Stolüstü Tennis Federasiyasının təşkilatçılığı ilə yarış keçirilib

“Şüa” İdman-Sağlamlıq Kompleksində Azərbaycan Stolüstü Tennis Federasiyasının təşkilatçılığı ilə autizmli uşaqlar arasında yarış keçirilib. Turnir Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun maliyyə dəstəyi ilə Azərbaycan Autizm Assosiasiyası İctimai Birliyi tərəfindən icra olunan “İnklüziv idman tədbirlərinin təşkili vasitəsilə autizmli uşaqların tibbi-sosial reabilitasiyasına və sosiallaşmasına dəstəyin göstərilməsi” layihəsi çərçivəsində təşkil olunub.Federasiyadan Azərtac-a verilən məlumata görə, tədbirdə çıxış edən assosiasiyanın sədri Elnur Məmmədov deyib: “Hazırkı layihə autizmdən əziyyət çəkən uşaqların tibbi-sosial reabilitasiyası və sosiallaşması üçün milli səviyyədə inklüziv idman tədbirlərinin təşkilini həyata keçirir. Autizmdən əziyyət çəkən uşaqların inklüziv idman növlərinə cəlb olunması, stolüstü tennis və velosiped məşqlərində yaxşı nəticə göstərənlər arasında yarışların keçirilməsi və qaliblərin autizmli uşaqlar üçün xarici ölkələrdə təşkil olunan beynəlxalq yarışlarda iştirakı ilə bağlı dəstəyin göstərilməsi layihə çərçivəsində icra olunması nəzərdə tutulan əsas fəaliyyət istiqamətləridir”.xeber100.com  

“Prezident Kuboku” uğrunda yarış keçiriləcək

Dekabrın 22-də Azərbaycan Döyüş Federasiyaları Assosiasiyasının (ADFA) təşkilatçılığı ilə “Sərhədçi” İdman Olimpiya Mərkəzində “Prezident Kuboku” uğrunda yarış keçiriləcək.ADFA-nın baş katibi Vasif Namazovun Azərtac-a verdiyi məlumata görə, üç gün davam edəcək yarışda 11 döyüş federasiyasının idmançıları medallar uğrunda mübarizə aparacaq.Turnirdə Azərbaycan da daxil olmaqla 11 ölkədən 900-dən artıq idmançı qüvvəsini sınayacaq.xeber100.com

Azərbaycan Həndbol Federasiyasının məlumatı əsasında

Qadın həndbolçular arasında Azərbaycan çempionatında doqquzuncu turun oyunları keçirilib.Azərbaycan Həndbol Federasiyasından Azərtac-a bildiriblər ki, ikinci dövrənin sonuncu turuna “Qarabağ” - “Azərsu” oyunu ilə start verilib. Nominal ev sahibinin favorit sayıldığı görüşdə azarkeşlər gərgin idman mübarizəsinin şahidi olublar. “Azərsu”nun ciddi müqavimətinə baxmayaraq, “Qarabağ” komandası oyunu qələbə ilə başa vurmağı bacarıb - 35:34.Günün digər matçında isə çempionatın lideri “Azəryol” autsayder “İdman Akademiyası” komandasını böyük fərqlə - 44:26 hesabı ilə məğlubiyyətə uğradıb.Bu qələbə sayəsində xal ehtiyatını 16-ya çatdıran “Azəryol” liderliyini davam etdirir. “Qarabağ” ondan 2 xal geri qalır. “Azərsu” 6 xalla üçüncüdür. “İdman Akademiyası” komandası bütün görüşlərdə məğlub olub.Beləliklə, qadın həndbolçular arasında ölkə çempionatında martın 4-dək fasilə olacaq. Yanvarın 15-də isə Azərbaycan kuboku turnirinə start veriləcək. Həmin gün “Azəryol” - “Azərsu”, “Qarabağ” – “İdman Akademiyası” görüşləri oynanılacaq.xeber100.com

Azərbaycan kuboku uğrunda yarışın dörddəbir final mərhələsində

Dekabrın 20-də futbol üzrə Azərbaycan kuboku uğrunda yarışın dörddəbir final mərhələsinin son iki cavab oyunu keçiriləcək.Azərtac xəbər verir ki, “Kapital Bank Arena”da keçirilən birinci oyunda “Sumqayıt” klubu “Neftçi” komandasını qəbul edəcək. Saat 17:00-da start götürəcək qarşılaşmanın baş hakim funksiyasını Rəvan Həmzəzadə yerinə yetirəcək.Komandalar arasında birinci oyunda sumqayıtlılar minimal hesabla qalib gəliblər – 1:0.Günün sonuncu qarşılaşmasında isə “Keşlə” komandası “ASCO Arena”da “Qarabağ” ilə görüşəcək. Rauf Cabbarovun idarə edəcəyi oyun saat 20:00-da başlayacaq.Bu komandaların birinci görüşündə “Qarabağ” rəqibini 1:0 hesabı ilə məğlub etmişdi.Qeyd edək ki, Azərbaycan kuboku uğrunda yarışın digər yarımfinalçıları “Qəbələ” və “Zirə” komandalarıdır. “Qəbələ” dörddəbir finalda “Sabah”ı (3:0, 3:2), “Zirə” isə “Səbail”i (0:0, 1:0) mübarizədən kənarlaşdırıb.Yarışın birinci yarımfinal qarşılaşmasında “Qəbələ” və “Zirə” komandaları üz-üzə gələcəklər. Digər yarımfinal matçında isə bugünkü oyunların qalibləri qarşılaşacaqlar. Yarımfinal mərhələsinin oyunları aprelin 22-də, cavab görüşləri isə bir həftə sonra təşkil ediləcək.Xatırladaq ki, Azərbaycan kuboku uğrunda turnirin sonuncu qalibi finalda “Sumqayıt” klubuna 1:0 hesabı ilə məğlub edən “Qəbələ” komandası olub.xeber100.com

