Almaniya Bundestaqı Qarabağda hərbi əməliyyatların dayandırılmasını alqışlayıb

Almaniya Bundestaqı Qarabağda davamlı sülhün yaranmasının dəstəklənməsi ilə bağlı qəbul etdiyi sənəddə münaqişənin eskalasiyasının ardınca 2020-ci il noyabrın 10-dan hərbi əməliyyatların dayandırılmasını alqışladığını bildirir.Azərtac xəbər verir ki, sənəd CDU/CSU (Xristian Demokrat/Xristian-Sosialist İttifaqı) və SPD (Sosial-Demokratlar) fraksiyalarının təklifi ilə hazırlanıb.Hər iki tərəfdən insanların həlak olmasından təəssüfləndiyini ifadə edən Bundestaq atəşkəsin ehtiyac duyulan humanitar yardımı regiona gətirməyə və tərəflərə danışıqlar masasına qayıtmağa imkan yaratdığını qeyd edir. Almaniyanın Beynəlxalq Qırmızı Xaç Komitəsini zəruri humanitar yardım göstərmək üçün iki milyon avro ilə dəstəklədiyi bildirilir. Eyni zamanda, vurğulanır ki, Almaniya Avropa İttifaqındakı, ATƏT-dəki və BMT-dəki tərəfdaşları ilə birlikdə Ermənistan və Azərbaycan arasında davamlı sülh üçün daha böyük öhdəlik götürməyə hazır olmalıdır. Avropa qonşuluğunun sabitliyi siyasi, iqtisadi və s. sahələrdə əməkdaşlığa münasibətdə Almaniya üçün də maraq kəsb edir. Bununla əlaqədar Almaniya Cənubi Qafqazda təhlükəsizliyin və sülhün bərqərar olmasına öz töhfəsini verməlidir.Sənəddə bildirilir ki, sentyabrın 27-də münaqişənin yenidən alovlanması ərazi məsələləri ilə bağlı münaqişələrin həlli ilə məşğul olmağın necə vacib olduğunu göstərdi. ATƏT və BMT Minsk qrupu çərçivəsində BMT qətnamələri və Madrid prinsipləri, eləcə də güc tətbiq etməmə prinsipi əsasında davamlı sülhün tapılması üçün çox az iş görüblər. Belə bir ssenarinin gələcəkdə ATƏT məkanında təkrarlanmasına yol verilməməlidir. Bu xüsusda, ATƏT-in Minsk qrupu və xüsusən də onun həmsədrləri ən qısa müddət ərzində öz uğursuzluqlarını tənqidi baxımdan nəzərdən keçirməli, uğursuzluqların səbəblərini müəyyənləşdirməlidirlər. Onlar gələcəkdə belə bir eskalasiyanın qarşısının alınması üçün konsepsiyaların hazırlanmasına görə məsuliyyət daşıyırlar. Eyni zamanda, son proseslər Avropa İttifaqı üçün də həyəcan siqnalı olmalıdır. Avropa İttifaqı özünün qonşuluğunda sabitliyi təmin etmək üçün indi əvvəlkindən daha çox məsuliyyət daşıyır. Avropa İttifaqı dinc və firavan Cənubi Qafqaz üçün razılaşmalara töhfəsini verməyə hazır olduğunu bəyan edib. Bu, Avropa İttifaqının gələcəkdə regiondakı siyasi proseslərə təsir edə bilmək üçün bütün münaqişə bölgəsində iqtisadi yenidənqurma fəaliyyətini də ehtiva edə bilərdi.Bundestaq Türkiyə və Rusiyanın davamlı sülhün təminində səylərinin önəmini də qeyd edir.Vətənə qayıtmaq, dağılmış evlərin yenidən bərpası və dinc birgəyaşayış imkanının insanlar üçün böyük uğur olduğu bildirilir.xeber100.com

