ÇXR-in valyuta ehtiyatları azalıb

Çin Xalq Bankının valyuta ehtiyatlarının həcmi daha 99,5 milyard dollar azalıb. Bu barədə RNS agentliyi xəbər verib. Ölkənin valyuta ehtiyatlarının həcmi 3,33 trln. dollardan 3,23 trln. dollaradək azalıb. İqtisadçılar azalmanın daha çox - 3,21 trln. dollaradək olacağını gözləyirdilər. Qeyd edək ki, 2015-ci ilin yekunları üzrə ÇXR-in valyuta ehtiyatları 1992-ci ildən sonra ilk dəfə azalıb. Dekabrın yekunları üzrə valyuta ehtiyatları 107,9 mlrd. dollar, ümumilikdə ötən il üzrə isə 512,66 mlrd. dollar azalıb.

2016-cı ildə 30 min hektar sahədə pambıq əkilməsi planlaşdırılır

“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunan konfransda dövlət başçısı tərəfindən pambıqçılığın inkişaf etdirilməsi istiqamətində verilmiş tapşırıqlara uyğun olaraq, iqtisadiyyat naziri Şahin Mustafayev və kənd təsərrüfatı naziri Heydər Əsədov pambıq istehsalı və emalı ilə məşğul olan müəssisələrin nümayəndələri ilə görüşüb. Lent.az-ın məlumatına görə, İqtisadiyyat Nazirliyində keçirilmiş görüşdə pambıq istehsalı və emalı ilə məşğul olan müəssisələrin pambıqçılığın inkişafı, suvarma sisteminin təkmilləşdirilməsi, aqrolizinq xidmətlərinin genişləndirilməsi, pambıqçılıq sahəsinə daha çox güzəştli kreditlərin ayrılması, toxum və dərman preparatlarının alınmasına subsidiyaların verilməsi barədə təklifləri müzakirə edilib. Görüşdə pambıq istehsalı və emalı müəssisələrinin nümayəndələri pambıqçılığı təşviq etmək üçün yüksək məhsula görə digər stimillaşdırma tədbirləri ilə yanaşı, daşıma xərclərinin qarşılanacağını və istehsal xərclərinin 90%-nin emalçılar tərəfindən avans olaraq veriləcəyini vurğulanıb. Bütün bunların həyata keçirilməsi üçün güzəştli kreditlərdən və aqrolizinq xidmətlərindən daha geniş istifadə olunacaq. Qeyd edək ki, 2016-cı ildə ötən illə müqayisədə 80% çox (30 min hektar) sahədə pambıq əkilməsi planlaşdırılır. Bu 2 dəfə çox - 70 min ton xam pambıq tədarükünə, eləcə də fermerlərdən pambığın alış qiymətinin əhəmiyyətli dərəcədə artırılmasına imkan yaradacaq. Bütün bunlar isə bu sahədə məşğulluq səviyyəsini əhəmiyyətli dərəcədə yüksəldəcək, pambıqçılıq sahəsində çalışanların sayı ötən illə müqayisədə 2 dəfəyə yaxın artacaq.   Görüşdə pambıq istehsalı və emalı müəssisələrinin nümayəndələri satınalma qiymətinin 2016-cı ildə əvvəlki illə müqayisədə əhəmiyyətli dərəcədə artırılmaqla birinci növ pambığın bir tonunun 500 manata (2015-ci ildə 410 manat), ikinci növünün bir tonunun  470 manata (2015-ci ildə 390 manat), üçüncü növünün bir tonunun 440 manata (2015-ci ildə 370 manat), dördüncü növünün bir tonunun isə 400 manata (2015-ci ildə 350 manat) qəbul ediləcəyini bildiriblər.

ABŞ-ın dövlət borcu 20 trilyon dolları keçə bilər

ABŞ federal hökumətinin rəsmi dövlət borcu 19 trilyon dolları keçib. Rusiya mətbuatı xəbər verir ki, bu rəqəm ölkə ÜDM-nin 103%-nə bərabərdir. Borcun 13,7 trilyon dolları şirkətlər və mülki şəxslərə məxsusdur. 5,3 trilyon isə hökumətin Federal ehtiyat sistemi qarşısında olan borcudur. Barak Obamanın dövründə ABŞ dövlətinin borcları demək olar iki dəfə artıb. 7 ildə 8 trilyon dollar. Eyni dinamika Corc Buşun prezidentliyi dövründə də müşahidə olunub. 2015-ci ilin 2 noyabrında Obama hökumətin borclarının artırılmasına razılıq verib. Gözlənilir ki, 2017-ci ildə ABŞ-ın dövlət borcları 20 trilyon dolları keçəcək. Keçən ilin iyulunda Respublikaçılar partiyasının üzvü senator Ron Pol getdikcə şişən ABŞ büdcəsi ilə bağlı tədbir görməyə çağırmışdı. Əks halda ölkə iqtisadiyyatı Yunanıstanın gününə düşə bilər.

