Britaniya parlamenti yeni qanun layihəsini təsdiqləyib

Böyük Britaniya parlamenti qeyri-leqal miqrasiya haqqında qanun layihəsini qəbul edib. Bu qanun hakimiyyət orqanlarına Birləşmiş Krallığa qanunsuz yolla daxil olan və sığınacaq üçün müraciət edən mühacirləri ölkədən çıxarmağa imkan verəcək. Aprel ayında İcmalar Palatasında təsdiqlənən qanun layihəsi iyulun 18-də Lordlar Palatasının da dəstəyini qazanıb. Kral III Çarlz layihəni imzaladıqdan sonra qanun qüvvəyə minəcək. Hər il artan qanunsuz miqrasiya problemini həll etmək məqsədi daşıyan qanun layihəsi hökumət tərəfindən 2023-cü ilin martında təqdim edilib. Qanun qüvvəyə minəcəyi təqdirdə Böyük Britaniya Daxili İşlər Nazirliyinə qeyri-leqal mühacirləri həbs etmək, sığınacaq üçün müraciətlərinə baxmamaq və üçüncü ölkələrə deportasiya etmək hüququ verəcək. Qanun layihəsi BMT-nin sərt tənqidinə tuş gəlib. İnsan Hüquqları və Qaçqınların İşi üzrə ali komissarlıqların birgə bəyanatında Londonun qanunvericilik təşəbbüsü “Birləşmiş Krallığın beynəlxalq insan haqları və qaçqınların hüquqları üzrə öhdəliyini pozmaq” kimi dəyərləndirilib. Qeyd edək ki, hakim Mühafizəkarlar partiyasının qeyri-leqal miqrasiya ilə mübarizə barədə vədlərinə baxmayaraq, son beş ildə La-Manş boğazını keçərək ölkəyə daxil olan mühacirlərin sayı durmadan artır. Daxili İşlər Nazirliyinin məlumatına görə, 2018-ci ildə ölkəyə dəniz yolu ilə 299 qanunsuz daxilolma faktı qeydə alınmışdısa, 2019-cu ildə 1,8 min, 2020-ci ildə 8,4 min, 2021-ci ildə 28,5 min, 2022-ci ildə isə 45,7 min nəfər bu yoldan istifadə edib. Rəsmi statistikaya əsasən, qeyri-leqal mühacirlərin saxlanılması britaniyalı vergiödəyicilərinə gündə 6 milyon funt-sterlinqə başa gəlir.xeber100.com

Zəlzələdən sonra elan olunan sunami xəbərdarlığı ləğv edilib

Bazar günü səhər tezdən Alyaska yarımadasında 7,2 bal gücündə baş verən zəlzələdən sonra elan olunan sunami xəbərdarlığı ləğv edilib. ABŞ Sunami Xəbərdarlıq Sistemi Cənubi Alyaska və Alyaska yarımadasının sahilyanı əraziləri üçün verdiyi xəbərdarlığı geri götürüb. Qeyd edək ki, ABŞ-ın Alyaska ştatında 7,4 bal gücündə zəlzələ baş verib. Yeraltı təkanların episentri Sand-Point şəhərindən 97 kilometr cənubda, ocağı isə 10 kilometr dərinlikdə yerləşib. Sosial şəbəkələrdə sunami xəbərdarlığı və güclü təkanların görüntüləri yerləşdirilsə də, dağıntı və ya tələfat barədə məlumat yoxdur.xeber100.com

G7 ölkələri birgə bəyannaməni razılaşdırıblar

“Böyük yeddilik” ölkələri Ukraynaya təhlükəsizlik və iqtisadiyyat sahəsində planlaşdırdıqları uzunmüddətli dəstəyin sabit edildiyi birgə bəyannaməni razılaşdırıblar. Bu barədə Ukrayna Prezidenti Ofisinin rəhbəri Andrey Yermaka istinadla xəbər verir. “Müdafiə sahəsində çox güclü razılaşmalarımız və G7 ölkələri tərəfindən razılaşdırılan Ukraynaya birgə dəstək haqqında bəyannaməmiz var. O, dövlətimiz üçün təhlükəsizlik təminatları ilə bağlı Ukrayna və ayrı-ayrı qarant ölkələr arasında təhlükəsizlik üzrə ikitərəfli razılaşmalar sisteminin qurulması yolunda mühüm addımdır”, - deyə o qeyd edib. Andrey Yermakın sözlərinə görə, bəyannamə həm Ukraynanın ehtiyaclarını, həm də tərəfdaşların imkanlarını nəzərə alan birgə məhsuldur. Bəyannamə çərçivə sənədidir. Növbəti addım isə Ukrayna və ayrı-ayrı qarant ölkələr arasında təhlükəsizlik üzrə çoxtərəfli qarşılıqlı fəaliyyət çərçivələri ilə birləşdirilən ikitərəfli razılaşmalar sisteminin qurulmasıdır.xeber100.com

