Finlandiyada güllə atıcılığı üzrə Avropa çempionatı ləğv olunub

Finlandiyada keçirilməsi nəzərdə tutulan güllə atıcılığı üzrə Avropa çempionatı ləğv olunub.Azərtac xəbər verir ki, bu barədə Avropa Atıcılıq Konfederasiyasının saytında məlumat verilib. Lohya şəhərində fevralın 26-dan martın 6-dək keçirilməli olan yarış koronavirus pandemiyası səbəbindən baş tutmayacaq. Məlumatda bildirilir ki, yarışın başqa tarixə keçirilməsi müzakirə ediləcək. Qitə çempionatının keçirilməsi mümkün olmayacağı təqdirdə, “Tokio-2020” üçün kvota yerləri Beynəlxalq Olimpiya Komitəsinin təsdiq etdiyi təsnifat sisteminə uyğun olaraq ötən il may ayına olan Avropa reytinqinə görə ayrılacaq.Qitə çempionatında güllə atıcılarımızın iştirakı da nəzərdə tutulmuşdu.Xatırladaq ki, Azərbaycanın güllə atıcısı Ruslan Lunyov İtaliyanın Bolonya şəhərində keçirilən qitə çempionatında 25 metr məsafəyə kiçikçaplı tapançadan atəşaçma yarışının qalibi olmaqla “Tokio-2020” Yay Olimpiya Oyunlarına vəsiqə qazanıb.xeber100.com

“Latsio” futbol klubu heyətini yeni futbolçu ilə gücləndirib

İtaliyanın “Latsio” klubu heyətini yeni futbolçu ilə gücləndirib.Azərtac klubun rəsmi saytında istinadla xəbər verir ki, komanda Dmitriye Kamenoviç ilə müqavilə imzalayıb. İyirmi yaşlı müdafiəçi ilə üçillik anlaşma əldə olunub. Bunun üçün “Latsio” “Çukariçki” klubuna 3 milyon avro ödəyəcək.Qeyd edək ki, Kamenoviç 2019-cu ildən Serbiyanın yüksək dəstəsində oynamağa başlayıb. İndiyə qədər bu komandada 26, ölkəsinin U-21 millisində 4 oyun keçirib.xeber100.com

“Champions Chess Tour” seriyasının üçüncü turniri keçiriləcək

Fevralın 6-14-də “Champions Chess Tour” seriyasının üçüncü turniri keçiriləcək.Azərtac xəbər verir ki, onlayn turnirdə Azərbaycan şahmatçısı qrossmeyster Teymur Rəcəbov da iştirak edəcək. Onunla yanaşı, yarışda hazırkı dünya çempionu Maqnus Karlsen (Norveç), Nikaru Nakamura, Uesli So (ABŞ), Yan Nepomnyaşi, Daniil Dubov (Rusiya), Maksim Vaşye-Laqrav (Fransa), Levon Aronyan (Ermənistan) da mübarizə aparacaqlar.“Champions Chess Tour” seriyası 10 turnirdən ibarət olub 2021-ci ilin sentyabrınadək davam edəcək.Xatırladaq ki, “Champions Chess Tour” seriyasının ikinci - “Airthings Masters” turnirinin finalında şahmatçımız Teymur Rəcəbov Ermənistan təmsilçisi Levon Aronyanı məğlub edərək qalib adını qazanıb. Ondan əvvəlki, “Skillinq Open” yarışında da təmsilçimiz erməni rəqibinə prinsipial qarşılaşmada qalib gəlib. Həmin yarışın qalibi isə ABŞ şahmatçısı Uesli So olub.xeber100.com

Beynəlxalq Futbol Tarixi və Statistikaları Federasiyası hakimlərin adlarını açıqlayıb

Beynəlxalq Futbol Tarixi və Statistikaları Federasiyası (IFFHS) son on ilin ən yaxşı hakimlərinin adlarını açıqlayıb.Azərtac xəbər verir ki, 2011-2020-ci illərin ən yaxşı ədalət təmsilçisi Feliks Brix seçilib. Almaniyalı referi son 10 ildə keçirilən səsvermələrin nəticələrinə əsasən 141 xala malikdir. O, türkiyəli Cüneyt Çakırı cəmi 1 xal arxada qoyub.Byorn Kuypers (Niderland) 133, Nikola Rizzoli (İtaliya) 113, Nestor Pitana (Argentina) 88 xalla ilk beşlikdə yer alıblar. Ən yaxşı 10 hakim sırasına düşən Hovard Uebb (İngiltərə) və Damir Skomina (Sloveniya) hərəsi 76, Martin Atkinson (İngiltərə) 69, Viktor Kaşşai (Macarıstan) 56 xala malikdirlər.xeber100.com

İtaliya A Seriyasının 16-ci turunun növbəti oyunu keçirilib

Yanvarın 10-da futbol üzrə İtaliya A Seriyasının 16-ci turunun növbəti oyunu keçirilib.Azərtac xəbər verir ki, lider “Milan” doğma azarkeşlər önündə “Torino” komandasını qəbul edib. Görüş meydan sahiblərinin 2:0 hesablı qələbəsi ilə başa çatıb.Milanlılar hesabı oyunun 25-ci dəqiqəsində açıb. Brahim Diyazın ötürməsindən sonra rəqibin qapıçısı ilə üzbəüz qalan Rafael Leao fürsəti əldən verməyib. Görüşün 36-ci dəqiqəsində “Milan”nın futbolçusu Frank Kessi hesab arasındakı fərqi iki topa çatdırıb.Bu qələbədən sonra “Milan” 40 xalla liderliyinə davam edir. “Torino” isə 12 xalla 19-cu yerdə qərarlaşıb.Turun digər görüşlərində “Atalanta” səfərdə “Beneveto”dan (4:1), “Genoa” isə öz meydanında “Bolonya”dan üstün olub (2:0).xeber100.com

