Musiqili Teatr “Amerikalı kürəkən”ı təqdim edir…

Azərbaycan Dövlət Musiqili Teatrı aprelin 29-da Ramiz Mirişli və Marat Haqverdiyevin "Amerikalı kürəkən" iki hissəli musiqili komediyasını təqdim edəcək.  Teatrdan verilən məlumata görə, tamaşanın quruluşçu rejissoru  İlham Namiq Kamaldır. İ.N.Kamal bildirib ki, bu əsərin ən böyük özəlliklərindən biri də günümüzlə səsləşməsi, aktuallığıdır: "Söz yox ki, hər bir valideyn övladının xoşbəxtliyini istəyir. Amma burada bir incə məqam var: bəzilərinə elə gəlir ki, xoşbəxtlik təkcə qır-qızılda, var-dövlətdə, imtiyaz sahibi olmaqdadır. Əlbəttə ki, bu, çox yanlış bir fikirdir. Və bizim əsərin qəhrəmanı olan ana - Tünzalə xanım da bu cür yanlış düşüncədə olan insanlardandır. O, qızını varlı, malı-dövləti başından aşan birisinə ərə vermək istəyir. Qızı Reyhan isə başqa birisini - ingilis dili müəllimi olan Kamranı sevir. Reyhan anasının onun kasıb bir müəllimlə evlənməsinə heç cür razı olmayacağını görüb Kamranla birgə Tünzalə xanım üçün oyun qururlar. Elə əsl məzhəkə də bundan sonra başlayır. Yeri gəlmişkən, qeyd edim ki, Tünzalə obrazını tanınmış müğənnimiz, əməkdar artist Almaz xanım Ələsgərli ifa edir".Qeyd edək ki, Almaz Ələsgərli Azərbaycan Dövlət İncəsənət İnstitutunun Musiqili komediya aktyorluğu fakültəsini bitirib. İlk dəfə 1985-ci ildə - tələbə ikən məhz Musiqili Teatrda səhnəyə çıxıb və Emin Sabitoğlu və Xalidə Hasilovanın "Nəğməli könül" əsərində baş qəhrəmanı - Könül obrazını canlandırıb. Sonra uzun müddət teatrdan uzaq düşən A.Ələsgərli əsasən müğənnilik fəaliyyəti ilə məşğul olub. Bu yaxınlarda yenidən teatrda işləmək arzusu ilə Azərbaycan Dövlət Musiqili Teatrına müraciət edib. Artıq o, Musiqili Teatrın aktrisasıdır. "Amerikalı kürəkən" iki hissəli musiqili komediyasının quruluşçu-dirijoru əməkdar incəsənət xadimi Nazim Hacıəlibəyov, quruluşçu-rəssamı Nabat Səmədova, quruluşçu-baletmeysterləri Leyla və Zakir Ağayevlər, şeirlərin müəllifi xalq şairi Fikrət Qoca, xormeysteri əməkdar artist Vaqif Məstanov, dirijoru Fəxrəddin Atayev, konsertmeysteri Nərminə Əbdürəhmanova, rejissor assistenti isə Tamilla Aslanovadır. Tamaşada rolları xalq artistləri İlham Namiq Kamal, Fatma Mahmudova, əməkdar artistlər Novruz Qartal, Almaz Ələsgərli, Əkbər Əlizadə, aktyorlar Məhərrəm Qurbanov, Rəsmiyyə Nurməmmədova, Səməd Xasıyev, Pərviz Məmmədov, Gültac Əlili, Ağaxan Şərifov, Ruslan Mürsəlov, Gülnarə Əzizova, Gülçöhrə Abdullayeva, Nigar Qarayeva və Gülnarə Kərimbəyova ifa edirlər.xeber100.com    

