KATV1 güzəştli tarif paketini təqdim edir

  KATV1-in "Veteran" adlı sosial paketi çərçivəsində güzəştli qruplar əsas TV-paketini cəmi 5 manata izləyə bilirlər. KATV1-in "Veteran" adlı sosial paketi çərçivəsində güzəştli qruplar əsas TV-paketini ayda cəmi 5 manata izləyə bilirlər. KATV1-dən verilən məlumata əsasən, sözügedən sosial paket Böyük Vətən müharibəsi və Əfqanistan veteranlarına, həmçinin 1-ci və 2- ci qrup Qarabağ Müharibəsi əlillərinə təqdim olunur. Şirkətdə qeyd etdilər ki, sözügedən sosial paket KATV1 şirkətinin yarandığı 2006-cı ildən mövcuddur və yuxarıda qeyd olunan qrupa daxil olan hər kəs həmin güzəştin üstünlüklərindən bəhrələnə bilər. Bununla belə, sosial paketdən həm yeni abunəçilər, həm də artıq qoşulmuş abunəçilər istifadə bilər. Qeyd etmək lazımdır ki, "Veteran" sosial paketi Myvideo.az portalı vasitəsilə yayımlanan ödənişli telekanallara da şamil olunur. KATV1 şirkəti həm güzəştli qrupların sayını, həm də "Veteran" sosial paketi çərçivəsində göstərilən xidmətlərin siyahısının genişləcəyini də istisna etmir.  

7-ci Qlobal Forumu üçün xüsusi aviareyslər açılacaq

Bakıda keçiriləcək BMT-nin Sivilizasiyalar Alyansının 7-ci Qlobal Forumu üçün xüsusi aviareyslər açıla bilər. Mədəniyyət və Turizm nazirliyinin mətbuat xidmətindən Trend-ə verilən məlumata görə, bu məsələ mədəniyyət və turizm naziri Əbülfəs Qarayevin rəhbərlik etdiyi nümayəndə heyətinin Azərbaycan Respublikası və Körfəz ölkələri arasında mədəniyyət və turizm sahələrində əməkdaşlığın genişləndirilməsi və intensivləşdirilməsi məqsədilə Qətər Dövlətinin Doha şəhərinə səfəri zamanı müzakirə edilib.Ə.Qarayev "Qatar Airways" şirkətinin sədrinin birinci müavini ilə görüşüb. Görüşdə 25-27 aprel tarixlərində Bakıda keçiriləcək BMT-nin Sivilizasiyalar Alyansının 7-ci Qlobal Forumu üçün xüsusi aviareyslərin açılması ilə bağlı məsələlər müzakirə olunub. Həmçinin, Azərbaycanın Qəbələ və Gəncə beynəlxalq hava limanlarından uçuşların həyata keçirilməsi, reyslərin təşkili və "Azərbaycan Hava Yolları" (AZAL) ilə birgə reyslərin təşkili imkanlarına baxılması qeyd olunub.Qətərin mədəniyyət və idman naziri Salah bin Qanem Al Əli ilə Qətərin Milli Teatr Binasında keçirilən görüş zamanı tərəflər mədəniyyət və idman sahələrində ikitərəfli əməkdaşlıq məsələlərini, eləcə də bu sahələrdə əməkdaşlığın gücləndirilməsi imkanlarını müzakirə ediblər. Görüşdə həmçinin, nazir Əbülfəs Qarayev Bakıda keçiriləcək Qlobal Forum haqqında məlumat vermiş və həmkarını tədbirdə iştirak etməyə dəvət etmişdir. İki ölkədə qarşılıqlı mədəniyyət günlərinin, Azərbaycan kino günlərinin təşkili, teatr kollektivlərinin qarşılıqlı səfərlərinin təşkili, o cümlədən, opera nümunələri, musiqi sahəsi, əl işləri sərgiləri, muğam musiqisi ilə bağlı tədbirlərin keçirilməsi məsələləri nəzərdən keçirilib.  

