Dövlət qulluğuna qəbul üçün test imtahanı keçiriləcək

Dövlət İmtahan Mərkəzi (DİM) tərəfindən mayın 26-da dövlət qulluğunda inzibati vəzifələrin A növünə (inzibati rəhbər vəzifələr) aid olan AA, AB və AC qruplarına uyğun olan vəzifələr üzrə dövlət qulluğuna qəbul üçün test imtahanı keçiriləcək.DİM-dən Azərtac-a bildirilib ki, kompüter vasitəsilə aparılacaq imtahan Bakı şəhəri, Nəsimi rayonu, Əbdülvahab Salamzadə küçəsi, 28 ünvanında (keçmiş Bakı Asiya Universitetinin binası) keçiriləcək.xeber100.com      

Bakı Slavyan Universitetində elmi-praktik konfransı keçirilib

Aprelin 26-da Bakı Slavyan Universitetində (BSU) “Azərbaycan müasir beynəlxalq münasibətlər sistemində” mövzusunda tələbə və magistrantların respublika elmi-praktik konfransı keçirilib. Azərtac xəbər verir ki, BSU-nun rektoru N.Əliyeva konfransın Azərbaycan Xalq Cümhuriyyətinin (AXC) yaranmasının 100 illiyinə həsr olunduğunu söyləyib, bu münasibətlə ölkəmizdə silsilə tədbirlərin keçirildiyini bildirib.Konfransda ölkənin müxtəlif ali təhsil müəssisələrindən gənclərin iştirak etdiklərini bildirən N.Əliyeva AXC-nin yaranmasından və qısa vaxtda gördüyü böyük işlərdən, ümummilli lider Heydər Əliyevin azərbaycançılıq ideologiyasından danışıb, gənclərimizə vətənpərvər olmağı, hər zaman dövlətimizin, millətimizin mövqeyini qorumağı, onun adını uca tutmağı tövsiyə edib.Sonra konfrans işini altı bölmədə iclaslarla davam etdirib. İclaslarda “Azərbaycan Xalq Cümhuriyyətinin beynəlxalq əlaqələri”, “Azərbaycan Xalq Cümhuriyyətinin milli ordu quruculuğu”, “Azərbaycan Xalq Cümhuriyyəti və təhsil”, “Azərbaycan Xalq Cümhuriyyətinin Azərbaycan tarixində yeri və əhəmiyyəti”, “Azərbaycan Xalq Cümhuriyyətinin xarici siyasətinə qısa baxış”, ”Azərbaycan Xalq Cümhuriyyətinin yaranma tarixi”, “Müstəqil dövlətdə kosmik sənayenin əhəmiyyəti” və digər mövzularda məruzələr dinlənilib.xeber100.com

“Azərbaycan Respublikasının dövlət dili haqqında” qanununa əsasən…

Qəbul (buraxılış) imtahanını Azərbaycan dilindən fərqli dildə verən abituriyentlər “Azərbaycan Respublikasının dövlət dili haqqında” qanununa əsasən, Azərbaycan dili fənnindən test imtahanı verirlər.Dövlət İmtahan Mərkəzindən Azərtac-a bildiriblər ki, test imtahanı ildə iki dəfə təşkil olunur. Bu il Azərbaycan dili fənni üzrə ilk imtahan aprelin 22-də keçirilib, ikinci imtahan isə iyunun 10-da olacaq.Aprelin 22-də keçirilən imtahanda “qeyri-məqbul” qiymət alan və ya müxtəlif səbəblər üzündən imtahanda iştirak etməyən ümumi (9 illik) orta təhsil bazasında orta ixtisas təhsili müəssisələrinə qəbul olmaq istəyən abituriyentlər mayın 18-dən 29-dək qeydiyyatdan keçməklə ikinci Azərbaycan dili imtahanında iştirak edə bilərlər.Martın 1-dən 27-dək ümumi (9 illik) orta təhsil bazasında orta ixtisas təhsili müəssisələrinə qəbul olmaq üçün elektron ərizə təqdim etməyən cari ilin 9-cu sinif rus bölməsinin abituriyentləri də mayın 18-dən 29-dək kolleclərin müsabiqəsində iştirak etmək üçün qeydiyyatdan keçə biləcəklər. Göstərilən tarixlərdə qeydiyyatdan keçən rus bölməsinin abituriyentləri iyunun 10-da keçiriləcək Azərbaycan dili fənni üzrə ikinci imtahanda iştirak edə biləcəklər, yəni həmin abituriyentlər Azərbaycan dili fənni üzrə imtahanda iştirak etmək üçün əlavə qeydiyyatdan keçməyəcəklər.Kolleclərin müsabiqəsində iştirak etmək üçün martın 1-dən 27-dək qeydiyyatdan keçməyən cari ilin Azərbaycan bölməsi məzunlarına isə ümumi (9 illik) orta təhsil bazasında buraxılış imtahanlarında iştirak edib tələb olunan müsabiqə şərtlərini ödədikləri halda iyulun 25-dən avqustun 6-dək ixtisas seçimi müddətində qeydiyyatdan keçib müsabiqədə iştirak etmək imkanı yaradılacaq.xeber100.com

