Formula-1 üzrə dünya çempionatının 15-ci mərhələsində

Formula-1 üzrə dünya çempionatının 15-ci mərhələsi – Malayziya Qran-Prisi “Red Bull Racing” komandasının hollandiyalı pilotu Maks Verstappenin qələbəsi ilə başa çatıb.Azərtac xəbər verir ki, start xəttindən liderliyi ələ keçirən 20 yaşlı pilot bu üstünlüyü finişədək qorumağı bacarıb və mövsümdə birinci, karyerasında isə ikinci qələbəsinə imza atıb. O, 5,543 kilometr uzunluğundakı trekdə 56 dövrəni 1 saat 30 dəqiqə 01,29 saniyəyə başa vuraraq qalib gəlib.Çempionatın lideri - “Mersedes”in britaniyalı pilotu Luis Hamilton ikinci (+12,770), M.Verstappenin komanda yoldaşı Daniel Rikkiardo isə (22,519) üçüncü olublar.Beləliklə, 15 mərhələdən sonra pilotların yarışında liderlik 281 xala sahib olan L.Hamiltona məxsusdur. “Ferrari”nin almaniyalı pilotu Sebastian Vettel 247 xalla ikincidir. “Mersedes” komandasının finlandiyalı pilotu Vallteri Bottas isə 222 xalla üçüncü yerdə qərarlaşıb.Konstruktorların siyahısına 503 xalla “Mercedes” kollektivi başçılıq edir. “Ferrari”nin 385, “Red Bull Racing”in 270 xalı var.Dünya çempionatının növbəti mərhələsi oktyabrın 6-8-də Yaponiyada keçiriləcək. Builki çempionata noyabrın 24-26-da təşkil olunacaq Abu-Dabi Qran-Prisi ilə yekun vurulacaq.Xatırladaq ki, Formula-1 dünya çempionatının səkkizinci mərhələsi – Azərbaycan Qran-Prisi bu il iyunun 23-25-də Bakıda keçirilib.xeber100.com

Gimnastika Federasiyasının məlumatı

Portuqaliyada keçirilən Dünya Kuboku yarışlarında batut gimnastikası üzrə yığma komandamızın üzvü Mixail Malkin tamblinq cığırında qələbə qazanıb.Azərbaycan Gimnastika Federasiyasından Azərtac-a bildiriblər ki, 20-dən çox ölkənin idmançılarının iştirak etdikləri turnirin təsnifat mərhələsində inamlı çıxışı ilə hakimlərdən ən yüksək xal alan gimnastımız final mərhələsinə vəsiqəni təmin edib. Həlledici mərhələdə də proqramını qüsursuz icra edən idmançımız bütün rəqiblərini geridə qoyaraq Dünya Kubokunun qızıl medalına sahib olub.Xatırladaq ki, M.Malkin bu ilin fevralında Bakıda təşkil olunmuş Dünya Kuboku mərhələsində gümüş medal qazanıb. Gimnastımız oktyabrın ilk həftəsində İspaniyada keçiriləcək beynəlxalq turnirdə və noyabrın 9-11-də Sofiyada təşkil ediləcək dünya yaş qrupu yarışlarında iştirak edəcək.xeber100.com

Kütləvi futbol həftəsi festivalı keçirilib

Heydər Əliyev Mərkəzinin ərazisində AFFA tərəfindən kütləvi futbol həftəsi festivalı keçirilib.Azərtac AFFA-ya istinadla xəbər verir ki, layihənin məqsədi futbolun kütləviliyini artırmaq, uşaqların və yeniyetmələrin asudə vaxtlarının səmərəli təşkili, onlarda futbola və idmanın digər növlərinə maraq yaratmaq, sağlam həyat tərzini təbliğ etməkdir.Əlli uşağın qatıldığı festivalın ən gənc iştirakçısı 2015-ci il təvəllüdlü Ruqeyya Rəsulova olub.Sonda festival iştirakçılarına AFFA tərəfindən hədiyyələr təqdim edilib.xeber100.com

“Olimpiya Gündəliyi-2020” mövzusunda seminar-konfrans işə başlayıb

Oktyabrın 3-də Bakıda Avropa Milli Olimpiya akademiyalarının iştirakı ilə “Olimpiya Gündəliyi-2020 və Olimpiya hərəkatının gələcəyi” mövzusunda seminar-konfrans işə başlayıb.Azərtac xəbər verir ki, tədbirdə Azərbaycan Milli Olimpiya Komitəsinin (MOK) vitse-prezidenti Ç.Hüseynzadə, Avropa Olimpiya Akademiyaları Assosiasiyasının prezidenti M.Leammer vitse-prezidenti M.Bulatova, MOK-un baş katibi A.Abıyev iştirak ediblər.Qeyd olunub ki, Azərbaycan Milli Olimpiya Komitəsinin yaranmasının 25 illiyi ilə əlaqədar MDB, Baltikyanı ölkələr və Gürcüstanın Milli Olimpiya Komitələrinin Forumu və Avropa Olimpiya Komitələrinin İcraiyyə Komitəsinin iclası ölkəmizdə təşkil olunub. Bu da Azərbaycanda Olimpiya hərəkatının inkişafından xəbər verir. MOK-un 25 illik yubileyi münasibətilə silsilə tədbirlərə MOA-nın seminarının daxil olması da təsadüfi deyil. MOK Olimpiya hərəkatı, xüsusilə “Olimpiya Gündəliyi-2020”nin təbliği ilə fəal şəkildə məşğuldur. Buna görə də MOK-da “Olimpiya Gündəliyi-2020” Komissiyası işə başlayıb.xeber100.com

