“Neftçi” klubu “Qəbələ”ni qəbul edib

Noyabrın 19-da futbol üzrə Azərbaycan Premyer Liqasının XII turunun son matçında "Neftçi" klubu doğma meydanda "Qəbələ"ni qəbul edib. Azərtac xəbər verir ki, "Baksel Arena"da baş hakim Rauf Cabbarovun idarə etdiyi oyun "Qəbələ"nin 3:2 hesablı əzmkar qələbəsi ilə başa çatıb."Neftçi"nin heyətində qolları 19-cu dəqiqədə Emin Mahmudov, 48-ci dəqiqədə Kirill Petrov vurublar. "Qəbələ"nin heyətində isə 21-ci dəqiqədə Baqali Dabo, 56-cı dəqiqədə 11 metrlik cərimə zərbəsindən Ruslan Qurbanov, 80-ci dəqiqədə isə Stiven Monroz fərqləniblər.Bu oyunda Azərbaycan milli komandasının futbolçusu Emin Mahmudov "Neftçi"nin heyətində ilk qolunu vurub."Qəbələ"nin fransalı hücumçu Baqali Dabo aktivindəki qolların sayını altıya çatdıraraq çempionatın bombardirləri siyahısında vahid lider olub."Qəbələ" klubu bu qələbədən sonra aktivinə üç xal əlavə edərək xallarının sayını 25-ə çatdırıb və üçüncü pillədəki mövqeyini möhkəmləndirib. Paytaxt təmsilçisi isə 13 xalla beşinci yerdə qərarlaşıb.Eyni zamanda, "Qəbələ" "Neftçi" ilə Azərbaycan çempionatının oyunlarında qələbə sayında bərabərləşib. Hər iki komandanın hesabında 15 qalibiyyət mövcuddur.Qeyd edək ki, turnir cədvəlinə 28 xalla "Qarabağ" başçılıq edir. "Zirə" klubu 27 xalla ikinci pillədədir. İlk üçlükdə isə 25 xalla "Qəbələ" qərarlaşıb. Digər pillələrdə müvafiq olaraq "Sumqayıt" (16), "Neftçi" (13 xal), "Səbail" (12), "Keşlə" (8) və "Kəpəz" (7) yer alıblar.xeber100.com

“Chengdu Business Daily” qəzeti yazır…

Çin Futbol Assosiasiyası (ÇFA) 2030-cü ildə futbol üzrə dünya çempionatına ev sahibliyi etmək üçün namizədliyini irəli sürməyib. Assosiasiya bununla bağlı yayılan fikirlərə cavab olaraq bildirib ki, Çinin mundialın təşkili üçün müraciət etmək barədə planı yoxdur.Azərtac xəbər verir ki, ÇFA yerli “Chengdu Business Daily” qəzetinin ölkənin futbol üzrə yığma komandasının baş məşqçisi Marçello Lippiyə istinadla Çinin 2030-cu ildə dünya çempionatına ev sahibliyi üçün müraciət edəcəyi ilə bağlı xəbərləri təkzib edib. Assosiasiya jurnalistlərin Lippinin sözlərini yanlış başa düşdüklərini bəyan edib.Qəzetin bu barədəki xəbərindən sonra “Sina Weibo” sosial şəbəkəsinin 15 milyondan çox istifadəçisi Çinin futbol üzrə dünya çempionatına ev sahibliyi etməsini ölkə üçün faydasız hesab ediblər. Onlar milli komandanın gələn il Rusiyada təşkil olunacaq dünya çempionatına vəsiqə qazanmaq gücündə olmadığı halda, 2030-cu ildəki yarışa ev sahibliyini ayıb və xeyli maliyyə vəsaitinin göyə sovrulması kimi qiymətləndirib, həmin vəsaitin daha vacib istiqamətlərə, məsələn futbolçuların yetişdirilməsinə yönəltməyin məqsədəuyğun olduğunu bildiriblər.Qeyd edək ki, mart ayında Cənubi Koreya Futbol Assosiasiyasının prezidenti Çun Mun-qyu 2030-cu ildə futbol üzrə dünya çempionatını ölkəsinin Çin, Yaponiya və Şimali Koreya ilə birgə təşkil etməsi təklifini irəli sürmüşdü.xeber100.com

Futbol üzrə yoldaşlıq oyunu keçirilib

Tbilisidə futbol üzrə 17 yaşadək qızlardan ibarət Azərbaycan və Gürcüstan yığma komandaları arasında yoldaşlıq oyunu keçirilib.Azərtac AFFA-ya istinadla xəbər verir ki, qarşılaşma 2:2 hesabı ilə başa çatıb.Yığmamızın qollarını Umnisə Əliyeva və Melis Ersoy vurublar.xeber100.com

Cüdoçular arasında ölkə birinciliyinə yekun vurulub

“Sərhədçi” İdman Olimpiya Mərkəzində yeniyetmə cüdoçular arasında Azərbaycan birinciliyinə yekun vurulub.Azərtac xəbər verir ki, yarışın sonuncu günündə 119 yeniyetmə cüdoçu medallar uğrunda mübarizə aparıb.Birincilikdə 73, 81, 90 kiloqram və 90 kiloqramdan yuxarı çəki dərəcələrində qaliblər müəyyənləşib. Hacıbala Cəbrayılov, İbrahim Ağakişiyev, Yaqub İsmayılzadə və Toğrul Salmanov ölkə birinciliyində son günün qalibi olublar. Qeyd edək ki, cüdo üzrə Azərbaycan birinciliyində 565 idmançı mübarizə aparıb. Birinciliyin qalibləri və perspektivli cüdoçular yeniyetmələrdən ibarət milli komandanın heyətinə cəlb olunacaq.xeber100.com