Noyabr 27, 2020 2:44

QDİƏT üzv dövlətlərinin Xarici İşlər Nazirləri Şurasının 42-ci iclasında

Azərbaycan Respublikasının xarici işlər naziri Ceyhun Bayramov Qara Dəniz İqtisadi Əməkdaşlıq Təşkilatına (QDİƏT) üzv dövlətlərinin Xarici İşlər Nazirləri Şurasının 42-ci iclasında iştirak edib.Xarici İşlər Nazirliyinin Mətbuat xidməti idarəsindən Azərtac-a bildiriblər ki, iclasda çıxış edən nazir Ceyhun Bayramov QDİƏT-in gündəliyindəki bir sıra vacib məsələlərin əlaqələndirilməsi və həlli üçün Rumıniya nümayəndə heyətinin səylərini yüksək qiymətləndirib, Rumıniyanı səmərəli sədrliyinə görə təbrik edib. Şimali Makedoniya Respublikasını qurumun 13-cü üzvü olması ilə salamlayan Ceyhun Bayramov bu üzvlüyün müştərək maraq sahələrində əməkdaşlığın artırılması üçün imkanlar yaradacağını, bu ölkə ilə QDİƏT-ə üzv dövlətlər arasında əlaqələrin gücləndirilməsinə xidmət edəcəyini vurğulayıb.Təşkilatın gələcəyə birgə baxış və qarşılıqlı əməkdaşlıq yolu ilə Qara dənizi sülh, sabitlik və firavanlıq bölgəsinə çevirmək məqsədilə yaradıldığını qeyd edən nazir deyib ki, QDİƏT bir sıra sahələrdə, o cümlədən ticarət, enerji, nəqliyyat, turizm kimi istiqamətlərdə qarşılıqlı faydalı əməkdaşlıq imkanlarının genişləndirməsinə xidmət edən əhəmiyyətli bir platforma səviyyəsinə yüksəlib.C.Bayramov bildirib ki, bir çox vacib təşəbbüslərin irəli sürülməsi təqdirəlayiqdir, lakin xalqlarımızın mənafeyi naminə bu təşəbbüslərin praktiki nəticələrini təmin etmək üçün daha böyük əməkdaşlıq zəruridir. Müxtəlif işçi qrupları arasında qarşılıqlı əlaqənin asanlaşdırılması, sektoral və dövlət-özəl əməkdaşlığının gücləndirilməsi vasitəsilə QDİƏT üzv dövlətlərə COVID böhranının çoxsaylı təsirlərinin öhdəsindən gəlmək və daha yaxşı yenidənqurmanı həyata keçirməkdə kömək göstərə bilər.“Azərbaycan regional əməkdaşlığın möhkəmləndirilməsi və asanlaşdırılması istiqamətində davamlı iş aparır. Ölkəmiz Xəzər dənizi-Qara dəniz əməkdaşlığının gücləndirilməsində konkret təşəbbüslər vasitəsilə fəal rol oynayır. Enerji, nəqliyyat, İKT, ticarət və KOBİ-lər əsas prioritetlərimiz sırasındadır. Biz QDİƏT-in sektoral qurumları və müvafiq təşkilatlarında əməkdaşlığımızın dərinləşəcəyinə ümidvarıq. Növbəti sədr kimi Albaniyanın nəticəyönümlü səylər vasitəsilə əməkdaşlığı inkişaf etdirəcəyinə inanırıq”, - deyən Ceyhun Bayramov əlavə edib ki, COVID-19 pandemiyası iqtisadi itkilərə gətirib çıxaran zərərini davam etdirir. Eyni zamanda, pandemiya regional ticarəti inkişaf etdirmək, özəl sektoru təşviq etmək və davamlı artımı dəstəkləmək üçün fürsət yaradır. Ticarət, sərmayə və artıma yenidən diqqət yetirərək, QDİƏT bölgəsində sürətli və davamlı sosial-iqtisadi bərpaya töhfə vermək mümkündür. Vurğulanıb ki, Azərbaycanın bütün tərəfdaşlarına təklif edə biləcəyi və artıq təklif etdiyi çox şey var. “QDİƏT-ə üzv dövlətləri birləşdirən və müştərək firavan gələcək qurmağa imkan verən təşəbbüslərimiz regional əməkdaşlığı genişləndirmək və dərinləşdirmək üçün maraq və potensialımızın ən yaxşı nümunəsidir. Gələcək əməkdaşlıq üçün hazırıq.xeber100.com  

