Akademik Milli Dram Teatrı aprel ayının repertuarını təqdim edir

Azərbaycan Dövlət Akademik Milli Dram Teatrı apreldə maraqlı səhnə əsərləri ilə çıxış edəcək. Sənət ocağının aprel repertuarını təqdim edirik: 1 aprel – “Ah, bu uzun Sevda yolu” 2 aprel – “Xanuma” 3 aprel – “Ölülər” 7 aprel- “Manqurt” 8 aprel – “Cəhənnəm sakinləri” 9 aprel – “Filumena Marturano” 10 aprel – “Dəli yığıncağı” 15 aprel – “12-ci gecə, yaxud hər nə istəsəniz” 16 aprel – “Qətibə inanc” 17 aprel – “Ah, bu uzun Sevda yolu” 21 aprel – “Yaşar” 22 aprel – “Sinif yoldaşları” 23 aprel – “Şah Qacar” 24 aprel – “Zorən şorgöz” 28 aprel – “İnanıram” 29 aprel - “Filumena Marturano” 30 aprel – “Mənim günahım”  

“Azərbaycanım” V Respublika Uşaq Rəsm Festivalı çərçivəsində

Bakıda “Azərbaycanım” V Respublika Uşaq Rəsm Festivalı çərçivəsində eyniadlı müsabiqə elan olunub.Müsabiqə Mədəniyyət və Təhsil nazirlikləri, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Naxçıvan Rəssamlar Birliyinin dəstəyi, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə “Şuşa İli” çərçivəsində keçirilir.Müsabiqə uşaq, yeniyetmə və gənclərin yaradıcılığını stimullaşdırmaq, əhatə olunduqları mədəni mühitə yanaşma tərzini təkmilləşdirmək, onların bədii zövqünü inkişaf etdirmək, Azərbaycan xalqının mənəviyyatını, Azərbaycan əsgərinin qəhrəmanlığını, işğaldan azad olunmuş ərazilərimizin mədəni irsinin daha geniş təbliği məqsədilə təşkil olunur.xeber100.com

Bakı Bələdiyyə Teatrının təqdimatında “Sehrbaz” tamaşası

Aprelin 1-də Bakı Bələdiyyə Teatrında “Sehrbaz” tamaşasının premyerası keçiriləcək. Yazıçı, Əməkdar incəsənət xadimi Firuz Mustafanın psixoloji-dram janrında yazdığı “Sehrbaz” tamaşasında insanoğlunun həqiqətə tapınmasını, öz-özünə hesabat verməsini, yalanın çarmıxa çəkilərək həqiqət önündə diz çökməsini və bütün bunlardan sonra insanlığın əbədi yaşam qazanmasını diqqətə çəkilib. İlk görüşdə və ilk baxışda bir-biri ilə tanış olmayan, yad, özgə adamların qəribə taleyindən söhbət açılan pyesdə, hadisələrin gedişi prosesində məlum olur ki, bu adamlar heç də bir-birinə “yad” deyillər. Onların həyat “xətləri” nə zamansa bir nöqtədə kəsişib. Bir-birini  əvəz edən  gərgin hadisələr fonunda vaxtilə baş vermiş bir sıra müdhiş hadisələrin, sirlərin üstü açılır. Əsərdə sevgi, nifrət, xəyanət səhnələri obrazların  daxili aləminin açılmasında əsaslı rol oynayır, eyni zamanda faciəvi və komik notlar bir-birini izləyir... Tamaşanın quruluşçu rejissoru, Xalq artisti Mərahim Fərzəlibəyov, quruluşçu rəssam, Əməkdar mədəniyyət işçisi İlham Əsgərov, musiqi hissə müdiri, Əməkdar mədəniyyət işçisi Nazim Əbidov, işıqçı rəssam Tərlan Ələsgərli, illyuziya məsləhətçisi Elmar İbrahimov, dizayn işləri üzrə tərtibatçı Elnur Əliyevdir. Səhnə əsərində İsmayıl Atakişiyev, Tural Əhməd, Zülfiyyə Qurbanova, Aynur Abbasova iştirak edirlər. Xatırladaq ki, Bakı Bələdiyyə Teatrı 1992-ci ildə görkəmli teatr və kino xadimləri, Xalq artistləri Amaliya Pənahova və Yusif Muxtarov tərəfindən yaradılmışdır. Bu illər ərzində teatrın repertuarında Cəlil Məmmədquluzadənin, Nəriman Nərimanovun, Mirzə Fətəli Axundovun, Nazim Hikmətin, Əziz Nesinin, Cəfər Cabbarlının, eləcə də dünya klassiklərinin pyeslərini uğurla səhnələşdirilmişdir. “Sehrbaz” tamaşası 1 aprel 2022-ci il tarixində saat 19.00-da nümayiş olunacaq.xeber100.com