Nəqliyyat vasitələrinin hərəkət istiqaməti dəyişdirilib

  "Bakı Ağ Şəhər" ("Baku White City") layihəsi çərçivəsində Xaqani Rüstəmov küçəsi ilə Nobel prospektinin kəsişməsində “Azəravtoyol” ASC tərəfindən yeni yeraltı piyada keçidinin tikintisi işləri aparılır. ASC-dən apa-ya verilən məlumata görə, bu səbəbdən sözügedən hissədə nəqliyyat vasitələrinin hərəkət istiqaməti dəyişdirilib. Belə ki, mərkəzdən Nobel prospektinə doğru hərəkətdə olan nəqliyyat vasitələri Neftçilər prospekti ilə Nobel prospektinin kəsişməsində yerləşən yeni Dənizkənarı avtomobil yolundan istifadə edərək Nobel prospekti boyunca hərəkətlərinə davam edə bilirlər. Əks istiqamətdə, yəni Nobel prospektindən mərkəzə doğru hərəkətdə olan nəqliyyat vasitələri üçün müvəqqəti olaraq Xəqani Rüstəmov küçəsi ilə kəsişmədə mövcud yola paralel olaraq yeni yol hissəsi salınıb. Nəqliyyat vasitələri həmin yeni yol hissəsindən istifadə edərək hərəkətlərinə rahat və maneəsiz şəkildə davam etdirirlər. Tikintisi aparılan yeraltı piyada keçidinin 4 çıxışı var. Keçidin uzunluğu 280 metr, qalereyasının eni 8 m, hündürlüyü isə 3,2 metrdir. Keçidlər 8 ədəd eskalatorla təmin olunacaq. Keçidin tikintisi ilə "Bakı Ağ Şəhər"dən vətəndaşların birbaşa Dənizkənarı Bulvar ərazisinə və əksinə rahat, təhlükəsiz keçidi təmin olunacaq. Yeraltı piyada keçidinin giriş hissələrinin tikintisi demək olar ki, yekunlaşıb. Hazırda keçidin Nobel prospektinin altından keçən hissəsinin inşası işləri aparılır. Buna görə, Nobel prospektinin Xəqani Rüstəmov küçəsi ilə kəsişməsində sıxlığın yaranmaması üçün sürücülərdən tikinti işlərinin aparıldığı müddət ərzində öncədən hərəkət istiqamətlərinə uyğun alternativ yollar seçməkləri tövsiyə olunur. Qeyd edək ki, "Bakı Ağ Şəhər" ("Baku White City") layihəsi çərçivəsində “Azəravtoyol” ASC tərəfindən Xaqani Rüstəmov küçəsinin əsaslı şəkildə yenidən qurulması işləri də həyata keçirilir. Bakının iki əsas prospektini - Babək və Nobel prospektlərini birləşdirəcək küçənin yenidən qurulması layihəsi çərçivəsində daha bir bu cür keçidin inşası Süleyman Vəzirov küçəsi ilə kəsişmədə də aparılacaq.  

Azərbaycana yük vaqonu gətirilib

  Son 11 ayda Rusiyadan Azərbaycana 3100 yeni yük vaqonu gətilib. Bu barədə apa-ya “Azərbaycan Dəmir Yolları” Qapalı Səhmdar Cəmiyyətinin (QSC) mətbuat katibliyinin rəisi Nadir Əzmmədov bildirib. Onun sözlərinə görə, 2015-ci ilin mart ayında QSC sədri Cavid Qurbanov Rusiya Federasiyasının F. Dzerjinski adına “Uralvaqonzavod”  Elmi-İstehsal Korporasiyasının baş direktoru Oleq Sienko ilə görüşüb. Görüşdə “Uralvaqonzavod”dan 3100 müxtəlif təmayüllü yük vaqonunun alınması ilə bağlı müqavilə imzalanıb. Qısa zaman kəsiyində vaqonların hamısı ölkəmizə gətirilib. Bunlardan 400-ü qapalı, 400-ü platforma, 200-ü iritonnajlı konteyner daşıyan platforma, 1000-i yarımvaqon, 600-ü çən, 300-ü taxıldaşıyan, 100-ü xopper, 100-ü isə sement daşıyan vaqondur. Qeyd edək ki, “Azərbaycan Dəmir Yolları”nın sifariş etdiyi yeni vaqonların ilk qrupu  25 aprel 2015-ci ildə ölkəmizə gətirilib.  

Qızıl ucuzlaşıb…

Amerika fond bazarında Dow Jones indeksi 0,31% - 17 737,00 bəndədək, S&P 500 0,32% - 2 066,13 bəndədək, NASDAQ 0,46% - 4 891,80 bəndədək azalıb. “APA-Economics” xəbər verir ki, Avropa fond bazarlarında FTSE 100 indeksi 0,30% - 6 164,72 bəndədək, Almaniya DAX-ı 0,28% - 9 822,08 bəndədək, Fransa CAC-40-ı 0,53% - 4 345,22 bəndədək bahalaşıb. COMEX-də sonuncu hərraclarda qızılın unsiyası 8,30 dollar bahalaşaraq 1 227,60 dollara, gümüş isə 0,15 dollar artaraq 15,09 dollara satılıb.  

Neftin qiyməti ucuzlaşmaqda davam edir

Dünya birjalarında neftin qiyməti ucuzlaşmaqda davam edib. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 0,85 dollar ucuzlaşaraq 35,51 dollar, Londonun İCE (“İnterContinental Exchange Futures”) birjasında “Brent” markalı neftin bir barrelinin qiyməti 0,71 dollar azalaraq 37,52 dollar olub. AZƏRTAC xəbər verir ki, “AzəriLayt” markalı neftin bir barrelinin qiyməti isə 0,36 dollar ucuzlaşaraq 38,86 dollar təşkil edib.  