“Müqəvva” pyesi Türkiyə teatrında

Türkiyənin İstanbul şəhərində yerləşən “Oda” teatrında yazıçı-dramaturq Firuz Mustafanın “Müqəvva” pyesinin məşqlərinə başlanılıb.  Onu da qeyd edək ki, monodram janrında yazılan əsər indiyəcən ölkəmizin bir çox teatrlarında öz uğurlu səhnə həyatını yaşayıb. Qardaş ölkədə bu əsəri Kəmalə Kamalqızı hazırlayır. O, tamaşanın rejissoru və baş rolun ifaçısıdır.Yeri gəlmişkən, K.Kamalqızı Turan teleteatrinin rəhbəri, habelə Türkiyədə fəaliyyət göstərən Azərbaycan Barış Tv-də “A-dan Z-yə” verilişinin aparıcısıdır. Arayış: “Oda” teatrı 1990-cı ildən fəaliyyət göstərir. Bu sənət ocağında Kaan Erkam, Levent Tayman, Niyazi Gezer, Beste Hoşses kimi tanınmış sənətkarlar fəaliyyət göstərir. Teatrın həyatında maraqlı bir fakt da diqqəti çəkir: “Oda” 48 saat ərzində oyun nümayiş etdirərək səhnədə qalan və bu cəhətinə görə dünya rekorduna sahib olan bir teatrdır.Onu da bildirmək istəyirik ki, bu günlərdə Firuz Mustafanın “Neytral zona” adlı pyesi Dərbənddə yerləşən Azərbaycan Dövlət Dram Teatrında öz səhnə həllini tapıb.xeber100.com  

“MİLLİ GEYİM GÜNÜ” layihəsinə start verildi

Bakı Uşaq Teatrı "Canlı abidə" adlı ayda bir gün milli geyim günü layihəsinə start verib. 18 apreldən başlayan həmin gün şəhərimizin küçələrində teatrın kollektivini milli geyimdə görə biləcəksiniz. Teatrdan verilən məlumata görə, məqsəd mədəniyyətimizin bir qolu olan milli geyimlərimizə diqqət çəkmək, bayağı geyimlərin milli geyimlərimizi sıxışdırmasına imkan verməməkdir. Xatırladaq ki, Bakı Uşaq Teatrının kollektivi hər ayın bir gününü milli geyimdə olacaqlarına qərar veriblər. Könüllülər gələn aydan etibarən qatıla bilər və 055 327 32 35 nömrəsinə zəng vurub qeydiyyata düşə bilərlər.xeber100.com  

Gənc Tamaşaçılar Teatrında premyera hazırlığı

Azərbaycan Dövlət Gənc Tamaşaçılar Teatrında “Mehmanxana sahibəsi” tamaşasının premyerası olacaq. Teatrdan verilən məlumata görə, səhnə əsəri may ayının 7-də saat 19.00-da ilk dəfə nümayiş etdiriləcək. Maarifçilik ideyalarını öz dramaturgiyasının əsas hədəfinə çevirən Italyan dramaturqu Karlo Qaldoninin “Mehmanxana sahibəsi” əsasında hazırlanan eyniadlı tamaşaya xalq artisti Cənnət Səlimova quruluş verib. Tamaşanın quruluşçu rəssamı Elşən Sərxanoğlu, musiqi tərtibatçısı İradə Muradova, rejissor assisenti Günay Qasımovadır. Yeni səhnə əsərində əsas obrazları əməkdar artistlər Leyli Vəliyeva, Gülər Nəbiyeva, Şövqi Hüseynov, Nofəl Vəliyev, aktyorlar Kərəm Hadızadə, Elşən Hacıbabayev, Rəşad Səfərov, Şəbnəm Hüseynova, Sevinc Mehrəliyeva və Eşqin Quliyev ifa edirlər. Tamaşa hər kəs tərəfindən sevilən gözəl Mirandolinaya (mehmanxana sahibəsi) inadkar Kavalerin kobud münasibəti və bu qadının yaraşıqlı Kavalerə qisasından bəhs edir.xeber100.com    

Sidqi Ruhulla – 130

Martın 28-də Buzovna qəsəbəsi R. Axundov adına Mədəniyyət evində Mədəniyyət və Turizm İdarəsinin təşkilatçılığı ilə tanınmış aktyor, xalq artisti Sidqi Ruhullanın anadan olmasının 130 – illik yubileyi münasibəti ilə “Səhnəmizin Qacarı”adlı ədəbi bədii musiqili gecə keçirilib. Bu barədə Trend-ə İdarədən məlumat verilib. Sidqi Ruhullanın səhnə fəaliyyəti haqqında fotoşəkillərdən ibarət video çarx qonaqlara nümayiş olunub. Tədbirdə Sidqi Ruhullanın ailəsi adından iştirak edən qohumu Dürdanə xanım, mədəniyyət evinin direktoru Nursevər Yəhyazadə, C.Cabbarlı adına Azərbaycan Dovlət Teatr Muzeyinin direktoru Sevinc Mikayılova, şairə-publisist Gülarə Munis, Buzovna kəndinin axundu Hacı Soltan Hüseynqulu oğlu, Akademik Milli Dram Teatrının aktyorları əməkdar artistlər Mirzə Ağabəyli, Çingiz Ələskər, bədii qiraətçi Əlinur və kənd sakinləri tanınmış aktyor haqqında bildiklərini və xatirələrərini bölüşüblər. Mədəniyyət evinin “Səda” instrumental ansanblının ifasında musiqi nömrələri təqdim olunub.

