FIFA e-klub dünya çempionatının qrup mərhələsinin püşkü atılıb

İsveçrənin Sürix şəhərində futbol üzrə FIFA e-klub dünya çempionatının qrup mərhələsinin püşkü atılıb.Azərtac FIFA-ya istinadla xəbər verir ki, turnirin təsnifat mərhələsində 190 komanda mübarizə aparıb. Gərgin keçən yarışlarda 24 komanda qrup mərhələsinə yüksəlib. Püşkə əsasən, komandalar 4 qrupda yarışacaqlar. Komandalar 1-in 1-ə və 2-nin 2-yə formatında güclərini sınayacaqlar.Mükafat fondu 100 min ABŞ dolları olan dünya çempionatının final mərhələsinə sentyabrın 7-9-da İtaliyanın Milan şəhəri ev sahibliyi edəcək.xeber100.com

Azərbaycan Yüksək Liqasında növbəti oyun keçirilib

Kişi voleybolçular arasında Azərbaycan Yüksək Liqasında növbəti oyun keçirilib.Azərtac xəbər verir ki, birinci dövrənin yanvarın 22-də oynanılan növbəti matçında “Azərreyl” və “Express” komandaları üz-üzə gəliblər.Azərbaycan Voleybol Mərkəzində təşkil olunan qarşılaşmada “Azərreyl” komandası 3:0 hesabı ilə qalib gəlib. Bu, “Azərreyl”in cari mövsümdə ilk qələbəsidir.Qeyd edək ki, hesabında 6 xal olan “Neftçi” turnir cədvəlində birinci pillədə yer alıb. MOİK 4 xalla ikinci, “Azərreyl” isə 3 xalla üçüncüdür.xeber100.com

“Gibraltar International Chess Festival 2020” turnirində…

Yanvarın 21-də nüfuzlu şahmat yarışlarından olan “Gibraltar International Chess Festival 2020” turniri start götürür.Azərtac xəbər verir ki, Cəbəllütariqdə keçiriləcək və 10 turdan ibarət olacaq festivalın “Masters” turnirində Azərbaycanın 3 şahmatçısı - Şəhriyar Məmmədyarov, Vasif Durarbəyli və Günay Məmmədzadə mübarizə aparacaq.Ş.Məmmədyarovun ilk turda rəqibi hindistanlı Rahil Mulik olacaq. Digər şahmatçılarımız V.Durarbəyli Cənubu Afrika Respublikasından olan Daniel Barış, G.Məmmədzadə hindistanlı Şalmali Gagare ilə üz-üzə gələcəklər.“Masters” turnirdə hər il onlarca qrossmeyster, o cümlədən “2700 klubu”nun üzvləri iştirak edirlər. Bu il festivalın “Masters” turnirinə dünyanın müxtəlif ölkələrindən 241 şahmatçı qatılıb ki, onlardan da 116-sı qrossmeysterdir. Turnirin reytinq favoriti təmsilçimiz Ş.Məmmədyarovdur.xeber100.com

Bakı İdman Sarayında kikboksinq üzrə turnir start götürəcək

Yanvarın 24-də Bakı İdman Sarayında kikboksinq üzrə üçüncü “Xocalı kuboku” turniri start götürəcək.Azərtac xəbər verir ki, “Xocalıya ədalət!” devizi altında təşkil olunacaq turnirdə yeniyetmələr, gənclər və kadetlər mübarizə aparacaqlar.Azərbaycan Kikboksinq Federasiyası və “Xocalı” idman klubunun təşkilatçılığı ilə keçiriləcək turnir 3 gün davam edəcək.xeber100.com