“NBC Bank” ASC, “Parabank” ASC və “Dekabank” ASC bir arada

Azərbaycanda daha 3 kommersiya bankının konsolidasiyası ilə bağlı ilkin razılıq əldə edilib. Report.az xəbər verir ki, ötən gün Azərbaycan Mərkəzi Bankı (AMB) fevralın 1-də lisenziyası bərpa edilən "NBC Bank" ASC artıq bu ilin aprel ayında "Parabank" ASC və "Dekabank" ASC ilə birləşməyi planlaşdırır və hər üç tərəf bununla bağlı razılığını bildirib. Mənbə bankların hansı ad altında birləşəcəyinin hələlik bəlli olmadığını və bu mövzu ətrafında danışıqlar getdiyini açıqlayıb. "Parabank"dan adıçəkilən məsələ ilə bağlı məlumatsız olduqlarını, "Dekabank"dan isə bu məlumatın səhv olduğunu bildiriblər. "NBC Bank"dan isə bildirilib ki, onlar bir neçə bankla konsolidasiyaya dair niyyət protokolu imzalayıblar, lakin bunun hansı banklarla baş verəcəyi ilə bağlı məlumat verilməyib.  

“Beynəlxalq ticarət sövdələşmələri və sənədləşmə”

Ümumdünya Gömrük Təşkilatının Potensialın Gücləndirilməsi üzrə Avropa Regional Ofisində “Beynəlxalq ticarət sövdələşmələri və sənədləşmə” mövzusunda seminar işə başlayıb. "APA-Economics" xəbər verir ki, tədbirin açılışında çıxış edən Ümumdünya Gömrük Təşkilatının Avropa Regional Ofisinin rəhbəri Roger Herman rəhbərlik etdiyin ofisin fəaliyyəti barədə qısa məlumat verib və seminarın əhəmiyyətindən bəhs edib. Seminarda çıxış edən Dövlət Gömrük Komitəsi sədrinin birinci müavini, gömrük xidməti general-leytenantı Səfər Mehdiyev iştirakçıları salamlayaraq tədbirin “Beynəlxalq gömrük günü”nə təsadüf etməsinin xoş bir hal olduğunu qeyd edib. Səfər Mehdiyev Ulu öndər Heydər Əliyevin, prezident İlham Əliyevin elmə, təhsilə verdikləri önəmdən bəhs edərək Azərbaycan gömrüyünün də gömrük işinin təşkili sahəsində elmi biliklərin tətbiqi ilə bağlı mühüm addımlar atdığını vurğulayıb. Mehdiyev Beynəlxalq Gömrük Universitetləri Şəbəkəsi iləDövlət Gömrük Komitəsi arasında əməkdaşlığın müvəffəqiyyətlə davam etdiyini və şəbəkənin Bakıdakı Regional Ofisinin təşkilatçılığı ilə keçirilən bu tədbirə Azərbaycanın aparıcı təhsil ocaqlarının cəlb olunmasının gömrük işi sahəsində biliklərin daha da möhkəmləndirilməsinə öz faydasını verəcəyini bildirib. Beynəlxalq Gömrük Universitetləri Şəbəkəsinin katibi Mixail Kaşubski seminar iştirakçılarını salamlayaraq təmsil etdiyi qurumun fəaliyyəti barədə məlumat verib. Seminarın önəmindən bəhs edən Mixail Kaşubski bu tədbirin birinci olmaqla yanaşı, davamlı xarakter daşıyacağına əminliyini ifadə edib. Daha sonra Beynəlxalq Gömrük Universitetləri Şəbəkəsinin fəaliyyəti ilə bağlı videoçarx nümayiş etdirilib. Azərbaycan Dövlət Gömrük Komitəsi və Beynəlxalq Gömrük Universitetləri Şəbəkəsi tərəfindən təşkil olunan seminarda Dövlət Gömrük Komitəsinin Akademiyası, Bakı Dövlət Universiteti, Azərbaycan Dövlət İqtisad Universiteti və Bakı Ali Neft Məktəbinin tələbələri iştirak edir. Seminarın ilk iş günü “Beynəlxalq ticarət sövdələşmələrində risklər” və “Beynəlxalq ticarət sövdələşmələrində sənədlərin nəzərdən keçirilməsi” mövzusunda məruzələr dinlənilib, eləcə də Rusiya Federasiyasının Menecment üzrə Şimal-Qərb Universitetinin tələbələri tərəfindən “Tələbə Gömrük Xəbərləri” elektron jurnalının təqdimatı keçirilib. Üç gün davam edəcək seminarın növbəti günlərində isə “Beynəlxalq hüquq çərçivəsinin nəzərdən keçirilməsi”, “Ekspeditor və qiymətləndirmənin rolu”, “Satış üzrə beynəlxalq müqavilələr”, “Beynəlxalq ticarət şərtləri - INKOTERMS 2000 & INKOTERMS 2010”, “Dəniz yolu ilə malların daşınması”, “Hava və çoxmodallı nəqliyyatla malların daşınması”, “Beynəlxalq ödəmələr”və “Mübahisələrin həlli” mövzusunda məruzələr dinləniləcək. Xatırladaq ki, seminar yanvarın 28-dək davam edəcək.    