“Sən qayıdacaqsan” tamaşasının premyerası keçiriləcək

Martın 31-də Bakı Bələdiyyə Teatrında “Sən qayıdacaqsan” tamaşasının premyerası keçiriləcək. 30 mart-3 aprel 1918-ci il tarixində Bakı şəhərində, eyni zamanda Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə erməni silahlı dəstələri tərəfindən azərbaycanlılara qarşı törədilmiş soyqırımın timsalında bütün dünyada törədilmiş müharibələrə həsr olunan tamaşa rejissor  Bəhruz Vaqifoğlunun "Sən qayıdacaqsan" adlı pyesi əsasında hazırlanıb. Qeyd edək ki, tamaşanın qəhrəmanlarının adları ümumiləşdirilib və onların hər biri müharibənin özünü və sonrakı fəsadlarını yaşayan insanlardır. Hər bir qəhraman hər gün eyni vaxta qatar yoluna tələsir, eyni vaxta qatar yolunda müharibədə itirdiklərinin yolunu gözləyir. Əsərin sonunda qəhrəmanlar yol ayrıclarını birləşdirib bir düz yol əmələ gətirirlər ki, bu da onların həsrətinə son qoyur. Əsərin ideyası da məhz bunun üzərində yazılıb. Əsərin müəllifi və quruluşçu rejissoru Bəhruz Vaqif oğlu, ideya müəllifi Hüsniyyə Mürvətova, quruluşçu rəssam, Əməkdar mədəniyyət işçisi İlham Əsgərov, musiqi hissə müdiri, Əməkdar mədəniyyət işçisi Nazim Əbidov, işıqçı rəssam Tərlan Ələsgərli, kostyum sexinin müdiri Leyla Əkbərova, dizayn işləri üzrə tərtibatçı Səbuhi Səmədovdur. Tamaşada iştirak edirlər: Hüsniyyə Mürvətova(Əməkdar artist), Rafiq İbrahimov(Əməkdar artist), Mehman Abdullayev, Zülfiyyə Qurbanova, Toğrul Rza, Zülfiyyə Məmmədova, Elçin Muradov, Ülviyyə Rza, Fateh Muradov, Əzizə Həşimova. HAŞİYƏ: Bakı Bələdiyyə Teatrı 1992-ci ildə görkəmli teatr və kino xadimləri, Xalq artistləri Amaliya Pənahova və Yusif Muxtarov tərəfindən yaradılmış və yarandığı gündən bu günə kimi saysız-hesabsız səhnə əsərləri ilə milli teatr mədəniyyətini Azərbaycanda, eyni zamanda dünya ölkələrində təbliğ edir. Bu illər ərzində teatrın repertuarında Cəlil Məmmədquluzadənin, Nəriman Nərimanovun, Mirzə Fətəli Axundovun, Nazim Hikmətin, Əziz Nesinin, Cəfər Cabbarlının, eləcə də dünya klassiklərinin pyeslərini uğurla səhnələşdirilmişdir. “Sən qayıdacaqsan” tamaşası 31 mart 2022-ci il tarixində saat 18.00-da nümayiş olunacaq.xeber100.com    

66-cı “Eurovision” mahnı müsabiqəsi may ayında keçiriləcək

“Eurovision 2022” mahnı müsabiqəsində İtaliyanı “Mahmood&Blanco” qrupu təmsil edəcək.Ev sahibi İtaliya birbaşa finaldan yarışmaya qoşulacaq və “Mahmood&Blanco” qrupu “Brividi” mahnısı ilə səhnəyə çıxacaq.“Mahmood&Blanco” qrupu bu ilin fevralında İtaliyada keçirilən 72-ci Sanremo musiqi festivalının qalibi olub.Xatırladaq ki, 66-cı “Eurovision” mahnı müsabiqəsi İtaliyanın Turin şəhərinin ev sahibliyi ilə may ayında keçiriləcək. Avropa Yayım Birliyi (EBU) və İtaliyanın “RAI” televiziya kanalının təşkilatçılığı ilə keçiriləcək dünyanın ən böyük canlı musiqi tədbirində bu il 40 ölkə iştirak edəcək. “Eurovision 2022”nin yarımfinalları mayın 10-12-də, finalı isə mayın 14-də İtaliyanın ən böyük qapalı arenalarından olan “PalaOlimpico”da keçiriləcək.xeber100.com