Həndbolçular arasında Azərbaycan kuboku yarışları davam edir

Kişi həndbolçular arasında Azərbaycan kuboku yarışları davam edir.Azərbaycan Həndbol Federasiyasından Azərtac-a bildiriblər ki, yarışın əsas favoriti sayılan “Məhsul” komandası “Bakı” ilə qarşılaşıb. Yarışa qələbə ilə başlayan rəqiblərin oyunu böyük maraqla gözlənilirdi. Bu görüş qrup liderini müəyyənləşdirmək baxımından həlledici xarakter daşıyırdı. Rəqibin ciddi müqavimətinə rəğmən, oyunu qələbə ilə bitirən “Məhsul” qarşıya qoyulan tapşırığı yerinə yetirib – 32:29.Günün digər matçında meydançaya “Təhsil” və U-18 komandaları çıxıblar. Startı uğursuz alınan rəqiblərin növbəti görüşündə birincilərin qələbəsinə inananlar yanılmayıblar. “Təhsil”in üstünlüyü şəraitində keçən qarşılaşma 36:17 hesabı ilə başa çatıb.Yanvarın 25-də keçiriləcək “Məhsul” – U-18 və “Təhsil”–“Bakı” görüşləri ilə qrup mərhələsinə yekun vurulacaq.xeber100.com

Azərbaycan futbol klublarından dördü yoxlama oyunu keçirəcək

Antalyada təlim-məşq toplanışında olan Azərbaycan futbol klublarından dördü yoxlama oyunu keçirəcək.Azərtac xəbər verir ki, paytaxtın “Zirə” klubu Serbiyanın “Napredak” klubu ilə üz-üzə gələcək. Oyun Bakı vaxtı ilə saat 16:00-da başlayacaq. “Sumqayıt” isə Polşanın “Arka” komandası ilə Bakı vaxtı ilə saat 16:30-da görüşəcək. Jelko Sopiçin rəhbərlik etdiyi “Sabah” klubu Antalyadakı sonuncu sınağında Rusiyanın “Spartak-2” komandası ilə saat 17:00-da qarşılaşacaq. Paytaxtın digər klubu “Səbail” isə üçüncü yoxlama görüşündə Rumıniyanın “Voluntari” klubu ilə münasibətlərinə aydınlıq gətirəcək. Matç saat 17:00-da start götürəcək.Qeyd edək ki, “Sabah” bundan əvvəlki yoxlama matçlarında “Kaysar”a (Qazaxıstan) 3:1 hesabı ilə qalib gəlib, “Akademika Klinçeni" (Rumıniya) ilə qolsuz bərabərə qalıb, “Pakş”a (Macarıstan) 0:2 hesabı ilə uduzub. İlk matçında Türkiyə “Ümraniyespor”una 0:3 hesabı ilə məğlub olan “Zirə” ikinci oyununda Rumıniyanın “Sepsi” komandasına qalib gəlib - 2:0. “Səbail” Qazaxıstanın “Jetisu” klubuna 0:1, Ukraynanın “Olimpik” komandasına isə 1:3 hesabı ilə uduzub. Macarıstan “Kaposvar”ına 3:4 hesabı ilə uduzan “Sumqayıt” Rumıniya “Politexnika”sı bərabərə qalıb - 1:1.xeber100.com

“Tata Steel Chess 2020” turnirində səkkizinci turun oyunları keçirilib

Niderlandın Veyk-an Zee şəhərində təşkil olunan “Tata Steel Chess 2020” turnirində səkkizinci turun oyunları keçirilib.Azərtac xəbər verir ki, turnirin B qrupunda mübarizə aparan şahmatçımız Rauf Məmmədov ikinci qələbəsini qazanıb. Səkkiz turun nəticəsinə görə R.Məmmədovun aktivində 4,5 xal var.Qeyd edək ki, səkkizinci turda onun rəqibi yerli idmançı Maks Vermerdam olub.xeber100.com