Çimərlik voleybolu üzrə beynəlxalq turnir keçiriləcək

Oktyabrın 11-dən 14-dək Bakıda çimərlik voleybolu üzrə beynəlxalq turnir keçiriləcək.Azərbaycan Voleybol Federasiyasından Azərtac-a bildiriblər ki, yarışda kişilər arasında Azərbaycan, Avstriya, Çexiya, Danimarka, Finlandiya, Fransa, Yunanıstan, İtaliya, Latviya, Hollandiya, Rusiya, Sloveniya, İsveç, Türkiyə və Ukrayna voleybolçuları mübarizə aparacaqlar.Qadınların mübarizəsində isə Azərbaycan, Avstriya, Belçika, Belarus, Cənubi Kipr, Çexiya, Danimarka, Fransa, Almaniya, Yunanıstan, Macarıstan, Hollandiya, Rusiya, Şotlandiya, Sloveniya və İsveç təmsilçiləri yarışacaqlar.Azərbaycanı turnirdə Ruslan Əliyev–Vüsal Qurbanov, Vadim Kutukov–Pərviz Səmədov, Fidan Ağaməmmədova–Dünya Vəliyeva, İlhamə Əliyeva–İrina Abbaszadə və Nazilə Səlimova–Viktoriya Ağakişiyevadan ibarət cütlüklər təmsil edəcək.Qeyd edək ki, yarışın mükafat fondu 4 min avro olacaq.xeber100.com

Uşaq-Gənclər Futbol Federasiyasının təşkilatçılığı ilə…

Uşaq-Gənclər Futbol Federasiyasının təşkilatçılığı ilə Mingəçevirdə 12-13 yaşlı uşaqlar arasında futbol turniri keçirilib.Azərtac AFFA-ya istinadla xəbər verir ki, yarışda Ağdam, Bərdə, Ağcabədi, Şəki, Naftalan, Oğuz, Ağdaş və Mingəçevirdən, ümumilikdə 10 komanda iştirak edib.Yekunda “Bərdə” komandası turnirin qalibi olub. “Mingəçevir-1” ikinci, “Oğuz” isə üçüncü pilləni tutub.Mükafatçılara kubok və diplomlar təqdim olunub.xeber100.com

U-17 komandası İslandiya yığması ilə qarşılaşıb

Futbol üzrə 17 yaşadək qızlardan ibarət komandalar arasında təşkil edilən Avropa çempionatının seçmə mərhələsində Azərbaycan millisi ilk oyununu keçirib.Azərtac AFFA-ya istinadla xəbər verir ki, Bakıda İslandiya ilə qarşılaşan yığmamız 0:2 hesabı ilə məğlub olub.Millimiz növbəti oyununu oktyabrın 5-də İspaniya yığmasına qarşı keçirəcək.xeber100.com

Voleybol üzrə Avropa çempionatının mükafatlandırma mərasimi keçirilib

Oktyabrın 1-də Bakıda Milli Gimnastika arenasında qadınlar arasında voleybol üzrə Avropa çempionatının mükafatlandırma mərasimi keçirilib.Azərtac xəbər verir ki, tədbirdə Avropa çempionatının finalçıları Serbiya, Niderland və Türkiyə voleybol komandaları meydana dəvət olunub.Avropa çempionatında Türkiyə millisi bürünc, Niderland komandası gümüş, Serbiya yığması isə qızıl medallarla mükafatlandırılıb.Mərasimdən öncə Avropa Voleybol Konfederasiyasının Prezidenti Aleksandar Boriçiç Serbiya voleybol millisinin kapitanı Melisa Rasiçə çempionluq kubokunu təqdim edib.Mərasim çərçivəsində əvvəlcə turnirin ən yaxşı voleybolçularının mükafatlandırma mərasimi keçirilib. Serbiya voleybol komandasının 9 nömrəli oyunçusu Brankisiya Mihajloviç və Niderland yığmasının 11 nömrəli oyunçusu Anne Bujisə “Ən yaxşı hücumçu”, Türkiyə yığmasının oyunçusu Eda Erdem Dündara “Ən yaxşı orta blokçu”, Serbiya millisinin voleybolçuları Stefana Veljkoviçə “Ən yaxşı blok oyunçusu”, Tijana Boskoviçə “Ən dəyərli oyunçusu”, Niderland millisinin üzvləri Lonneke Sloejesə “Ən yaxşı diaqonal oyunçusu”, Laura Dijkemə “Ən yaxşı toppaylayıcı”, Azərbaycan voleybol yığmasının oyunçusu Valeriya Məmmədovaya isə “Ən yaxşı libero” mükafatları təqdim edilib.Sonra birinci, ikinci və üçüncü yerlərin sahiblərinə medallar verilib.Avropa çempionatının qalibləri Serbiya millisinə qızıl medalları Avropa Voleybol Konfederasiyasının Prezidenti Aleksandar Boriçiç və Azərbaycanın gənclər və idman naziri Azad Rəhimov təqdim edib.Serbiya millisinin himni səsləndirilib.İkinci yerdə qərarlaşmış Niderland millisinin voleybolçularına gümüş medalları Avropa Voleybol Konfederasiyasının vitse-prezidenti Özkan Mutlugil və Gürcüstan Voleybol Federasiyasının prezidenti İrali Çaçua veriblər.Üçüncü yerdə qərarlaşmış Türkiyə millisinin üzvlərinə isə bürünc medalları gənclər və idman nazirinin müavini İsmayıl İsmayılov və Azərbaycan Voleybol Federasiyasının Prezidenti Elşən Əfəndiyev təqdim ediblər.xeber100.com

