Atəşkəsin imzalanmasının 70-ci ildönümü münasibətilə hərbi parad keçirilib

Koreya Xalq Demokratik Respublikasında (KXDR) 1950-1953-cü illər Koreya müharibəsinin yekununda atəşkəsin imzalanmasının 70-ci ildönümü münasibətilə hərbi parad keçirilib. Bu barədə Yonhap agentliyi hadisə şahidlərinə istinadla məlumat yayıb. Koreya müharibəsinin atəşkəs razılaşması Şimali Koreyada Qələbə günü kimi qeyd olunur. Paytaxt Pxenyanda keçirilmiş parad yerli vaxtla saat 20:00-da başlayıb. Hələlik paradda ölkə lideri Kim Çen Inın və başqalarının iştirakına dair məlumat olmasa da, Qələbə Günü ilə əlaqədar KXDR-də səfərdə olan Rusiya müdafiə naziri Sergey Şoyqunun və Çin Kommunist Partiyası Siyasi Bürosunun üzvü Li Honconun rəhbərlik etdikləri nümayəndə heyətlərinin paradı izləyənlər arasında olması ehtimalı böyükdür. İyulun 26-da KXDR lideri Kim Çen In Rusiya müdafiə naziri ilə birgə silah sərgisində iştirak edib. Şimali Koreya lideri həmin gün Çin nümayəndə heyəti ilə də görüşüb. Qeyd edək ki, Şimali Koreyada əhəmiyyətli tarixi hadisələrin yubileylərində irimiqyaslı tədbirlərin, o cümlədən hərbi paradların təşkili ənənəsi var. Kim Çen In hakimiyyətə gəldiyi 2011-ci ildən bəri ölkədə 14 dəfə hərbi parad keçirilib. Yeni silahlar da əsasən həmin paradlarda ilk dəfə ictimaiyyətə nümayiş olunur. Son bir neçə ildir ki, paradlar adətən ya axşam saatlarında və ya səhər erkən vaxtı təşkil olunur.

Yaponiya hökuməti hibrid mühərrikli avtomobillərin Rusiyaya ixracını qadağan edib

Yaponiya hökuməti mühərrikinin həcmi 1,9 kubsantimetrdən çox olan, hibrid mühərrikli avtomobillərin və yük avtomobilləri üçün təkərlərin Rusiyaya ixracını qadağan edib. Bu barədə jurnalistlərə ölkənin iqtisadiyyat, ticarət və sənaye naziri Yasutoşi Nişimura məlumat verib. Onun sözlərinə görə, məhdudiyyətlər avqustun 9-dan qüvvəyə minəcək. Nişimura bildirib ki, Yaponiya beynəlxalq ictimaiyyət və G7 ölkələri ilə yaxından işləməyə davam edərək Rusiyaya qarşı qoyulan məhdudiyyətlərə ciddi şəkildə əməl etmək üçün lazım olan hər şeyi edəcək.xeber100.com

Parlament seçkiləri 2024-cü ilin yazında keçirilə bilər

Böyük Britaniyada hakim Mühafizəkarlar Partiyasının rəhbərliyində ölkədə ümumi parlament seçkilərinin 2024-cü ilin yazında keçirilməsinin mümkünlüyü müzakirə olunur. Bu barədə “The Guardian” məlumat yayıb. Qeyd olunub ki, Böyük Britaniyanın Baş naziri Rişi Sunak çox güman gələn ilin əvvəlində, Böyük Britaniya üçün iqtisadi perspektivlər aydınlaşanda, seçkilərin dəqiq vaxtı ilə bağlı qərar verəcək. Nəşrin yazdığına görə, 2025-ci ilin yanvarından gec olmayaraq keçirilməli olan səsvermənin daha erkən tarixə irəli çəkilməsi ideyası partiyanın yüksək rütbəli üzvləri arasında “rəğbət qazanır”. Bundan əvvəl Britaniya mediası İcmalar Palatasına seçkilərin 2024-cü ilin oktyabr və ya noyabrında keçirilə biləcəyini iddia edirdi.xeber100.com

İtaliyanın “La Stampa” qəzeti yazır…

Biz vaxt çərçivəsi müəyyən etməklə Ukrayna müharibəsinin başa çatması və şərtləri barədə danışmalıyıq. Ümid edirəm ki, gələn il bu vaxt Ukrayna münaqişəsindən bir daha bəhs etməyəcəyik. İtaliyanın müdafiə naziri Quido Krozetto bu barədə “La Stampa” qəzetinə müsahibəsində deyib. “İndiyədək Kiyevə hərbi yardımla bağlı bütün öhdəliklərimizi yerinə yetirmişik. Artıq münaqişənin dinc yolla həlli üçün hər cür səy göstərməyin vaxtı çatıb”, - deyə Quido Krozetto bildirib. İtaliya indiyədək Kiyevə məzmunu məxfi saxlanılan altı paket çərçivəsində silah tədarükü edib. Ekspertlərin hesablamalarına görə, bu məqsədlə 1-1,5 milyard avro vəsait xərclənib. Roma son vaxtlar, o cümlədən investisiyalar vasitəsilə Ukraynanın bərpasından danışmağa üstünlük verir.xeber100.com

