36-cı Türkiyə Beynəlxalq Kitab Sərgisi çərçivəsində

Noyabrın 5-dən İstanbulun TÜYAP sərgi mərkəzindəki 36-cı Türkiyə Beynəlxalq Kitab Sərgisi çərçivəsində türk dilinə tərcümə olunub qardaş ölkədə nəşr olunan Azərbaycan ədəbiyyatı nümunələrinin təqdimatı keçirilib.Qeyd edək ki, Azərbaycan Mədəniyyət və Turizm Nazirliyi ilə Sevinc Fırat Zənginin Yayınçılıq 2016-cı ildə əldə olunan razılaşma əsasında həyata keçirilən layihə çərçivəsində Azərbaycan ədəbiyyatının görkəmli simalarından olan yazıçı və şairlərin bir il ərzində ümumilikdə 8 əsəri türk dilində nəşr olunub.xeber100.com

36-cı Türkiyə Beynəlxalq Kitab Sərgisinin açılışı olub

Noyabrın 4-də İstanbuldakı TÜYAP sərgi mərkəzində 36-cı Türkiyə Beynəlxalq Kitab Sərgisinin açılışı olub.Azərtac xəbər verir ki, 30 ölkədən 700-dək nəşriyyatın iştirak etdiyi sərgi-yarmarkada geniş bir sahədə Azərbaycan pavilyonu qurulub. Pavilyonda Mədəniyyət və Turizm Nazirliyinin, “Azərnəşr”, “Kaspi Nəşrləri”, “Hədəf Nəşrləri”, “Altun kitab”, “Qələm” və “Parlaq imzalar” nəşriyyatlarının çap işləri sərgilənir.Azərbaycanın zəngin mədəniyyətini, tarixini, elmi nailiyyətlərini, sürətli sosial-iqtisadi inkişafını, həmçinin Ermənistanın ölkəmizə qarşı təcavüzkar siyasətinin ağır nəticələrini əks etdirən kitablar ziyarətçilərdə maraq doğurur. Bundan başqa, stenddə qurulmuş monitorlarda nümayiş etdirilən kadrlarda Azərbaycan barədə ətraflı məlumat verilir.Sərgi çərçivəsində XVIII əsr Azərbaycan poeziyasının parlaq siması, görkəmli şair, məşhur siyasi və dövlət xadimi Molla Pənah Vaqifin 300 illik yubileyi ilə bağlı tədbir və ona aid kitabların təqdimatı keçiriləcək.xeber100.com

Beynəlxalq Kitab Sərgisi təşkil olunacaq

Noyabrın 4-dən 7-dək İstanbulda Beynəlxalq Kitab Sərgisi təşkil olunacaq. Ölkəmizin, onun zəngin mədəniyyətinin, inkişaf edən nəşriyyat-poliqrafiya sahəsinin, kitab sənətinin təmsil və təbliğ olunması məqsədilə Mədəniyyət və Turizm Nazirliyinin və “Azərnəşr”, “Kaspi Nəşrləri”, “Hədəf Nəşrləri”, “Altun kitab”, “Qələm” və “Parlaq imzalar” nəşriyyatlarının əməkdaşlarından ibarət nümayəndə heyəti sərgidə iştirak edəcəklər.Nazirlikdən Azərtac-a bildirilib ki, hər il təşkil olunan bu sərgiyə dünyanın əksər ölkələrindən çoxsaylı iştirakçılar qatılır. Azərbaycanın zəngin mədəniyyətinin, sürətli inkişafının və Qarabağ həqiqətlərinin təbliğ olunması, eyni zamanda nəşriyyat və informasiya sahəsində xarici tərəfdaşlarla əlaqələrin qurulması baxımından sərgi mühüm əhəmiyyət daşıyır.Sərgidə 36 kvadratmetr sahədə hazırlanmış xüsusi stendlə dövlətçiliyimizə, tariximizə, mədəniyyətimizə və ölkəmizin turizm potensialına dair nəşrlər ziyarətçilərin diqqətinə təqdim ediləcək.xeber100.com  

Milli kitabxanalar birliyi yaradılacaq

Türkdilli Ölkələr və Qohum Topluluqların Milli Kitabxanalar Birliyi yaradılacaq.Türkiyə mətbuatı xəbər verir ki, “Türkdilli Ölkələr və Qohum Topluluqlar Milli Kitabxanaları Birliyi Statusu” layihə mətni oktyabrın 30-dan noyabrın 2-dək Antalyada keçiriləcək iclasda milli kitabxana rəhbərlərinə təqdim olunacaq.Qeyd edək ki, 2016-cı il noyabrın 14-dən 17-dək Türkiyədə Azərbaycan, Qazaxıstan, Qırğızıstan, Şimali Kipr, Moldova (Qaqauz Yeri), Rusiya Federasiyasının Başqırdıstan, Saxa (Yakutiya), Tatarıstan respublikaları milli kitabxanalarının iştirakı ilə “IV Türkdilli Ölkələr və Qohum Topluluqlar Milli Kitabxana Rəhbərləri Toplantısı” keçirilib. Bu toplantıda alınan ortaq qərara əsasən, birlik işlərinin hüquqi bazaya oturdulması, beynəlxalq rəsmi bir konfrans statusunda daha fəal və faydalı hala gətirilməsi məqsədi qarşıya qoyulub.Toplantıda, Azərbaycan, Başqırdıstan, Qaqauz Yeri, Qazaxıstan, Şimali Kipr, Qırğızıstan, Özbəkistan və Tatarıstan qurucu üzv, Bosniya və Herseqovina, Saxa (Yakutiya), Makedoniya, Kosovo, Monqolustan milli kitabxanaları isə müşahidəçi ölkə kimi iştirak edəcəklər.xeber100.com