Azərbaycan millisi ilk təlim-məşq toplanışına start verib

Qadın boksçulardan ibarət Azərbaycan millisi yeni ilin ilk təlim-məşq toplanışına start verib.Azərbaycan Boks Federasiyasından Azərtac-a verilən məlumata görə, komandamız baş məşqçi Elbrus Rzayevin rəhbərliyi ilə Abşeron Olimpiya İdman Kompleksində bir araya gəlib.Hazırlığa 8 boksçu dəvət olunub. Gündə 2 dəfə keçirilən məşqlərdə əsas diqqət funksional hazırlığa yönəlib. Komanda sonradan kişi boksçulardan ibarət yığma ilə birgə məşq edəcək.Toplanış Tokio Yay Olimpiya Oyunlarına lisenziya veriləcək turnirlərə hazırlıq xarakteri daşıyır.xeber100.com

İngiltərə Premyer Liqasının 23-cü turunun mərkəzi qarşılaşması keçirilib

Yanvarın 19-da İngiltərə Premyer Liqasının 23-cü turunun mərkəzi qarşılaşması keçirilib.Azərtac xəbər verir ki, turnir cədvəlinin hazırkı lideri “Liverpul” doğma azarkeşlər önündə “Mançester Yuanyted” komandasını qəbul edib.“Enfild” stadionunda baş tutan görüş meydan sahiblərinin 2:0 hesablı qələbəsi ilə başa çatıb.Hər iki hissədə bir qol vuran “Liverpul” çempionluq yolunda vacib qələbə qazanıb.Mersessayd təmsilçisinin heyətində Viljil van Deyk və Məhəmməd Salah fərqləniblər.Bu qələbə sahəsində xalları sayını 64-ə çatdıran “Liverpul” əzəli rəqibi, ikinci yerdə qərarlaşan “Mançester Siti”dən 16 xal irəlidədir. Qırx beş xala malik “Lester Siti” isə səfərdə “Börnli”yə məğlub olub (2:1).Xatırladaq ki, ötən gün “Mançester Siti” öz meydanında “Kristal Palas”ı qəbul edib. Hesabı 39-cu dəqiqədə qonaqlar açıb. “Kristal Palas”ın türkiyəli hücumçusu Cenk Tosun fərqlənib.Fasilədən sonra hücumları gücləndirən meydan sahibləri matçın sonlarına yaxın - 82-ci dəqiqədə hesaba tarazlıq gətiriblər. Serxio Aquera Qabriel Jesusun ötürməsini qola çevirib. Bundan beş dəqiqə sonra “Mançester Siti” hesabda önə keçib. Serxio Aquera adını ikinci dəfə tabloya yazdırıb. Bu da son qol olmayıb. “Kristal Palas” 90-cı dəqiqəsində hesabı bərabərləşdirməyə nail olub. Vilfried Zahanın cinah ötürməsindən sonra top “Mançester Siti”nin futbolçusu Fernandinyonun ayağına dəyərək qapıdan keçib. Beləliklə, oyun 2:2 hesab ilə başa çatıb.Günün digər oyunlarında aşağıdakı hesablar qeydə alınıb: “Arsenal” - “Şeffild Yunayted” - 1:1; “Brayton” - “Aston Villa” - 1:1; “Norviç Siti” - “Bormunt” - 1:0; “Southemton” - “Volverhemton” - 2:3; “Vest Ham Yunayted” - “Everton” - 1:1.xeber100.com

“Tata Steel Chess 2020” turnirində növbəti oyunlar keçiriləcək

Niderlandın Veyk-an Zee şəhərində təşkil olunan və təmsilçimiz Rauf Məmmədovun da iştirak etdiyi “Tata Steel Chess 2020” turnirində yanvarın 18-də yeddinci turun oyunları keçiriləcək.Azərtac xəbər verir ki, B qrupunda mübarizə aparan şahmatçımız növbəti turda turnir cədvəlinin liderlərindən olan hindistanlı Surya Şexar Ganquli ilə mübarizə aparacaq.Altı turdan sonra şahmatçımız 3 xal toplayıb.xeber100.com