İkitərəfli strateji tərəfdaşlığın inkişaf perspektivləri müzakirə olunub

Qazaxıstan Prezidenti Kasım-Jomart Tokayevin mayın 10-11-də Türkiyəyə dövlət səfəri planlaşdırılır.Bu barədə Qazaxıstan dövlət başçısının mətbuat xidməti Prezidentin Türkiyə lideri Rəcəb Tayyib Ərdoğanla telefon danışığından sonra məlumat yayıb.Prezident Rəcəb Tayyib Ərdoğan Qazaxıstanın dövlət başçısının Türkiyəyə planlaşdırılan səfərinin ölkələr arasında hərtərəfli strateji tərəfdaşlığın genişləndirilməsində mühüm mərhələ olacağını bildirib.Prezidentlər, həmçinin ticarət-iqtisadi, investisiya, mədəni-humanitar əməkdaşlığın daha da gücləndirilməsinin əhəmiyyətini vurğulayaraq, ikitərəfli strateji tərəfdaşlığın inkişaf perspektivlərini müzakirə ediblər.xeber100.com

“Mercedes-Benz” şirkəti Misirdə elektromobil istehsalını həyata keçirəcək

“Mercedes-Benz” şirkəti yaxın gələcəkdə Misirdə elektromobil istehsalını həyata keçirəcək. Bu məsələ alman şirkətinin icraçı direktoru Gerd Bitterlix ilə Misirin ticarət və sənaye naziri Nevin Cameanın görüşündə əsas müzakirə mövzusu olub.“Mercedes-Benz”in icraçı direktoru Misirdə məşhur avtomobil brendinin “GLE” və “GLS klass” modellərinin istehsal edildiyi və Süveyş Kanalı Azad İqtisadi Zonasında 20 min kvadratmetr sahəsi olan logistika mərkəzinin açıldığı barədə məlumat verib.O əlavə edib ki, “Nasr” avtomobil şirkəti “Mercedes-Benz”in əsas tərəfdaşıdır və tezliklə elektromobillərin satışına başlanılacaq. Eyni zamanda, 2023-cü ildə elektrik mühərriki ilə işləyən maşınların istehsalı üzrə birgə müəssisə də yaradılacaq və onun məhsulları Yaxın Şərq və Afrika ölkələrinə ixrac ediləcək.Hazırda “Mercedes-Benz”in elektromobillərin satışı üzrə Misirin Qahirə, Giza, İsgəndəriyyə və Hurqada şəhərlərini əhatə edən şəbəkəsi yaradılır.xeber100.com

Hərbi əməliyyatlar ispanların alıcılıq qabiliyyətinə birbaşa təsir edib

Ukraynadakı hərbi əməliyyatlar ispanların alıcılıq qabiliyyətinə birbaşa təsir edib.Milli Statistika İnstitutunun (INE) məlumatına görə, aprel ayında İspaniyada istehlak qiymətləri indeksi (İQİ) ötən ilin müvafiq ayı ilə müqayisədə 8,4 faiz təşkil edib. İnflyasiya təkcə elektrik enerjisi və benzinlə bağlı fakturalara toxunmayıb. Son aylarda kənd təsərrüfatı xammalının, yəni buğdanın və qarğıdalının da qiymətləri artıb.Ukrayna buğda, qarğıdalı, günəbaxan, un və günəbaxan yağında dünyanın aparıcı ixracatçılarından biridir.İspaniyanın Kənd Təsərrüfatı, Balıqçılıq və Ərzaq Nazirliyinin məlumatına görə, ölkə Ukraynadan ildə təxminən 2,7 milyon ton qarğıdalı və 500 min tona yaxın günəbaxan yağı idxal edir.xeber100.com

Türkiyənin Milli Müdafiə Nazirliyinin məlumatına görə…

Türkiyənin milli müdafiə naziri Hulusi Akar ilə Rusiyanın müdafiə naziri Sergey Şoyqu arasında telefon danışığı olub.Bununla bağlı Türkiyənin Milli Müdafiə Nazirliyi məlumat yayıb. Məlumata əsasən, danışıq zamanı Rusiya ilə Ukrayna arasındakı böhran müzakirə olunub. Nazir Akar humanitar vəziyyətin yaxşılaşdırılması, bölgədə sülh və sabitliyin bərpası üçün dərhal atəşkəsin vacibliyini qeyd edib. Başda Mariupol şəhəri olmaqla, dinc əhalinin quru və dəniz yolu vasitəsilə təhlükəsiz şəkildə təxliyəsinin vacibliyi vurğulanıb.Hulusi Akar humanitar yardımların göstərilməsinə hər cür dəstək verməyə çalışan Türkiyənin daha əvvəl də olduğu kimi, bölgədə sülhün təmin olunması üçün üzərinə düşən vəzifəni yerinə yetirməyə davam edəcəyini bildirib.xeber100.com

