265 metr hündürlüyündə minarəsi olan məscid inşa olunacaq

2017-ci ildə Əlcəzairdə 265 metr hündürlüyündə minarəsi olan Cama Əl-Cəzair məscidi inşa olunacaq. AZƏRTAC "The Guardian"a istinadən bildirir ki, məsciddə 120 min insan eyni vaxtda ibadət edə biləcək. Məscidin içində Quranın tədrisi ilə məşğul olan məktəblər, İslam incəsənəti və tarixi muzeyi, milyonlarla kitabın olduğu kitabxana nəzərdə tutulub. Məscidin tikintisi 1,4 milyard dollara başa gələcək. Hazırda dünyanın ən hündür minarəli məscidi Mərakeşin Kasablanka şəhərindədir. Minarənin hündürlüyü 210 metrdir.

Əmək Partiyasının qurultayı keçiriləcək

Şimali Koreyada bu gün son 36 ildə ilk dəfə Əmək Partiyasının qurultayı keçiriləcək. Apa-nın xarici mətbuata istinadən verdiyi xəbərə görə, bu hakim Əmək Partiyasının sayca VII qurultayıdır. Qurultayda KXDR-in gələcək illər üçün vəzifələr və prioritetlər müəyyən ediləcək. Qeyd edək ki, Şimali Koreyanın lideri Kim Çen In Əmək Partiyasının qurultayınadək ölkədə toy və yas mərasimlərinə qadağa qoyub. “Bu addım təhlükəsizliyin möhkəmləndirilməsi və qurultayın nümunəvi şəkildə keçirilməsinə yönəlib”, rəsmi mənbələr bildirib. Qeyd olunur ki, paytaxt Pxenyan şəhərinə bütün giriş və çıxışlar bağlanacaq. Qeyd edək ki, sonuncu dəfə partiyanın qurultayı 1980-ci ildə keçirilib. Qurultayda 1978-1984-cü illəri əhatə etmiş 7 illik dövlət planı qəbul olunub. Şimali Koreyada Əmək Partiyasından başqa Sosial-Demokratik Partiya və “Çxondoqe-Çxonudan Yolunun Gənc Dostları” partiyası fəaliyyət göstərir. Hər iki partiya Əmək Partiyasının nəzarəti altında fəaliyyət göstərir.xeber100.com  

“Kalaşnikov” markası ilə paltar və aksessuarların təqdimatı keçiriləcək

Rusiyanın ən iri atıcı silah istehsalçısı olan “Kalaşnikov” konserni paltar və aksessuarlar istehsalı xəttini yaxın zamanda işə salmaq niyyətindədir. Apa-nın “RİA Novosti”yə istinadən verdiyi xəbərə görə, bu barədə şirkətin marketinq üzrə direktoru Vladimir Dmitriyev bildirib. Məlumata görə, cari ilin sonunadək Rusiyanın müxtəlif şəhərlərində şirkətin 60-dək firma mağazası fəaliyyətə başlayacaq. Bu mağazalarda alıcılara ənənəvi silah məhsulları ilə yanaşı “Kalaşnikov” markası ilə “feşn” mallar təqdim olunacaq.  “Kalaşnikov” markası ilə paltar və aksessuarların təqdimatı sentyabrda Kubinkada keçiriləcək “Ordu-2016” forumunda keçiriləcək. Qeyd edək ki, tank və digər zirehli texnika istehsalçısı olan  “Uralvaqonzavod” konserninin 2014-cü ildə fəaliyyətə başlayan firma mağazasında “militari” üslubunda futbolkalar, idman çantaları, jiletlər, çəkmələr və şirkətin digər  suvenir məhsulları təqdim olunub.  