106-cı mövsüm…

Azərbaycan Dövlət Musiqili Teatrı 106-cı teatr mövsümünün sonuna qədər olan müddət üçün repertuar planını açıqlayıb. Teatrın mətbuat xidmətindən verilən məlumata görə, Bədii Şuranın üzvləri aprel, may, iyun, iyul ayları üçün Musiqili Teatrın repertuar və iş planını təsdiqləyib. Bu müddət ərzində teatrın repertuarında olan təqribən 20 tamaşa 70 dəfədən çox nümayiş etdiriləcək. Tamaşaçıların böyük maraq və sevə-sevə izlədiyi tamaşalar - “O olmasın, bu olsun” (Ü. Hacıbəyli), “Ər və arvad” (Ü. Hacıbəyli), “Qızıl toy” (O. Kazimi, R. Heydər), “Baladadaşın toy hamamı” (Elçin), “Mən dəyərəm min cavana” (F. Sücəddinov, T. Vəliyeva), “www-ferzeli-kef.com” (E. Sabitoğlu, C. Məmmədov), “Qısqanc ürəklər” (R. Mirişli, M. Haqverdiyev), “Kimdir müqəssir?” (Ə. Haqverdiyev), “Talelər qovuşanda” (R. Hacıyev, E. Ocaqov, F. Zöhrabov), “Amerikalı kürəkən” (R. Mirişli, M. Haqverdiyev) və başqa səhnə əsərləri təqdim ediləcək. Habelə rusdilli və balaca tamaşaçılar “Qafqazlı qardaşqızı” (R. Hacıyev), “Skapenin kələkləri” (J.B. Molyer), “Fransız sayağı qarnir” (M. Kamoletti), “Düyməcik” (H.K. Anderson), “Qızıl cücə” (V. Ulanovski, V. Orlov), “Yağış göbələyinin macərası” (R. Şəfəq, V. Zimin), “Qırmızıpapaq” (E. Sabitoğlu, Y. Şvarts), “Dəcəl çəpişlər” (O. Zülfüqarov, R. Heydər), “Bir dayan canavar” (R. Ağayeva, A. Xayt, A. Kurlyanski) və başqa tamaşaları izləyə biləcəklər.  

“Vokal və səhnə sənəti” müsabiqəsi keçiriləcək

Bu ilin mayında Yekaterinburq şəhərində gənc vokalçıların və operetta ifaçılarının SSRİ Xalq artisti Vladimir Kuroçkin adına VI Beynəlxalq müsabiqəsi keçiriləcək. Belə bir nüfuzlu müsabiqənin təşkilat komitəsi Azərbaycan Dövlət Musiqili Teatrının direktoru, Əməkdar İncəsənət Xadimi Əliqismət Lalayevə dəvət məktubu göndərərək onun müsabiqənin münsiflər heyətinə üzv seçildiyini bildirib. Teatrın mətbuat xidmətindən bildirilib ki, müsabiqə Rusiya Federasiyası Mədəniyyət Nazirliyi, Rusiya Teatr Xadimləri İttifaqı, Musiqili Teatrların Beynəlxalq Assosiasiyası, “Qerard Vasilyev adına operetta janrının qorunub saxlanması və inkişafı fondu” Sverdlovsk Vilayət Mədəniyyət Nazirliyi və Sverdlovsk Vilayət Teatr Xadimləri İttifaqının təşkilatçılığı ilə reallaşacaq. Dünyanın bir sıra musiqili teatr sənətçilərinin də daxil olduğu münsiflər heyətinin rəhbəri Rusiyanın Xalq Artisti, dünya şöhrətli vokalçı və aktyor Viktor Krivonosdur. Operetta və müzikl çərçivəsində “Vokal və səhnə sənəti” nominasiyasında keçiriləcək müsabiqəyə Rusiyadan və xarici ölkələrdən 35 yaşa qədər olan gənclər qatıla biləcəklər. Müsabiqə mayın 16-dan 21-dək Sverdlovsk Dövlət Akademik Musiqili Komediya Teatrında baş tutacaq.

