Animafilm I Beynəlxalq animasiya festivalı keçiriləcək

Bakıda oktyabrın 19-dan 21-dək Animafilm I Beynəlxalq animasiya festivalı keçiriləcək.Azərtac xəbər verir ki, ilk mövzusu “Azərbaycan animasiyası” olan festivala “Ən yaxşı qısametrajlı Azərbaycan animasiya filmi”, “Ən yaxşı animasiyalı sosial çarx”, “Ən yaxşı animasiyalı reklam”, “Qısametrajlı animasiya filmi üçün ən yaxşı orijinal ssenari” kateqoriyaları üzrə müsabiqəyə başlanılıb.Festivalda iştirak etmək üçün 22 ölkədən 84 müraciət daxil olub. Nominasiyaları dəyərləndirmək üçün tanınmış animasiya rejissorlarından, sənətşünaslardan ibarət iki beynəlxalq münsiflər heyəti yaradılıb, eyni zamanda “Tamaşaçı rəğbəti” mükafatı da təsis edilib.Festival iştirakçıları müsabiqədənkənar proqramda Azərbaycan animasiyası tarixindən bəhs edən “Azərbaycan animasiyası” kitabının təqdimatında, tematik nümayişlərdə iştirak edə, retrospektivlərdə ən gözəl sənət nümunələri ilə tanış ola biləcəklər.Festivalın proqramına sərgilər, konsertlər, yaradıcılıq gecələri və animasiya kinosu ilə bağlı digər tədbirlər daxil ediləcək.xeber100.com

“YARAT” Müasir İncəsənət Mərkəzi təqdim edir

İyunun 9-da “YARAT” Müasir İncəsənət Mərkəzində Müslüm Maqomayev adına 26 saylı musiqi məktəbinin şagirdlərinin və Bakı Musiqi Akademiyasının tələbələrinin iştirakı ilə konsert proqramı təqdim olunacaq.Azərtac xəbər verir ki, konsertdə dünya və Azərbaycan bəstəkarlarının əsərləri səsləndiriləcək. Hər kəsin qatıla biləcəyi konsertin bədii rəhbərləri Naala Baratelia və Dmitri Babayevdir.xeber100.com

“Azərbaycan mədəniyyəti həftəsi” keçiriləcək

Daşkənddəki Heydər Əliyev adına Azərbaycan Mədəniyyət Mərkəzinin layihəsi və təşkilatçılığı, Səmərqənd Vilayəti üzrə Azərbaycan Cəmiyyətinin və şəhər hakimiyyətinin dəstəyi ilə Səmərqənddə iyunun 9-dan 11-dək “Azərbaycan mədəniyyəti həftəsi” keçiriləcək. Tədbirlərdə Səmərqənd Vilayət Hakimiyyətinin nümayəndələri, şəhərin elm, mədəniyyət, təhsil işçiləri, ali məktəblərin müəllim və tələbələri, yerli azərbaycanlılar, ictimaiyyət nümayəndələri, jurnalistlər iştirak edəcəklər.Azərtac xəbər verir ki, Azərbaycan Xalq Cümhuriyyətinin 100 illiyinə və 15 iyun – Milli Qurtuluş Gününə həsr edilən tədbirlər çərçivəsində Əlişir Nəvai adına Səmərqənd Dövlət Universitetində “Əbədi ezamiyyət” filminin təqdimatı olacaq, şəhərin mərkəzində yerləşən Həmid Alimcan adına Səmərqənd Vilayət Musiqili Dram Teatrının qarşısında “Cümhuriyyətin 100 illik yubileyi mübarək, Azərbaycan!” adlı tədbir və konsert keçiriləcək. Konsertdə Özbəkistanın tanınmış musiqiçiləri, habelə azərbaycanlı saz ustaları, rəqs kollektivləri çıxış edəcəklər.Tədbirlərdə Azərbaycan Mədəniyyət Mərkəzinin milli geyimlər kolleksiyasına aid Qarabağ geyimləri nümayiş etdiriləcək. Azərbaycanın Qarabağ bölgəsinə aid bəylərin, habelə xanımların mərasim geyimləri ilk dəfə təqdim olunacaq. Mədəniyyət həftəsində “Şərqin ilk parlayan ulduzu – Azərbaycan Xalq Cümhuriyyəti” adlı foto və kitab sərgisi keçiriləcək, habelə adət-ənənələrimizi özündə əks etdirən stend qurulacaq, Azərbaycan suvenirləri, xalçaları, kəlağayıları sərgilənəcək.Azərbaycan Mədəniyyət Mərkəzinin layihəsi ilə son 5 ildə Özbəkistanda yerli dildə çap olunmuş 50 adda kitab Səmərqənd kitabxanalarına hədiyyə ediləcək.xeber100.com

