Təl-Əvivdə keçiriləcək mahnı müsabiqəsinin devizi elan edilib

Gələn il mayın 14-18-dək Təl-Əvivdə (İsrail) keçiriləcək “Eurovision-2019” mahnı müsabiqəsinin devizi elan edilib.Azərtac müsabiqənin rəsmi saytına istinadla xəbər verir ki, bu müsabiqənin devizi belə səslənir: “Dare to Dream” (“Arzularına sərbəstlik ver”). İsrail bu müsabiqəyə ev sahibliyi etmək hüququnu “Eurovision-2018” müsabiqəsində müğənni Netta Barzilayın qələbəsindən sonra qazanıb.Xatırladaq ki, “Eurovision-2019” müsabiqəsində Azərbaycanın da iştirak edəcəyi sentyabrın 18-də elan olunub.Azərbaycan İctimai Televiziyasının Musiqi, bədii və xüsusi layihələr departamentinin rəhbəri Leyla Quliyeva Azərtac-a müsahibəsində deyib: “Biz “Eurovision-2019” beynəlxalq mahnı müsabiqəsində iştirak etmək üçün sifariş vermişik. Bizim sifarişimiz qəbul edilib və 2019-cu ildə Təl-Əvivdə keçiriləcək müsabiqə Azərbaycanın iştirakını təsdiq edirik”.Onu da qeyd edək ki, Azərbaycan İctimai Televiziyası “Eurovision” mahnı müsabiqəsinin milli yayım kanalıdır.xeber100.com

Muzey Mərkəzində konsert proqramı təqdim ediləcək

Muzey Mərkəzində bəstəkar Tofiq Quliyevin xatirəsinə həsr olunmuş konsert proqramı təqdim ediləcək.Azərtac xəbər verir ki, bəstəkarın doğum günündə - noyabrın 7-də gerçəkləşəcək konsert proqramında Tofiq Quliyevin mahnıları, kino və tamaşalara yazdığı musiqilərdən parçalar səslənəcək. Konsert proqramının tərtibatçısı sənətşünaslıq üzrə fəlsəfə doktoru, dosent Nərgiz Hüseynovadır.Konsertin solistləri Üzeyir Hacıbəyli adına Bakı Musiqi Akademiyasının doktorantı, tenor Rüfət Piriyev və akademiyanın məzunu, soprano Güllübəyim Məmmədovadır. Konsertmeyster isə Qənirə Həsənovadır.xeber100.com

Gənc Tamaşaçılar Teatrı təqdim edir

Oktyabrın 28-də Gənc Tamaşaçılar Teatrında Migel de Servantesin “Don Kixot” əsəri əsasında eyniadlı tamaşanın premyerası olacaq.Teatrın mətbuat xidmətindən Azərtac-a bildirilib ki, yeni quruluşda təqdim olunacaq səhnə əsərinin quruluşçu rejissoru Azərbaycanın və Kalmıkiyanın Əməkdar incəsənət xadimi Bərham Osmanov, quruluşçu rəssamı Elşən Sərxanoğludur. Səhnə əsərinin plastik həlli Ceyhun Dadaşova aiddir.Tragikomediya janrında qurulan tamaşada dahi bəstəkar Qara Qarayevin “Don Kixot” simfonik qravürlərindən, həmçinin Qiya Kançelinin və digər bəstəkarların musiqilərindən istifadə olunub.Don Kixot rolunu Xalq artisti Qurban İsmayılov, Sanço Pansanı Əməkdar artist Şövqi Hüseynov canlandırırlar. Əsrlər öncə yazılmasına baxmayaraq bu gün üçün də aktual olan əsərin vasitəsilə yaradıcı heyət insana xas olan mərhəmət, sevgi, saflıq kimi duyğuları ifadə etməyə çalışacaq.xeber100.com

