Formula-1 yarışlarının 2018-ci il mövsümü üçün təqvimi təsdiq edilib

Beynəlxalq Avtomobil Federasiyasının (FIA) Dünya Şurası Formula-1 yarışlarının 2018-ci il mövsümü üçün təqvimini rəsmən təsdiq edib.Azərtac xəbər verir ki, növbəti mövsüm 21 mərhələdən ibarət olacaq. İlk yarış martın 25-də, son yarış isə noyabrın 25-də təşkil olunacaq.Ölkəmizin üçüncü dəfə ev sahibliyi edəcəyi Azərbaycan Qran-Prisi isə aprelin 29-da təşkil olunacaq.İlkin təqvimlə müqayisədə böyük dəyişikliklər edilməyib, lakin gözlənildiyi kimi Çin və Bəhreyn mərhələləri yerlərini dəyişib. Mövsümün ikinci yarışı məhz Bəhreyndə, ardınca isə Çində keçiriləcək.xeber100.com

Kyokşin Karate Federasiyasının məlumatı

Dekabrın 9-da Rusiyanın Yekaterinburq şəhərində Ümumdünya Kyokşin İttifaqı (KWU) tərəfindən üçüncü dünya çempionatı start götürəcək.Azərbaycan Kyokşin Karate Federasiyasından Azərtac-a bildirilib ki, mötəbər yarışa federasiyanın prezidenti Allahverdi Rüstəmovun rəhbərliyi altında 7 idmançımız yola düşüb.Millimizin baş məşqçisi Samir Məmmədov, köməkçi məşqçi Namiq Vəliyev mundialda Solmaz Zeynallı (60 kq), Sevinc Mehdiyeva (55 kq), Emin İsmayıllı (65 kq), Valeh Cəfərov (70 kq), Nail Quliyev (75 kq), Mübariz Ağamalıyev (80 kq) və Etibar Ağalarova (85 kq) şans verəcəklər.Yarışların idarə edilməsində ölkəmizi beynəlxalq dərəcəli hakim Qələndər Aslanov təmsil edəcək.Qeyd edək ki, dünya çempionatına dekabrın 10-da yekun vurulacaq.xeber100.com

“Tour d’Azerbaidjan-2018” veloturunun keçirilmə vaxtı müəyyənləşib

Beynəlxalq Velosipedçilər İttifaqının (UCI) 2.1 kateqoriyalı “Tour d’Azerbaidjan-2018” veloturunun keçirilmə vaxtı müəyyənləşib.Azərtac xəbər verir ki, gələn il mayın 9-13-də planetin ən güclü şose velosiped komandaları yenidən Azərbaycanda mübarizə aparacaqlar. Beş günlük yarış artıq Beynəlxalq Velosipedçilər İttifaqının 2018-ci il üçün müəyyənləşdirdiyi təqvim planına da daxil edilib.“Tour d’Azerbaidjan-2018” şose velosipedi üzrə gələn ilin mayında qəbul edəcəyimiz yeganə yarış olmayacaq – sözügedən veloturda iştirak etmək üçün Azərbaycana gələcək komandalar mayın 8-də birgünlük “Bakı-Xızı Eko” turunda da yarışacaqlar. Beynəlxalq Velosipedçilər İttifaqının kifayət qədər yüksək səviyyəli yarışı hesab edilən 1.1 kateqoriyalı velotur da artıq qurumun təqvim planında yer alır.Xatırladaq ki, şose velosipedi üzrə gələn ilin mayında keçiriləcək bu 2 yarışdan əlavə, iyunun 5-9-da Bakıda velosiped idmanının BMX növü üzrə (Olimpiya idman növü) dünya çempionatı da təşkil olunacaq.xeber100.com