İspaniya La Liqasının 10-cu turunun təxirə salınmış oyunu keçirilib

Dekabrın 19-da futbol üzrə İspaniya La Liqasının 10-cu turunun təxirə salınmış oyunu keçirilib.Azərtac xəbər verir ki, İspaniya çempionatının iki əzəli rəqibi “Barselona” və “Real Madrid” klubları qarşılaşıb. Gərgin hücumlarla yadda qalan birinci hissədə hesab açılmayıb. Fasilədən sonra irəli atılan hər iki komanda qapı qarşısında təhlükəli vəziyyətlər yaradıblar. Görüşün 71-ci dəqiqəsində Madrid təmsilçisi hesabı açsada hakim oyundan kənar vəziyyət qeydə alıb. Qalan dəqiqələrdə hesab dəyişilməyib.On yeddinci turdan sonra hər iki komanda 36 xal toplayaraq birinci və ikinci yerləri bölüşürlər.Qeyd edək ki, 93 min 426 nəfərin bir başa izlədiyi görüşdə hakim 7 sarı vərəqə göstərib.Bu komandalar indiyədək bütün turnirlərdə 275 dəfə qarşılaşıblar. Onlardan 115-də “Barselona”, 99-da “Real Madrid” qalib gəlibsə, 61 matçda heç-heçə qeydə alınıb. Kataloniyalılar top fərqində də üstündürlər – 482:446.Xatırladaq ki, təqvimə əsasən, cari mövsümün ilk “El-Klasiko”su oktyabrın 26-da olmalı idi. Lakin qarşılaşma Kataloniyanın müstəqilliyi ilə bağlı etiraz aksiyaları səbəbindən təxirə salındı.xeber100.com

Futbol üzrə dünya çempionatının finalçısı müəyyənləşib

Futbol üzrə klublararası dünya çempionatının ikinci finalçısı müəyyənləşib.Azərtac xəbər verir ki, ikinci yarımfinal oyununda İngiltərənin “Liverpul” klubu Meksikanın “Monterrey” komandası ilə qarşılaşıb. Gərgin idman mübarizəsi şəraitində keçən matçda ingiltərəlilər 2:1 hesabı ilə qalib gələrək finala yüksəliblər. Görüşdə hesabı 12-ci dəqiqədə “Liverpul”un yarımmüdafiəçisi Nabi Keyta vurub. 2 dəqiqə sonra Meksika təmsilçisinin hücumçusu Rogelio Funes hesaba tarazlıq gətirib. Oyunun taleyini “Liverpul”un braziliyalı hücumçusu Roberto Firminonun 91-ci dəqiqədə vurduğu qol həll edib.Digər yarımfinal görüşündə isə Braziliyanın “Flamenqo” komandası Səudiyyə Ərəbistanının “Əl Hilal”ını məğlub edərək finala yüksəlib.Klublararası dünya çempionatının finalı dekabrın 21-də Qətərin paytaxtı Dohadakı “Education City” stadionunda keçiriləcək.Qeyd edək ki, son üç ildə bu turnirin qalibi İspaniyanın “Real Madrid” klubu olub.xeber100.com

