Blits üzrə onlayn Avropa çempionatı start götürəcək

Dekabrın 18-də blits üzrə onlayn Avropa çempionatı start götürəcək.Azərtac xəbər verir ki, çempionatda Azərbaycan şahmatçıları da mübarizə aparacaqlar. Qitə çempionatında kişi şahmatçılarımızdan Qədir Hüseynov, Vasif Durarbəyli, Eltac Səfərli, Namiq Quliyev, Vüqar Əsədli, Aydın Süleymanlı, Misrətdin İsgəndərov, Fərid Abbasov, Vüqar Rəsulov, Abdulla Qədimbəyli, Məhəmməd Muradlı, Rəhim Qasımov, Kamal Ağasiyev, Əhməd Əhmədzadə, Xəzər Babazadə, Nail Bəşirli, Fərid Mustafayev, Read Səmədov, Kənan Qarayev, Rəvan Əliyev mübarizə aparacaqlar. Qadın təmsilçilərimizdən isə Günay Məmmədzadə, Gülnar Məmmədova, Xanım Balacayeva, Türkan Məmmədyarova, Ülviyyə Fətəliyeva, Gövhər Beydullayeva iştirak edəcəklər.Qeyd edək ki, yarışın əvvəlcə İsveçrə sistemi üzrə 11 turdan ibarət seçmə mərhələsi keçiriləcək. Ən yaxşı 16 oyunçu pley-offa yüksələcək. Pley-off mərhələsinin ən yaxşı 4 oyunçusu isə turnirin medalçılarını və qalibini müəyyənləşdirən yarımfinala yüksələcək. Daha sonra superfinal keçiriləcək.Ən yaxşı 16 oyunçuya pul mükafatı, medallar və kuboklar veriləcək. Təşkilatçılar, həmçinin ən yaxşı qadın oyunçular, yaşlı oyunçular və müxtəlif yaş qruplarında yeniyetmə şahmatçılar üçün xüsusi mükafatlar hazırlayıblar.xeber100.com

Belqradda keçirilən güləş üzrə fərdi dünya kuboku yarışları sona yaxınlaşır

Serbiyanın paytaxtı Belqradda keçirilən güləş üzrə fərdi dünya kuboku yarışları sona yaxınlaşır.Azərtac xəbər verir ki, turnirin sonuncu günündə - dekabrın 18-də güləşçimiz Əhmədnəbi Qvarzatilov (61 kq) qızıl medal uğrunda görüşə çıxacaq. Təmsilçimiz startda Fransanı təmsil edən erməni güləşçi üzərində inamlı qələbə qazanıb. Bolqarıstan və Tacikistan güləşçilərindən də güclü olan Ə.Qvarzatilov finala yüksəlib. İdmançımızın həlledici görüşdə rəqibi rusiyalı Abashacı Məhəmmədov olacaq.Üçqat Avropa və dünya çempionu Hacı Əliyev debütdə prinsipial rəqiblə qarşılaşıb. Altmış beş kiloqram çəki dərəcəsində son dünya çempionu rusiyalı Hacımurad Rəşidovla görüşə əla start verən güləşçimiz 4 xal qazandıqdan sonra görüş yarımçıq saxlanılıb. Buna səbəb rəqibin zədələnməsi olub. Üçqat dünya çempionu dörddəbir finalda qırğız güləşçi ilə gərgin keçən görüşdən də qalib ayrılaraq adını yarımfinala yazdırıb. Macarıstan təmsilçisi ilə görüş gərgin idman mübarizəsi şəraitində keçib. Güləşçimiz əzmkarlıq nümayiş etdirsə də, onu qələbədən 1 xal ayırıb. H.Əliyev bürünc medal üçün güləşəcək.Rəşad Yusifli (79 kq) ilk görüşdə türk həmkarına məğlub olub. Ancaq rəqib finala yüksəldiyi üçün həmyerlimiz təsəlliverici görüşə çıxacaq.Mübarizəyə dörddəbir finaldan qoşulan Şamil Zubairov (97 kq) Moldova təmsilçisini çətinlik çəkmədən məğlub edərək yarımfinala yüksəlib. Ancaq finalın bir addımlığında Belarus təmsilçisinə yenilib və ümidini bürünc medala bağlayıb.Dekabrın 18-də təsəlliverici görüşlər Bakı vaxtı ilə saat 18:30-da, medal qarşılaşmaları isə 21:00-da keçiriləcək.Qeyd edək ki, daha əvvəl yunan-Roma güləşçilərindən İslambek Dadov (67 kq) gümüş, Eldəniz Əzizli (55 kq) və Beka Kandelaki (130 kq) bürünc medal əldə ediblər. Qadınlardan isə Elis Manolova (65 kq) fəxri kürsünün 3-cü pilləsinə qalxıb.xeber100.com

