Təhsil Nazirliyinin məlumatı əsasında…

2019-2020-ci tədris ili üzrə 8 mindən çox müəllim işə qəbul olunub.Təhsil Nazirliyindən Azərtac-a bildirilib ki, onlardan 3260 nəfəri müddətsiz, 5614 nəfəri isə müddətli müqavilə əsasında işlə təmin olunub. Müddətsiz müqavilə əsasında işə qəbul olunan müəllimlərdən 973 nəfər həvəsləndirmə tədbirləri tətbiq olunmayan ümumi təhsil müəssisələrinə, 2287 nəfər isə həvəsləndirmə tədbirləri tətbiq edilən məktəblərdə işə başlayıb.Xatırladaq ki, ötən il ali məktəblərə qəbul imtahanlarında 500-dən çox bal toplayanların hər 4 nəfərindən biri və ya 25 faizi müəllimlik ixtisasını seçib.xeber100.com

2019/2020-ci tədris ilinin qış imtahan sessiyasına start verilib

Azərbaycan Dövlət İqtisad Universitetində (UNEC) 2019/2020-ci tədris ilinin qış imtahan sessiyasına start verilib.UNEC-dən Azərtac-a bildirilib ki, imtahan sessiyasında bakalavr səviyyəsində 12 min 412 tələbənin 6 fənn üzrə biliyi qiymətləndiriləcək. Magistratura səviyyəsi üzrə 3 min 360 nəfərin attestasiyası nəzərdə tutulub. Universitetin Zaqatala filialı üzrə isə bakalavr səviyyəsində 628 tələbə imtahan sessiyasında iştirak edəcək. UNEC-in nəzdində fəaliyyət göstərən Maliyyə-İqtisad Kollecində attestasiya olunacaq tələbələrin sayı 1210 nəfərdir.Sessiya dövründə tələbələrin biliyinin obyektiv qiymətləndirilməsi və şəffaflığın təmin edilməsi prioritet seçilib. Əvvəlki illərdə olduğu kimi, bu il də UNEC-də imtahanlar ictimaiyyətə açıq olacaq. Sessiyaya nəzarəti aparıcı təhsil ekspertlərindən, QHT və media nümayəndələrindən, tələbələrdən ibarət İctimai Nəzarət Şurası həyata keçirəcək. Sessiya dövründə “Açıq qapı” günləri təşkil olunacaq, sorğu və müraciətlər dinləniləcək.Şəffaflığın və obyektivliyin effektiv təmin edilməsi məqsədilə sessiya dövründə 18 46 “Qaynar xətt”i, bütün tədris binalarında isə qərargahlar fəaliyyət göstərəcək.UNEC 24/7 Kitabxanasında fasiləsiz xidmət göstəriləcək. Digər tədris binalarındakı kitabxana və oxu zalları isə gücləndirilmiş iş rejimində fəaliyyət göstərəcək.UNEC-in Zaqatala filialında və Maliyyə-İqtisad Kollecində də imtahanlar eyni qaydada təşkil olunacaq.xeber100.com

IX respublika müsabiqəsinə elektron qeydiyyat müddəti davam edir

“Sabahın alimləri” IX respublika müsabiqəsinə elektron qeydiyyat müddəti uzadılıb.Təhsil Nazirliyindən Azərtac-a bildirilib ki, müsabiqədə iştirak etmək istəyən şagirdlər dekabrın 30-dək qeydiyyatdan keçə bilərlər.Bu günədək 358 şagird müsabiqədə iştirak üçün elektron qeydiyyatdan keçib.Qeyd edək ki, müsabiqə 2020-ci il fevralın 11-dən 13-dək İSEF – Beynəlxalq Elm və Mühəndislik Sərgisi çərçivəsində keçiriləcək.Müsabiqənin təşkilində məqsəd yerli ümumi təhsil müəssisələrinin IX-XI siniflərində təhsil alan şagirdlərin elmi axtarışlara sövq edilməsi, onların elmi və yaradıcılıq fəaliyyətinin stimullaşdırılması, tədqiqat işinə meyli olan istedadlı şagirdlərin aşkar edilməsidir. Həmçinin yüksək tədqiqat nəticələri əldə etmiş Azərbaycan məktəblilərinin seçilib ABŞ-da keçirilən İSEF – Beynəlxalq Elm və Mühəndislik Sərgisinə göndərilməsini təmin etmək də məqsədlər sırasındadır.xeber100.com

