“Arşın mal alan” filminin Monteneqro dilində təqdimatı keçirilib

Azərbaycanın Monteneqrodakı diplomatik nümayəndəliyinin, Azərbaycan-Monteneqro İqtisadi və Mədəni Mərkəzinin təşkilatçılığı və “Azmont Investments” şirkətinin dəstəyi ilə paytaxt Podqoritsada “Arşın mal alan” filminin bərpa olunmuş və rənglənmiş versiyasının Monteneqro dilində təqdimatı keçirilib.Azərtac xəbər verir ki, tədbirdə Monteneqronun dövlət qurumlarının, diplomatik nümayəndəliklərinin, qeyri-hökumət təşkilatlarının və KİV-lərin təmsilçiləri iştirak ediblər.Film tamaşaçılar tərəfindən maraqla izlənilib.xeber100.com  

İtaliya Opera Günləri keçiriləcək

Mayın 3-6-da Bakıda İtaliya Opera Günləri keçiriləcək.Təşkilatçılar bildiriblər ki, İtaliya Opera Günləri bu ölkənin Bakıdakı səfirliyi və Opera və Balet Teatrının birgə təşkilatçılığı ilə keçiriləcək.Opera günləri Cakomo Puççininin “Madam Batterflay" operası ilə açılacaq. Operaya məşhur italyan dirijoru Yakopo Sipari di Peskassero dirijorluq edəcək. Madam Batterflay partiyasını Silvana Froli (İtaliya) ifa edəcək.Qeyd edək ki, bu il məşhur italyan bəstəkarı Coakkino Rossininin ölümündən 150 il ötür.İtaliya Opera Günləri çərçivəsində Opera və Balet Teatrında Romanın "Cara İtalia, Alfin di Miro" Opera Teatrı tərəfindən C.Rossiniyə həsr olunmuş sərgi açılacaq. Sərginin ekspozisiyasında C.Rossininin musiqi əsərləri ilə bərabər, onun bədii yaradıcılığını əks edən əsərlər, habelə İtaliyanın tarixi səhnə geyimləri və məşhur rəssam Corcio de Kirikonun əsərləri təqdim ediləcək.Sərgi mayın 3-dən 20-dək davam edəcək.Mayın 4-də Filarmoniyada kamera və orqan musiqisi zalında Azərbaycan Televiziya və Radio Verilişləri Qapalı Səhmdar Cəmiyyətinin, “Mədəniyyət” kanalının və Filarmoniyanın birgə təşkilatçılığı ilə opera orqan musiqisi konserti olacaq. Konsertdə məşhur orqançalan, "I Pomeriggi Musicali" orkestrının bədii rəhbəri Mauritsio Salerno geniş proqramla çıxış edəcək.Layihə çərçivəsində "Sevilya bərbəri" operası oynanılacaq. Operaya məşhur italyan dirijoru Alessandro Kalkanilya dirijorluq edəcək. Fiqaro partiyasını bariton səsli ifaçı Daniele Kaputo təqdim edəcək.xeber100.com

Musiqili Teatr Formula 1 Azərbaycan Qran-Prisinə hazırlaşır

Musiqili Teatr ölkəmizdə növbəti dəfə keçiriləcək Formula 1 Azərbaycan Qran-Prisinə yüksək səviyyədə hazırlaşıb.Teatrın direktoru Əliqismət Lalayev Azərtac-a məlumat verib ki, bu münasibətlə paytaxta təşrif buyuran qonaqların mədəni istirahətlərinin lazımi səviyyədə təşkil edilməsi ilə bağlı bütün təşkilati məsələlər teatrın rəhbərliyi tərəfindən həll olunub.“Musiqili Teatr Formula -1 həftəsində xüsusi repertuarla çıxış edəcək. Ölkəmizin bu mötəbər idman yarışmasına üçüncü dəfə ev sahibliyi etməsi məsuliyyətimizi artırır. Azərbaycan Dövlət Musiqili Teatrı sabahdan başlayaraq həftəsonuna qədər xüsusi repertuarla çıxış edəcək. Aprelin 26-da saat 19:00-da “Mənim günahım”, 27-də “Ər və arvad”, 28-29-da eyni saatlarda “Arşın mal alan” tamaşaları təqdim olunacaq. Qonaqlar səhnə əsərlərini ingilis dilində tərcümə sətirlər vasitəsilə izləyə biləcək”, - deyə sənət ocağının direktoru söyləyib.xeber100.com