Qətərin paytaxtı Doha Asiya Oyunlarına ev sahibliyi edəcək

Qətərin paytaxtı Doha 2030-cu il Asiya Oyunlarına ev sahibliyi edəcək.Azərtac xəbər verir ki, dekabrın 16-da Asiya Olimpiya Şurası bununla bağlı qərarını açıqlayıb. Oyunların keçirilməsinə digər namizəd – Səudiyyə Ərəbistanının paytaxtı Ər-Riyad isə 2034-cü ildə Asiya Oyunlarını qəbul edəcək.Asiya Olimpiya Şurasının İcraiyyə Komitəsi Dohanın namizədliyini yekdilliklə dəstəkləyib. Şuranın prezidenti Şeyx Əhməd Əl-Fəhad Əl-Sabah bəyan edib ki, Qətər Dövlətinin paytaxtı Oyunların keçirilməsi üçün bütün tələblərə cavab verir.İcraiyyə Komitəsinin iclasında səsvermə COVID-19 pandemiyası səbəbindən onlayn sistemi ilə keçirilib. Qeyd edək ki, Doha bundan əvvəl – 2006-cı ildə də Asiya Oyunlarına ev sahibliyi edib. Qətər paytaxtında idman infrastrukturunun 90 faizinin mötəbər idman yarışları üçün hazır olduğu bildirilir.xeber100.com

Beynəlxalq Şahmat Federasiyası “Grand Swiss” turnirinin keçirilməsini təsdiqləyib

Beynəlxalq Şahmat Federasiyası (FIDE) Azərbaycan qrossmeysterlərinin də iştirak edəcəyi “Grand Swiss” turnirinin keçirilməsini təsdiqləyib.Azərtac xəbər verir ki, kişilər və qadınlar arasında turnirlər Böyük Britaniyanın Men adasında oktyabrın 25-dən noyabrın 8-dək keçiriləcək.Təxminən 35 ölkədən 164 oyunçunun iştirak edəcəyi turnirin ümumi mükafat fondu 550 min dollar olacaq.xeber100.com

Peşəkar Tennisçilər Assosiasiyası yeni mövsümün təqvimini açıqlayıb

Peşəkar Tennisçilər Assosiasiyası (ATP) yeni mövsümün ilk 3 ayı üçün təqvimi açıqlayıb.Azərtac xəbər verir ki, Fransa mətbuatına görə, kişi tennisçilər arasında mövsümün ilk yarışı yanvarın 4-də Amerikanın Florida ştatındakı Delrey-Biç şəhərində keçiriləcək. “Australian Open”in iştirakçıları 14 günlük karantində qalmaq üçün artıq yanvarın 15-dən Avstraliyaya gəlməlidirlər. Turnir fevralın 8-də başlayacaq. Avstraliya açıq çempionatının təsnifat mərhələsində çıxış edəcək tennisçilər fevralın 1-də Əbu-Dabidə qüvvələrini sınayacaqlar.Mövsüm ərzində “Böyük dəbilqə” seriyasının ilk turnirindən sonra tennisçilər fevralın sonunda Monpelye və Kordoba, martın 1-dən 7-dək Rotterdam və Buenos Ayres, 15-dən 21-dək isə Akapulko və Dubay turnirlərində çıxış edəcəklər. Həmin dövrdə keçirilməli olan Oklend, Puna, Nyu-York, Rio-de-Janeyro və İndian Uells turnirləri ləğv ediləcək.xeber100.com

Futbol üzrə dünya çempionatının seçmə mərhələsində

2022-ci ildə Qətərdə təşkil olunacaq futbol üzrə dünya çempionatının seçmə mərhələsində "A" qrupunda mübarizə aparacaq Azərbaycan milli komandasının oyunlarının təqvimi açıqlanıb.Azərtac AFFA-nın saytına istinadla xəbər verir ki, millimiz ilk oyununu səfərdə martın 24-də Portuqaliya yığmasına qarşı keçirəcək. Üç gün sonra futbolçularımız Qətər komandasının qonağı olacaqlar. Martın 30-da Azərbaycan – Serbiya, sentyabrın 1-də Lüksemburq – Azərbaycan, üç gün sonra İrlandiya – Azərbaycan, ayın 7-də Azərbaycan – Portuqaliya matçları təşkil olunacaq. Millimiz oktyabrın 9-da İrlandiya seçməsini qəbul edəcək. Üç gün sonra Serbiya millisinin qonağı olacaq baş məşqçi Canni De Byazinin yetirmələri noyabrın 11-də Lüksemburq, 14-də isə Qətər ilə yerli azarkeşlər qarşısında mübarizə aparacaqlar.Qeyd edək ki, UEFA son Asiya çempionu Qətər millisini 2022-ci ildə keçiriləcək dünya çempionatına hazırlıq məqsədilə dəvət edib. Rəqiblərin səfər məsafəsinin qısa olması üçün Qətər millisinin ev oyunları Avropada keçiriləcək.xeber100.com