Özbəkistanda prezident seçkilərinin nəticələri yüksək qiymətləndirilib

İslam Əməkdaşlıq Təşkilatı (İƏT) bəyan edib ki, iyulun 9-da Özbəkistanda keçirilən prezident seçkiləri bu ölkədə demokratiyanın inkişafı baxımından mühüm addım olub.Təşkilatın Baş katibliyi  xəbər verir ki, İƏT-in bəyanatında deyilir: “Özbəkistan Respublikası hökumətinin dəvəti əsasında İslam Əməkdaşlıq Təşkilatının (İƏT) müşahidə missiyası bu ölkədə keçirilmiş prezident seçkilərində iştirak edib. Missiyaya təşkilatın Afrika ölkələri üzrə direktoru, səfir Boubakar Adamou rəhbərlik edib. İƏT-in Özbəkistandakı prezident seçkilərini müşahidə etməsi təşkilatın Nizamnaməsinə, İƏT Seçki Müşahidəçilərinin Davranış Kodeksinə və 2005-ci il Beynəlxalq Seçki Müşahidəsinin Prinsipləri Bəyannaməsinə uyğun olaraq üzv dövlətlərdə demokratiya və yaxşı idarəçiliyi təşviq etmək üzrə davamlı səylər çərçivəsində həyata keçirilib. İƏT-in müşahidəçiləri Özbəkistan xalqının öz səsvermə hüquqlarını dinc şəraitdə həyata keçirməsi baxımından səsvermə prosesinin yaxşı təşkil olunduğunu qeyd ediblər. Beynəlxalq müşahidəçilərin mətbuat üçün keçirdiyi brifinqdə İƏT-in missiyasının rəhbəri seçkilərin dinc şəraitdə keçirilməsindən məmnunluğunu ifadə edib və təşkilatın Baş katibinin Özbəkistan xalqına və ölkədə davam edən demokratik prosesə, dəyərlərə və sosial-iqtisadi inkişafa sadiqliyinə görə 87,05 faiz səslə yenidən seçilən prezident Şavkat Mirziyoyevə təbriklərini çatdırıb”. Bəyanatın sonunda qeyd edilib ki, İƏT demokratiyanın möhkəmləndirilməsi, yaxşı idarəetmə, sosial-iqtisadi inkişaf və insan hüquqlarının təşviqi istiqamətində təşkilatın mühüm və fəal üzv dövləti olan Özbəkistan Respublikasının göstərdiyi səylərə dəstək vermək öhdəliyini bir daha təsdiq edir.xeber100.com  

“Gatwick” aeroportunda 1700 aviareysi ləğv etmək barədə qərar qəbul edilib

Böyük Britaniyanın aparıcı aviakompaniyalarından olan “Easyjet” iyul, avqust və sentyabr aylarında paytaxt Londondakı “Gatwick” aeroportunda 1700 aviareysi ləğv etmək barədə qərar qəbul edib. Kompaniyanın yaydığı məlumata görə, aviareyslərin ləğvi Avropanın hava məkanında yaranan sıxlıq və hava uçuşlarına nəzarətdə baş verən çətinliklərlə bağlıdır. Aviakompaniya bilet alan sərnişinlərin 95 faizinin digər reyslərə yönəldildiyini bildirib. Bəyanatda, həmçinin davam edən müharibə səbəbindən Ukraynanın hava məkanının uçuşlar üçün bağlı qalmasının aviakompaniyaların yay aylarında çətin şərtlərlə üzləşdiyi qeyd edilir.xeber100.com

Ukrayna tərəfdaşlığa qoşulmaq üçün müraciət edib

Ukrayna Hərtərəfli və Proqressiv Trans-Sakit Okean Tərəfdaşlığı Sazişinə (CPPTA) qoşulmaq üçün müraciət edib. Bu barədə cümə günü jurnalistlərə Yaponiyanın iqtisadi bərpa naziri Şiqeyuki Qoto bildirib. “Ukrayna tərəfdaşlığa qoşulmaq üçün müraciət edib. Ehtimal olunur ki, müraciətə iyulun 16-da Yeni Zelandiyada keçiriləcək assosiasiyaya aid ölkələrin nazirlərinin görüşündə baxılacaq”, - deyə məlumatda qeyd olunur. Eyni iclasda Çin və Tayvandan gələn müraciətlərə də baxılacaq. Xatırladaq ki, Trans-Sakit Okean Tərəfdaşlığı üzrə ilkin razılaşma yeddi illik danışıqlardan sonra 2016-cı il fevralın 6-da Yeni Zelandiyada bağlanıb. Sənədi 12 dövlətin - Avstraliya, Bruney, Vyetnam, Kanada, Malayziya, Meksika, Yeni Zelandiya, Peru, Sinqapur, ABŞ, Çili və Yaponiyanın nümayəndələri imzalayıblar. Lakin keçmiş ABŞ-ın sabiq Prezidenti Donald Tramp vəzifəyə gəldikdən dərhal sonra ölkəsinin təşkilatdan çıxdığını elan edib. Nəticədə, qalan 11 dövlət azad ticarət zonasının yaradılmasına dair yeni sənəd - Trans-Sakit Okean Tərəfdaşlığı üzrə Hərtərəfli və Proqressiv Saziş imzalayıblar.xeber100.com