IV Tbilisi Beynəlxalq Müəllif Mahnıları Festivalı keçiriləcək

Mayın 7-dən 11-dək Gürcüstanın paytaxtında IV Tbilisi Beynəlxalq Müəllif Mahnıları Festivalı keçiriləcək. Festival Aleksandr Qaliçin 100 illik yubileyinə və Vladimir Vısotskinin 80 illik yubileyinə həsr olunub.Azərtac Gürcüstan saytlarına istinadla xəbər verir ki, ölkəmizi festivalda Cavid İmamverdiyev və Vəfa Məmmədova təmsil edəcək.Tədbirdə 10 ölkədən musiqiçilər iştirak edəcək.Qeyd edək ki, festival ilk dəfə 2014-ci ildə keçirilib.xeber100.com

Beynəlxalq Caz Günü münasibətilə qala-konsert olacaq

UNESCO-nun baş direktoru Odri Azuley Beynəlxalq Caz Günü ilə əlaqədar ictimaiyyətə müraciət edib.Azərtac xəbər verir ki, müraciətdə UNESCO-nun bu il aprelin 30-da VII Beynəlxalq Caz Gününü qeyd etməkdən qürur duyduğu bildirilir. Diqqətə çatdırılır ki, bu günün qeyd olunması caz sənətinə və irsinə ehtiramın ifadəsi olmaqla yanaşı, həm də musiqinin insanları bir araya gətirmək gücünün tanınmasıdır. Caz öz başlanğıcını əsarətə qarşı müqavimətdən və azadlıq uğrunda mübarizədən götürür. Bu musiqi müxtəlif ifa üslubunda saysız-hesabsız mədəniyyətlərə daxil olub, ifadə formalarına çevrilib.Beynəlxalq Caz Günü bu il dünyanın 190-dan çox ölkəsində qeyd ediləcək. Builki Beynəlxalq Caz Gününə Sankt-Peterburq ev sahibliyi edəcək. Şəhərdə cazla bağlı seminarlar, ustad dərsləri, film nümayişləri olacaq və dünyanın bir çox ölkələrindən tanınmış caz musiqiçilərini bir araya gətirən “The All-Star Global Concert” proqramı təqdim ediləcək. Tədbir UNESCO, Telonius Monk Caz Sənəti İnstitutu, İqor Butman Fondunun birgə əməkdaşlığı ilə təşkil olunacaq.Müraciətin tam mətni ilə UNESCO-nun saytında tanış olmaq mümkündür.Beynəlxalq Caz Günü münasibətilə Bakıda Beynəlxalq Muğam Mərkəzində qala-konsert olacaq.xeber100.com

“XX Beynəlxalq Monodram” festivalında

Gənc Tamaşaçılar Teatrının kollektivi Makedoniyanın Bitola Mədəniyyət Mərkəzinin dəvəti ilə mayın 10-dan 16-dək Bitola şəhərində keçiriləcək “XX Beynəlxalq Monodram” festivalında iştirak edəcək.Teatrın mətbuat xidmətindən Azərtac-a bildirilib ki, Mədəniyyət Nazirliyinin dəstəyi ilə reallaşacaq festivalda iştirak etmək üçün rejissor Cənnət Səlimova, Əməkdar Artist Şövqi Hüseynov və səhnə maşinisti Zaur Abbasov qeyd edilən şəhərə ezam olunacaq.Kollektiv festivalda P.Züskindin “Kontrabas” əsəri əsasında hazırlanmış eyniadlı monotamaşa ilə çıxış edəcək. Həmçinin dünyanın bir sıra teatr mütəxəssisinin rəhbərliyi ilə keçiriləcək ustad dərslərində, treninqlərdə, səhnə döyüşü və texnikası məşğələlərində iştirak edəcəklər.xeber100.com

Milli Kitabxanada kitab sərgisi açılıb

Aprelin 19-da Milli Kitabxanada ədəbiyyatşünas-alim Vaqif Yusiflinin 70 illiyi münasibətilə kitab sərgisi açılıb.Kitabxanadan Azərtac-a bildirilib ki, “Vaqif Yusifli – 70” adlı kitab sərgisində alimin əsərləri, redaktoru olduğu, rəy verdiyi, “Ön söz” yazdığı kitablar və qəzet-jurnal materialları yer alıb.Sərgi bir həftə davam edəcək.xeber100.com

