Vətəndaşların qəbulu keçiriləcək

Martın 17-də saat 11.00-dan Azərbaycan Respublikasının fövqəladə hallar naziri Kəmaləddin Heydərov tərəfindən Ağdaş şəhərində, Dövlət Yanğından Mühafizə Hissəsinin inzibati binasında vətəndaşların qəbulu keçiriləcək.Fövqəladə Hallar Nazirliyinin mətbuat xidmətindən Azərtac-a bildiriblər ki, qəbulda yalnız Mingəçevir və Naftalan şəhərlərinin, Ağdaş, Yevlax, Goranboy rayonlarının sakinləri, həmçinin həmin şəhər və rayonlarda məskunlaşmış məcburi köçkünlər iştirak edə bilərlər.Qəbulda yalnız Fövqəladə Hallar Nazirliyinin fəaliyyəti ilə bağlı müraciətlərə baxılacaq. Qəbula gələn vətəndaşların qeydiyyatı Ağdaş Rayon Dövlət Yanğından Mühafizə Hissəsinin inzibati binasında martın 16-da saat 9.00-da başlayacaq. Vətəndaşlar qəbula gələrkən şəxsiyyəti təsdiq edən sənəd təqdim etməlidirlər.xeber100.com

Ədliyyə Nazirliyinin məlumatı

Ədliyyə naziri Fikrət Məmmədov tərəfindən martın 16-da Beyləqan rayonunda vətəndaşların qəbulu keçiriləcək.Ədliyyə Nazirliyinin mətbuat xidmətindən Azərtac-a bildiriblər ki, Beyləqan rayonu Heydər Əliyev Mərkəzində keçiriləcək qəbulda Beyləqan, İmişli, Füzuli və Xocavənd rayonlarında yaşayan vətəndaşların ədliyyə fəaliyyəti ilə bağlı müraciətlərinə baxılacaq.xeber100.com

“İşıqlı Azərbaycan” layihəsində…

“Azərişıq” ASC ölkənin regionlarında, xüsusilə də cəbhə bölgələrində təxirəsalınmaz yenidənqurma, əsaslı təmir-tikinti və bərpa işlərini davam etdirir. “İşıqlı Azərbaycan” layihəsində önəmli və xüsusi yeri olan cəbhə bölgəsində işlər demək olar ki, ekstremal vəziyyətlərdə aparılır. Buna görə də “Azərişıq” ASC cəbhə bölgəsində gücləndirilmiş iş rejimində işləyir.ASC-dən Azərtac-a bildirilib ki, Goranboyun Tapqaraqoyunlu və digər kəndlərində aprel döyüşlərində zədələnən xətlər tam bərpa edilib. Düşmənlə təmas xəttində yerləşən Tapqaraqoyunlu kəndi ərazisində elektrik enerjisinin verilişinin fasiləsiz təşkili məqsədi ilə həmin kəndi qidalandıran 10 kilovolt (kV) Əzizbəyov hava xətlərində 830 ədəd 6 kV izolyator yeni 10 kV izolyatorla dəyişdirilib. 10 kV II subartezian hava xəttində isə 16 ədəd yararsız ağac dayaq dəmir-beton dayaqlarla əvəzlənib. Aprel döyüşləri zamanı 0.4 kV şəbəkədə zədələnmiş naqillər dəyişdirilib, 9 ədəd 10/0.4 komplekt transformator məntəqəsində (KTM) təmir işləri aparılıb.Əhalinin keyfiyyətli və fasiləsiz elektrik enerjisi ilə təmin etmək məqsədilə Füzuli rayonundakı 10 yarımstansiyada, 728 kilometr transformator məntəqəsində (KTM) profilaktik tədbirlər görülüb.xeber100.com