Ali və orta ixtisas təhsil müəssisələrinə tələbə qəbulu davam edir

Ali və orta ixtisas təhsil müəssisələrinə tələbə qəbulu ilə bağlı ərizələrin qəbulu aprelin 30-dək davam edəcək.Dövlət İmtahan Mərkəzindən (DİM) Azərtac-a bildirilib ki, abituriyentlər ekabinet.dim.gov.az internet səhifəsində "Şəxsi kabinet" yaratdıqdan sonra şəxsi kabinetinin istifadəçi adı və parolundan istifadə etməklə DİM-in müvafiq internet səhifəsinə daxil olub "Abituriyentin elektron ərizəsi" formasını doldurur və ərizəni təsdiq edirlər.Bu gün saat 09:45-dək olan məlumata əsasən, 70743 abituriyent elektron ərizəsini təsdiq edib.Abituriyentlər, eyni zamanda, ali təhsil müəssisələrinin I-IV ixtisas qruplarına aid olan ixtisaslar, V ixtisas qrupuna aid olan ixtisaslar və tam orta təhsil bazasında orta ixtisas təhsili müəssisələrinin ixtisasları üzrə müsabiqədə iştirak edə bilərlər. Bunun üçün onlar ərizələrində müvafiq istəklərini bildirməlidirlər.Ərizənin təsdiqi DİM-in məlumat bazasında abituriyent barədə məlumatların yetərli olub-olmamasından asılı olaraq iki üsulla həyata keçirilir (ərizənin hansı üsulla təsdiq ediləcəyi barədə məlumat proqram tərəfindən “Abituriyentin elektron ərizəsi” forması təsdiq edilənədək ərizəyə hər dəfə daxil olarkən ekranda göstərilir).xeber100.com

Müəllim və valideynlərin səyyar qəbulu keçiriləcək

Aprelin 27-də Bakının Nərimanov və Nizami rayonları üzrə müəllim və valideynlərin səyyar qəbulu keçiriləcək.Bakı Şəhəri üzrə Təhsil İdarəsindən (BŞTİ) Azərtac-a bildiriblər ki, 45 nömrəli tam orta məktəbdə təşkil olunacaq səyyar qəbul saat 10.00-da başlayacaq.Qəbulda müəllim və valideynlərin müraciətləri BŞTİ-nin rəhbərliyi və struktur bölmə əməkdaşları tərəfindən dinləniləcək, müvafiq təşkilati və maarifləndirmə tədbirləri görüləcək.Səyyar qəbul vəzifə funksiyalarının tələb olunan səviyyədə yerinə yetirilməsi istiqamətində müəssisə rəhbərlərinin məsuliyyətinin artırılması, təhsilin keyfiyyətinin yüksəldilməsi, məktəblərdə sağlam və yaradıcı mühitin təmin olunması üçün sistemli iş aparılması məqsədlərinə xidmət edir.xeber100.com

Dövlət İmtahan Mərkəzinin məlumatı

Azərbaycan Memarlıq və İnşaat Universiteti I, II və V ixtisas qruplarına aid ixtisaslara qəbul olunmaq istəyən abituriyentləri “açıq qapı” gününə dəvət edir.Dövlət İmtahan Mərkəzindən Azərtac-a bildirilib ki, “açıq qapı” aprelin 28-də saat 12:00-da təşkil olunacaq.Görüşdə universitetlə tanışlıq, professor-müəllim heyəti ilə söhbətlər, tədris olunan ixtisaslar və onların respublikamız üçün əhəmiyyətindən danışılacaq.xeber100.com

Əməkdaşlıq müqaviləsi imzalanıb

Azərbaycan Texniki Universitetinin (AzTU) rektor əvəzi Xalıq Yahudov Türkiyənin Yıldız Texniki Universitetinin rektoru Bahri Şahin və həmin universitetin nümayəndə heyəti ilə görüşüb.AzTU-dan Azərtac-a bildirilib ki, görüşdə X.Yahudov qonaqlara universitetin beynəlxalq əlaqələrindən, həyata keçirdiyi beynəlxalq layihələrdən danışıb. Rektor əvəzi AzTU-nun Türkiyənin 19 universiteti ilə sıx əməkdaşlıq etdiyini, “Mövlanə” mübadilə proqramı üzrə müəllim-tələbə mübadiləsinin uğurla həyata keçirildiyini bildirib.Sonra Bahri Şahin rəhbərlik etdiyi təhsil ocağı haqqında məlumat verib. Bahri Şahin bildirib ki, əsası 1911-ci ildə qoyulan Yıldız Texniki Universitetində 11 fakültə var və bu fakültələrin bir çoxu əsasən mühəndis kadrlar hazırlayır. Qeyd olunub ki, hazırda 36 min tələbənin təhsil aldığı Yıldız Texniki Universitetində Texnopark fəaliyyət göstərir ki, bu da tələbələrin nəzəri biliklərinin istehsalatda tətbiqinə şərait yaradır.Müzakirələrdən sonra Azərbaycan və Türkiyənin texniki universitetləri arasında əməkdaşlıq müqaviləsi imzalanıb.xeber100.com

