Kütləvi tibbi müayinə aksiyası davam edir

Əhalinin sağlamlığının qorunması məqsədilə üç aydır start götürən kütləvi pulsuz tibbi müayinə aksiyası davam edir. Azərtac xəbər verir ki, bu dəfə aksiya Balakən rayonunda həyata keçirilib. Aksiya çərçivəsində, ümumilikdə, 60 min 44 sakin müayinədən keçib. Müayinə olunanların 3394 nəfərinə ambulator müalicə təyin edilib, 492 nəfər stasionar müalicəyə cəlb olunub, 183 nəfər üzərində cərrahiyyə əməliyyat aparılıb. 212 nəfər daha geniş müayinə olunmaq və müalicə almaq üçün paytaxtın ixtisaslaşdırılmış tibb müəssisələrinə göndərilib.xeber100.com  

Qədim dövrə aid daş abidə aşkarlanıb

Cəlilabad rayonu ərazisində qədim dövrə aid daş abidə aşkarlanıb.Azərtac xəbər verir ki, rayonun Şatırlı kəndindəki eyniadlı meşəlikdə tapılan yazılı nümunə illərdir kimsənin diqqətini cəlb etməyib.Lakin tarixçi Elşad Əmənov sal daşın üzərindəki işarələri araşdırdıqda məlum olub ki, əslində, bu, adi daş deyil, tarixi eramızdan əvvələ aid olan yazılı nümunədir. Runik-Türk qrafikası ilə yazılmış daş abidə 14 hərf-işarədən ibarətdir. Tarixçinin sözlərinə görə, bu yazı növü 3800 il bundan əvvəl yaranıb və müxtəlif xalqlar öz mədəniyyətlərini gələcək nəsillərə ötürmək üçün uzun müddət məhz bu əlifbadan istifadə ediblər.Eramızdan əvvəl V əsrə aid olduğu güman edilən yazılı nümunədən bir neçə yüz metr kənarda qədim yaşayış məskəni mövcuddur. Ehtimal olunur ki, üzərində işarələr olan daş hər hansı tanınmış qəbilə başçısının qəbirüstü abidəsidir.Qeyd edək ki, daş üzərindəki işarələr səs düzülüşünə görə Mingəçevir abidləri ilə oxşarlıq təşkil edir. Bundan başqa, buradakı şərti işarələrə Şimali Qafqaz, Altay, Urmiya və Ön Asiyada da rast gəlinir.xeber100.com

Beynəlxalq Şahmat Festivalına start verilib

Naxçıvan şəhərindəki Şahmat Mərkəzində  “Naxçıvan-2017” Beynəlxalq Şahmat Festivalına start verilib.Azərtac xəbər verir ki, zəka sahibləri 3 qrupda mübarizə aparacaqlar. Belə ki, reqlamentə əsasən, beynəlxalq festivalda güclülərin (“A” qrupu), əmsalı az olanların (“B” qrupu) və uşaqların (“C” qrupu) yarışı keçiriləcək. Festivalın “A” qrupunda iştirak etmək üçün 47 şahmatçı müraciət edib. İsveçrə sistemi üzrə 9 turdan ibarət olacaq yarışda hər iştirakçıya 40 gediş üçün 90 dəqiqə, partiya başa çatana qədər hər şahmatçıya 30 dəqiqə və hər gediş üçün əlavə 30 saniyə vaxt ayrılır.“Naxçıvan-2017” Beynəlxalq Şahmat Festivalının ilk turu artıq yekunlaşıb və nəticələr məlum olub.xeber100.com