XV Beynəlxalq Ritm Festivalında

İyunun 25-dən iyulun 1-dək Rusiyanın Samara vilayətinin Tolyatti şəhərində “Dünya nağaraları” XV Beynəlxalq Ritm Festivalı keçiriləcək. Festivalda ölkəmizi Sumqayıtdan “Rövşən” ritm qrupu təmsil edəcək.Bu barədə Azərtac-a qrupun yaradıcısı və rəhbəri Rövşən Cabbarov məlumat verib. Onun sözlərinə görə, qrup dörd ildir həmin festivala dəvət edilir. Habelə Rövşən Cabbarov festival çərçivəsində ritm həvəskarlarına ustad dərsləri keçir.xeber100.com

Beynəlxalq Muğam Mərkəzində tədbir keçiriləcək

İyunun 13-də Beynəlxalq Muğam Mərkəzində Qulu Əsgərovun 90 illik yubileyinə həsr olunan tədbir keçiriləcək.Mərkəzdən Azərtac-a bildirilib ki, “Unudulmayanlar” layihəsi çərçivəsində reallaşacaq tədbirdə Əməkdar artistlər Zakir Əliyev və Ehtiram Hüseynov, ifaçılar Mirələm Mirələmov, Almaxanım Əhmədli, Rəvan Əlvanoğlu, Vüsal İsrafilov çıxış edəcəklər. Musiqiçiləri Xalq Artisti Möhlət Müslümovun rəhbərliyi ilə Azərbaycan Televiziyası və Radiosunun Əhməd Bakıxanov adına Xalq Çalğı Alətləri Ansamblı müşayiət edəcək.Gecənin aparıcıları Xalq Artisti, Mələkxanım Əyyubova və Əməkdar İncəsənət Xadimi Hafiz Quliyevdir.Xatırladaq ki, Beynəlxalq Muğam Mərkəzinin “Unudulmayanlar” layihəsi çərçivəsində Qara Qarayevin 100 illiyinə, Xalq artistləri Həqiqət Rzayevanın və Şövkət Ələkbərovanın yaradıcılıqlarına həsr olunmuş tədbirlər keçirilib.xeber100.com

Milli Dram Teatrı iyun repertuarını təqdim edir

Akademik Milli Dram Teatrı iyun repertuarını açıqlayıb.Azərtac teatrın repertuarını təqdim edir: 1 iyun - “Biri var idi, biri yox idi“ (xalq nağılı əsasında), “Bir, iki bizimki...” (Kamal Abdulla); 2 iyun - M.Qavran. “Qəribə, çox qəribə əhvalat”; 3 iyun - H.Mirələmov. “Vəsiyyət”; 8 iyun - N.V.Qoqol. “Müfəttiş”; 9 iyun - Y.Polyakov. “Sinif yoldaşları”; 10 iyun - M.S.Ordubadi. “Qətibə İnanc”, C.Cabbarlı - “Almaz”; 14 iyun - K.Abdulla. “Bir, iki bizimki...”; 15 iyun - Ə.Əmirli. “Şah Qacar”; 16 iyun - İ.Əfəndiyev. “Mənim günahım”; 17 iyun - Y.Polyakov. “Sinif yoldaşları”; 22 iyun – Elçin. “Cəhənnəm sakinləri”; 23 iyun - İ.Əfəndiyev. “Boy çiçəyi”; 24 iyun - R.Kuni. “Zorən şorgöz”; 29 iyun - M.S.Ordubadi. “Qətibə İnanc” 30 iyun - C.Məmmədquluzadə. “Ölülər”.xeber100.com