Bakı Şəhəri üzrə Təhsil İdarəsinin məlumatına görə…

Paytaxt məktəbliləri arasında keçirilən “Kiçik tədqiqatçılar” müsabiqəsinin qalibləri müəyyənləşib.Bakı Şəhəri üzrə Təhsil İdarəsindən (BŞTİ) Azərtac-a bildirilib ki, müsabiqənin final mərhələsinin nəticələrinə əsasən, 193 nömrəli tam orta məktəbin komandası I, 244 və 282 nömrəli tam orta məktəblərin komandaları II, 29, 211 və 245 nömrəli tam orta məktəblərin komandaları isə III yerə layiq görülüb.Qalib komandalar BŞTİ tərəfindən diplom və hədiyyələrlə mükafatlandırılacaq. Həmçinin şəhər mərhələsində iştirak edən bütün komandalara BŞTİ tərəfindən sertifikatlar təqdim olunacaq.Qeyd edək ki, “Kiçik tədqiqatçılar” müsabiqəsinə ümumilikdə 253 məktəbin komandası qatılıb. Onlardan 26 komanda rayon mərhələsində qalib gələrək şəhər turunda iştirak etmək hüququ qazanıb.BŞTİ-nin əmrinə əsasən təşkil olunan müsabiqənin əsas məqsədi ibtidai sinif şagirdlərində tədqiqatçılıq bacarıqlarını inkişaf etdirmək, elmi-tədqiqat fəaliyyətinə meyilli olan istedadlı şagirdləri vaxtında aşkara çıxarmaq, onların gələcəkdə “Kiçik Akademiya”larda, elmi cəmiyyətlərdə, intellektual klub və dərnəklərdə təmsil olunmasını təmin etmək, tədqiqatçılıq bacarığı ilə fərqlənən şagirdlərdə məruzə etmək, referatlar hazırlamaq, birgə layihələrdə iştirak etmək vərdişlərinin formalaşdırılmasına əlverişli şərait yaratmaqdan ibarətdir.xeber100.com

Bakı Dövlət Universitetinin məlumatı əsasında…

Rumıniyanın Azərbaycandakı səfiri Dan İanku Bakı Dövlət Universitetində (BDU) olub.BDU-dan Azərtac-a bildirilib ki, rektor Elçin Babayev səfirlə görüşdə Rumıniya universitetləri ilə əlaqələrdən bəhs edib, elm və təhsil sahəsində əməkdaşlığın perspektiv inkişafına xüsusi önəm verdiyini vurğulayıb. Rektor mayın 28-də və 29-da Buxarest şəhərində Bakı Dövlət Universitetinin 100 illiyinə həsr olunmuş beynəlxalq konfrans barədə də danışıb.Səfir Dan İanku BDU ilə Rumıniya universitetləri arasında əməkdaşlığın əhəmiyyətini qeyd edib, müvafiq ali təhsil müəssisələri ilə əlaqələrin daha da inkişafında maraqlı olduğunu bildirib.Görüşdə tələbə-müəllim mübadiləsi, Rumıniyada fəaliyyət göstərən elmi-tədqiqat institutları ilə birgə laboratoriyaların təşkili, müştərək konfrans və simpoziumların keçirilməsi, tədqiqatların aparılması, təqaüd və təcrübə proqramları, təlim və layihələr, “ikili diplom”ların verilməsi üzrə əməkdaşlıq məsələləri müzakirə edilib. Həmçinin rumın milli günləri ilə əlaqədar festivalların, o cümlədən sərgilərin keçirilməsi qərara alınıb.xeber100.com

Təhsil naziri vətəndaşları qəbul edəcək

Təhsil naziri Ceyhun Bayramov dekabrın 20-də saat 10.00-da Sumqayıt şəhərindəki Heydər Əliyev Mərkəzində Xızı, Qubadlı rayonlarının və Sumqayıt şəhərinin sakinlərini qəbul edəcək.Mərkəzi icra hakimiyyəti orqanları rəhbərlərinin 2019-cu ilin dekabr ayında şəhər və rayonlarda vətəndaşların qəbulu cədvəlinə uyğun olaraq keçiriləcək qəbulda Xızı rayonunda və Sumqayıt şəhərində müvəqqəti məskunlaşmış məcburi köçkünlər də iştirak edə bilərlər.xeber100.com