“Azərişıq” ASC-nin məlumatına görə…

“Azərişıq” ASC Aran regionunda yenidənqurma işlərini davam etdirir.“Azərişıq” ASC-dən Azərtac-a verilən məlumata görə, 2017-ci ilin 4 ayı ərzində Aran RETSİ (Regional Elektrik Təchizatı və Satış İdarəsi) elektrik şəbəkələrinin xidməti ərazisində 75,2 kilometr məsafədə 0,4 kilovoltluq hava xətləri və 4069 ədəd dayaq yenilənib. İtkilərin azaldılması məqsədilə 532 ədəd 10/0,4 kilovoltluq KTM-lərin (Komplekt Transformator Məntəqəsi) yüklənmələrində simmetrik paylanma icra olunub. Bundan başqa 0,4 kilovoltluq hava xətlərində 221,7 kilometr məsafədə təmir işləri aparılıb, 100,5 kilometr ÖİN (Özünüdaşıyan İzolyasiyalı Naqillər) kabel xətti çəkilib.Bütövlükdə Aran regionunda 5 ədəd 35 kilovoltluq yarımstansiya tikilərək yenidənqurmadan sonra istifadəyə verilib. Ağcabədi rayonunun Qiyamadınlı və Aşağı Avşar, Beyləqan rayonunun Sarı su kəndlərində, Ağdam rayonunun Quzanlı qəsəbəsinin Çadırlı ərazisində 0,4 kilovoltluq şəbəkələr ÖİN kabellərlə yenidən qurulub. Ağcabədi rayonunda 10 kilovoltluq hava xətti yenidən qurulub, 95,2 kilometr məsafədə əsaslı təmir işləri aparılıb, 412 ədəd yeni dayaq quraşdırılıb.“Elektrik Paylayıcı Şəbəkənin Yenidən Qurulması” üzrə İnvestisiya Proqramına əsasən İmişli rayonun Rəsullu, Şahverdili, Yalavac, Məhəmmədli, Göbəktala kəndlərində, Zərdab rayonunun Salahlı və Gəlmə kəndlərində 10 və 0,4 kilovoltluq şəbəkələrin yenidən qurulması işləri aparılır.xeber100.com

“Kitab bayramı” keçirilib

Mayın 2-də Cəlilabad rayonunda “Kitab bayramı” keçirilib. Tədbirdə ölkəmizdə nəşr olunmuş kitablarla yanaşı, qədim Misir sivilizasiyasını əks etdirən Firon eksponatları və Misirin turizm sektoruna dair yaddaş kitabçaları nümayiş olunub.Azərtac xəbər verir ki, tədbirdə bilik mənbəyi olan kitabın əhəmiyyətindən, ölkəmizdə kitabxana-informasiya sahəsinin inkişafına göstərilən dövlət qayğısından danışılıb, latın qrafikalı kitabların nəşri istiqamətində həyata keçirilən tədbirlərin əhali tərəfindən razılıqla qarşılandığı diqqətə çatdırılıb.xeber100.com

IV İslam Həmrəyliyi Oyunlarına həsr olunmuş sərgi açılıb

İsmayıllı şəhərində IV İslam Həmrəyliyi Oyunlarına həsr olunmuş rəsm sərgisi açılıb.İsmayıllı Regional Mədəniyyət və Turizm İdarəsindən Azərtac-a bildirilib ki, sərgidə məktəbli rəsm həvəskarlarının 10-dan çox əli işi nümayiş etdirilib. Rəsmlərdə uşaqlar IV İslam Həmrəyliyi Oyunlarına hədsiz maraqlarını ifadə etməyə çalışıblar.xeber100.com

Fövqəladə hallar naziri vətəndaşları qəbul edib

Fövqəladə hallar naziri K.Heydərov aprelin 28-də Qobustanda vətəndaşları qəbul edib.Azərtac xəbər verir ki, Qobustan Olimpiya İdman Kompleksində nazirliyin müvafiq struktur rəhbərlərinin, rayonların fövqəladə hallar komissiyaları sədrlərinin iştirakı ilə keçirilən qəbulda Qobustan, Şamaxı, Ağsu, İsmayıllı və Qəbələ rayonlarından gələn sakinlər iştirak ediblər. Müraciətlər əsasən işə qəbul, qəzalı vəziyyətdəki evlərin təmiri və digər məsələlərlə bağlı olub.Fövqəladə hallar naziri, nazir müavinləri və nazirliyin müvafiq struktur rəhbərləri tərəfindən qəbul edilən vətəndaşların müraciəti diqqətlə dinlənilib. Bu müraciətlərin bir çoxu yerindəcə həllini tapıb. Araşdırılması zəruri olan müraciətlərlə əlaqədar qanunvericiliyə müvafiq olaraq operativ tədbirlərin görülməsi üçün aidiyyəti strukturların rəhbərlərinə tapşırıqlar verilib.xeber100.com