Beynəlxalq poeziya festivalına başlanılıb

Oktyabrın 19-da Yakutiyada “Böyük qarın kəraməti” adlı beynəlxalq poeziya festivalına başlanılıb.Azərtac xəbər verir ki, festivalda ölkəmizi Dünya Gənc Türk Yazarlar Birliyinin məsləhət şurasının sədri Əkbər Qoşalı təmsil edir. Festivala müxtəlif ölkələrdən olan tanınmış ədəbiyyat və poeziya nümayəndələri qatılıb.Yakutsk şəhərinin Şimal Şərqi Federal Universitetinin mədəniyyət mərkəzində keçirilən festival çərçivəsində iştirakçı ədiblərin “Canlı avtoqraf” mərasimi təşkil olunacaq.Oktyabrın 20-də festival çərçivəsində poeziya axşamının keçirilməsi də nəzərdə tutulur.xeber100.com

Beynəlxalq Kitab Yarmarkası işə başlayıb

Almaniyanın Frankfurt-Mayn şəhərində Frankfurt Beynəlxalq Kitab Yarmarkası işə başlayıb. Azərbaycanın ənənəvi olaraq təmsil olunduğu beynəlxalq tədbirdə Mədəniyyət və Turizm Nazirliyinin əməkdaşlarından və ölkəmizin nəşriyyat nümayəndələrindən ibarət heyət iştirak edir.Nazirlikdən Azərtac-a bildirilib ki, ölkəmizin stendində Azərbaycanın dövlətçiliyi, tarixi, mədəniyyəti və turizm imkanları ilə bağlı 380 adda 700-ə yaxın nəşr məhsulları alman, ingilis və Azərbaycan dilində ziyarətçilərə təqdim olunur.Tədbirdə “Mayns-Azərbaycan” Cəmiyyətinin sədri Başar Kömür, “Avropa Əməkdaşlıq Forumu”nun sədri Samirə Patzer-İsmayılova və digər qonaqlar iştirak ediblər.Qeyd edək ki, Frankfurt yarmarkasında iştirak edən Ermənistan tərəfi bu dəfə də öz xislətinə uyğun olaraq ölkəmizə qarşı təxribata əl atıb. Ermənistanın stendində Azərbaycanın Dağlıq Qarabağ bölgəsini və digər işğal olunmuş ərazilərini qondarma “DQR” adı altında göstərən xəritələr yerləşdirilib. Amma bu çox çəkməyib. Azərbaycan Respublikası Mədəniyyət və Turizm Nazirliyi əməkdaşlarının səyləri sayəsində həmin xəritələr stenddən yığışdırılıb.xeber100.com

X Beynəlxalq şeir və ədəbiyyat festivalı keçirilir

İstanbulda X Beynəlxalq şeir və ədəbiyyat festivalı keçirilir.Azərtac xəbər verir ki, festival Türkiyənin Mədəniyyət və Turizm Nazirliyinin dəstəyi və Bəyoğlu Bələdiyyəsinin təşkilatçılığı ilə gerçəkləşib.Türkiyədən 30, xaricdən isə 20 gənc şair və yazarın qatılacağı festival bu gün Qrand Perada Senem Diyici Trio konserti ilə açılacaq. Festivalın ilk günündə, həmçinin Gülten Akın, Cemal Süreya, Rasim Özdenören kimi məşhur yazar və şairlərin gənc yaşlarında yazdıqları əsərlərdən ibarət “İlk əsərlər sərgisi” də təşkil ediləcək.Oktyabrın 7-dək davam edəcək festival çərçivəsində bir sıra kitabxana və kitab evlərində şeir axşamları, imza günləri və söhbətlər təşkil olunacaq.xeber100.com

