“Gəzən kitabxana III” adlı layihəyə start verildi

Azərbaycan Tələbə Gənclər Təşkilatları İttifaqı (ATGTİ) Gənclər və İdman Nazirliyinin dəstəyi ilə “Avropa Gənclər Paytaxtı 2016” çərçivəsində Gəncə şəhərində və “Şəmkir Gənclər Paytaxtı 2016” çərçivəsində Şəmkir rayonunda “Gəzən kitabxana III” adlı layihəyə start verib. Azərtac xəbər verir ki, bu münasibətlə oktyabrın 10-da Gənclər və İdman Nazirliyinin inzibati binasının qarşısında layihənin açılış mərasimi keçirilib. Açılış mərasimində çıxış edən gənclər və idman naziri A.Rəhimov bildirib ki, layihənin həyata keçirilməsində məqsəd gənclərin kitab oxumağa marağının artırılması, onların təmənnasız kitab və elektron kitab vəsaitləri ilə təmin olunmasından ibarətdir.xeber100.com

“Söz-2016” poeziya bayramı keçirilib

Azərbaycan Yazıçılar Birliyinin (AYB) Sumqayıt bölməsi və şəhərdəki Səməd Vurğun adına Mərkəzi kitabxananın təşkilatçılığı ilə “Söz-2016” poeziya bayramı keçirilib. AYB-dən Azərtac-a bildirilib ki, kitabxananın direktoru Yeganə Əhmədova və AYB Sumqayıt bölməsinin sədri Sabir Sarvan 1997-ci ildən bəri hər il keçirilən “Söz” bayramının ictimaiyyət və poeziyasevərlər tərəfindən rəğbətlə qarşılandığını söyləyiblər.  

Mədəniyyət və Turizm Nazirliyinin dəstəyi ilə…

Xalq Şairi Qabil İmamverdiyev haqqında kitab hazırlanır. Kitab Mədəniyyət və Turizm Nazirliyinin dəstəyi ilə çap olunacaq. Azərtac xəbər verir ki, bu sözləri M.Maqomayev adına Azərbaycan Dövlət Filarmoniyasında Xalq Şairinin 90 illiyinə həsr olunmuş yubiley tədbirində mədəniyyət və turizm nazirinin birinci müavini Vaqif Əliyev deyib. Nazir müavini bildirib ki, Xalq Şairi Qabilin anadan olmasının 90 illiyi münasibətilə onun bütün ədəbi irsinin yer aldığı kitab nəşrə hazırlanır. Bu istiqamətdə bütün işlər Mədəniyyət və Turizm Nazirliyi tərəfindən həyata keçiriləcək.xeber100.com

Kitabxanaçıların Beynəlxalq Konqresi keçirilir

Astanada Qazaxıstan Respublikasının müstəqilliyinin 25 illiyinə həsr olunmuş Kitabxanaçıların Beynəlxalq Konqresi keçirilir. Konqresdə alimlər, ictimai və siyasi xadimlər, şairlər, yazıçılar, kulturoloqlar, naşirlər, kitabxanaçılar iştirak edirlər. M.F.Axundzadə adına Azərbaycan Milli Kitabxanasından Azərtac-a bildirilib ki, konqresin plenar iclasını Qazaxıstanın mədəniyyət və idman naziri A.Muxamediuli açaraq iştirakçıları təşəkkürnamə ilə təltif edib. Moderator, Qazaxıstan Respublikası Milli Elmlər Akademiyasının akademiki Esim Qarifolla konqresin məqsəd və əhəmiyyətindən danışaraq, bu tədbirin kitabxanaların gələcək innovativ inkişafında, kitaba, mütaliəyə marağın artırılmasındakı mühüm rolunu vurğulayıb. Konqresin əsas vəzifəsi ictimaiyyətin kitabxanaların inkişafı məsələlərinə, kitaba olan diqqətini artırmaq, elektron informasiya resurslarının formalaşdırılması problemi və onların kitabxana-informasiya müəssisələrində istifadəsi üzrə təcrübə mübadiləsinin həyata keçirilməsidir. Konqres ümumilikdə kitabxana fəaliyyətinin demək olar ki, bütün aktual problem və məsələlərini əhatə edir. Eyni zamanda Müstəqillik Sarayında konqres çərçivəsində qazax xalqının tarixini əks etdirən qədim və qiymətli kitabların, kitabxana layihələrinin və instalyasiyaların da sərgisi keçirilib. Plenar iclasda Qazaxıstan, Rusiya, Azərbaycan, Gürcüstan, Belorus, Ukrayna, Moldova, İran İslam Respublikası və digər ölkələrdən olan məruzəçilər çıxış ediblər. Azərbaycan Milli Kitabxanasının direktor müavini, Əməkdar Mədəniyyət İşçisi Ədibə İsmayılovanın “Azərbaycan Milli Kitabxanası və XXI əsrin oxucusu” adlı məruzəsi dinlənilib. İclas işini bitirdikdən sonra şəhərin mədəniyyət mərkəzlərinə ekskursiya təşkil edilib. Konqresin ikinci günü Qazaxıstan Milli Akademik Kitabxanasında Avrasiya Kitabxanalar Assambleyasının (БАЕ) XIX ümumi iclası keçirilib. İclasda Azərbaycan Milli Kitabxanasının direktor müavini Ədibə İsmayılova ilə yanaşı, kitabxananın şöbəsinin müdiri Aygün Hacıyeva da iştirak edib. Avrasiya Kitabxanalar Assambleyasının Elektron Kitabxanası layihəsi, Assambleyaya yeni üzvlərin qəbulu, həmçinin üzv ölkələrin kitabxana mütəxəssisləri üçün müxtəlif dövlətlərin kitabxanalarında tədris kurslarının, seminarlarının təşkili və s. məsələlər müzakirə edilib, növbəti iclasın 2017-ci ilin oktyabrında Belorusun paytaxtı Minsk şəhərində keçiriləcəyi qərara alınıb. Hazırda Konqres işini 5 bölmədə davam etdirir. Sonda iştirakçılara sertifikatlar təqdim ediləcək.xeber100.com