Qanvermə aksiyası keçiriləcək

Sabah Azərbaycan Beynəlxalq Bankının Baş ofisində də qanvermə aksiyası keçiriləcək. Bu barədə virtualaz.org saytına bankdan məlumat verilib. Bank əməkdaşları hərbi əməliyyatlar zamanı yaralanmış hərbçilərin müalicəsinə kömək məqsədilə qan verəcəklər. Bankdan verilən məlumatda bildirilir ki, əməliyyatlar zamanı şəhid olmuş hərbçilərin, yaxud onların ailə üzvlərinin Azərbaycan Beynəlxalq Bankına kredit borcunun olub-olmadığı araşdırılacaq. Belə bir borc olduğu təqdirdə Bank bu borcların ləğvi barədə qərar qəbul edəcək.  

Mərkəzi Bankda struktur dəyişikliyi

Azərbaycan Mərkəzi Bankında (AMB) struktur dəyişikliyi aparılır. Bu barədə "APA-Economics"in sorğusuna cavab olaraq AMB-dən bildirilib. Məlumatda qeyd edilib ki, bank nəzarəti və Mərkəzləşdirilmiş Kredit Reyestri ilə bağlı funksiyaların yeni yaradılmış Maliyyə Bazarlarına Nəzarət Palatasına keçməsi ilə əlaqədar müvafiq struktur dəyişikliyinin həyata keçirilməsi prosesi gedir. Proses tamamlandıqdan sonra struktur dəyişikliklərlə bağlı ictimaiyyətə əlavə məlumat veriləcək.  

Cəbhə bölgəsindəki abunəçilərə dəstək

  "Bakcell" şirkəti cəbhə bölgələrində vəziyyətin gərginləşməsi və əhalinin mobil rabitəyə artan ehtiyacını nəzərə alaraq, bu bölgələrdə yaşayan “Bakcell” abunəçilərinin balansına pulsuz dəqiqələr yükləyib. Şirkətdən “APA-Economics”ə verilən məlumata görə, bu gündən etibarən Ağdam, Füzuli və Tərtər rayonları ərazisində yaşayan və ötən 30 gün ərzində mobil telefon nömrəsi aktiv olan (zəng qəbul edən və zəng edən) “Bakcell” abunəçiləri balanslarının 50 dəqiqə artırılması ilə bağlı qısa SMS alacaqlar. Həmin pulsuz dəqiqələr şəbəkədaxili zənglər üçün nəzərdə tutulur və aprel ayının sonuna qədər qüvvədədir. Bununla yanaşı, “Bakcell” cəbhə bölgələrində şəbəkənin keyfiyyətinə xüsusi nəzarət edir.    

Pulsuz hüquqi yardım

Artıq vətəndaşlar öz əmlaklarının qiymətləndirilməsini daha asan və obyektiv həyata keçirə biləcək. xezerxeber.com xəbər verir ki, Əmlak Məsələləri Dövlət Komitəsinə belə bir səlahiyyət verilib. Vətəndaşlar daşınmaz əmlak sahəsinə aid qarşılaşdıqları problemlərlə bağlı qurumdan pulsuz hüquqi yardım da ala biləcəklər. Əmlak Məsələləri Dövlət Komitəsinə vətəndaşlara pulsuz hüquqi yardım göstərilməsi ilə bağlı yeni səlahiyyət verilib. Artıq vətəndaşlar torpaq, eləcə də sahib olduqları daşınmaz əmlakla bağlı reyestr xidmətinin ərazi ofislərinə yaxınlaşmaqla tam məlumat ala bilərlər. Komitə eyni zamanda daşınmaz əmlakın qiymətləndirilməsi ilə bağlı da fəaliyyətini də genişləndirir. Qurum artıq Sumqayıt, Quba və Xaçmazda 150 mindən çox əmlakın qiymətləndirilməsini başa çatdırıb. Vətəndaşlar bu məlumatdan faydalanmaqla yanaşı ərazi ofislərində daşınmaz əmlakı girov qoyan, eləcə də satan zaman onun bazara uyğun qiymətləndirməsini həyata keçirə bilərlər. Xidmətin qiyməti isə əmlakın həcmindən asılı olaraq dövlətin müəyyən etdiyi tariflər əsasında həyata keçirilir. Qurumun sözçüsü eyni zamanda torpaqların elektron kadastr və uçot sisteminin yaradılması ilə bağlı komitənin üzərinə qoyulan vəzifələrin sürətlə yerinə yetirildiyinə də diqqət çəkib. Ölçmə işləri ilə yanaşı məlumatların yeni elektron bazaya daxil edilməsi gələcəkdə torpaqlardan elmi istifadəni asanlaşdıracaq və torpaqların keyfiyyət göstəricilərinin artırılmasına geniş imkan yaradacaq.