Azərbaycan teatrı 2009-2019-cu illərdə

Xəbər100. Azərbaycan Respublikası Prezidentinin müvafiq Sərəncamı ilə təsdiq olunmuş “Azərbaycan teatrı 2009-2019-cu illərdə” Dövlət Proqramının icrası, Azərbaycan teatrının dünya mədəniyyətinə inteqrasiyası, milli teatr sənətinin inkişafının, teatr sənətinin bütün janrları və peşə istiqamətləri üzrə gənclərin dəstəklənməsi, kadr hazırlığı, əlavə təhsil sisteminin təkmilləşdirilməsi və istedadlı gənclərin xarici dövlətlərdə məqsədli təhsilinə şərait yaradılması üçün Mədəniyyət və Turizm Nazirliyi tərəfindən yeni layihənin icrasına başlanılacaq. Nazirlikdən  bildirilib ki, Rusiyanın dünyaca məşhur Yevgeni Vaxtanqov adına Dövlət Akademik Teatrı nəzdində Boris Şukin adına Teatr İnstitutunda Azərbaycan Respublikası üçün məxsusi hədəf kursularına tələbə qəbulu keçiriləcək. Bu barədə tərəflər arasında müqavilə imzalanıb. Kursun rəhbəri Rusiyanın Əməkdar İncəsənət Xadimi, professor Mixayıl Borisovdur. Qəbul əsasən iki ixtisas istiqaməti üzrə müəyyənləşdirilib: Dram teatrı və kino artisti – qəbul sayı 15 nəfər (təhsil müddəti - 4 il); Teatr rejissorluğu – qəbul sayı 5 nəfər (təhsil müddəti – 5 il). İnstituta qəbul 2016-cı ilin iyul ayında Moskvadan dəvət olunmuş peşəkar şəxslərdən ibarət xüsusi imtahan komissiyası tərəfindən həyata keçiriləcək. Qəbul olunan şəxslərin illik təhsil haqqı Mədəniyyət və Turizm Nazirliyi tərəfindən ödəniləcək. Qəbulla bağlı ətraflı məlumat üçün Azərbaycan Teatr Xadimləri İttifaqına müraciət etmək olar.  

Yeni tamaşa hazırlanır

Mingəçevir Dövlət Dram Teatrında tanınmış rus yazıçısı H.V.Qoqolun “Müfəttiş” əsəri nümayişə hazırlanır. Əsərə teatrın baş rejissoru Xəzər Gəncəli quruluş verib. Mədəniyyət və Turizm Nazirliyindən bildirilib ki, müəllif bu əsərdəki qəsəbəni ruhumuzun qaranlıq şəhəri kimi təsvir edir. Tamaşada teatrın sevilən aktyorları, Əməkdar artistlər Akif Mirabov, Ella Yaqubova, Şıxı Yaqubov, aktyorlar Aydın Quliyev, Elmira İbrahimova, Fəridə Məmmədova və başqaları rol alıblar. Səhnə əsərinin aprelin sonlarına təhvil verilməsi planlaşdırılır. Bundan başqa Mingəçevir Teatrında uşaqlar üçün də yeni tamaşa – “İncəbel və Div” nümayişə hazırlanır. Tamaşada rol alan aktyorlar gənclərdir. Səhnə əsərində, həmçinin “İnam” studiyasının tələbələri də rol alıblar. Martın əvvəllərində balaca tamaşaçıların ixtiyarına veriləcək tamaşanın quruluşçu rejissoru Xalq Artisti Ağaxan Salmanlıdır.

Müsyö İbrahim və Quran çiçəyi

  Fevral ayının 7-də Dövlət Akademik Milli Dram Teatrında fransız dramaturqu Erik-Emmanuel Şmittin "Müsyö İbrahim və Quran çiçəyi" ikihissəli dramı əsasında hazırlanmış eyniadlı tamaşa nümayiş olunub. Xalq artisti Fuad Poladov  ikihissəli tamaşada Müsyö İbrahim rolunu canlandırıb. Teatrdan verilən məlumata görə, səhnə əsəri gənc rejissor Ərşad Ələkbərovun quruluşunda təqdim olunub. Tamaşanın bədii rəhbəri, teatrın direktoru və baş rejissoru, xalq artisti Azərpaşa Nemətdir. Rolları əməkdar artistlər Sabir Məmmədov, Şəlalə Şahvələdqızı, Mehriban Zəki, aktyorlar Murad İsmayılov, Fidan Cəfərova, Sərdar Rüstəmov, Adil Dəmirov və Vüsal Mustafayev ifa edblər. Xatırladaq ki, dünyanın 30-dan artıq tanınmış teatrının səhnəsində tamaşaya qoyulan əsər yazıçının avtobioqrafik romanıdır.