Dünya Oyunlarının taekvondo yarışları başa çatıb

Portuqaliyada IWAS versiyası üzrə fiziki məhdudiyyətli idmançılar arasında keçirilən Dünya Oyunlarının taekvondo yarışları başa çatıb.Azərtac xəbər verir ki, Oyunların sonuncu günündə qadınlar arasında mübarizəyə qoşulan Röyalə Fətəliyeva (49 kq, K44) bürünc medala sahib olub.Beləliklə, Dünya Oyunlarında 12 idmançı ilə təmsil olunan parataekvondo üzrə milli komandamız aktivinə bir qızıl, bir gümüş və üç bürünc medal əlavə edib.Xatırladaq ki, yarışların ilk günündə millinin kapitanı Nicat Müslümov iki kateqoriya üzrə döyüşlərə qatılıb. O, 75 kiloqram çəki dərəcəsində (K42) qızıl, 43 kateqoriyalı idmançıların yarışında gümüş medal əldə edib. Eyni kateqoriyada digər idmançımız Xəzər Mirzəyev və 75 kiloqramdan yuxarı çəki dərəcəsində çıxış edən Vüqar Adışirinov (K44) bürünc mükafata layiq görülüblər.Baş məşqçi Əvəz Tağıyevin və böyük məşqçi Yaşar Səfərovun yetirmələri komanda hesabında İran və Türkiyə komandalarından sonra üçüncü yerdə qərarlaşıblar.xeber100.com

“Qarabağ” klubu futbol üzrə sonuncu oyununu keçirib

Dekabrın 6-da Ağdamın “Qarabağ” klubu futbol üzrə UEFA Çempionlar Liqasının 2017-2018-ci il mövsümündə sonuncu oyununu keçirib.Azərtac xəbər verir ki, Azərbaycan çempionu turnirin qrup mərhələsinin sonuncu - altıncı turunda İtaliya paytaxtında “Roma” klubunun qonağı olub.Yetmiş iki min azarkeş tutumuna malik Romanın “Olimpiko” stadionunda keçirilən qarşılaşmanın birinci hissənin ilk dəqiqələri kəşfiyyat xarakteri daşıyıb. Oyunun 14-cü dəqiqəsində "Roma"nın futbolçusu Kostas Manolasın güclü zərbəsini "Qarabağ"ın qapıçısı İbrahim Şehiç dəf etməyi bacarıb. Növbəti təhlükəli vəziyyəti isə görüşün 22-ci dəqiqəsində "Qarabağ"ın oyunçusu Dino Ndlovu yaradıb. Hücumçunun güclü zərbəsinə baxmayaraq top qapıdan keçməyib.İlk hissəsinin sonunadək "Roma" futbolçuları Ağdam təmsilçisinin qapısı qarşısında təhlükəli vəziyyətlər yaratsalar da, İbrahim Şehiçin möhtəşəm oyunu görüşdə hesabın açılmasına imkan verməyib.“Roma” futbolçuları ikinci hissəyə daha fəal başlayıblar. Görüşün 53-cü dəqiqəsində İtaliya təmsilçisi istəyinə nail olub. Dieqo Perotti İbrahim Şehiçin səhvindən yararlanaraq oyunda hesabı açıb. Görüşün 83-cü dəqiqəsində “Qarabağ”ın futbolçusu Miçelin baş ilə zərbəsində bir az dəqiqlik çatmayıb. Komandaların cəhdlərinə baxmayaraq oyunun sonunadək hesab dəyişməyib.Beləliklə, görüş “Roma”nın 1:0 hesablı qələbəsi ilə yekunlaşıb.xeber100.com  