“Ədəbiyyat gecəsi” adlı tədbir təşkil edilib

YARAT Müasir İncəsənət Məkanında “Ədəbiyyat gecəsi” adlı tədbir təşkil edilib. Azərtac xəbər verir ki, ədəbiyyatsevərləri bir araya toplamaq məqsədilə keçirilən tədbirin qonağı gənc yazarlar Nigar Məmmədli, Hüseynağa Aslanov, Nuranə Nur və Pərviz Seyidli olub. Gənclər bu dəfə öz daxili müqavimətləri haqqında şeirlərini tədbir iştirakçılarına təqdim ediblər. Bundan başqa, ədəbiyyat və poeziya ilə bağlı maraq doğuran suallar ətrafında müzakirələr aparılıb.xeber100.com

“Azərbaycan haqqında yeni novellalar” adlı kitab çap olunub

Fransada “Azərbaycan haqqında yeni novellalar” (Nouvelles Nouvelles D’Azerbaidjan) kitabı nəşr olunub. Azərbaycan-Fransa Dostluq Cəmiyyətinin təşəbbüsü, Mədəniyyət və Turizm Nazirliyinin, Fransanın Azərbaycandakı səfirliyinin, Fransanın “Total” şirkətinin, Bakı Beynəlxalq Multikulturalizm Mərkəzinin və UFC şirkətinin dəstəyi ilə yenicə işıq üzü görmüş kitab tanınmış müasir fransız yazıçılarının müxtəlif sahələr üzrə mövzularda ölkəmizə səfər edərək yazdığı novellalardan ibarətdir. Kitabda Azərbaycan multikultural ənənələrə malik, dünyəvi, tolerant ölkə olaraq tanıdılır və şərh edilir. Qeyd olunur ki, 2015-ci ildə 10 fransız yazıçı xəbər toplamaq üçün Azərbaycanda “kəşfiyyatı” öz üzərlərinə götürürlər və nəticədə müxtəlif novellalar yazılaraq kitab halına salınır.xeber100.com

Milli Kitabxanada kitab sərgisi açılıb

Avqustun 24-də M.F.Axundzadə adına Milli Kitabxanada Azərbaycan ədəbiyyatının tanınmış nümayəndələrindən biri, yazıçı Seyfəddin Dağlının anadan olmasının 95 illiyi münasibətilə “Seyfəddin Dağlı-95” adlı kitab sərgisi açılıb. Kitabxanadan bildirilib ki, sərgidə yazıçının əsərləri, redaktoru olduğu kitablar və qəzet, jurnal materialları sərgilənib. Xatırladaq ki, yazıçının “Dəniz kəşfiyyatçısı" adlı ilk kitabı 1948-ci ildə nəşr edilib. “Adı sənin, dadı mənim”, “Aydınlığa dоğru”, “Mənziliniz mübarək”, “Təzə gəlin”, “Kölgələr pıçıldaşır” pyesləri, “Bahar оğlu”, “Məşəl”, “Kəcil qapısı”, “Sabiqlər” və sair kitabları geniş oxucu kütləsinin rəğbətini qazanıb.xeber100.com    