Avropa Şahmat İttifaqının Baş Assambleyası keçiriləcək

Dekabrın 19-da Avropa Şahmat İttifaqının (ECU) Baş Assambleyası keçiriləcək.Azərtac xəbər verir ki, sayca 35-ci Assambleyada pandemiya dövründə yaranmış mövcud vəziyyət, 2021-2022-ci illər üçün yarışların təqvimi və növbəti il üçün qurumun büdcəsi müzakirə olunacaq.Onlayn formatda keçiriləcək Assambleyada Azərbaycan Şahmat Federasiyasının rəsmiləri də iştirak edəcəklər.xeber100.com

Beynəlxalq Futbol Tarixi və Statistikaları Federasiyası rəmzi komandasını açıqlayıb

Beynəlxalq Futbol Tarixi və Statistikaları Federasiyası 2020-ci il üçün Avropanın rəmzi komandasını açıqlayıb.Azərtac xəbər verir ki, heyətdə Çempionlar Liqasının son qalibi olan Almaniyanın “Bavariya” komandasının 5 futbolçusu yer alıb.Rəmzi komandada qapıçı - Manuel Noyer (Almaniya, "Bavariya"), müdafiəçilər - Trent Aleksander-Arnold (İngiltərə, "Liverpul"), Serxio Ramos (İspaniya, "Real Madrid"), Vircil van Deyk (Hollandiya, "Liverpul"), Alfondo Devis (Kanada, "Bavariya"), yarımmüdafiəçilər - Coşua Kimmix (Almaniya, "Bavariya"), Tyaqo Alkantara (İspaniya, "Bavariya" / "Liverpul"), Kevin De Brüyne (Belçika, "Mançester Siti"), hücumçular - Kriştiano Ronaldo (Portuqaliya, "Yuventus"), Robert Levandovski (Polşa, "Bavariya") və Lionel Messi (Argentina, "Barselona") yer alıblar.xeber100.com

Türkiyə çempionatının XI turunun ikinci gün qarşılaşmasında

Dekabrın 5-da futbol üzrə Türkiyə çempionatının XI turunun ikinci gün qarşılaşmasında "Qalatasaray" doğma meydanda "Hatayspor"u qəbul edib.Azərtac xəbər verir ki, gərgin keçən görüşdə hesabı meydan sahibləri rəqibin qapısından üç cavabsız qol keçirib. İstanbul təmsilçisinin qollarını Mbaye Caqne (32), Pablo (64 öz qapısına) və Məhəmməd Aktürkoğlu (90+2) vurub.Günün digər matçlarında isə "Gənclərbirliyi" doğma meydanda lider "Alanyaspor"u 2:1 hesabı ilə məğlub edib. "Ərzurumspor" isə səfərdə "Konyaspor"a iki cavabsız qolla uduzub. "Göztəpə" - "Kayserispor" və "Yeni Malatyaspor" - "Başakşəhər" matçları 1:1 hesablı bərabərliklə bitib.Hazırda çempionatın turnir cədvəlinə 23 xalla "Alanyaspor" başçılıq edir. Onunla eyni xala malik olan "Qalatasaray" ikinci, 20 xal toplayan "Fənərbağça" isə üçüncü pillədə qərarlaşıb.xeber100.com

Formula 1 üzrə dünya çempionatının 16-cı mərhələsi start götürür

Bu gün Bəhreynin Sahir trasında Formula 1 üzrə dünya çempionatının 16-cı mərhələsi start götürür.Azərtac xəbər verir ki, Bəhreyn artıq ardıcıl olaraq, ikinci turnirə ev sahibliyi edəcək. Budəfəki yarış Sahir avtodromunda başqa konfiqurasiyada keçiriləcək. Yarışın keçiriləcəyi dövrə cari təqvimdə ən qısa olacaq - 3543 kilometr. Pilotlar 87 dövrə qət edəcəklər. Seçmə mərhələdə sürücülərin bir dövrəni təxminən 55 saniyəyə, yarışda isə bir dəqiqəyə başa vurması gözlənilir.Bəhreyndəki son yarış zamanı fransız Roman Qrojan qəza səbəbindən aldığı zədələrə görə, qarşıdakı mərhələni buraxmaq məcburiyyətində qalıb. Q.Qrojanı ikiqat dünya çempionu Emerson Fittipaldinin nəvəsi Petro Fittipaldi əvəzləyəcək.Yarışın digər iştirakçısı, Bəhreyindəki ötən mərhələnin qalibi olmuş Luis Hamilton da budəfəki turnirdə iştirak edə bilməyəcək. Britaniyalı pilotun koronavirusa görə verdiyi testin nəticəsi müsbət olub. Yeddiqat dünya çempionunu “Williams”ın üzvü gənc pilot Corc Rassel əvəz edəcək.Qeyd edək ki, Bəhreyn 2004-cü ildən Formula 1 yarışlarına ev sahibliyi edir. Ötən illər ərzində, yalnız 1 dəfə - 2011-ci ildə ölkədəki qeyri-sabit vəziyyətə görə mərhələ ləğv edilib.xeber100.com