“Türk dünyasının ortaq dili ‒ naxışlar” simpoziumu keçiriləcək

Oktyabrın 25-27-də Bakıda “Keçə sənətində kəsişmə nöqtələri” mövzusunda üçüncü Beynəlxalq “Türk dünyasının ortaq dili ‒ naxışlar” simpoziumu keçiriləcək.Azərtac xəbər verir ki, Mədəniyyət Nazirliyi və Azərbaycan Xalça Muzeyinin təşkilatçılığı ilə üç gün davam edəcək simpozium konfrans, tematik sərgilər, ustad dərsləri, moda nümayişi və satış yarmarkasından ibarət olacaq. Azərbaycan, ingilis, rus və türk dillərində keçiriləcək tədbirə 22 ölkədən 83 iştirakçı qatılacaq.Simpozium çərçivəsində keçə sənəti nümunələrindən ibarət “Ənənəvi keçə sənəti” və “Keçə müasir incəsənətdə” sərgiləri təşkil ediləcək. Hər iki sərgidə azərbaycanlı ustalarla yanaşı, türk, rus, qırğız, macar, İsveç və digər ölkələri təmsil edən sənətkarların əl işləri nümayiş olunacaq.xeber100.com

XX Beynəlxalq musiqi festivalı keçirilib

Qazaxıstanın Karaqanda şəhərində XX Beynəlxalq “Музыкальная Сарыарка” musiqi festivalı keçirilib. Müxtəlif üslub və janrlarda musiqilərin səsləndirildiyi festivalda Qazaxıstanla yanaşı, Türkiyə, Rusiya, Qırğızıstan, Özbəkistan, Tatarıstan və Azərbaycan da iştirak edib. Ölkəmizi bu festivalda Musiqili Teatrın solisti Eleonora Mustafayeva təmsil edib. Konsertin sonunda Eleonora Mustafayeva və digər ifaçılar mükafatlandırılıb. E. Mustafayeva Musiqili Teatrda oktyabrın 27-də Faiq Sücəddinov və Tamara Vəliyevanın “Mən dəyərəm min cavana” tamaşasında Gülnaz, noyabrın 3-də Rauf Hacıyevin “Talelər qovuşanda” komediyasında isə Nərgiz rolunda çıxış edəcək.xeber100.com

“YARAT” Müasir İncəsənət Mərkəzi təqdim edir

Oktyabrın 26-da “YARAT” Müasir İncəsənət Mərkəzində “Etno hip-hop” adlı konsert proqramı təqdim olunacaq.Azərtac xəbər verir ki, musiqili gecədə xalq mahnıları, klassik, etno caz, hip-hop janrlarının sintezindən ibarət kompozisiyalar səslənəcək. Konsertdə gənc musiqiçi, bəstəkar İsmayıl Zülfüqarov öz bəstələdiyi, o cümlədən, məşhur klassik musiqiləri üç fərqli alətdə (tar, ud, gitara) ifa edəcək. Tədbirin iştirakçıları musiqi sahəsində göstərdiyi fəaliyyətlərə görə xüsusi adlara layiq görülən, prezident təqaüdçüləri və bir çox müsabiqələrin qalibləri olan gənclərdir.Konsertdə iştirak sərbəstdir.xeber100.com

“YARAT” Müasir İncəsənət Məkanının təşkilatçılığı ilə…

Oktyabrın 19-da “YARAT” Müasir İncəsənət Məkanının təşkilatçılığı ilə “Artım rooms” layihəsi çərçivəsində “Yeni hekayələr” adlı sərgisinin finisaj tədbiri keçiriləcək.Azərtac xəbər verir ki, ikinci layihə-sərgisində rəssamlar Füzuli Əliyev, Mina Abbasova, Vüsal Əhmədov, Rizone, Leyla Qabulova, Əhməd Nəbiyev və Roman Qocayevin müstəqil layihələri təqdim olunur. Bir-birindən fərqlənən layihələrdə bioqrafik, psixoloji-mental və sosial paralelləri vurğulamaq olsa da, hər bir layihə digəri ilə bağlı olmayan eksperiment kimi nümayiş etdirilir.Ziyarətçilər bir daha iştirakçıların işlərini görüb onlar ilə tanış ola bilərlər.xeber100.com