Baş nazirin istefa verməsi ABŞ-Türkiyə əməkdaşlığına təsir etməyəcək

Türkiyənin baş naziri Əhməd Davudoğlunun istefa verməsi ABŞ-Türkiyə əməkdaşlığına təsir etməyəcək. Apa-nın “TASS”a istinadən verdiyi xəbərə görə, bunu Ağ Evin mətbuat katibi Coş Ernest deyib.  “Baş nazir ABŞ-ın yaxşı tərəfdaşı olub, biz ona liderliyinə görə minnətdarıq. Düşünmürəm ki, bu bizim  Türkiyə ilə birgə fəaliyyətimizə, İŞİD-in zəifləndirilməsi və məhv edilməsi üzrə strategiyamıza  hansısa şəkildə təsir edəcək” , -  deyə o qeyd edib.  Ernestin  sözlərinə görə, Ankara Suriya ilə sərhədin qorunmasına yönəlmiş bir sıra mühüm addımlar atıb. “Onlar əcnəbi silahlıların axınını azaldaraq üçün mühüm irəliləyişə nail olublar.  Qeyd edək ki, Türkiyənin hakim Ədalət və İnkişaf Partiyası mayın sonunda yeni rəhbərliyin seçilməsinə həsr olunmuş növbədənkənar iclas keçirəcək.  Davudoğlu partiya rəhbəri postuna öz namizədliyini irəli sürməyəcəyini bildirib. Türkiyədə ənənəvi olaraq hakim Ədalət və İnkişaf Partiyasının rəhbəri baş nazir postuna təyin olunur.xeber100.com  

Ədalət və İnkişaf Partiyasının növbədənkənar qurultayı keçiriləcək

Mayın 22-də Türkiyənin hakim Ədalət və İnkişaf Partiyasının (AKP) növbədənkənar qurultayı keçiriləcək.Bu barədə partiyanın baş qərargahında keçirilən AKP-nin Mərkəzi İcra Orqanının iclasından sonra partiyanın sədri, Türkiyənin Baş naziri Əhməd Davudoğlu məlumat verib. Qurultay təşkilati məsələyə baxacaq.

Antiterror əməliyyatlar davam etdirilir

Türkiyə Silahlı Qüvvələrinin qırıcıları ölkənin Şırnak və Haqqari bölgəsində PKK terrorçularının düşərgələrini dəqiq hədəflərlə bombalayıb. Bundan başqa, Kliç bölgəsindən İŞID terrorçu qruplaşmasının Suriya ərazisindəki hədəfləri top mərmiləri ilə vurulub. Üç nəfər İŞID mənsubunun öldürüldüyü bildirilir. Qeyd edək ki, son günlər İŞID terrorçuları dəfələrlə Suriya ərazisindən Türkiyənin Kliç bölgəsindəki yaşayış məntəqələrinə raketlərdən atəş açıblar. Dinc əhali arasında ölən və yaralananlar olub. Yaşayış binalarına və iaşə obyektlərinə zərər dəyib. Mayın 4-də səhər saatlarında da İŞID tərəfindən Kliçə raket zərbələri endirilib. Türkiyə Silahlı Qüvvələri Baş Qərargahının məlumatına görə, mayın 4-də gecə saatlarında PKK tərəfdarları Türkiyənin Mardin-Derik rayonunda daha bir ağır terror aktı törədiblər. Bomba yüklü avtomobilin partladılması nəticəsində bir hərbçi həlak olub, dördü yaralanıb. Bölgədə antiterror əməliyyatları davam etdirilir.xeber100.com  

“Süddeutsche Zeitung” qəzeti yazır…

Avropa Komissiyasının rəhbərliyində ABŞ və Avropa İttifaqı (Aİ) arasında Transatlantik Ticarət və İnvestisiya Tərəfdaşlığı (TTİP) haqqında müqavilənin yaxın gələcəkdə ümumiyyətlə imzalanacağına ciddi şübhələr var. “Süddeutsche Zeitung” qəzeti yazır ki, Aİ-nin yüksək rütbəli nümayəndəsində istinadla bildirilib ki, sazişin artıq 2016-ci ildə imzalanmasını təmin etmək üçün ABŞ çox az səy göstərir.Aİ nümayəndəsinin sözlərinə görə, ABŞ, Almaniya və Fransada seçkilər ilə əlaqədar yaranan fasilə 2017-ci ilin sonuna qədər uzana bilər, o zaman azad ticarət zonasına dair danışıqlara qayıtmaq çətin olacaq. Qəzetin qeyd etdiyi kimi, avropalılar müqavilənin mətni haqqında məlumatın sızmasına ABŞ-ın reaksiyasından da ehtiyatlanırlar. Belə ki, amerikalılar həmişə danışıqların ciddi məxfiliyinin tərəfdarı olublar.“Greenpeace” ekoloji təşkilatı dünən TTIP üzrə aparılan danışıqlar barədə əlinə keçən sənədləri yayıb. ABŞ hökuməti bu sızmaya nümayişkaranə surətdə laqeyd qalıb. ABŞ Prezidentinin rəsmi nümayəndəsi Coş Ernest bildirib ki, Amerika rəsmiləri bu faktdan bir o qədər xüsusi narahatlıq keçirmirlər.xeber100.com

