureyro Laura, Martin Laura, Masrouki Monia, Masrouki Sabrin, Miçel Laura, Periç Tamara, Raj Maurin, Radermeker Selin, Tilquin Kamill (hamısı Belçika), Van den Boorn Kim, Viynen Linn (hər ikisi Hollandiya), Bouçard Sesil və Friri Margot (hər ikisi Fransa) yer alıblar. Qeyd edək ki, ABU komandası “Femine Vize” ilə hər 2 matçı Bakıda keçirəcək. Qarşılaşmalar noyabrın 12-13-də olacaq.xeber100.com

Madrid klubunun məlumatına görə…

Madridin “Real” futbol klubu uelsli yarımmüdafiəçi Qaret Beylin müqavilə müddətini 2022-ci il iyunun 30-dək artırıb. Madrid klubunun mətbuat xidməti xəbər verir ki, 27 yaşlı futbolçunun bundan əvvəlki müqavilə müddəti 2019-cu ilədək nəzərdə tutulmuşdu. Yeni sazışdə onun həm də illik əməkhaqqı məsələsinə də aydınlıq gəlib. Məlum olub ki, Q.Beyl komandanın kapitanı Serxio Ramos qədər əməkhaqqı alacaq. Onun illik maaşı 10 milyon avro təşkil edəcək. Qeyd edək ki, uelsli futbolçu “Real”a 2013-cü ildə İngiltərənin “Tottenhem” klubundan 101 milyon avroya transfer edilmişdi. O, “Kral” klubunda ikiqat Çempionlar Liqası və 2013/2014-cü il mövsümündə İspaniya kubokunun qalibi olub.xeber100.com

2018-ci dünya çempionatının seçmə mərhələsində…

Futbol üzrə Azərbaycan millisi ilə 2018-ci dünya çempionatının seçmə mərhələsində eyni qrupda mübarizə aparan Almaniya yığmasının baş məşqçisi Yoahim Lövlə müqavilə müddəti artırılıb. Azərtac xəbər verir ki, yeni müqaviləyə əsasən, Y.Löv 2020-ci ilədək Bundestimdə çalışacaq. Əlli altı yaşlı mütəxəssislə iki illik müqavilə imzalanıb. Hazırkı müqavilə 2018-ci il dünya çempionatından sonra başa çatacaq. Xatırladaq ki, 2004-cü ildən yığmada köməkçi məşqçi vəzifəsini yerinə yetirən Y.Löv 2006-cı ilin dünya çempionatından sonra Almaniya yığmasının baş məşqçisi təyin olunub. O, Almaniya millisi ilə 2010-cu il dünya çempionatında bürünc, Avropa çempionatlarında bürünc (2012, 2016) və 2014-cü il dünya çempionatında isə qızıl medal qazanıb.xeber100.com

IV İslam Həmrəyliyi Oyunları ilə bağlı görüş keçirilib

Avstriyanın Lints şəhərində keçirilən 24-cü dünya çempionatı çərçivəsində Olimpiya idman növləri sırasına yeni daxil edilən karate üzrə yarışların da təşkil olunacağı IV İslam Həmrəyliyi Oyunları ilə bağlı görüş keçirilib. Azərtac xəbər verir ki, görüşdə Azərbaycan Milli Karate Federasiyasının prezidenti və Dünya Karate Federasiyasının (WKF) Texniki Komitəsinin üzvü Yaşar Bəşirov, federasiyanın media və ictimaiyyətlə işlər üzrə katibi Sənan Məhərrəmov, oyunların Təşkilat Komitəsinin nümayəndələri Dmitri Çigenev və Vüsalə Vəliyeva, WKF-nin prezidenti Antonio Espinoz və əməkdaşı Sara Espinoza iştirak ediblər. Söhbət zamanı “Bakı-2017” IV İslam Həmrəyliyi Oyunlarının karate yarışlarına hazırlıq işləri, turnirin formatı barədə müzakirələr aparılıb. A.Espinoz “Bakı-2015” İlk Avropa Oyunlarında karate yarışlarının təşkilindən məmnunluğunu ifadə edərək bu turnirin dünyada karatenin inkişafı və təbliği baxımından mühüm rol oynadığını deyib. Y.Bəşirov hazırda həyata keçirilən genişmiqyaslı hazırlıq işləri sayəsində IV İslam Həmrəyliyi Oyunlarının da Azərbaycanda yüksək səviyyədə təşkil ediləcəyini bildirib.xeber100.com