İqtisad Universitetinin məlumatı əsasında…

Azərbaycan Dövlət İqtisad Universitetində (UNEC) Azərbaycan ilə Qırğızıstan arasında diplomatik əlaqələrin qurulmasının 25 illiyinə həsr olunan tədbir keçirilib.Tədbirdə UNEC-in elm və innovasiyalar üzrə prorektoru, professor Sakit Yaqubov iki ölkə arasında güclü iqtisadi-siyasi əlaqələrin olduğunu bildirib. O, Qırğızıstan ilə Azərbaycan arasındakı diplomatik əlaqələrin əhəmiyyətindən bəhs edib.UNEC-dən Azərtac-a bildirilib ki, Qırğızıstanın ölkəmizdəki müvəqqəti işlər vəkili Bakıt Yusupov “Qırğızıstanın xarici siyasəti” mövzusunda təqdimatla çıxış edib. O, UNEC-in tələbələrinə Azərbaycan və qırğız xalqlarının tarix, dil, din və mədəni dəyərlər baxımından bir-birinə sıx tellərlə bağlı olduğunu bildirib. Qırğızıstanda 20 minə yaxın azərbaycanlının yaşadığını qeyd edən B.Yusupov iki ölkə arasında iqtisadi, siyasi və mədəni əlaqələrin inkişafından söz açıb. Diplomat ölkəsinin Ermənistan-Azərbaycan, Dağlıq Qarabağ münaqişəsində Azərbaycanın ədalətli mövqeyini dəstəklədiyini vurğulayıb.Tədbirdə Qırğızıstanın coğrafiyası, zəngin tarixi, inkişafı, mədəniyyəti, təbiəti, iqtisadiyyatı və təhsili haqqında sənədli film nümayiş olunub. Sonda tələbələrin suallarını cavablandıran müvəqqəti işlər vəkili UNEC-in tələbələrinin intellektual səviyyəsini yüksək qiymətləndirərək onlarla tanışlıqdan məmnun olduğunu bildirib.xeber100.com

V Moskva Beynəlxalq Təhsil Salonu çərçivəsində

Rusiya Federasiyasının (RF) paytaxtında V Moskva Beynəlxalq Təhsil Salonu çərçivəsində forum keçirilir.RF-nin Təhsil və Elm Nazirliyi ilə UNESCO-nun Təhsildə İnformasiya Texnologiyaları İnstitutu tərəfindən birgə təşkil olunan “Dayanıqlı inkişaf məqsədləri 4: təhsildə İKT tətbiqi məsələlərinə dair qlobal dialoq” mövzusunda keçirilən nazirlərin forumunda təhsil nazirinin müavini Firudin Qurbanovun rəhbərliyi ilə Azərbaycan nümayəndə heyəti də iştirak edir.Təhsil Nazirliyindən Azərtac-a bildiriblər ki, foruma RF hökuməti sədrinin müavini Olqa Qolodets, təhsil və elm naziri Olqa Vasilyeva, təhsil və elm nazirinin müavini Pavel Zenkoviç, UNESCO-nun təhsildə İKT-nin tətbiqi üzrə bölməsinin rəhbəri Fenqçun Miao, bir sıra dövlətlərin və beynəlxalq təşkilatların təhsil üzrə rəhbər şəxsləri, pedaqoqlar və metodistlər qatılıblar.Ümumilikdə, V Moskva Beynəlxalq Təhsil Salonu çərçivəsində təxminən min tədbir keçiriləcək. Bu tədbirlərdə mindən çox ekspertin, 400 eksponentin və 60 mindən çox ziyarətçinin iştirakı nəzərdə tutulub.xeber100.com

Abituriyentlər üçün “Açıq qapı” günü keçiriləcək

Aprelin 21-də M.V.Lomonosov adına Moskva Dövlət Universitetinin (MDU) Bakı filialında abituriyentlər üçün “Açıq qapı” günü keçiriləcək.Dövlət İmtahan Mərkəzindən Azərtac-a bildiriblər ki, tədbirdə MDU-nun Bakı filialına 2018-2019-cu il üçün qəbulun şərtləri və qaydaları barədə məlumat veriləcək.Abituriyentlər MDU Bakı filialının filologiya, tətbiqi riyaziyyat, kimya, psixologiya, iqtisadiyyat və fizika fakültələrində bakalavrların və magistrlərin hazırlanması ilə bağlı ətraflı məlumat ala biləcəklər.xeber100.com