Andrey Tarkovskinin kitabı Azərbaycan dilində

Azərbaycan Kinematoqrafçılar İttifaqı kino nəşrlərinin say və keyfiyyət artımını kinomuzun inkişafı üçün vacib hesab etdiyinə görə, bu istiqamətdə ardıcıl layihələr reallaşdırır. “Azərbaycan kino tarixi” 4 cildliyi, “Həsən Seyidbəyli. Sənətkar və şəxsiyyət” kitabı, rüblük “Rakurs” dərgisi bu sıradandır. Növbəti layihə “Parlaq imzalar” nəşriyyatının təşəbbüsü ilə həyata keçirilmiş kinorejissor, ssenarist Andrey Tarkovskinin “Zapeçatlennoe vremya”(“Həkk olunmuş zaman”) kitabının Azərbaycan dilində nəşridir. Kitab tərcüməçi, şair, publisist Azad Yaşar tərəfindən tərcümə olunub. Qeyd edək ki, kino aləmində yüksək dəyərə malik olan, bir neçə xarici dilə tərcümə olunmuş “Həkk olunmuş zaman” Andrey Tarkovskinin sənət manifestidir. Kitabın girişində Tarkovskinin həyat və yaradıcılıq bioqrafiyası yer alıb. Bu fəsildə onun oxucularla olan tanışlığı əsas götürülüb. Tarkovski yazır ki, tamaşaçı ilə ünsiyyətimin (bəzən isə tam anlaşmazlığın!) necəliyini göstərməkdən ötrü xarakterik məktublardan sitatlar gətirməkdən özümü saxlaya bilməyəcəyəm. Və beləliklə də oxucu məktublarına yer verir. Məktublarda olan tənqidi fikirlər, bəzən oxucu hiddəti və rejissorun filmlərini analiz etmə səyi kimi məqamlar diqqətdən yayınmır. Hiss olunur ki, Tarkovski ona ünvanlanan məktublardakı hər kəliməni anlamağa çalışıb və kitabda bunu geniş oxucu auditoriyasına təqdim etməklə onlara da bəzi şeyləri anlatmağa çalışıb. Yeri gəlmişkən, məktublarda əsas tənqid hədəfi rejissorun öz ssenarisi əsasında 1974-cü ildə quruluş verdiyi “Ayna” filminə yönəlib. Məktublarda Tarkovskiyə nifrət dolu fikilər aşılayan olduğu kimi, onu təhqir etməkdən çəkinməyənlər də olub. Tarkovski “Bu cür müraciət sahiblərinə mən heç nə tövsiyə edə bilməzdim. Bu mövcud vəziyyət məni öz hədəfimdən heç cür yayındıra bilməzdi, çünki bu sayədə hər dəfə daha bariz şəkildə əmin olurdum ki, mənim filmlərimi gözləyən və onları sevən məxsusi bir tamaşaçı auditoriyam var”. Ona bu inamı verən də tamaşaçılarından aldığı, sənətinə verilən qiymətlə yanaşı, onun yaratdığı sənət nümunəsini hiss edərək duyan, qiymətləndirənlərin olması idi. Bu baxımdan rejissor kitabda onu da xüsusilə vurğulayır ki, yazdığı bu kitabla kiməsə ağıl vermək fikrində deyil: “Bu kitabı yazarkən əslində çox araşdırılmasına baxmayaraq, xeyli gənc və cəlbedici sayılan kino sənətinin cəngəlliklərindən hər kəsdən elə öncə özüm çıxmağa can atmışam”. Yeri gəlmişkən, Tarkovski kitabı yazarkən gündəlik qeydlərindən, çıxışlarından, müsahibələrindən geniş istifadə edib. Tarkovski filmlərinə olan münasibəti, mövzuya necə hakim olması və ümumiyyətlə çəkdiyi filmlərin ərsəyə gəlməsinin səbəblərini araşdırır: “Elə əsərlər var ki, bədii obrazlarının dəqiqiliyini və özünəməxsusluğunu, xarakterlərin sözlə ifadə olunan dərinliyini, kompozisiyası arxasında sehri və ümumilikdə kitabın yaratdığı təsir gücünü öz müəlliflərinə borcludur”. İlk filmini yaradarkən kino rejissorluğu işini bacarıb-bacarmayacağını özü üçün dəqiqləşdirməyi qarşısına məqsəd qoyan və “Əgər bu film alınsa, deməli, kinoda işləməyə layiqəm” fikrini əsas götürən rejissor” məhz bəhs etdiyi, 1962-ci ildə çəkdiyi ilk tammetrajlı “İvanın uşaqlığı”  filminin təhlil formasını xarakterizə etməklə özünün rejissor imkanlarının nələrə qadir olduğunu da açıqlamağa və ümumiyyətlə filmlərində nə demək istədiyini anlatmağa çalışıb. Azərbaycan Kinematoqrafçılar İttifaqından bildiriblər ki, bu layihəni dəstəkləmələrinin səbəblərindən biri mətnin səliqəli, maksimum orijinala yaxın tərcümə edilməsidir. AKİ “Parlaq imzalar” nəşriyyatı ilə bundan sonra da kino nəşrlərinin realizasiyası istiqamətində birgə işə əzmlidir.          