2017-2018-ci il mövsümünün qrup mərhələsində mübarizə başa çatacaq

Dekabrın 6-da “E”, “F”, “G” və “H” qruplarında yer alan komandalar arasında keçiriləcək qarşılaşmalarla UEFA Çempionlar Liqasının 2017-2018-ci il mövsümünün qrup mərhələsində mübarizə başa çatacaq.Azərtac xəbər verir ki, mötəbər turnirin “E” qrupunda “Liverpul” Moskvanın “Spartak” klubunu qəbul edəcək. “Sevilya” isə səfərdə Sloveniyanın “Maribor” komandası ilə üz-üzə gələcək. Bu qrupda “Liverpul”un 9, “Sevilya”nın 8, “Spartak”ın 6, “Maribor”un 2 xalı var.“F” qrupunda keçirdiyi bütün görüşlərdə qələbə qazanan “Mançester Siti” Ukraynada qrupun ikincisi “Şaxtyor” ilə qarşılaşacaq. Digər görüşdə isə bütün oyunlarda məğlubiyyətə uğrayan “Feyenord” qrupda üçüncü olan “Napoli”ni qəbul edəcək.“G” qrupunda birinci yeri əvvəlki turda təmin edən “Beşiktaş” Almaniya səfərində “Leypsiq”in qonağı olacaq. “Portu” komandası doğma divarlar arasında “Monako” ilə üz-üzə gələcək. “Leypsiq” və “Portu” komandalarının 7, “Monako”nun 2 xalı var.“H” qrupunda liderliyi əldən verməmək üçün “Tottenhem” komandasına Londonda Kiprin “APOEL” klubu ilə görüşdə heç-heçə də kifayət edir. Qrupda ikinci sırada yer alan “Real Madrid” isə Madriddə “Borussiya Dortmund” ilə üz-üzə gələcək. “Tottenhem”in aktivində 13, “Real Madrid”in 10 xalı var. “Borussiya Dortmund” və “APOEL” isə 2 xal toplayıblar.Bütün görüşlər Bakı vaxtı ilə saat 23:45-də başlayacaq.UEFA Çempionlar Liqasının səkkizdəbir final mərhələsinin püşkü dekabrın 11-də atılacaq.xeber100.com

Güləş Federasiyasının məlumatı

Qazaxıstanın paytaxtı Astanada Əməkdar Məşqçi Axmetcan Kazımbetovun xatirəsinə həsr olunan yeniyetmə güləşçilər arasında beynəlxalq turnir keçirilib.Azərbaycan Güləş Federasiyasından Azərtac-a bildiriblər ki, turnirdə sərbəst güləş üzrə yeniyetmələrdən ibarət yığma komandamızın üzvləri də iştirak ediblər.Azərbaycan komandası ilə yanaşı, Özbəkistan, Qırğızıstan, Rusiya və Qazaxıstan pəhləvanlarının iştirak etdikləri turnirdə güləşçilərimiz üç qızıl medal qazanıblar. Əlihəsən Əmirli (45 kq), Elvin Dünyamalıoğlu (65 kq) və Fuad Mayılov (80 kq) bütün rəqiblərinə qalib gələrək fəxri kürsünün ən yüksək pilləsində qərarlaşıblar.xeber100.com