Vokalçıların VII Beynəlxalq müsabiqəsi təşkil olunacaq

Azərbaycan Respublikası Prezidentinin “Bülbülün 120 illik yubileyinin keçirilməsi haqqında” 2017-ci il 11 may tarixli Sərəncamının icrasını təmin etmək məqsədilə iyunun 4-dən 7-dək Bakıda Vokalçıların Bülbül adına VII Beynəlxalq müsabiqəsi keçiriləcək.Mədəniyyət Nazirliyindən Azərtac-a bildirilib ki, müsabiqə iştirakçılarının ifalarını musiqi mədəniyyətinin görkəmli nümayəndələri - münsiflər heyətinin sədri, Rusiya Federasiyasının Xalq Artisti, professor Sergey Leyferkus, Azərbaycandan SSRİ Xalq Artisti, professor Fərhad Bədəlbəyli, Gürcüstanın Xalq Artisti, professor Teymuraz Ququşvili, Ukraynadan SSRİ Xalq Artisti, professor Mariya Stefyuk, Rusiya Akademik Böyük Teatrının gənclər proqramının rəhbəri, Əməkdar İncəsənət Xadimi Dmitri Vdovin, Almaniyadan Beynəlxalq opera müsabiqələrinin prezidenti Hans-Yoahim Fray qiymətləndirəcəklər.Azərbaycan professional vokal məktəbinin banisi, görkəmli müğənni, tədqiqatçı-alim və pedaqoq, tanınmış ictimai xadim, SSRİ Xalq Artisti, SSRİ Dövlət mükafatı laureatı Bülbülün adını daşıyan müsabiqədə Azərbaycan, Rusiya, Türkiyə, Ukrayna, Qazaxıstan, Moldova, Monqolustan, Özbəkistan, Gürcüstandan gənc istedadlı vokalçılar iştirak edəcəklər. Eyni zamanda, dünya şöhrətli menecer və prodüserlərin fəxri qonaq qismində iştirakı da nəzərdə tutulub.Müsabiqənin seçim turları iyunun 4-dən 7-dək Azərbaycan Dövlət Akademik Filarmoniyasında olacaq. İyunun 4-dən 6-dək müsabiqənin I və II turları, iyunun 7-də isə Ü.Hacıbəyli adına Azərbaycan Dövlət Simfonik Orkestrinin müşayiəti ilə III tur keçiriləcək.Bülbülün anadan olmasının 120 illiyinə həsr olunmuş yubiley gecəsi iyunun 8-də saat 19:00-da Heydər Əliyev Sarayında, iyunun 9-da saat 19:00-da isə Gəncə Dövlət Filarmoniyasında baş tutacaq.xeber100.com

Mədəniyyət Nazirliyinin təşkilatçılığı ilə…

Mayın 29-da Nizami Kino Mərkəzində Mədəniyyət Nazirliyinin təşkilatçılığı ilə “Cümhuriyyət tələbələri” adlı sənədli filmin təqdimatı keçiriləcək.Mədəniyyət Nazirliyindən Azərtac-a bildirilib ki, Azərbaycan Xalq Cümhuriyyətinin 100 illik yubileyi münasibətilə dövlət sifarişi əsasında “Salnaməfilm” studiyasında çəkilən ekran əsəri Cümhuriyyətin təhsil almaq üçün xaricə göndərdiyi tələbələrə həsr olunub.xeber100.com

“Avropa Şəhərciyi -2018” festivalı keçiriləcək

İyunun 2-də Dənizkənarı Milli Parkda Azərbaycan Xalq Cümhuriyyətinin 100 illiyinə həsr olunmuş bayram tədbirləri çərçivəsində Avropa mədəniyyəti bayramı - “Avropa Şəhərciyi -2018” festivalı keçiriləcək.Azərtac xəbər verir ki, festival Avropa ilə Azərbaycan arasında mövcud olan çoxillik əməkdaşlıq və tərəfdaşlıq əlaqələri haqqında daha çox məlumat almaq istəyən insanlar üçün ideal fürsət yaradacaq.“Avropa şəhərciyi”ndə Avropa ölkələrinə virtual turlar, milli və Avropa rəqsləri üzrə dərslər, karaoke musiqisi, səfirliklərin və mədəniyyət mərkəzlərinin nümayəndələri ilə xarici dil məktəbi, kimyəvi və fiziki eksperimentləri ehtiva edən bilik şouları, o cümlədən üz rəsmləri, çələng toxuculuğu üzrə ustad dərsləri, “3D” qələmlə müxtəlif obyektlərin çəkilməsi və bir sıra digər tədbirlər keçiriləcək.xeber100.com

“Dastan gecələri” layihəsi çərçivəsində

Mayın 24-də Beynəlxalq Muğam Mərkəzində (BMM) bu qurumun və Azərbaycan Milli Elmlər Akademiyası (AMEA) Folklor İnstitutunun birgə reallaşdırdığı “Dastan gecələri” layihəsi çərçivəsində “Leyli və Məcnun” dastanı təqdim olunacaq.Mərkəzdən Azərtac-a bildirilib ki, tədbir BMM-in və “Mədəniyyət” kanalının birgə təşkilatçılığı ilə keçirilir.Biletləri şəhərimizin mərkəzləşdirilmiş kassalarından, “ASAN xidmət” mərkəzlərindən və iticket.az saytından əldə etmək olar.xeber100.com