İqtisadiyyat Nazirliyinin məlumatına əsasən…

İqtisadiyyat Nazirliyinin Sahibkarlığa Kömək Milli Fondu Tovuz rayonunda sahibkarlardan prioritet hesab olunan sahələr üzrə investisiya layihələrinin qəbuluna başlayır.İqtisadiyyat Nazirliyinin mətbuat xidmətindən Azərtac-a bildiriblər ki, layihələrdə iri fermer, müasir heyvandarlıq, cins heyvandarlıq, kartofçuluq (o cümlədən yüksək məhsuldar kartof toxumçuluğu), istixana və intensiv üzümçülük təsərrüfatlarının, eləcə də süd emalı və meyvəqurutma müəssisələrinin yaradılması məqsədəuyğun hesab edilib.Sahibkarlar investisiya layihələrinin maliyyələşdirilməsi məqsədilə müvəkkil kredit təşkilatları vasitəsilə Sahibkarlığa Kömək Milli Fonduna müraciət edə bilərlər.Qeyd edək ki, Sahibkarlığa Kömək Milli Fondu Tovuz rayonunun Düz Qırıqlı kəndində işgüzar forum keçirib.xeber100.com

Helikopterlərin yığılmasını həyata keçirən yeni müəssisə qurulacaq

Gəncədə kiçik tutumlu təyyarələrin və helikopterlərin yığılmasını həyata keçirən yeni müəssisə qurulacaq.Azərtac xəbər verir ki, bu fikirlər Avstriyanın ölkəmizdəki səfiri Aksel Vexin Gəncəyə səfəri zamanı şəhər icra hakimiyyətində gələcək əməkdaşlığın istiqamətləri ilə bağlı müzakirələrin gedişində səsləndirilib.Avstriya ilə iqtisadiyyatın bir sıra sahələrində əməkdaşlıq etməkdə maraqlı olduqlarını deyən Gəncə Şəhəri İcra Hakimiyyətinin başçısı Elmar Vəliyev bildirib ki, aparılan danışıqlardan sonra həmin ölkədən kiçik tutumlu təyyarə və helikopterlərin yığımını həyata keçirən müəssisənin yaradılmasına dair razılıq məktubu alınıb.Razılaşmaya əsasən, müəssisə Avstriya dövlətinin köməyi ilə Gəncə Beynəlxalq Hava Limanının yaxınlığındakı 30 hektar ərazidə qurulacaq. İlkin mərhələdə burada kiçik tutumlu təyyarələr yığılacaq və təmir ediləcək. İkinci mərhələdə isə helikopterlərin yığılmasına başlanılacaq.xeber100.com

Loqopedik və Psixoloji Mərkəzin filialı açılacaq

Şəmkirdə “Səlis danışıq” Loqopedik və Psixoloji Mərkəzin bölgə filialı açılacaq.Azərtac xəbər verir ki, bu münasibətlə keçirilən tədbirdə mərkəzin rəhbəri Xavər Abdullayeva Şəmkir filialının bir ay ərzində açılacağını bildirib. Qeyd olunub ki, mərkəzin bölgə filiallarını açmaqda məqsəd həm valideynlər, həm də fiziki qüsurlu uşaqların işini asanlaşdırmaqdan ibarətdir.Mərkəzin psixoloqu Zərifə Kərimli “Səlis danışığ”ın filiallarında çalışmaq üçün mütəxəssislərin hazırlandığını vurğulayıb.Şəmkir Rayon İcra Hakimiyyətinin nümayəndəsi Pərviz İbrahimov bu ideyanı dəstəkləyib və uşaqların sağlamlığı üçün əllərindən gələni edəcəklərini bildirib.Sonda mərkəzin rəhbəri X.Abdullayeva və psixoloqlar tədbirdə iştirak edən uşaqları müayinə edib, tövsiyələrini veriblər.xeber100.com