Beynəlxalq Olimpiya Komitəsinin iclası keçirilib

Çərşənbə axşamı, dekabrın 5-də Lozannada (İsveçrə) Beynəlxalq Olimpiya Komitəsinin (BOK) İcraiyyə Komitəsinin iclası keçirilib. İclasın gündəliyinə 2018-ci il fevral ayında Cənubi Koreyanın Pxençxan şəhərində start veriləcək qış Olimpiya Oyunlarına rusiyalı idmançıların buraxılması barədə qərar məsələsi daxil edilib.İclasın yekunlarına əsasən Rusiya Olimpiya Komitəsi diskvalifikasiya edilib, RF yığması isə 2018-ci il Olimpiadasında iştirakdan kənarlaşdırılıb. Rusiyalı idmançılara neytral bayraq altında yarışmaq təklif olunub. “Təmiz” atletləri xüsusi komissiya seçəcək.BOK İcraiyyə Şurası qərara alıb ki, rusiyalılar “Rusiyada olan olimpiya idmançısı” statusu ilə fərdi və ya komanda idman növlərində yarışa bilərlər. Onlar Olimpiya bayrağı altında çıxış edəcək, bu idmançıların şərəfinə mərasimlərdə isə Olimpiya himni səslənəcək.Oyunların RF-dən olan iştirakçıları həm seçmə yarışlardan keçməli, həm də məxsusi onlar üçün müəyyən edilmiş “təmiz” atlet meyarlarına uyğun olmalıdırlar.Rusiya Olimpiya Komitəsinin prezidenti Aleksandr Jukovun BOK-da üzvlüyü dayandırılıb.Rusiyanın sabiq idman naziri, hazırda Baş nazirin müavini olan Vitali Mutko və onun keçmiş müavini Yuri Naqornıx olimpiadalarda iştirakdan ömürlük kənarlaşdırılıblar.“Soçi-2014” Olimpiadasının Təşkilat Komitəsinin keçmiş rəhbəri Dmitri Çernışenko Pekində keçiriləcək 2022-ci il Olimpiya Oyunlarının Əlaqələndirmə Komissiyasından çıxarılıb.Həmçinin bildirir ki, Rusiya Olimpiya Komitəsi BOK-un təhqiqatlar üçün çəkdiyi xərclərin əvəzinin ödənilməsi üçün 15 milyon dollar məbləğində cərimə edilib. Bu vəsait qlobal antidopinq sisteminin inkişafına yönəldiləcək.BOK belə bir halı istisna etmir ki, əgər Rusiya Olimpiya Komitəsi Pxençxanda Oyunların bağlanış mərasiminə qədər bütün tələbləri yerinə yetirərsə, onun kənarlaşdırılması qismən və ya tamamilə ləğv edilə bilər.Bu qərar Samuel Şmidin və Denis Osvaldın rəhbərlik etdiyi iki komissiyanın məruzəsi əsasında qəbul edilib. Həmin komissiyalar Riçard Maklarenin rəhbərliyi ilə Ümumdünya Antidopinq Agentliyinin (WADA) məruzəsində şərh edilən, RF-yə ünvanlanmış ittihamları araşdırıblar.xeber100.com  

Aerobika gimnastikası üzrə ölkə çempionatı keçirilir

Dekabrın 6-da Milli Gimmastika Arenasında akrobatika gimnastikası üzrə Bakı çempionatı və birinciliyi, aerobika gimnastikası üzrə Azərbaycan və Bakı birinciliyi, tamblinq üzrə Azərbaycan birinciliyi və Bakı çempionatı start götürüb.Azərtac xəbər verir ki, yarışların birinci günündə balacalar, uşaqlar, yeniyetmələr və böyüklər yaş kateqoriyalarına daxil olan akrobatlar, 7-8, 9-11 və 12-14 yaşlı aerobika gimnastları medallar uğrunda mübarizə aparırlar. Tamblinq cığırında isə balacalar və yeniyetmələr yaş kateqoriyalarına aid gimnastlar arasında ən yaxşılar müəyyənləşəcək.Gimnastlar qarışıq cütlüklər, kişi qrupu, kişi cütlükləri, qadın qrupları və cütlükləri halında bacarıqlarını nümayiş etdirirlər.xeber100.com

“Qəbələ” idman klubu əməkdaşlıq müqaviləsi imzalayıb

“Qəbələ” idman klubu ilə AVIS şirkəti arasında əməkdaşlıq müqaviləsi yenilənib.Azərtac xəbər verir ki, müqaviləyə əsasən, AVIS “Qəbələ”ni daha 1 il nəqliyyat vasitələri ilə təmin edəcək.AVIS reklamları “Qəbələ”nin ev oyunlarının keçirildiyi meydançanın ətrafındakı lövhələrdə, oyun sonrası mətbuat konfranslarında arxa fon lövhəsində və klubun rəsmi saytında yerləşdiriləcək.Bundan əlavə, hər iki qurum keçirəcəkləri sosial məsuliyyət və ya marketinq kampaniyalarında bir-birilərini dəstəkləyəcək və birgə fəaliyyət göstərəcəklər.xeber100.com