Milli Mətbuat Günü qeyd olunub

Qubada 22 İyul - Milli Mətbuat Günü və rayonda nəşr olunan “Şəfəq” qəzetinin 95 illik yubileyi qeyd olunub. Azərtac xəbər verir ki, Yeni Azərbaycan Partiyasının Quba rayon təşkilatının inzibati binasında keçirilən mərasimdə yerli icra hakimiyyətinin rəhbər şəxsləri, “Şəfəq” qəzetinin kollektivi, regiondakı mətbuat və media qurumlarının əməkdaşları və rayon ictimaiyyətinin nümayəndələri iştirak ediblər. Tədbirdə çıxış edən Milli Məclisin deputatı Yevda Abramov Azərbaycan Prezidentinin qayğısı sayəsində milli mətbuatımızın sürətlə inkişaf etdiyini bildirib. Qeyd olunub ki, dövrün nəbzini tutmağı bacaran, əsil həqiqətləri dünya ictimaiyyətinə dolğun şəkildə çatdıran jurnalist kadrlar yetişib. Azərbaycan mətbuatının bir parçası olan “Şəfəq” qəzeti də rayonun sosial-iqtisadi və mədəni həyatında baş verən bütün yenilikləri, aparılan islahatları, görülən quruculuq işlərini oxuculara çatdırır. Mərasimdə bildirilib ki, 141 il əvvəl əsası Həsən bəy Zərdabi tərəfindən qoyulan Azərbaycan mətbuatı ötən hər ildə yeni-yeni keyfiyyət göstəriciləri əldə edib. Bu isə özünü bölgə nəşrlərinin timsalında da göstərir. Diqqətə çatdırılıb ki, 1921-ci ilin aprel ayından müxtəlif adlarla nəşr olunan “Şəfəq” qəzeti özünəməxsus dəst-xətti ilə seçilib. Yaradıcı kollektiv hadisə və proseslərə daim peşəkar yanaşma tərzi nümayiş etdirib. Fərəhləndirici haldır ki, bu illər ərzində qəzetin 8300-ə yaxın nömrəsi çapdan çıxıb. Qəzetin belə şərəfli yol keçməsində müxtəlif illərdə onun redaktorları olan Hüseynağa Məmmədbəyli, Qafar Rəcəbli, Nağı Cəfərov, Hüseynqulu Kazımlı, Mövlud Qonaqov, Əlihadı Kərimov, Camal Balayev, Mahmud Ağalarov, Məmmədpaşa Mirzəyev, Nadir Xəlilov və Elmira Aşurovanın xidmətləri əvəzsizdir. Tədbir çərçivəsində regionda çalışan bir sıra jurnalistlər Milli Mətbuat Günü münasibətilə Yeni Azərbaycan Partiyası Quba rayon təşkilatının fəxri fərmanları ilə təltif olunublar.xeber100.com

İyul 22, 2016 3:05

III Beynəlxalq şirniyyat festivalının açılış mərasimi olacaq

Festivallar şəhəri kimi tanınan qədim Şəki bu gün, iyulun 20-də yenidən öz qapılarını beynəlxalq festival iştirakçılarının üzünə açır. Azərtac xəbər verir ki, axşam saatlarında XVIII əsrə aid qədim tarixi-memarlıq abidəsi “Yuxarı Karvansaray” mehmanxana kompleksinin həyətində III Beynəlxalq ənənəvi şirniyyat festivalının təntənəli açılış mərasimi olacaq. Mədəniyyət və Turizm Nazirliyi, Şəki Şəhər İcra Hakimiyyəti, Azərbaycan Milli Kulinariya Mərkəzi və Azərbaycan Milli Kulinariya Assosiasiyasının birgə təşkilatçılığı ilə keçirilən festivalda respublikamızın 20 şəhər və rayonunun, həmçinin 10 ölkənin, o cümlədən Türkiyə, İndoneziya, Fransa, Hindistan, Yunanıstan, Rusiya Federasiyasının Çuvaşıya Respublikası, Özbəkistan, İran, Ukrayna və Qananın şirniyyatçıları iştirak edirlər. TÜRKSOY tərəfindən Şəki şəhərinin 2016-cı il üçün “Türk dünyasının mədəniyyət paytaxtı” elan edilməsi ilə əlaqədar builki festivalın iştirakçıları arasında türkdilli ölkələrdən gəlmiş qənnadıçılar da var. “Yuxarı Karvansaray” kompleksinin həyətində təşkil edilən sərgilərdə şirniyyatçılar əvvəlcədən hazırladıqları qənnadı məhsullarını nümayiş etdirəcəklər. Festival iştirakçılarının təqdim etdikləri şirniyyat nümunələri münsiflər heyəti tərəfindən qiymətləndiriləcək və fərqlənən şirniyyatçılar mükafatlandırılacaq.xeber100.com

İyul 20, 2016 12:02

“Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri”…

Azərbaycan Respublikası Prezidentinin İqtisadi İslahatlar üzrə Köməkçisi Xidməti və İqtisadi İslahatların Təhlili və Kommunikasiya Mərkəzi birlikdə "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri"nin ictimai müzakirələrini bölgələrdə davam etdirirlər. İqtisadi İslahatların Təhlili və Kommunikasiya Mərkəzindən Azərtac-a bildiriblər ki, bu silsilədən növbəti tədbir Qəbələ şəhərində Qəbələ, Şəki, Qax, Balakən və Zaqatala rayonlarının ictimaiyyət nümayəndələrinin iştirakı ilə keçirilib. Tədbirdə Azərbaycan Respublikası Prezidentinin İqtisadi İslahatlar üzrə Köməkçisi Xidmətinin sektor müdiri Elxan Mikayılov, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı, maliyyə nazirinin birinci müavini İlqar Fətizadə və Azərbaycan Dövlət İqtisad Universitetinin rektoru Ədalət Muradov məruzə ediblər. Məruzəçilər həm "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri" sənədi barədə, həm də ölkədə aparılan davamlı və sistemli islahatlar haqqında məlumat veriblər. İctimaiyyət nümayəndələri çıxış edərək "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri" sənədinə dair təkliflərini səsləndiriblər. Qeyd edək ki, "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri" sənədinin müzakirəsi respublikamızın əksər bölgələrini əhatə edib.xeber100.com

İyul 17, 2016 10:50