“Sarja” kuboku yarışında final mərhələsinin sonuncu turlarında

Azərbaycanın qadın şahmatçıları Gülnar Məmmədova və Ülviyyə Fətəliyeva “Lichess.org” platforması vasitəsilə keçirilən onlayn “Şarca” kuboku yarışının finalında bu gün son 4 turda mübarizə aparacaqlar.Azərtac xəbər verir ki, final mərhələsinin ilk 5 oyununda 3,5 xal toplayan G.Məmmədova 6-cı, 2 xal əldə edən Ü.Fətəliyeva 22-ci pillədə qərarlaşıblar.Xatırladaq ki, şahmatçılarımız turnirin blits ilk mərhələsində uğurla çıxış edərək finala vəsiqə qazanıblar.Finalda 483 şahmatçı arasından seçilmiş ən güclü 25 oyunçu ilə yanaşı, 10 namizəd də mübarizə aparır. Rapid üzrə İsveçrə sistemi ilə keçirilən həlledici mərhələ 9 turdan ibarətdir. Ümumi nəticədə ilk səkkizliyə düşən idmançılar mükafatlandırılacaqlar.xeber100.com

Futbol üzrə İspaniya çempionatının XVIII turunda qələbə sevinci

Futbol üzrə İspaniya çempionatının XVIII turunda səfərdə “Selta” üzərində 4:0 hesablı qələbə “Vilyarreal” üçün əlamətdar olub.Azərtac xəbər verir ki, bu, komandanın ölkə çempionatlarında üçüncü ən böyük hesablı səfər qələbəsi kimi klubun tarixinə düşüb.“Vilyarreal” sonuncu dəfə bu rekordu 16 il əvvəl - 2005-ci ildə “Real Sosyedad”ı səfərdə dörd cavabsız qolla məğlubiyyətə uğradarkən əldə edib.Unai Emerinin başçılıq etdiyi kollektiv 18 turdan sonra 32 xalla turnir cədvəlinin üçüncü pilləsində qərarlaşıb.“Vilyarreal” cari mövsümdə UEFA Avropa Liqasında Ağdamın “Qarabağ” komandası ilə eyni qrupda mübarizə aparıb. “Qarabağ” İspaniya təmsilçisi ilə İstanbulda keçirildiyi ev oyununda 1:3 hesabı ilə uduzub. “Qarabağ” klubu cavab görüşündə iştirak etmədiyi üçün texniki məğlubiyyət (0:3) alıb.xeber100.com

“Mançester Siti” futbol klubu “ həlledici matçda Tottenhem”lə üz-üzə gələcək

İngiltərənin “Mançester Siti” futbol klubu Liqa Kubokunda ardıcıl dördüncü dəfə finala yüksələn ikinci komanda olub.Azərtac xəbər verir ki, komanda yarımfinalda “Mançester Yunayted”i 2:0 hesabı ilə məğlub etməklə bunu bacarıb.1981-1984-cü illərdə “Liverpul” eyni turnirin finalında oynayıb.Qeyd edək ki, “Mançester Siti” aprelin 25-də həlledici matçda “Tottenhem”lə üz-üzə gələcək.xeber100.com

Futbol üzrə dünya çempionatının seçmə mərhələsi çərçivəsində

Futbol üzrə dünya çempionatının seçmə mərhələsi çərçivəsində Portuqaliya və Azərbaycan milli komandaları arasında keçiriləcək qarşılaşmanın stadionu açıqlanıb.Azərtac xəbər verir ki, Portuqaliya Futbol Federasiyasının prezidenti Fernando Qomeş qurumun rəsmi saytına açıqlamasında matçın paytaxt Lissabonda yerləşən və “Sportinq” klubuna məxsus olan “Joze Alvalade” arenasında oynanılacağını bildirib.Qeyd edək ki, martın 24-də keçiriləcək qarşılaşma Bakı vaxtı ilə saat 23:45-də start götürəcək. Azərbaycan millisi “A” qrupunda Portuqaliya ilə yanaşı, Serbiya, İrlandiya və Lüksemburqla da mübarizə aparacaq.xeber100.com

Şahmatçılar arasında “Sarja” kuboku yarışı start götürəcək

Bu gün “Lichess.org” platforması vasitəsilə qadın şahmatçılar arasında “Sarja” kuboku yarışı start götürəcək.Azərtac xəbər verir ki, Birləşmiş Ərəb Əmirlikləri Şahmat Federasiyasının təşkilatçılığı ilə keçiriləcək turnirdə Azərbaycanı 8 şahmatçı təmsil edəcək. Sayca 11-ci dəfə təşkil ediləcək turnirə şahmatçılarımız Günay Məmmədzadə, Gülnar Məmmədova, Türkan Məmmədyarova, Ülviyyə Fətəliyeva, Nərmin Xələfova, Xəyalə Abdulla, Fidan Ağasıyeva və Aytac Məmmədov qatılacaqlar.Yarışda ümumilikdə 307 şahmatçı iştirak edəcək. Turnirin seçmə mərhələsində iştirakçılar İsveçrə sistemi üzrə blits turnirində mübarizə aparacaqlar. Onların arasından ən yaxşı nəticə göstərən şahmatçılar rapid (15 dəqiqə + 5 saniyə) üzrə keçiriləcək final mərhələsinə vəsiqə qazanacaqlar.Turnir yanvarın 9-dək davam edəcək.xeber100.com