Fənn olimpiadalarının ikinci seçim mərhələsi təşkil olunub

Təhsil Nazirliyi tərəfindən martın 11-də Mingəçevir şəhərində bölgənin orta məktəb şagirdlərinin iştirakı ilə respublika fənn olimpiadalarının ikinci seçim mərhələsi təşkil olunub.Azərtac xəbər verir ki, Mingəçevir şəhər 10 və 15 nömrəli tam orta məktəblərdə keçirilən yarımfinal mərhələsində 6 şəhər və rayon üzrə 9, 10 və 11-ci sinif şagirdləri 8 fənn üzrə (riyaziyyat, fizika, kimya, biologiya, informatika, tarix, coğrafiya, Azərbaycan dili və ədəbiyyat) biliklərini nümayiş etdirib.Təhsil Nazirliyinin əməkdaşı Fuad Qarayev bildirib ki, hazırda Azərbaycanın 12 bölgəsində 6 min şagirdin iştirakı ilə fənn olimpiadalarının yarımfinal mərhələsi keçirilir: “Olimpiadaların birinci rayon (şəhər) mərhələsi bu ilin yanvarında ölkə üzrə 30 minə yaxın şagirdin iştirakı ilə reallaşıb. İkinci turun nəticələrinə əsasən aprel ayında respublika fənn olimpiadalarının final mərhələsi keçiriləcək. Yarımfinalda hər fənn üzrə yüksək nəticə göstərən ən yaxşı 60 şagird, yəni 480 şagird olimpiadaların final mərhələsində iştirak etmək hüququ qazanacaq”.xeber100.com

Kütləvi tibbi müayinə aksiyası davam edir

Əhalinin tibbi müayinədən keçirilməsi aksiyası Oğuz rayonunda da davam edir. Fevralın 15-də başlanan aksiya çərçivəsində bu günədək 9406 nəfər rayon sakini tibbi müayinədən keçib.Bu barədə Azərtac-a Oğuz Rayon Mərkəzi Xəstəxanasının baş həkimi A.Əzizov məlumat verib.Baş həkimin bildirdiyinə görə, Oğuz rayonu üzrə 18 yaşdan yuxarı 31 min 471 nəfər vətəndaşın tibbi müayinələrə cəlb olunması nəzərdə tutulub. Müayinələrin keçirildiyi mərkəzi xəstəxananın kollektivi bu məsul aksiyaya çox ciddi hazırlaşıblar. Müayinələr zamanı ultrasəs, rentgen və digər tibbi aparatlardan geniş istifadə olunur. Xəstəxananın laboratoriyasında müxtəlif qan analizlərinin aparılması üçün müasir tələblərə cavab verən zəruri tibbi avadanlıq var. Xəstəxanalara gəlmək imkanı olmayan sakinləri evlərində müayinə etmək üçün səyyar həkim briqadası da yaradılıb. Müayinələr zamanı xəstəliklər aşkar edildikdə, onlar müalicəyə cəlb olunurlar.xeber100.com  

Əhalinin pulsuz tibbi müayinəsi davam edir

Ölkəmizin hər yerində olduğu kimi, Göyçayda da həyata keçirilən əhalinin kütləvi pulsuz tibbi müayinəsi uğurla davam etdirilir. Rayon mərkəzi xəstəxanasında insanların müayinəsi üçün bütün imkanlar yaradılıb, rentgen, ultrasəs, laborator və digər müayinələr aparılır. Xəstəxananın baş həkiminin müavini L.Hacıyeva Azərtac-a bildirib ki, aksiya çərçivəsində peşəkar həkimlərdən ibarət 6 briqada yaradılıb və onlar kəndlərə ezam olunaraq insanların müayinəsini həyata keçirirlər.xeber100.com

Maarifləndirici konfrans keçirilib

İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətinin təşkilatçılığı ilə martın 3-də Qobustanda "Hər bir istehlakçı öz hüquqlarını bilməli və tələb etməlidir" mövzusunda maarifləndirici konfrans keçirilib.İqtisadiyyat Nazirliyinin mətbuat xidmətindən Azərtac-a bildiriblər ki, aidiyyəti dövlət orqanlarının, sahibkarların, ictimai təşkilatların və ictimaiyyət nümayəndələrinin iştirak etdiyi konfransda istehlakçıların hüquqlarının qorunması sahəsində mövcud qanunvericilik, istehlakçıların bilməli olduğu vacib məsələlər, Dövlət Xidməti tərəfindən həyata keçirilən tədbirlər barədə məlumat verilib.Dövlət Xidmətinin əməkdaşları istehlakçı hüquqlarının müxtəlif aspektləri ilə bağlı məruzələrlə çıxış edib, xidmət qaydalarının tələblərinə əməl olunması və xidmət mədəniyyətinin yüksəldilməsi istiqamətində həyata keçirilən tədbirlər, istehlakçıların ərzaq malları alarkən diqqət yetirməli olduğu məsələlər, ictimai-iaşə və xidmət müəssisələrinin vəzifələri, inzibati məsuliyyət tədbirlərindən danışıblar. Sonda tədbir iştirakçılarına istehlakçı hüquqlarına dair maarifləndirici materiallar paylanıb.xeber100.com