Moldova hökuməti daha iki sazişdən imtina barədə qərar qəbul edib

Moldova hökuməti bu gün keçirilən iclasında MDB çərçivəsində imzalanan daha iki sazişdən imtina barədə qərar qəbul edib. Bu barədə Moldova Nazirlər Kabinetinin mətbuat xidməti məlumat yayıb. Məlumata görə, Moldova hökuməti 2000-ci ildə imzalanan azad ticarət zonasında texniki baryerlər üzrə sazişdən imtina etmək istəyir. Bundan başqa, MDB-yə üzv ölkələr arasında istehlakçı hüquqlarının müdafiəsi sahəsində əməkdaşlığa yönələn əsas sazişə də xitam verilməsi nəzərdə tutulur. Artıq may ayında Moldova MDB çərçivəsində iki sazişdən - təşkilata üzv ölkələrin xarici sərhədlərinin müdafiəsi sahəsində məlumat mübadiləsi, həmçinin məhsul tədarükü üzrə ümumi şərtlər barədə sazişlərdən çıxıb. Parlamentin sədri İqor Qrosu bir müddət əvvəl elan edib ki, Moldova MDB-nin parlamentlərarası assambleyası barədə sazişdən də çıxmağa hazırlaşır.xeber100.com

Prezident seçkilərinin rəsmi nəticələrinin açıqlanması təxirə salındı

Qvatemala Ali Seçki Məhkəməsi prezident seçkilərinin rəsmi nəticələrini məhkəmə qərarına görə qeyri-müəyyən müddətə təxirə salınıb. Xarici KİV xəbər verir ki, seçki bülletenlərinin 98,82 faizi hesablandıqdan sonra əldə edilən nəticələrə görə, Qvatemalada prezident seçkilərinin ikinci turuna sabiq birinci xanım Sandra Torres və deputat Bernardo Arevalo getməlidir. Torres ilk üç favoritdən biri, Arevalo isə səkkizinci olub. Sağçı partiyaları təmsil edən 9 namizəd səsvermə zamanı pozuntular barədə məlumatların araşdırılmasını tələb edərək məhkəməyə müraciət edib. Konstitusiya Məhkəməsi şikayəti qəbul edib və seçkinin nəticələrinin rəsmi elanını təxirə salmağı tapşırıb.xeber100.com

ABŞ-ın bir neçə federal hökumət qurumu haker hücumuna məruz qalıb

ABŞ-ın bir neçə federal hökumət qurumu haker hücumuna məruz qalıb. Bu barədə CNN kanalı məlumat yayıb. Haker hücumunun arxasında kimin dayandığı hələlik məlum deyil. Hücum geniş istifadə olunan proqram təminatındakı boşluqdan istifadə edilməklə həyata keçirilib. Kanalın məlumatına görə, bu, ilk belə hal deyil. Genişmiqyaslı haker hücumu iki həftə əvvəl başlayıb və bu müddət ərzində bir neçə universitet və ABŞ hökumət təşkilatları vurulub.xeber100.com

Anadolu agentliyinin məlumatı əsasında…

Yunanıstanın Peloponnes yarımadasında yerləşən Pilos şəhəri sahillərində qeyri-leqal mühacirləri daşıyan balıqçı qayığı batıb. Anadolu agentliyi xəbər verir ki, beynəlxalq sularda baş verən qəza nəticəsində azı 32 nəfər ölüb, 100-dən çox insan isə xilas edilib. Xilas edilən insanlar Kalamata limanına aparılıb. Hazırda axtarış-xilasetmə əməliyyatı davam edir. Mühacirləri Liviyadan İtaliyaya aparan qayıqda qəza zamanı neçə nəfərin olduğu dəqiq bilinmir. Bu səbəbdən ölənlərin sayının artacağı istisna olunmur. Bu gün səhər saatlarında Krit adası sahillərində də 80 mühacirin xilas edildiyi barədə məlumatlar yayılıb.xeber100.com