Britaniya parlamenti yeni qanun layihəsini təsdiqləyib

Böyük Britaniya parlamenti qeyri-leqal miqrasiya haqqında qanun layihəsini qəbul edib. Bu qanun hakimiyyət orqanlarına Birləşmiş Krallığa qanunsuz yolla daxil olan və sığınacaq üçün müraciət edən mühacirləri ölkədən çıxarmağa imkan verəcək. Aprel ayında İcmalar Palatasında təsdiqlənən qanun layihəsi iyulun 18-də Lordlar Palatasının da dəstəyini qazanıb. Kral III Çarlz layihəni imzaladıqdan sonra qanun qüvvəyə minəcək. Hər il artan qanunsuz miqrasiya problemini həll etmək məqsədi daşıyan qanun layihəsi hökumət tərəfindən 2023-cü ilin martında təqdim edilib. Qanun qüvvəyə minəcəyi təqdirdə Böyük Britaniya Daxili İşlər Nazirliyinə qeyri-leqal mühacirləri həbs etmək, sığınacaq üçün müraciətlərinə baxmamaq və üçüncü ölkələrə deportasiya etmək hüququ verəcək. Qanun layihəsi BMT-nin sərt tənqidinə tuş gəlib. İnsan Hüquqları və Qaçqınların İşi üzrə ali komissarlıqların birgə bəyanatında Londonun qanunvericilik təşəbbüsü “Birləşmiş Krallığın beynəlxalq insan haqları və qaçqınların hüquqları üzrə öhdəliyini pozmaq” kimi dəyərləndirilib. Qeyd edək ki, hakim Mühafizəkarlar partiyasının qeyri-leqal miqrasiya ilə mübarizə barədə vədlərinə baxmayaraq, son beş ildə La-Manş boğazını keçərək ölkəyə daxil olan mühacirlərin sayı durmadan artır. Daxili İşlər Nazirliyinin məlumatına görə, 2018-ci ildə ölkəyə dəniz yolu ilə 299 qanunsuz daxilolma faktı qeydə alınmışdısa, 2019-cu ildə 1,8 min, 2020-ci ildə 8,4 min, 2021-ci ildə 28,5 min, 2022-ci ildə isə 45,7 min nəfər bu yoldan istifadə edib. Rəsmi statistikaya əsasən, qeyri-leqal mühacirlərin saxlanılması britaniyalı vergiödəyicilərinə gündə 6 milyon funt-sterlinqə başa gəlir.xeber100.com

Zəlzələdən sonra elan olunan sunami xəbərdarlığı ləğv edilib

Bazar günü səhər tezdən Alyaska yarımadasında 7,2 bal gücündə baş verən zəlzələdən sonra elan olunan sunami xəbərdarlığı ləğv edilib. ABŞ Sunami Xəbərdarlıq Sistemi Cənubi Alyaska və Alyaska yarımadasının sahilyanı əraziləri üçün verdiyi xəbərdarlığı geri götürüb. Qeyd edək ki, ABŞ-ın Alyaska ştatında 7,4 bal gücündə zəlzələ baş verib. Yeraltı təkanların episentri Sand-Point şəhərindən 97 kilometr cənubda, ocağı isə 10 kilometr dərinlikdə yerləşib. Sosial şəbəkələrdə sunami xəbərdarlığı və güclü təkanların görüntüləri yerləşdirilsə də, dağıntı və ya tələfat barədə məlumat yoxdur.xeber100.com

G7 ölkələri birgə bəyannaməni razılaşdırıblar

“Böyük yeddilik” ölkələri Ukraynaya təhlükəsizlik və iqtisadiyyat sahəsində planlaşdırdıqları uzunmüddətli dəstəyin sabit edildiyi birgə bəyannaməni razılaşdırıblar. Bu barədə Ukrayna Prezidenti Ofisinin rəhbəri Andrey Yermaka istinadla xəbər verir. “Müdafiə sahəsində çox güclü razılaşmalarımız və G7 ölkələri tərəfindən razılaşdırılan Ukraynaya birgə dəstək haqqında bəyannaməmiz var. O, dövlətimiz üçün təhlükəsizlik təminatları ilə bağlı Ukrayna və ayrı-ayrı qarant ölkələr arasında təhlükəsizlik üzrə ikitərəfli razılaşmalar sisteminin qurulması yolunda mühüm addımdır”, - deyə o qeyd edib. Andrey Yermakın sözlərinə görə, bəyannamə həm Ukraynanın ehtiyaclarını, həm də tərəfdaşların imkanlarını nəzərə alan birgə məhsuldur. Bəyannamə çərçivə sənədidir. Növbəti addım isə Ukrayna və ayrı-ayrı qarant ölkələr arasında təhlükəsizlik üzrə çoxtərəfli qarşılıqlı fəaliyyət çərçivələri ilə birləşdirilən ikitərəfli razılaşmalar sisteminin qurulmasıdır.xeber100.com