Bilik Günü münasibətilə aksiya keçiriləcək

Sentyabrın 16-da “Hədəf” kurslarının təşəbbüsü ilə “Pulsuz 3000 kitab” aksiyası keçiriləcək.Kursun rəhbəri, filologiya üzrə fəlsəfə doktoru Şəmil Sadiq Azərtac-a bildirib ki, artıq 9 ildir Bilik Günü münasibətilə belə bir aksiya təşkil edirlər. Qurum fəaliyyətə başladığı ilk illərdən təhsilimizin inkişafı, gənclərin maariflənməsinə dəstək məqsədilə bir neçə sosial layihəyə imza atıb. Növbəti layihə yeni tədris ilinin başlanğıcında tələbə olmaq istəyən abituriyentlər və məktəblilər üçün nəzərdə tutulub.“Ali məktəblərə hazırlaşan abituriyentlərin kitab və test vəsaitlərini əldə etməsi bəzən müəyyən qədər maddi sıxıntıya səbəb olur. Bu maddi sıxıntını aradan qaldırmaq üçün “Hədəf” kursları 3 min dərslik, bədii kitab və test vəsaitlərini şagirdlərə bu il də ödənişsiz paylayacaq”, - deyə kursun rəhbəri bildirib.Onun sözlərinə görə, layihəyə qoşulmaq istəyən kənar şəxslər də istifadəyə yararlı, lakin ehtiyacları olmayan dərslik, bədii kitab və test vəsaitlərini gətirib imkansız şəxslərin oxumasına dəstək ola bilər. Aksiya sentyabrın 16-da saat 15-dən 18-dək davam edəcək.xeber100.com

Ədəbi müsabiqəyə start verilir

“Mədəniyyət” kanalı ilə Yazıçılar Birliyinin birgə layihəsi olan yeni ədəbi müsabiqəyə start verilir.Azərtac xəbər verir ki, “Mədəniyyət” kanalının direktoru R.Qasımovun sözlərinə görə, müsabiqənin əsas məqsədi ölkəmizin müasir iqtisadi-mədəni inkişafının poetik müstəvidə işıqlandırılmasını təmin etmək, eyni zamanda, yüksək səviyyəli poeziya nümunələrini geniş tamaşaçı kütlələri arasında təbliğ etməkdir.Müsabiqəyə “Vətənpərvərlik”, “Azərbaycan bayrağı”, “Doğma Bakı” və “Milli həmrəylik” mövzularında poeziya nümunələri qəbul olunur.Ramil Qasımov qeyd edib ki, Azərbaycan Televiziyası öz fəaliyyətində gənc nəslə vətənpərvərlik, qəhrəmanlıq ideyalarının təbliğini, xalqa, millətə, bayrağımıza, doğma Bakımıza, Azərbaycanımıza hörmət və sevgi hisslərinin aşılanmasını hər zaman əsas missiya kimi yerinə yetirir. Gənc nəslin maariflənməsi Azərbaycan Televiziyasının əsas məqsədlərindəndir. Bu baxımdan belə müsabiqələrin keçirilməsi təqdirəlayiqdir.Müsabiqənin sonunda hər mövzu üzrə 3 şeir nümunəsi ekspertlər tərəfindən qalib elan ediləcək. Bu şeirlərə musiqi yazılacaq və “Mədəniyyət” kanalı vasitəsilə yayımlanacaq. Bu isə istər poeziya həvəskarlarına, istərsə də musiqisevərlərə “Mədəniyyət” kanalının bir töhfəsi olacaq. Qalibləri əlavə pul mükafatı da gözləyir.xeber100.com

Uolthamstou Sentral Kitabxanasında Azərbaycan bölməsi yaradılıb

Bu günlərdə Londonun Uolthamstou Sentral Kitabxanasında (Walthamstow Central Library) Azərbaycan ədəbiyyatı bölməsi fəaliyyətə başlayıb. Bakı Dövlət Universitetinin professoru Vaqif Sultanlının təşəbbüsü ilə yaradılan bölmədə klassik və müasir ədəbiyyat örnəkləri oxucuların mühakiməsinə verilib.Azərtac xəbər verir ki, Azərbaycan dilində bədii və elmi-publisistik əsərlərdən ibarət bölmənin yaradılması Bakı Dövlət Universitetinin və AMEA-nın Elmi Kitabxanası, “Xan” nəşriyyatı, həmçinin ayrı-ayrı yazıçı və alimlərin dəstəyi ilə gerçəkləşib.Kitabxananın dünya dillərində bədii ədəbiyyatın sərgiləndiyi böyük salonunda yerləşən bölməyə indiyədək 300-ə yaxın kitab göndərilib. Bölmədə Nizami Gəncəvi, Məhəmməd Füzuli, Mirzə Kazım bəy, Mirzə Ələkbər Sabir, Əli bəy Hüseynzadə, Əhməd bəy Ağaoğlu, Yusif Vəzir Çəmənzəminli, Hüseyn Cavid, Ceyhun Hacıbəyli, Məhəmmədhüseyn Şəhriyar, Əli Kərim, İsmayıl Şıxlı, İsa Muğanna, Əzizə Cəfərzadə, Sabir Əhmədli, Xəlil Rza Ulutürk, Məmməd İsmayıl, Sabir Rüstəmxanlı və başqa müəlliflərlə yanaşı, gənc yazarların əsərləri, habelə “Kitabi-Dədə Qorqud”, “Koroğlu”, “Qaçaq Nəbi” dastanları, nağıllar və lətifələrdən ibarət folklor materialları da yer almaqdadır. Bölmədəki bütün kitablar kataloqlaşdırılıb, hissə-hissə oxuculara təqdim olunması nəzərdə tutulub.Qeyd edək ki, Uolthamstou Sentral Kitabxanasında açılan Azərbaycan dilində ədəbiyyat fondu postsovet respublikaları içərində Rusiyadan sonra yaradılan ikinci bölmədir.xeber100.com