Noyabr 27, 2020 2:41

Türkiyə Xarici İşlər Nazirliyinin açıqlamasına əsasən…

Fransa Senatının Dağlıq Qarabağla bağlı qəbul etdiyi qətnamə beynəlxalq hüququn, qanunun və ədalətin əsas prinsiplərinə hörmətsizliyin bariz nümunəsidir. Qətnamədə Türkiyəyə qarşı irəli sürülən əsassız iddiaları kəskin şəkildə rədd edirik. Fransa Senatının qətnaməsi bu ölkənin də həmsədr olduğu ATƏT-in Minsk qrupunun niyə bu günə qədər münaqişəni çözmədiyini və tərəfkeşlik etdiyini də açıq şəkildə göstərir.Azərtac xəbər verir ki, bu fikirlər Türkiyə Xarici İşlər Nazirliyinin açıqlamasında yer alıb.Açıqlamada deyilir ki, Azərbaycan Ermənistanın əvvəlcə Tovuzda, sonra Qarabağdakı hücumlarına və təxribatlarına qarşı lazımi cavab verib və təxminən otuz il idi ki, işğal altında saxlanılan torpaqlarını azad edərək ərazi bütövlüyünü yenidən təmin edib. Azərbaycanın cəbhədə qazandığı nəticə BMT qətnamələrində əksini tapmış, Fransanın da həmsədr olduğu Minsk prosesində qeydə alınmış, ancaq həyata keçirilməmiş haqlarının təcəssümüdür. BMT-nin qətnamələri Ermənistanın işğal etdiyi Azərbaycan torpaqlarından dərhal və qeyd-şərtsiz çəkilməsini tələb edir. Belə olduğu halda, Fransa Senatının Azərbaycanı işğaldan azad etdiyi torpaqlarından çəkilməyə çağırması qeyri-ciddi və gülüncdür, tərəfkeşliyin təzahürüdür. Heç bir gerçəyə uymayan, sağlam düşüncədən uzaq bu qərar Fransanın məsələnin həlli üçün səy göstərmək imkanını da məhdudlaşdırır. Senatın qətnaməsində Fransa hökumətinin də qəbuledilməz hesab etdiyi məqamlar əks olunur. Qətnamədə Türkiyə ilə bağlı fikirlərin yer alması təəccüblü olmasa da, düşündürücüdür.Türkiyə XİN-in açıqlamasında təxminən otuz il davam edən Ermənistan-Azərbaycan münaqişəsi ilə bağlı hazırkı mərhələdə Fransanın artıq düzgün nəticələr çıxararaq bölgənin sabitliyə qovuşması üçün konstruktiv mövqedə olmasının vacibliyi qeyd edilir. Bunun üçün mövcud gerçəkliklərə uyğun hərəkət edərək beynəlxalq hüquq əsasında səylər göstərmək yetərlidir.xeber100.com

Noyabr 26, 2020 1:28

Leonid Kalaşnikov: Fransa gərginlik yaratmağa yenidən cəhd edir

Fransa Senatı Fransa hökumətini qondarma “DQR”in müstəqilliyini tanımağa səsləyərkən Dağlıq Qarabağ münaqişəsinin nizamlanması üzrə Rusiyanın səylərini pozmağa cəhd göstərib.Azərtac xəbər verir ki, Rusiya Dövlət Dumasının MDB məsələləri, Avrasiya inteqrasiyası və həmvətənlərlə iş üzrə komitəsinin sədri Leonid Kalaşnikov bu sözləri “Vestnik Kavkaza” nəşrinə müsahibəsində söyləyib.“Mən ABŞ-dan gözləmədiyim kimi, Fransadan da Rusiyanın tərəfləri normal nizamlanma yoluna çıxarmasına görə təəssüf hissi keçirməsindən başqa heç nə gözləmirdim. Vəziyyətin sülhə doğru getdiyini, tərəflərin razılığa gəlməsini görüncə, Paris bu prosesi pozmağa, hansısa gərginlik yaratmağa yenidən cəhd edir”, - deyə siyasətçi qeyd edib.Rusiyalı deputatın fikrincə, buna bənzər hərəkətlər indiki mərhələdə tamamilə qeyri-konstruktivdir və Minsk qrupu həmsədrinin birtərəfli müdaxiləsi, sadəcə olaraq, yolverilməzdir.L.Kalaşnikov deyib: “Bu qətnamənin Cənubi Qafqazda heç kəsə faydası olmayacaq. Bu addım yalnız Rusiyanın bu regionda səylərini hər hansı yolla pozmağa yönəlib. Reallıqda bu, Rusiyanın mövqeyinə heç cür təsir etməyəcək, lakin hər halda xoşagəlməz təəssürat qalacaq. Fransa Senatının qərarı ən azından hazırda Rusiya Federasiyasını Cənubi Qafqaza sülh gətirməkdə təqsirləndirən radikalları ruhlandıracaq. Qətnamənin məqsədlərindın biri budur”.Deputatın proqnozlarına görə, çox güman ki, Fransa hökuməti Senatın təxribatını dəstəkləməyəcək. “Fikrimcə, Fransa hökuməti özünü daha məsuliyyətli aparır və başa düşür ki, təəssüf hissini ifadə etməkdən başqa məsələlər də mövcuddur, münaqişəni əməli surətdə nizamlamaq lazımdır. Siyasətdə təəssüflər üçün yer yoxdur”, - deyə Dövlət Dumasının komitəsinin sədri sonda vurğulayıb.xeber100.com