Özbəkistanda prezident seçkilərinin nəticələri yüksək qiymətləndirilib

İslam Əməkdaşlıq Təşkilatı (İƏT) bəyan edib ki, iyulun 9-da Özbəkistanda keçirilən prezident seçkiləri bu ölkədə demokratiyanın inkişafı baxımından mühüm addım olub.Təşkilatın Baş katibliyi  xəbər verir ki, İƏT-in bəyanatında deyilir: “Özbəkistan Respublikası hökumətinin dəvəti əsasında İslam Əməkdaşlıq Təşkilatının (İƏT) müşahidə missiyası bu ölkədə keçirilmiş prezident seçkilərində iştirak edib. Missiyaya təşkilatın Afrika ölkələri üzrə direktoru, səfir Boubakar Adamou rəhbərlik edib. İƏT-in Özbəkistandakı prezident seçkilərini müşahidə etməsi təşkilatın Nizamnaməsinə, İƏT Seçki Müşahidəçilərinin Davranış Kodeksinə və 2005-ci il Beynəlxalq Seçki Müşahidəsinin Prinsipləri Bəyannaməsinə uyğun olaraq üzv dövlətlərdə demokratiya və yaxşı idarəçiliyi təşviq etmək üzrə davamlı səylər çərçivəsində həyata keçirilib. İƏT-in müşahidəçiləri Özbəkistan xalqının öz səsvermə hüquqlarını dinc şəraitdə həyata keçirməsi baxımından səsvermə prosesinin yaxşı təşkil olunduğunu qeyd ediblər. Beynəlxalq müşahidəçilərin mətbuat üçün keçirdiyi brifinqdə İƏT-in missiyasının rəhbəri seçkilərin dinc şəraitdə keçirilməsindən məmnunluğunu ifadə edib və təşkilatın Baş katibinin Özbəkistan xalqına və ölkədə davam edən demokratik prosesə, dəyərlərə və sosial-iqtisadi inkişafa sadiqliyinə görə 87,05 faiz səslə yenidən seçilən prezident Şavkat Mirziyoyevə təbriklərini çatdırıb”. Bəyanatın sonunda qeyd edilib ki, İƏT demokratiyanın möhkəmləndirilməsi, yaxşı idarəetmə, sosial-iqtisadi inkişaf və insan hüquqlarının təşviqi istiqamətində təşkilatın mühüm və fəal üzv dövləti olan Özbəkistan Respublikasının göstərdiyi səylərə dəstək vermək öhdəliyini bir daha təsdiq edir.xeber100.com  

“Gatwick” aeroportunda 1700 aviareysi ləğv etmək barədə qərar qəbul edilib

Böyük Britaniyanın aparıcı aviakompaniyalarından olan “Easyjet” iyul, avqust və sentyabr aylarında paytaxt Londondakı “Gatwick” aeroportunda 1700 aviareysi ləğv etmək barədə qərar qəbul edib. Kompaniyanın yaydığı məlumata görə, aviareyslərin ləğvi Avropanın hava məkanında yaranan sıxlıq və hava uçuşlarına nəzarətdə baş verən çətinliklərlə bağlıdır. Aviakompaniya bilet alan sərnişinlərin 95 faizinin digər reyslərə yönəldildiyini bildirib. Bəyanatda, həmçinin davam edən müharibə səbəbindən Ukraynanın hava məkanının uçuşlar üçün bağlı qalmasının aviakompaniyaların yay aylarında çətin şərtlərlə üzləşdiyi qeyd edilir.xeber100.com

Ukrayna tərəfdaşlığa qoşulmaq üçün müraciət edib

Ukrayna Hərtərəfli və Proqressiv Trans-Sakit Okean Tərəfdaşlığı Sazişinə (CPPTA) qoşulmaq üçün müraciət edib. Bu barədə cümə günü jurnalistlərə Yaponiyanın iqtisadi bərpa naziri Şiqeyuki Qoto bildirib. “Ukrayna tərəfdaşlığa qoşulmaq üçün müraciət edib. Ehtimal olunur ki, müraciətə iyulun 16-da Yeni Zelandiyada keçiriləcək assosiasiyaya aid ölkələrin nazirlərinin görüşündə baxılacaq”, - deyə məlumatda qeyd olunur. Eyni iclasda Çin və Tayvandan gələn müraciətlərə də baxılacaq. Xatırladaq ki, Trans-Sakit Okean Tərəfdaşlığı üzrə ilkin razılaşma yeddi illik danışıqlardan sonra 2016-cı il fevralın 6-da Yeni Zelandiyada bağlanıb. Sənədi 12 dövlətin - Avstraliya, Bruney, Vyetnam, Kanada, Malayziya, Meksika, Yeni Zelandiya, Peru, Sinqapur, ABŞ, Çili və Yaponiyanın nümayəndələri imzalayıblar. Lakin keçmiş ABŞ-ın sabiq Prezidenti Donald Tramp vəzifəyə gəldikdən dərhal sonra ölkəsinin təşkilatdan çıxdığını elan edib. Nəticədə, qalan 11 dövlət azad ticarət zonasının yaradılmasına dair yeni sənəd - Trans-Sakit Okean Tərəfdaşlığı üzrə Hərtərəfli və Proqressiv Saziş imzalayıblar.xeber100.com