Fransız mədəniyyətinə həsr olunmuş sərgi açılıb

Kubanın paytaxtı Havanada dünya şöhrətli modelyer və fotoqraf Karl Laqerfeldin “Work in Progress” və ya Kuba dilində “Obra en Proceso” adlı fotosərgisi açılıb. buro247.az  xəbər verir ki, mayın 12-dək davam edəcək sərgi Kubada fransız mədəniyyəti ayına həsr olunub. Sərginin ekspozisiyasında moda, memarlıq, peyzaj kimi müxtəlif mövzularda 200-dək sənət əsəri yer alıb. İyun ayında isə Florensiyada keçiriləcək “Pitti Uomo” layihəsi çərçivəsində Karl Laqerfeldin “Visions of Fashion” adlı retrospektiv sərgisi açılacaq.xeber100.com  

“Gazeta.ru”nun verdiyi xəbərə görə…

Britaniyanın “Sky News” telekanalı Suriya hakimiyyətinin İŞİD terror qruplaşmasını  dəstəkləməsi barədə məlumatların əks olunduğu məxfi sənədlərin əldə etdiyini bildirib.  "Gazeta.ru”nun verdiyi xəbərə görə, sənədlərdə qeyd olunur ki, Palmira şəhərinin azad edilməsi İŞİD və Suriya hakimiyyəti arasında əldə olunan bir neçə razılaşma əsasında  həyata keçirilib. Razılaşmalar arasında neftin gübrələrə dəyişdirilməsi, əhalinin bir neçə rayondan hücumlardan əvvəl təxliyə olunması və s.  Telekanalın məlumatına görə, məxfi sənədlər İŞİD sıralarından fərarilik etmiş şəxslər tərəfindən təqdim olunub. Sənədlərdəki məlumatların doğruluğu hələlik təsdiqlənməyib.xeber100.com  

“Vilayət-95” irimiqyaslı təlimlərin 2017-ci ilin fevralında keçirilməsi nəzərdə tutulub

İran Hərbi-Dəniz Qüvvələri cari ildə  (İranda yeni təqvim ili martın 21-dən başlayır) 20 təlim keçirəcək. APA-nın “TASS”a istinadən verdiyi xəbərə görə, bu barədə İran Hərbi-Dəniz Qüvvələrinin komandanı kontr-admiral Həbibulla Səyyari bildirib.  “İran Hərbi-Dəniz Qüvvələri raket buraxılışı, sualtı qüvvələrin təlimləri, hərbi-dəniz kəşfiyyatı daxil olmaqla cari ildə 20 xüsusi təlim keçirəcək. İlk təlimlərə artıq gələn ay start veriləcək. Təlim çərçivəsində hərbi gəmilərin şəxsi heyətləri elektron müharibə sahəsində biliklərini təkmilləşdirəcəklər”, - deyə kontr-admiral qeyd edib.  Səyyari qeyd edib ki, “Vilayət-95” irimiqyaslı təlimlərin 2017-ci ilin fevralında keçirilməsi nəzərdə tutulub. "Baxmayaraq ki, ABŞ Fars körfəzində İranın hərbi qüvvəsinin artırılmasında maraqlı deyil, onlar bilməlidirlər ki, bu bölgədə qüvvələrimiz kifayət qədərdir və biz orada təlimlərimizi keçiririk. Bu məsələnin onlara heç bir aidiyyəti yoxdur”, - deyə Həbibulla Səyyari bildirib. xeber100.com