Dövlət Gömrük Komitəsinin sədri vətəndaşları qəbul edib

Mərkəzi icra hakimiyyəti orqanlarının rəhbərləri bölgələrdə vətəndaşların qəbulu davam edir. Azərtac xəbər verir ki, martın 2-də Dövlət Gömrük Komitəsinin sədri Aydın Əliyev Ağstafa şəhərində vətəndaşları qəbul edib.Qəbulda bölgədə yerləşən Ağstafa, Tovuz, Qazax və Gədəbəy rayonlarının sakinlərinin müraciətləri dinlənilib. Vətəndaşların müraciətləri əsasən gömrük orqanlarında işə qəbul, malların idxal və ixracı, bununla əlaqədar sənədləşmə qaydaları və digər gömrük məsələləri ilə bağlı olub.xeber100.com

Pulsuz tibbi müayinə çərçivəsində…

Əhalinin kütləvi pulsuz tibbi müayinəsi çərçivəsində fevralın 15-dən etibarən Beyləqan rayonunda 9 min 600 nəfərə yaxın sakin müayinə olunub.Beyləqan Rayon Mərkəzi Xəstəxanasının baş həkimi Əli Məmmədov Azərtac-a bildirib ki, müayinələr zamanı xəstəlik aşkar olunan 178 nəfər ambulator, 16 nəfər isə stasionar müalicəyə cəlb olunub, 2 nəfər Bakı şəhərinə göndərilib. Sakinlər rayon mərkəzi xəstəxanasında, Birinci Şahsevən, Təzəkənd və Dünyamalılar kənd sahə xəstəxanalarında müayinə edilirlər.Bundan başqa, yüksəkixtisaslı mütəxəssislərdən ibarət həkim briqadaları tərəfindən rayonun kəndlərində də əhalinin tibbi müayinəsi aparılır. Ümumilikdə, tibbi müayinədən 66 min 800 nəfərin keçməsi nəzərdə tutulub.xeber100.com

Yaponiya Hökumətinin maliyyə dəstəyi ilə…

Fevralın 27-də Yaponiya Hökumətinin maliyyə dəstəyi ilə “Ağsu rayonunun Gəşəd kəndində su təchizatı sisteminin tikintisi”, “Şamaxı rayonunun Quşçu kəndində su təchizatı sistemini tikintisi” və “Lənkəran rayonunun Günəhir kəndində su təchizatı sistemini tikintisi” layihəsi üzrə qrant müqavilələrinin imzalanma mərasimi keçirilib.Azərtac xəbər verir ki, adları qeyd olunan layihələr üzrə qrant müqaviləsini Yaponiyanın Azərbaycan Respublikasındakı fövqəladə və səlahiyyətli səfiri Tsuquo Takahaşi və “Ağsu rayonunun Gəşəd kəndində su təchizatı sisteminin tikintisi” layihəsi üçün “Vətəndaşların Əmək Hüquqlarının Müdafiəsi Liqası” təşkilatının icraçı direktoru Sahib Məmmədov, “Şamaxı rayonunun Quşçu kəndində su təchizatı sistemini tikintisi” layihəsi üçün “Azərbaycan Gənclərinin Hüquqlarını Müdafiə Mərkəzi” təşkilatın icraçı direktoru Elçin Salmanov, “Lənkəran rayonunun Günəhir kəndində su təchizatı sistemini tikintisi” layihəsi üçün isə “Qlobal-Humanitar Təşkilatı” İctimai Birliyin direktoru İlham Tahirli imzalayıb.Layihələrin əsas məqsədi üç rayonda su təchizatı sisteminin tikilməsi ilə yeri sakinlərin su ehtiyacını ödəməkdir. Ağsu rayonunda olan layihənin ümumi məbləği 82,747 ABŞ dolları, Şamaxıda olan layihənin ümumi məbləği 82,930 ABŞ dolları, Lənkəranda olan layihənin ümumi məbləği isə 83,213 ABŞ dolları təşkil edir.xeber100.com