Mingəçevir Dövlət Dram Teatrı – 50

Oktyabrın 17-də Mingəçevir Dövlət Dram Teatrının 50 illiyinə həsr olunmuş tədbir keçiriləcək.Mədəniyyət Nazirliyindən Azərtac-a bildirilib ki, tədbir Prezident İlham Əliyevin “Mingəçevir Dövlət Dram Teatrının 50 illiyi haqqında” Sərəncamına uyğun olaraq reallaşacaq.Qeyd edək ki, 1968-ci ildə yaradılan bu sənət ocağı 1969-cu ilin mart ayının 28-də C.Cabbarlının “Almaz” tamaşası ilə fəaliyyətə başlayıb. Teatrın ilk mütəxəssisləri Mingəçevir Xalq Teatrının və Azərbaycan Dövlət Teatr İnstitutunun məzunlarından ibarət olub. Bu illər ərzində sənət ocağının yaradıcı kollektivi dünya və Azərbaycan dramaturgiyasından 300-ə yaxın tamaşa hazırlayıb.Yarandığı gündən repertuarında milli klassik və müasir dramaturgiya nümunələrini əsas götürən Mingəçevir Dövlət Dram Teatrı, hər zaman rus və dünya dramaturgiyasına da müraciət edib.Teatr ölkəmizin hüdudlarından kənarda da fəal mədəniyyət ocağı kimi tanınır. Teatr respublikamızın əksər şəhər və rayonları ilə bərabər, Türkiyə, Gürcüstan, Rusiya və digər ölkələrə qastrol səfərləri etməklə yanaşı, yerli və beynəlxalq festivalların iştirakçısı və qalibi olub.Azərbaycan Teatr Xadimləri İttifaqının İdarə Heyətinin müvafiq qərarı ilə Mingəçevir Dövlət Dram Teatrının Hüseyn Cavidin “Ana” tamaşası klassik dramaturgiyanın uğurlu səhnə təcəssümünə görə “Qızıl Dərviş” mükafatına layiq görülüb.xeber100.com

“YARAT” Müasir İncəsənət Mərkəzində konsert təşkil olunacaq

Oktyabrın 16-da “YARAT” Müasir İncəsənət Mərkəzində baltimorlu repçi, musiqiçi və sahibkar Vordsmith tərəfindən ustad dərsi və konsert təşkil olunacaq.Azərtac xəbər verir ki, Vordsmith çox güclü motivasiya mesajını çatdıran hip-hop musiqisi yaradır. Onun missiyası “Məqsəd mesajı” vasitəsilə əyləndirmək və maarifləndirmək, həmişə bir nümunə olaraq, bu mesajı təmiz, keyfiyyətli və çoxsatılan “kütlələr üçün musiqi” ilə əlaqələndirməkdir.Vordsmith öz şüurlu-kommersiya hip-hop musiqisi və teatr tamaşaları ilə milli və beynəlxalq səhnələrdə çıxış etməyə çalışır. Onun ilhamlandırıcı mesajla dolu məzmunlu və bütün yaş dövrlərini əyləndirən mahnıları, əsasən adi fəhlə təbəqəsinə ünvanlanıb.xeber100.com

İstiqlal Muzeyində tədbir–sərgi keçiriləcək

Oktyabrın 17- də Azərbaycan İstiqlal Muzeyində dövlət müstəqilliyimizin bərpasının 27–ci ildönümü münasibətilə “Paralel” adlı tədbir–sərgi keçiriləcək.Muzeydən Azərtac-a bildirilib ki, sərgidə Azərbaycan Xalq Cümhuriyyətinin və Müstəqil Azərbaycan Respublikasının fəaliyyətini və inkişafını özündə əks etdirən 40–dan çox fotoşəkil nümayiş etdiriləcək.Tədbirdə Təhsil Nazirliyi Gənclərin Respublika bədii yaradıcılıq evinin tələbələrinin hazırladığı maraqlı bədii proqram təqdim olunacaq.xeber100.com