Beynəlxalq Muğam Mərkəzində ilk konsert proqramı təqdim olunub

Beynəlxalq Muğam Mərkəzinin “Muğam axşamları” layihəsinin 2022-2023-cü musiqi mövsümü üçün ilk konsert proqramı təqdim olunub.Mərkəzdən Azərtac-a bildirilib ki, böyük maraqla gözlənilən layihənin rəhbəri BMM -nin direktoru, Xalq artisti Murad Hüseynovdur.Konsertdə BMM-nin solistləri Mirələm Mirələmov və Nisbət Sədrayeva “Rast” və “Səmai Şəms” muğamını səsləndiriblər. Xanəndələri BMM-nin solistləri, tarda Rövşən Qurbanov, kamançada Ceyhun Muradov, qanunda Əməkdar artist Təranə Əliyeva, balabanda Rəfael Əsgərov, udda Vasif Yusipli, nağarada Amil Mustafayev müşayiət edib.Beynəlxalq Muğam Mərkəzi Azərbaycan milli musiqisinin təbliğinə həsr olunmuş bir neçə layihə həyata keçirir ki, onlardan biri də “Muğam axşamları” layihəsidir. Sərt karantin rejimindən sonra ilk dəfə tamaşaçılarla görüşə gələn layihənin bir özəlliyi də ondadır ki, BMM və İctimai Radio 90 FM arasında əməkdaşlıq sayəsində “Muğam axşamları” konsertləri radio dinləyicilərinə də təqdim olunacaq. Həmçinin “Muğam axşamları”nın hər konserti “Mədəniyyət” kanalı tərəfindən lentə alınaraq muğamsevərlərə çatdırılacaq.Musiqi mövsümü ərzində Beynəlxalq Muğam Mərkəzinin səhnəsində "Şur", "Zabul-Segah", "Çahargah", "Bayatı-Şiraz", "Humayun", "Şüştər", "Şahnaz", "Orta Mahur", "Arazbari", "Osmani", "Heydəri", "Bayatı Qacar", "Mahur hindi", "Qarabağ şikəstəsi", "Xaric segah", "Heyratı", "Mirzəhüseyn segahı", "Kəsmə şikəstə", "Bayatı Kürd" , "Ovşarı", "Dəşti", "Qatar", "Rahab", "Şirvan şikəstəsi" muğamları təqdim olunacaq.Qeyd edək ki, layihə 2017-ci ildən həyata keçirilir və layihənin beynəlxalq işıqlandırılmasında “Baku” jurnalının rolu böyük əhəmiyyət kəsb edib. Bu layihə çərçivəsində tanınmış ifaçılar tərəfindən muğamlar, xalq mahnıları və təsniflər səsləndirilib. Muğam sənətimizin fəlsəfəsini gələcək nəsillərə çatdırmaq məqsədilə reallaşan konsertlərə tamaşaçılar böyük maraq göstərməkdədir.Layihənin növbəti konserti martın 17-də təqdim ediləcək.xeber100.com