Avropa İttifaqı gömrük rüsumlarını bir illik dayandıra bilər

Avropa İttifaqı (Aİ) Ukraynadan idxal edilən bütün məhsullara tətbiq olunan gömrük rüsumlarını 1 il müddətinə ləğv etməyə hazırlaşır.Ukraynaya dəstək üçün bu təklif Avropa Komissiyası tərəfindən açıqlanıb. Belə ki, Ukraynanın polad ixracına tətbiq edilən antidempinq və digər qaydaların dayandırılacağı, bunun çətin vəziyyətdə olan ukraynalı istehsalçı və ixracatçılara dəstək olacağı qeyd edilib. Sözügedən rüsumların dayandırılması təşəbbüsünün misli görünməmiş bir xoşməramlılıq nümunəsi olduğu bildirilib.Təklifin qüvvəyə minməsi üçün o, həmçinin Avropa Parlamenti (AP) və Aİ-yə üzv dövlətlər tərəfindən də təsdiqlənməlidir.xeber100.com

“Microsoft korporasiyasının gəliri ötən ilin eyni dövrü ilə müqayisədə artıb

ABŞ-ın “Microsoft korporasiyasının ötən rübdə gəliri ötən ilin eyni dövrü ilə müqayisədə 18 faiz artaraq 49,36 milyard dollara çatıb.Bu barədə qurumun saytında məlumat verilib.Martın 31-də başa çatan üç aylıq dövr ərzində şirkətin xalis gəliri illik müqayisədə 8 faiz artaraq 16,72 milyard dollara çatıb. “Microsoft”un qeyd olunan dövrdə əməliyyat mənfəəti 2021-ci ilin eyni dövrü ilə müqayisədə 19 faiz artaraq 20,36 milyard dollar təşkil edib. CNBC televiziya şirkətinin məlumatına görə, şirkətin maliyyə göstəriciləri qurumun mənfəətinin 49,05 milyard dollardan çox olmayacağını proqnozlaşdıran ekspertlərin gözləntilərini üstələyib.1975-ci ildə sahibkarlar Bill Qeyts və Pol Allen tərəfindən qurulan “Microsoft", kompüterlərdən tutmuş mobil telefonlara qədər müxtəlif cihazlar üçün proqram təminatı istehsal edən ən böyük korporasiyalardan biridir.xeber100.com

Ukraynanı tərk edən qaçqınların sayı 5,2 milyona yaxınlaşıb

Müharibənin başlanğıcından bəri Ukraynanı tərk edən qaçqınların sayı 5,2 milyona yaxınlaşıb.Bu barədə BMT-nin qaçqınların işləri üzrə Ali komissarının idarəsi məlumat yayıb. Aprelin 23-nə olan məlumata görə, Ukraynanı 5 milyon 186 min 744 nəfər tərk edib. Mart ayında ölkədən 3,4 milyon nəfər, apreldə isə bundan təxminən üç dəfə az – 1 milyon 151 min nəfər çıxıb.Ukraynalıların əksəriyyəti Polşaya gedib. Hazırda bu ölkədə 2,6 milyon nəfər qaçqın yerləşib. Rumıniyaya 774 min 94, Moldovaya 433 min 214, Slovakiyaya 354 min 329 qaçqın gəlib. Rusiyadakı ukraynalı qaçqınların sayı isə 578 min 255 nəfərə çatıb.

Kiyev şəhərində komendant saatının vaxtı qısaldılıb

Kiyev şəhərində komendant saatının vaxtı qısaldılıb.Bu barədə Kiyev şəhər meri Vitali Kliçko Telegram kanalında məlumat verib. Onun sözlərinə görə, aprelin 17-dən paytaxt Kiyevdə və Kiyev vilayətində komendant saatı 22:00-dan 05:00-dək tətbiq ediləcək.Qeyd edək ki, bundan öncə Kiyev şəhərində komendant saatı 21:00 dan 06:00-a qədər tətbiq olunurdu.xeber100.com  

Aprelin 17-də İndoneziya sahillərində 5,3 bal gücündə zəlzələ baş verib

Aprelin 17-də İndoneziya sahillərində 5,3 bal gücündə zəlzələ baş verib.Bu barədə ABŞ Geoloji Xidməti məlumat yayıb.Yeraltı təkanların episentrinin ölkənin Nabire şəhərindən 273 kilometr şimal-şərqdə, ocağının 10 kilometr dərinlikdə yerləşdiyi qeyd edilib.Dağıntılar və zərərçəkənlər barədə məlumat verilmir, sunami xəbərdarlığı elan olunmayıb.xeber100.com

İtaliyanın Xarici İşlər və Beynəlxalq Əməkdaşlıq Nazirliyi məlumatı

İtaliyanın Ukraynadakı səfirliyi yenidən paytaxt Kiyevə köçüb.Bu barədə İtaliyanın Xarici İşlər və Beynəlxalq Əməkdaşlıq Nazirliyi məlumat yayıb.“Səfirliyin kollektivi Ukrayna institutlarına yaxın olmaq, İtaliya vətəndaşlarına kömək etmək, sülhü təşviq edən həll yolları dəstəkləmək və dialoqa dəstəyini artırmaq üçün yenidən paytaxt Kiyevə qayıdıb”, - deyə nazirliyin açıqlamasında bildirilib.Xatırladaq ki, İtaliya Ukraynadakı səfirliyini martın 1-də Kiyevdən Lvova köçürmüşdü.xeber100.com