Bakı Şəhəri üzrə Təhsil İdarəsinin məlumatı

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində "Sənədsiz məktəbli qalmasın” aksiyası davam edir.BŞTİ-dən Azərtac-a bildirilib ki, növbəti aksiya 102 nömrəli tam orta məktəbdə təşkil olunub. Aksiya çərçivəsində şagirdlərə şəxsiyyət vəsiqələri verilib və müvafiq sənədlərin dəyişdirilməsi təmin edilib.Aksiya dövlət xidmətlərinin daha rahat, yeni və innovativ üsullarla təqdim edilməsi, vətəndaşlar üçün əlçatanlığın təmin olunması, vətəndaş məmnunluğunun artırılması məqsədlərinə xidmət edir.Həmçinin məktəblərdə şəxsiyyət vəsiqələrinin verilməsi şagirdlərin uçot sisteminin daha səmərəli təşkili və valideynlərin rahatlığı baxımından əhəmiyyət kəsb edir. Valideynlərin nəinki məktəbyaşlı övladlarına, eləcə də 5 yaşına qədər uşaqlarına şəxsiyyət vəsiqələri alması məktəbəhazırlıq qrupları və I sinfə qeydiyyat prosesini asanlaşdırır. Bu, ümumi təhsil müəssisələri üzrə şagird kontingenti proqnozunun düzgün müəyyənləşdirilməsi, məktəblilər haqqında statistik hesabatların dəqiq göstəricilərinin formalaşması, icbari təhsilin həyata keçirilməsinə rəhbərlik və nəzarətin gücləndirilməsi imkanlarını daha da artırır.Qeyd edək ki, Təhsil Nazirliyi və “ASAN xidmət”in birgə təşkilatçılığı ilə keçirilən aksiya şagirdlərin təhsil aldıqları məktəbdə müvafiq xidmətlərdən yararlanması imkanlarını artırır. Hər bir şagirdin şəxsiyyət vəsiqəsi əsasında elektron bazaya daxil edilməsi Ümumi Təhsilin İnformasiya Sistemini təkmilləşdirməklə yanaşı, şagird yerdəyişməsi və digər müvafiq hallarda qarşıya çıxan sualların da aradan qaldırılmasına xidmət edir.xeber100.com

Müəllim və valideynlərin müraciətləri dinləniləcək

Dekabrın 13-də Bakının Qaradağ, Yasamal və Səbail rayonları üzrə müəllim və valideynlərin səyyar qəbulu keçiriləcək.Bakı Şəhəri üzrə Təhsil İdarəsindən Azərtac-a bildirilib ki, 110 nömrəli tam orta məktəbdə təşkil olunacaq səyyar qəbul saat 10.00-da başlayacaq.Səyyar qəbulda müəllim və valideynlərin müraciətləri BŞTİ-nin rəhbərliyi və struktur bölmə əməkdaşları tərəfindən dinləniləcək, müvafiq təşkilati və maarifləndirmə tədbirləri görüləcək. Səyyar qəbul vəzifə funksiyalarının tələb olunan səviyyədə yerinə yetirilməsi istiqamətində müəssisə rəhbərlərinin məsuliyyətinin artırılması, vətəndaşları maraqlandıran məsələlərə yerində aydınlıq gətirilməsi, təhsilin keyfiyyətinin yüksəldilməsi, məktəblərdə sağlam və yaradıcı mühitin təmin olunması üçün sistemli iş aparılması məqsədlərinə xidmət edir.xeber100.com

İqtisad Universitetində Birinci Kitabxana Forumu işə başlayıb

Noyabrın 28-də Azərbaycan Dövlət İqtisad Universitetində (UNEC) Universitetlərarası Birinci Kitabxana Forumu işə başlayıb.Azərtac xəbər verir ki, respublikada ilk dəfə keçirilən bu tədbirdə Təhsil və Mədəniyyət nazirliklərinin nümayəndələri, ali məktəb rektorları, Milli Məclisin deputatları, aparıcı kitabxanaların rəhbərləri iştirak edirlər.Forum çərçivəsində “Akademik kitabxanaların inkişaf perspektivləri: 24/7 modelindən yeni hədəflərə doğru” mövzusunda respublika elmi-praktik konfransı keçirilib. UNEC-in rektoru, professor Ədalət Muradov müasir təhsil sistemində klassik kitabxana modelinin artıq effekt vermədiyini bildirib. O, təhsilin keyfiyyətinin artırılması, qloballaşan dünyada kitabxanaların hər kəsə əlçatanlığının təmin edilməsi üçün universitet kitabxanalarının çağdaş, innovativ sistemlərlə ayaqlaşmasının zəruriliyini vurğulayıb.Tədbirdə Milli Məclisin deputatları Ziyad Səmədzadə, Fazil Mustafa və Azərbaycan Milli Kitabxanasının direktoru, professor Kərim Tahirov məruzə ilə çıxış ediblər.Sonra UNEC-in 1 nömrəli Oxu zalının açılışı olub. Forum çərçivəsində geniş kitab sərgisi və endirimli kitab satış-yarmarkası da təşkil edilib.xeber100.com

Təhsil naziri vətəndaşları qəbul edəcək

Təhsil naziri Ceyhun Bayramov noyabrın 28-i saat 10.00-da Yevlax şəhərindəki Heydər Əliyev Mərkəzində Ağdaş və Yevlax rayonlarının sakinlərini qəbul edəcək.Nazirlikdən Azərtac-a bildirilib ki, mərkəzi icra hakimiyyəti orqanları rəhbərlərinin 2019-cu ilin noyabr ayında şəhər və rayonlarda vətəndaşların qəbulu cədvəlinə uyğun olaraq keçiriləcək qəbulda həmin rayonlarda müvəqqəti məskunlaşmış məcburi köçkünlər də iştirak edə bilərlər.xeber100.com