YARAT Müasir İncəsənət Məkanının birgə təşkilatçılığı ilə…

Mədəniyyət Nazirliyi və YARAT Müasir İncəsənət Məkanının birgə təşkilatçılığı ilə ictimaiyyətdə böyük əks-səda doğuran “Mədəni Yenilənmə” layihəsi 2022-ci ildə də davam etdiriləcək.Layihə çərçivəsində ilin ilk tədbirinə Xalq artisti Elnarə Kərimova və xor kollektivi dəvət olunub.Fevralın 15-də Azərbaycan Dövlət Akademik Filarmoniyasında Elnarə Kərimovanın səhnə fəaliyyətinin 30 illik yubileyi qeyd olunacaq. Konsertdə dirijorun rəhbərliyi ilə Ankara Radiosu Çoxsəsli Xorunun ifasında müxtəlif bəstəkarların xor əsərləri səsləndiriləcək. Eyni zamanda, səfər çərçivəsində Qarabağ Zəfəri ilə bağlı Türkiyə və Azərbaycanın birgə strateji layihəsi kimi dirijor Rauf Abdullayevin rəhbərliyi ilə TRT Ankara Radiosu Çoxsəsli Xorunun, Azərbaycan Dövlət Xor Kapellasının və Ü.Hacıbəyli adına Azərbaycan Dövlət Simfonik Orkestrinin ifasında dahi Azərbaycan bəstəkarı Qara Qarayevin “Zəfər marşı”nın səs yazısı nəzərdə tutulub.xeber100.com

İtaliyada 72-ci “Sanremo musiqi festivalı”nın açılışı olub

İtaliyada 72-ci “Sanremo musiqi festivalı”nın açılışı olub.Fevralın 5-dək davam edəcək festival İtaliyanın “RAI” telekanalı vasitəsilə canlı yayımlanır.“Ariston” tarixi teatrının səhnəsində keçirilən festivalın açılış mərasiminin aparıcısı italiyalı məşhur aktrisa Ornella Muti olub. Musiqi festivalının ilk günündə tanınmış müğənnilər Gianni Morandi və Massimo Ranieri ilə yanaşı, Achille Lauro, Harlem Gospel Choir, Yuman, Noemi, Michele Bravi, Mahmud&Blanco, Ana Mena, Rkomi, Dargen D'Amico, Giusy Ferreri kimi gənc musiqiçilərin ifaları dinlənilib.xeber100.com

Azərbaycan Dövlət Akademik Milli Dram Teatrının səhnəsində

Azərbaycan Dövlət Akademik Milli Dram Teatrının səhnəsində Cəlil Məmmədquluzadənin “Ölülər” pyesi əsasında hazırlanmış eyniadlı ikihissəli komediya-tamaşa yanvarın 16-da nümayiş olunub.Tamaşada görkəmli bəstəkar, Xalq artisti Qara Qarayevin “Ölülər” əsəri üçün bəstələdiyi musiqi yeni versiyada təqdim olunur.Mədəniyyət Nazirliyinin sifarişi ilə hazırlanan səhnə əsərinin elmi məsləhətçisi akademik İsa Həbibbəylidir.“Ölülər”in Şeyx Nəsrullahı Xalq artisti Nurəddin Mehdixanlı, Kefli İsgəndəri isə Əməkdar artist Anar Heybətov olub.Xronometrajı 130 dəqiqə olan səhnə əsərində rəsmlərin quruluşu Azər Paşa Nemətova məxsusdur.Aktyorların məharətli çıxışı səhnə əsərini daha baxımlı edib, tamaşa maraqla qarşılanıb.Əsərdəki mənəvi əsarət, fanatizm və cəhalət böyük cəsarətlə aktyorların ifasında özünəməxsus çalarlarla açılır. Belə ki, yaradıcı heyət Cəlil Məmmədquluzadə düşüncələrini yüksək məharətlə ifa edərək XX əsrin əvvəllərində Azərbaycanda baş verən prosesləri, mövhumat və cahilliyin poetik və dramatik lövhələrini dolğun təcəssüm etdirə bilirlər.xeber100.com