Noyabr 26, 2020 1:24

Milli Məclis Fransa Senatının qərəzli qətnaməsi ilə əlaqədar bəyanat qəbul edib

Azərbaycan Respublikasının Milli Məclisi noyabrın 26-da keçirilən iclasında Fransa Senatının qərəzli qətnaməsi ilə əlaqədar bəyanat qəbul edib.Azərtac həmin bəyanatı təqdim edir. Azərbaycan Respublikası Milli Məclisinin B Ə Y A N A T I Fransada fəaliyyət göstərən ayrı-ayrı türkofob və islamofob siyasi dairələrin və erməni etnik qruplarının təhriki ilə Fransa Respublikası Senatının 2020-ci il noyabrın 25-də qəbul etdiyi qətnamə ilə əlaqədar Azərbaycan Respublikasının Milli Məclisi aşağıdakıları bəyan edir: • Ermənistan silahlı qüvvələri tərəfindən Azərbaycan Respublikasının 1988–1994-cü illərdə işğal edilmiş ərazilərində qeyri-qanuni yaradılan və heç bir dövlət tərəfindən tanınmayan “Dağlıq Qarabağ respublikası” adlı oyuncaq qurumun mövcudluğuna 2020-ci ilin noyabr ayında son qoyulmuşdur; • Fransa Senatı tərəfindən bu oyuncaq qurumun tanınması zərurətinin irəli sürülməsi Fransa hökumətini beynəlxalq hüququn əsas norma və prinsiplərini pozmağa təhrik etmək cəhdidir; • Fransa Senatının bu addımı Avropa İttifaqının xarici və təhlükəsizlik siyasəti üzrə qlobal strategiyası, o cümlədən Avropa İttifaqı Şurasının dövlətlərin ərazi bütövlüyü barədə 2016-cı ildən bəri ardıcıl qəbul etdiyi sənədlər çərçivəsində Fransa Respublikasının üzərinə götürdüyü öhdəliklərlə bir araya sığmır; • Sözügedən qətnamənin müddəalarının həyata keçirilməsi Avropa İttifaqına və onun “Şərq Tərəfdaşlığı” proqramına sarsıdıcı zərbə vurmaq potensialı daşıyır; • Cənubi Qafqazın və bütövlükdə Avropanın təhlükəsizliyi üçün təhdid törətmiş Ermənistan–Azərbaycan Dağlıq Qarabağ münaqişəsinin 30 ilə yaxın bir müddətdə həll edilməməsinin əsas səbəblərindən biri sülh danışıqlarında beynəlxalq vasitəçi rolunu oynamış dövlətlərin, xüsusən Fransanın təcavüzkarı öz adı ilə çağırmaması, işğalçı ilə işğala məruz qalan arasında fərq qoymaması olmuşdur; • Cənubi Qafqaz regionunda qeyri-sabitliyin davam etməsində maraqlı olan xarici qüvvələrin dəstəyindən cəsarətlənən, sülh danışıqlarını birdəfəlik pozmaq və Azərbaycan torpaqlarının işğalını legitimləşdirmək istəyən Ermənistan 2020-ci il sentyabrın 27-də Azərbaycana qarşı növbəti təxribata əl atmış, lakin BMT Nizamnaməsinin 51-ci maddəsinə əsasən özünümüdafiə hüququndan istifadə edən Azərbaycanın həyata keçirdiyi 44 günlük əks-hücum əməliyyatı təcavüzkar Ermənistanı sülhə məcbur etmişdir; • Fransa Senatının qətnaməsində Azərbaycan tərəfindən əks-hücum əməliyyatında Türkiyə Silahlı Qüvvələrinin iştirak etdiyinə və Yaxın Şərqin bəzi münaqişəli bölgələrindən muzdluların Ermənistana qarşı istifadə olunduğuna, Dağlıq Qarabağda mülki əhaliyə qarşı müharibə cinayətləri törədildiyinə dair əsassız və saxta iddialar irəli sürülmüş, lakin bu iddialarla bağlı heç bir dəlil göstərilməmişdir; • Bununla belə, Ermənistan tərəfindən xarici ölkələrdən, o cümlədən Fransadan