“Judo Club 2012” idman klubunun məlumatı əsasında…

Gürcüstanın Zuqdidi şəhərində cüdo üzrə yeniyetmələr arasında beynəlxalq turnir keçirilib. Yarışda Azərbaycanla yanaşı, Gürcüstan, Dağıstan, İnquşetiya və Ermənistandan 150-yə yaxın idmançı qüvvəsini sınayıb.“Judo Club 2012” idman klubundan Azərtac-a verilən məlumata görə, turnirdə ölkəmizi klubun 2003-2010-cu il təvəllüdlü yetirmələri təmsil ediblər.Əməkdar idman ustası, usta cüdoçular arasında dəfələrlə dünya və Avropa çempionu Zaur Paşayevin rəhbərliyi ilə Gürcüstana yollanan komandanın heyətində klubun həkimi Məhəmməd Hüseynzadə və 28 idmançı yer alıb. Klubun yetirmələri beynəlxalq turnirdə müxtəlif yaş qrupları üzrə yarışlarda 3 qızıl və 8 bürünc medal qazanıblar. Qızıl medallara Nicat Eyvazov (34 kq), Ruslan Quliyev (42 kq) və Abduləziz Məmmədov (66 kq) layiq görülüblər. Klubun aktivinə bürünc medalları Mirmehdi Aslanlı (24 kq), Cavanşir Comərdov (38 kq), Amil Həsənov (42 kq), Riad Mustafazadə (42 kq), Mehdi Cəfərov (55 kq), Nurlan Abdullayev (60 kq), Polad Əhmədov (81 kq) və Orxan Ağayev (+87 kq) yazdırıblar.Klubun idmançılarının uğuru bununla da yekunlaşmayıb. Belə ki, “Judo Club 2012”nin üzvü Əli Arzumanlı (38 kq) turnirin ən texnikalı və nizam-intizamlı cüdoçusu adına layiq görülüb.Qeyd edək ki, Əli Arzumanlı bu il Türkiyədə keçirilən “Qara dəniz” beynəlxalq turnirində çempion olub.xeber100.com

FIFA milli komandaların reytinq cədvəlini açıqlayıb

FIFA futbol üzrə milli komandaların növbəti reytinq cədvəlini açıqlayıb.Azərtac AFFA-ya istinadla xəbər verir ki, ötən ayla müqayisədə Azərbaycan milli komandasının mövqeyində dəyişiklik olmayıb. Millimiz 1177 xalla 114-cü pillədə qərarlaşıb.Qeyd edək ki, ilk üçlükdə də dəyişiklik olmayıb. Belçika 1765 xalla birinci, Fransa 1733 xalla ikinci, Braziliya isə 1712 xalla üçüncü pillədə yer alıblar.xeber100.com

Azərbaycan Voleybol Federasiyasının məlumatı

Lüksemburqda Avropa Voleybol Konfederasiyasının (CEV) baş qərargahında Qızıl və Gümüş Avropa liqalarının yeni mövsümü ilə bağlı iclas keçirilib.Azərbaycan Voleybol Federasiyasından (AVF) Azərtac-a bildiriblər ki, görüşdə CEV prezidenti Aleksandr Boriçiç, qurumun təmsilçiləri, bu yarışlarda mübarizə aparacaq 36 komanda və 23 federasiyanın rəsmiləri iştirak ediblər.İclasda ölkəmiz AVF-nin baş katibi Cəlil Cəfərov və idman şöbəsinin rəhbəri Elnur Məmmədovla təmsil olunub.Toplantıda bildirilib ki, “Dördlər finalı”nın mükafat fondu 305 min avro təşkil edəcək və bu vəsaitin 125 mini qalibə çatacaq. Gələn il baş tutacaq Qızıl Avropa Liqasında 12 qadın və 12 kişi, Gümüş Avropa Liqasında isə 6 qadın və 6 kişi komandası mübarizə aparacaq. Bu liqalar müvafiq olaraq, 3 və 2 qrupa bölünüblər. Qrup mərhələsində oyunlar ev-səfər prinsipi ilə keçiriləcək.Qızıl Avropa Liqasında mübarizə aparacaq qadınlardan ibarət milli komandamız C qrupunda qüvvəsini sınayacaq. Yığmamızın rəqibləri Ukrayna, İspaniya və Rumıniya voleybolçuları olacaqlar. Kişilərdən ibarət Azərbaycan yığması isə Gümüş Avropa Liqasına yarışacaq. A qrupunda yer alan millimiz Finlandiya və Xorvatiya ilə bir qrupda çıxış edəcək.İclasdan sonra CEV rəhbəri A.Boriçiç Azərbaycan nümayəndə heyəti ilə görüşüb. Görüş zamanı ölkəmizdə voleybolun inkişafı üçün görülən işlər, AVF-nin 2020-2024-cü illər üçün hazırladığı inkişaf planı haqqında ətraflı danışıqlar aparılıb. Həmçinin gələn il avrokuboklarda ölkəmizin 2 klubla iştirak etməsi də müzakirə mövzusu olub.xeber100.com

“Turkey Junior Open 2019” beynəlxalq badminton turniri davam edir

Ankarada “Turkey Junior Open 2019” beynəlxalq badminton turniri davam edir.Azərtac xəbər verir ki, 19 yaşadək badmintonçuların qatıldığı yarışda idmançılarımız 5 kateqoriyada 6 iştirakçı ilə təmsil olunur.Cavanşir Əlizadə, Vahid Quliyev və Teymur Abbasovdan ibarət məşqçilər korpusun rəhbərliyi altında qadın badmintonçuların şəxsi yarışında Nigar Əliyeva 1/32 finalda yerli idmançı Ezgi Hazal Ulusa 2:0 hesabı ilə qalib gəlib. İdmançımız onaltıdabir finalda digər türk idmançı Çağla Özayyıldızla qarşılaşacaq.Qeyd edək ki, “Turkey Junior Open 2019” turnirinə dekabrın 18-də yekun vurulacaq.xeber100.com