Bəxtiyar Vahabzadə – 91

Bu gün Xalq Şairi Bəxtiyar Vahabzadə anadan olmasının 91-ci ili tamam olur. Qeyd edək ki, ötən il Bəxtiyar Vahabzadənin 90 illik yubileyinin keçirilməsi haqqında Prezident İlham Əliyevin müvafiq Sərəncamına uyğun olaraq ölkəmizin hər yerində silsilə tədbirlər təşkil edilib. Müasir Azərbaycan ədəbiyyatının ən parlaq simalarından olan Bəxtiyar Vahabzadə öz yaradıcılığı ilə bədii fikrimizin zənginləşməsində mühüm rol oynayıb. Bəxtiyar Vahabzadənin tariximizin bir çox hadisələrini canlandıran dram əsərləri gənc nəslin tərbiyəsində böyük rol oynayır. Onun pyesləri Azərbaycan, eləcə də xarici ölkə teatrlarının səhnələrində uğurla tamaşaya qoyulub, müəllifinə böyük şöhrət gətirib. Onun müasir mövzularda qələmə aldığı “İkinci səs”, “Vicdan”, “Yağışdan sonra”, “Yollara iz düşür”, “Hara gedir bu dünya?”, “Fəryad”, “Cəzasız günah”, “Dar ağacı”, “Rəqabət” və “Özümüzü kəsən qılınc” kimi lirik-psixoloji pyesləri günün aktual problemlərindən, müasirlərimizin daxili dünyasından, daim təzələnən həyat və insan münasibətlərindən söz açmaqla gerçəkliyin ən müxtəlif tərəflərinə diqqət cəlb edib, layiqli səhnə təcəssümü taparaq, yarım əsrədək bir müddətdə Azərbaycan səhnəsindən düşməyib. O, tarixi və müasir mövzuda 20-dən artıq irihəcmli poemanın müəllifidir. Azərbaycan xalqının müstəqilik ideyalarının ilk carçılarından olan Bəxtiyar Vahabzadə 20 Yanvar faciəsi ilə bağlı qələmə aldığı “Şəhidlər” poeması ilə yeni bir tarix yazdı. Bəxtiyar Vahabzadə millətin məhəbbətinə layiq olduğunu təsdiq etmək üçün ziddiyyətlər içində keçən həyatının bütün cəfalarına çəkinmədən tab gətirib, heç vaxt sarsılmayıb. Şair 2009-cu il fevralın 13-də, 83 yaşında uzun sürən xəstəlikdən sonra Bakıda vəfat edib.xeber100.com    

Milli Arxiv İdarəsinin məlumatına görə…

Ceyhun bəy Hacıbəylinin Azərbaycan Respublikası Dövlət Ədəbiyyat və İncəsənət Arxivində mühafizə edilən arxiv sənədlərindən, epistolyar yazılarından və digər mənbələrdən olan sənədlərdən istifadə edilməklə hazırlanmış “Qürbətdən gələn səslər” (Ceyhun bəy Hacıbəylinin mühacirət həyatı) kitabı çap olunub. Milli Arxiv İdarəsindən Azərtac-a bildirilib ki, kitab “Ceyhun bəy Hacıbəylinin 125 illik yubileyinin keçirilməsi haqqında” Azərbaycan Respublikasının Prezidentinin 19 noyabr 2015-ci il tarixli Sərəncamına uyğun olaraq hazırlanıb. Dövlət Ədəbiyyat və İncəsənət Arxivinin böyük həcmdə materiallarından istifadə edilməklə ərsəyə gəlmiş bu kitab tədqiqatçıların tarixin çox dəyərli və az öyrənilmiş məqamları ilə tanış olmasına imkan yaradacaq.xeber100.com

Milli Kitabxanada kitab sərgisi açılıb

M.F.Axundzadə adına Azərbaycan Milli Kitabxanasında xalq şairi Qabilin anadan olmasının 90 illiyinə həsr olunmuş “Qabil-90” adlı kitab sərgisi açılıb. Milli Kitabxananın verdiyi məlumata görə, sərgidə ustadın poetik istedadını əks etdirən şeir kitabları və seçilmiş əsərləri nümayiş olunub. Belə ki, sərgidə Qabilin “Seçilmiş əsərləri”, “Adsız bulaqlar”, “Qoy danışsın təbiət”, “Təmizlik”, “Rübailər”, “Gülləboran eylədilər”, “Ömür həbləri”, “Nəsimi” və digər kitabları nümayiş etdirilib, şairin yaradıcılığı haqqında oxuculara ətraflı məlumat verilib. Sərgi iştirakçılar tərəfindən maraqla qarşılanıb.xeber100.com