şovinist, irqçi və terrorçu muzdlu dəstələrin müharibə zonasına gətirilərək Azərbaycana qarşı istifadə edildiyinə, Azərbaycanın hərbi əməliyyatlar zonasından uzaqda yerləşən yaşayış məntəqələrində dinc əhaliyə və mülki obyektlərə qarşı ağır müharibə cinayətləri törədildiyinə dair təkzibedilməz faktlar mövcuddur; • Ermənistan silahlı qüvvələri 1992–1994-cü illərdə Azərbaycana qarşı işğalçılıq müharibəsinin gedişində də dinc azərbaycanlılara qarşı bir sıra qətliamlar, o cümlədən XX əsrin ən dəhşətli faciələrindən olan Xocalı soyqırımını törətmişlər; • Özünü insan hüquqlarına və demokratik dəyərlərə hörmətin “nümunəsi” sayan Fransa Respublikası dinc azərbaycanlılara qarşı bu cinayətlər qarşısında səssiz qalmağa üstünlük vermişdir; • Müstəmləkə hakimiyyəti dövründə Fransa silahlı qüvvələri etnik və dini mənsubiyyətinə görə yüz minlərcə dinc sakini kütləvi surətdə qətlə yetirmişlər. Törədilmiş soyqırımı cinayətləri Fransanın siyasi tarixində silinməsi mümkün olmayan qara bir ləkədir; • 2020-ci il noyabrın 10-da Azərbaycan, Rusiya prezidentlərinin və Ermənistan baş nazirinin imzaladıqları üçtərəfli bəyanat 30 ildən artıq davam edən Ermənistan–Azərbaycan Dağlıq Qarabağ münaqişəsinə, Azərbaycan torpaqlarının işğalına son qoymuş, Cənubi Qafqaz bölgəsinin gələcək inkişafına yol açmışdır; • Bu üçtərəfli bəyanat beynəlxalq hüquq normalarının və prinsiplərinin üstünlüyünü bərqərar etmiş, BMT Təhlükəsizlik Şurasının 1993-cü ildə qəbul etdiyi və Fransa Respublikasının özünün də dəstəklədiyi 822, 853, 874 və 884 nömrəli qətnamələrin, BMT Baş Məclisinin 2008-ci ildə qəbul etdiyi 62/243 nömrəli qətnamənin, eləcə də Avropa İttifaqının və Avropa Parlamentinin, Avropa Şurası Parlament Assambleyasının, İslam Əməkdaşlıq Təşkilatının, Qoşulmama Hərəkatının, Avropa İnsan Hüquqları Məhkəməsinin və digər mötəbər beynəlxalq qurumların ayrı-ayrı illərdə qəbul etdikləri sənədlərin icrasını təmin etmişdir. Azərbaycan Respublikasının Milli Məclisi Cənubi Qafqaz bölgəsində Azərbaycanın hərtərəfli səyləri nəticəsində yaradılmış yeni reallıqların bütün beynəlxalq təşkilatlar və dövlətlər, o cümlədən Fransa Respublikası tərəfindən qəbul edilməli olduğunu vurğulayır, bu reallıqların bölgədə nüfuz sahibi olan Rusiya və Türkiyə tərəfindən dəstəkləndiyini və Ermənistan tərəfindən qəbul edildiyini xatırladır və yuxarıda şərh edilənləri nəzərə alaraq, Azərbaycan Respublikası Hökumətinə aşağıdakılarla bağlı çağırış edir: 1. Son günlərdə tutduğu mövqe və verdiyi bəyanatlar ilə bitərəfliyini şübhə altına qoyan Fransa Respublikasının ATƏT-in Minsk qrupunun həmsədrliyindən geri çağırılması üçün ATƏT-in rəhbərliyinə müraciət edilsin; 2. Azərbaycan Respublikası ilə Fransa Respublikası arasında mövcud olan siyasi münasibətlərə yenidən baxılsın; 3. Azərbaycan Respublikası ilə Fransa Respublikası arasında mövcud olan iqtisadi əlaqələr dərindən təhlil edilərək lazımi tədbirlər görülsün.xeber100.com

Noyabr 26, 2020 1:17