“Azərbaycan Hava Yolları” (AZAL) yeni uçuş proqramı barədə elan edir

“Azərbaycan Hava Yolları” (AZAL) Türkiyənin məşhur kurort şəhərləri - Antalya, Bodrum, İzmir və Dalamana yeni uçuş proqramı barədə elan edir. “Azərbaycan Hava Yolları” QSC-nin mətbuat xidmətindən verilən məlumata görə, aviaşirkət bu il yeni istiqamətə - Alanya (Gazipaşa Beynəlxalq Hava Limanı) şəhərinə uçuşlara başlayır.   Bakı-Bodrum-Bakı reysləri 17 iyun tarixindən başlayaraq hər gün həyata keçiriləcək. Bu istiqamətdə aviabiletin qiyməti 149 avrodan başlayacaq.   Bakı-İzmir-Bakı reysləri 15 iyun tarixindən etibarən həftədə üç dəfə - bazar ertəsi, çərşənbə və şənbə günləri həyata keçiriləcək. Bu marşrut üzrə aviabiletin qiyməti də 149 avrodan başlayır.   Bakı-Dalaman-Bakı reysləri 1 iyul tarixindən etibarən həftədə iki dəfə - bazar ertəsi və cümə günləri həyata keçiriləcək. Aviabiletin qiyməti - 149 avrodur.   Yeni cədvələ əsasən, Bakı-Antalya-Bakı marşrutu üzrə birbaşa uçuşlar mayın 21-dən sentyabrın 27-ə kimi hər gün, aprelin 2-dən mayın 14-ə kimi və oktyabrın 15-dən etibarən həftədə bir gün olmaqla şənbə günləri həyata keçiriləcək. Yüksək tələbat olduğu halda reyslərin sayı həftədə 14-dək artırıla bilər. Bakı-Antalya-Bakı marşrutu üzrə aviabiletin qiyməti 139 avrodan başlayır.   Bakı-Alanya-Bakı yeni birbaşa marşrut üzrə uçuşlar iyulun 4-də başlayacaq və həftədə üç dəfə - bazar ertəsi, çərşənbə və cümə günləri həyata keçiriləcək. Bakı-Alanya-Bakı marşrutu üzrə aviabiletin qiyməti 139 avrodan başlayacaq.   Uçuşlar biznes və ekonom salonlu komfortlu Airbus A319/A320 və Boeing 757 laynerləri ilə həyata keçiriləcək.   Türkiyə kurortları həmişə Azərbaycan vətəndaşlarını əlverişli qiymətə təmtəraqlı istirahət imkanı ilə cəlb edib. Türkiyə kurortlarının əsas xüsusiyyəti çox sayda müxtəlif səviyyədə hər istəyə uyğun - ailə, gənclər və ya sakit istirahət üçün otellərin olmasıdır. Onların bir çoxu "hər şey daxil" (all inclusive) sistemi təklif edir. Aralıq və Egey dənizlərinin sahillərində isti cənub iqlimi və mənzərəli yerlər bütün dünyadan bu cənnət guşəsinə turistləri cəlb edir.    