Bakı Musiqi Akademiyasında yubiley konfransı keçirilib

Aprelin 20-də Üzeyir Hacıbəyli adına Bakı Musiqi Akademiyasında “Şifahi ənənəli Azərbaycan musiqisi və onun yeni istiqamətlərinin tədqiqi” elmi laboratoriyasının 25 illik yubiley konfransı keçirilib.Azərtac xəbər verir ki, konfrans Təhsil Nazirliyi və Üzeyir Hacıbəyli adına Bakı Musiqi Akademiyasının dəstəyi ilə reallaşıb.Tədbirdə Musiqi Akademiyasının rektoru  Fərhad Bədəlbəyli çıxış edərək laboratoriya əməkdaşlarının 25 il ərzində gördüyü işləri yüksək qiymətləndirib. Bildirib ki, elmi laboratoriyanın əməkdaşlarının fəal iştirakı ilə bir sıra elmi-praktik konfranslar təşkil edilib və onların materialları nəşr olunub. Bundan başqa, elmi işçilərin, müəllimlərin və doktorantların iştirakı ilə şifahi ənənəli musiqinin tarixi və nəzəri məsələləri, Azərbaycan bəstəkarlarının yubileylərinə həsr olunmuş elmi məqalələrdən ibarət toplular oxucuların ixtiyarına verilib.Qeyd edilib ki, laboratoriyada musiqişünaslıq, etnomusiqişünaslıq, sənətşünaslıq, musiqi fəlsəfəsi, musiqi tarixi, kulturologiya kimi tədqiqat istiqamətləri formalaşıb. Burada çalışan işçilərin tədqiqatları çoxsaylı məqalələr, monoqrafiyalar, dərs vəsaitlərində öz əksini tapıb və bütün bunlar təhsilin elmi bazasının inkişafına xidmət edib.Tədbirdə elmi laboratoriyanın kollektivinin fəaliyyətinə həsr olunmuş slayd-şou nümayiş olunub, həmçinin musiqi nömrələri təqdim edilib.xeber100.com  

Musiqili Teatrın məlumatına görə…

Həftəsonu Musiqili Teatrda maraqlı tamaşalar nümayiş olunacaq.Teatrın mətbuat xidmətindən bildirilib ki, aprelin 20, 21 və 22-də saat 19:00-da müvafiq olaraq “Talelər qovuşanda”, “Toya bir gün qalmış” və “O olmasın, bu olsun” tamaşaları təqdim ediləcək.Musiqili Teatr balaca teatrsevərlərin görüşünə aprelin 21 və 22-də saat 12:00-da “Dəcəl çəpişlər” və “Yatmış gözəl və cırtdanlar” tamaşaları ilə gələcək.xeber100.com

Gənc Tamaşaçılar Teatrı təqdim edir

Gənc Tamaşaçılar Teatrı həftəsonu üçün maraqlı repertuar tərtib edib.Teatrın mətbuat xidmətindən Azərtac-a bildirilib ki, hər zaman olduğu kimi bu dəfə də teatrsevərlər sənət ocağının repertuarında olan rəngarəng səhnə əsərlərinə baxmaq imkanı qazanacaqlar.Belə ki, aprelin 20-də saat 19:00-da teatrın kiçik səhnəsində T.Vəliyevanın “Cəza” tamaşası nümayiş olunacaq. Teatrsevərlər aprelin 21-də Ə.Haqverdiyevin “Xortdanın cəhənnəm məktubları”, 22-də isə V.Siqarevin “Ağ ölüm” tamaşasına baxa biləcəklər. Hər iki tamaşa saat 19:00-da nümayiş olunacaq.Məktəblilər isə aprelin 21-də A.Şaiqin “Tıq-tıq xanım”, 22-də isə A.Lindqrenin “Balaca və damda yaşayan Karlson” tamaşalarını izləyə biləcəklər. Tamaşalar saat 12:00 və 14:00-da nümayiş olunacaq.Tamaşalarda Əməkdar artistlər Kəmalə Hüseynova, Qurban İsmayılov, Nübar Novruzova, Leyli Vəliyeva, Şövqi Hüseynov, aktyorlar Günel Məmmədova, Elnur Kərimov, Manaf Dadaşov, Asya Atakişiyeva, Anar Seyfullayev, Vahid Orucoğlu və digərləri rol alıblar.Tamaşalara biletləri bütün mərkəzləşdirilmiş kassalardan və “ASAN xidmət” mərkəzlərindən və filiallarından əldə etmək olar.xeber100.com