Premyer Liqasının XII turu çərçivəsində

Gəncənin “Kəpəz” futbol klubunun baş məşqçisi Şahin Diniyev istefa verib.Azərtac xəbər verir ki, 51 yaşlı mütəxəssis qərarını Azərbaycan Premyer Liqasının XII turu çərçivəsində “Səbail” ilə qarşılaşmadan 3:2 hesablı məğlubiyyətdən sonra mətbuat konfransında açıqlayıb.Qeyd edək ki, hazırda “Kəpəz” 12 oyundan sonra yeddi xalla sonuncu pillədə qərarlaşıb.xeber100.com

Gimnastika Federasiyası könüllülərin qəbulunu elan edir

Azərbaycan Gimnastika Federasiyası 2018-ci ildə Bakıda keçiriləcək beynəlxalq yarışların yüksək səviyyədə təşkili üçün könüllülərin qəbulunu elan edir.Azərtac xəbər verir ki, könüllülər yarışlara qatılacaq nümayəndə heyətlərini müşayiət etmək, tibbi xidmət, akkreditasiya, yarışların katibliyi, mükafatlandırma və digər sahələr üzrə fəaliyyət göstərəcəklər.Həmçinin könüllülər martın 15-18-də idman gimnastikası üzrə dünya kuboku, aprelin 12-15-də batut gimnastikası, tamblinq və ikili mini batut üzrə Avropa çempionatı, aprelin 27-29-da bədii gimnastika üzrə dünya kuboku və iyunun 22-23-də yeniyetmələr arasında Olimpiya Oyunlarına idman gimnastikası üzrə təsnifat xarakterli yarışlarda iştirak hüququ qazanacaqlar.xeber100.com

Xorvatiya Futbol Assosiasiyasının məlumatı

Futbol üzrə Xorvatiya millisinin baş məşqçisi Zlatko Daliçin yığmadakı taleyinə aydınlıq gəlib.Azərtac xəbər verir ki, Xorvatiya Futbol Assosiasiyasının rəsmi saytının yaydığı xəbərə görə, o, vəzifəsində qalıb. Gələn həftə 51 yaşlı mütəxəssislə müqavilə imzalanacaq.Komandanı gələn il Rusiyada keçiriləcək dünya çempionatına məhz Daliç aparacaq.Qeyd edək ki, Ante Çaçiçin istefaya göndərilməsindən sonra Xorvatiya Futbol Assosiasiyası Zlatko Daliçi müvəqqəti bu vəzifəyə təyin etmişdi.xeber100.com

UEFA Gənclər Liqasının qrup mərhələsi çərçivəsində…

AFFA-nın baş katibinin müavini Sərxan Hacıyev UEFA tərəfindən yeni təyinat alıb.Azərtac AFFA-ya istinadla xəbər verir ki, UEFA Gənclər Liqasının qrup mərhələsi çərçivəsində keçiriləcək “Maribor” (Sloveniya)–“Sevilya” (İspaniya) oyununun UEFA nümayəndəsi Sərxan Hacıyev olacaq.Görüş dekabrın 6-da Sloveniyanın Lendava şəhərində keçiriləcək.xeber100.com

Cüdoçular arasında keçirilən Azərbaycan birinciliyi yekunlaşır

“Sərhədçi” İdman Olimpiya Mərkəzində yeniyetmə cüdoçular arasında keçirilən Azərbaycan birinciliyi davam edir.Azərtac xəbər verir ki, yarışın ikinci günündə 224 yeniyetmə cüdoçu tatami üzərinə çıxıb. Ölkə birinciliyində 55, 60 və 66 kiloqram çəki dərəcələrində mübarizə aparan iştirakçılar arasında qaliblər müəyyənləşib. Gərgin idman mübarizəsi şəraitində keçən yarışda Rəşad Quluzadə (55 kq), Nəriman Mirzəyev (60 kq) və Orduxan Məmmədov (66 kq) fəxri kürsünün ən yüksək pilləsinə qalxıblar.Qeyd edək ki, yeniyetmələrin ölkə birinciliyinə noyabrın 17-də yekun vurulacaq. Respublika birinciliyinin sonuncu günündə medallar uğrunda 73, 81, 90 kiloqram və 90 kiloqramdan yuxarı çəki dərəcələrində 119 cüdoçu mübarizə aparacaq.xeber100.com

XIII Respublika Spartakiadası davam edir

“Gənclik “Tələbə İdman Cəmiyyəti Respublika Şurasının təşkilatçılığı orta ixtisas təhsil müəssisələrinin tələbələri arasında XIII Respublika Spartakiadası davam edir.Azərtac xəbər verir ki, spartakiadanın təqvim planına idmanın 6 növü daxil edilib. Qızlar və oğlanlar arasında atletika, şahmat, dama, voleybol, basketbol və stolüstü tennis üzrə yarışlar keçirilir.Şahmat üzrə yarış Azərbaycan Dövlət Pedaqoji Kollecin idman zalında təşkil olunub.Gərgin idman mübarizəsi şəraitində keçən yarışda oğlanların mübarizəsində Azərbaycan Dövlət Pedaqoji Kollecinin tələbələri qalib adını qazanıblar. Qızların yarışında isə Bakı 2 nömrəli Baza Tibb Kollecinin komandası fəxri kürsünün ən yüksək pilləsinə qalxıb.xeber100.com