Azərbaycan borc alacaq

Azərbaycan hökuməti Beynəlxalq Valyuta Fondundan (BVF) 3 mlrd. ABŞ dolları, Dünya Bankından isə 1 mlrd. dollar həcmində kredit alacağı gözlənilir. Sonxeber.az bildirir ki, bu barədə "Reuters"ə hökumətdəki mənbələrdən məlumat verilib. Məlumata görə, hələlik kreditlərin şərtləri ilə bağlı heç bir məlumat verilmir. Qeyd edək ki, BVF və Dünya Bankının nümayəndələri bu kredit məsələlərini müzakirə etmək məqsədi ilə Bakıda olublar

“Qafqaz İnkişaf Bankı” ASC və “Atrabank” ASC-nin bank lisenziyaları ləğv edilib

Azərbaycan Mərkəzi Bankı (AMB) İdarə Heyətinin 27 yanvar 2016-cı il tarixli qərarları ilə məcmu kapitalın minimum məbləği tələbinə əməl etmədiyinə, kreditorları qarşısında öhdəliklərini icra edə bilmədiyinə, cari fəaliyyətini etibarlı və prudensial qaydada idarə etmədiyinə görə "Qafqaz İnkişaf Bankı" ASC və "Atrabank" ASC-nin bank lisenziyaları ləğv edilib. Mərkəzi bankın verdiyi xəbərə görə, "Banklar haqqında" qanunun 51-ci və 52-ci maddələrinə uyğun olaraq bu gündən bu banklara müvəqqəti inzibatçı təyin edilib. AMB bildirir ki, "Qafqaz İnkişaf Bankı" ASC və "Atrabank" ASC Əmanətlərin Sığortalanması Fonduna üzv banklardır və Fond tərəfindən əhalinin qorunan əmanətləri üzrə qanunvericiliyə müvafiq olaraq kompensasiyaların ödənişi həyata keçiriləcək. Bundan başqa "NBCbank" ASC və "Yunayted Kredit Bank" ASC Əmanətlərin Sığortalanması Fonduna üzv bankların reyestrindən çıxarılıb və onlara verilmiş şəhadətnamə ləğv edilib.

Sığorta şirkətləri özəl klinikalardan güzəştlər tələb edir

Azərbaycanın sığorta şirkətləri tibbi sığorta üzrə xidmətlər göstərmək üçün özəl klinikalardan güzəştlər tələb edir. Azərbaycan Sığortaçılar Assosiasiyasının rəhbəri Orxan Bayramov mətbuat konfransında bu barədə məlumat verib. Onun sözlərinə görə, mövcud məsələ bu gün səhər saatlarında Dövlət Sığorta Nəzarəti Xidmətinin sədri Namiq Xəlilovun da iştirak etdiyi sığorta şirkətlərinin rəhbərləri ilə görüşdə müzakirə olunub: "Biz sığorta şirkətlərinin tibbi sığorta üzrə xərcləri necə azalda biləcəyini, eləcə də bu sığorta növü üzrə xidmətlərin göstərilməsi formatınının dəyişdirilməsi imkanını müzakirə etdik". O.Bayramov dərman qiymətlərinin artmasına görə tibbi xidmətlər üzrə qiymətləri artırmağı düzgün hesab etmir: "Bütün tibbi xidmətlər dərmanlarla bağlı deyil, buna görə də özəl klinikaların göstərdikləri xidmətlərin qiymətini artırması düzgün deyil, axı bütün digər xərclər, məsələn, elektrik enerjisi və ya vergi xərcləri onlar üçün əvvəlki kimi qalıb".

Bakı-Yalama-Bakı elektrik qatarı fəaliyyətə başlayacaq

Sərnişinlərin çoxsaylı arzu və təklifləri nəzərə alınaraq, fevralın 1-dən 611/612 nömrəli Bakı-Yalama-Bakı elektrik qatarı fəaliyyətə başlayacaq. Sərnişinlərin çoxsaylı arzu və təklifləri nəzərə alınaraq, fevralın 1-dən 611/612 nömrəli Bakı-Yalama-Bakı elektrik qatarı fəaliyyətə başlayacaq. “Azərbaycan Dəmir Yolları” QSC-nin mətbuat katibliyindən bildirilib ki, həmin tarixdən Bakı-Xaçmaz-Keşlə marşrutu ilə işləyən 6803/6804 nömrəli elektrik qatarının fəaliyyəti dayandırılacaq. 611/612 nömrəli Bakı-Yalama-Bakı elektrik qatarı hər gün saat 20:00-da Bakı-sərnişin stansiyasından yola düşəcək, saat 01:10-da Yalama stansiyasına çatacaq, 03:30-da Yalama stansiyasından yola düşəcək və saat 09:15-də Bakı-sərnişin stansiyasına çatacaq.