2018-ci il dünya çempionatının seçmə qrup mərhələsi çərçivəsində

Futbol üzrə Azərbaycan milli komandasının 2018-ci il dünya çempionatının seçmə qrup mərhələsi çərçivəsindəki Çexiya yığması ilə oyunun hakimləri müəyyənləşib.Azərtac UEFA-nın rəsmi saytına istinadla xəbər verir ki, qarşılaşmanı fransalı hakimlər briqadası idarə edəcək. Oyunun baş hakimi Benua Miyo olacaq. Ona həmyerliləri - yan xətt hakimləri Julien Paçelli və Bertran Juanno kömək edəcəklər. Matçda dördüncü hakim funksiyasını Frank Şnayder yerinə yetirəcək.Qeyd edək ki, "C" qrupunda yer alan Azərbaycan millisi Çexiya ilə oktyabrın 5-də Bakı Olimpiya Stadionunda qarşılaşacaq. Görüşə saat 20:00-da start veriləcək.Qrupda Almaniya 21 xalla vahid liderdir. Şimali İrlandiya 16 xalla ikinci, Azərbaycan 10 xalla üçüncü, Çexiya 9 xalla dördüncü, Norveç 7 xalla beşinci, hesabında xal olmayan San-Marino isə sonuncu pillədə qərarlaşıb.xeber100.com

Ümumdünya Boks Şurasının 55-ci Konvensiyasının açılış mərasimi keçirilib

Oktyabrın 2-də Bakıda Ümumdünya Boks Şurasının (WBC) 55-ci Konvensiyasının açılış mərasimi keçirilib.Azərtac xəbər verir ki, əvvəlcə boksun tarixindən bəhs edən videoçarx nümayiş olunub.Azərbaycanın gənclər və idman naziri Azad Rəhimov tədbirə dünyanın ən məşhur boksçularının qatıldığını vurğulayaraq, Konvensiyanın boksun inkişafına yeni təkan verəcəyini diqqətə çatdırıb. Nazir bildirib ki, Azərbaycan müstəqilliyini bərpa etdikdən sonra ilk dəfə 1996-cı ildə Atlanta Yay Olimpiya Oyunlarına qatılıb və 1 medala sahib olub. Ötən il idmançılarımız Rio-de-Janeyroda təşkil olunan Olimpiadada 18 medal qazanıblar. Bu, Azərbaycan dövlətinin idmanın inkişafına göstərdiyi yüksək diqqət və qayğının təzahürüdür.“Azərbaycan dünyada idman ölkəsi kimi tanınır. Ölkəmizdə irimiqyaslı yarışların təşkili üçün beynəlxalq standartlara cavab verən idman infrastrukturu var. Milli Gimnastika Arenası, Bakı Atıcılıq Mərkəzi və Bakı Olimpiya Stadionu möhtəşəmliyi ilə fərqlənir”, - deyə A.Rəhimov əlavə edib.Azərbaycanın boks üzrə də mühüm nailiyyətlərinin olduğunu qeyd edən Azad Rəhimov Məhəmmədrəsul Məcidovun Almaniyada üçqat dünya çempionu adını qazandığını xatırladıb.Sonra Konvensiyaya qatılan çempionlar təqdim edilib. Ardınca dünya çempionu Vitali Kliçkonun karyerasından bəhs edən qısa film nümayiş olunub.V.Kliçko yüksək təşkilatçılığa görə Azərbaycan hökumətinə minnətdarlığını bildirib. Qeyd edib ki, Azərbaycanda idmanın inkişafı üçün hər cür şərait var. O, idmana göstərdiyi qayğıya və Konvensiyanın yüksək səviyyədə keçirilməsində dəstəyinə görə Prezident İlham Əliyevə minnətdarlığını bildirib.“Azərbaycan gözəl ölkədir. Burada idman infrastrukturu beynəlxalq standartlara cavab verir. Ümid edirəm ki, Azərbaycan boksçuları WBC-də çempion olacaqlar. Çünki burada kifayət qədər peşəkar boksçular var”, - deyə V.Kliçko vurğulayıb.Konvensiya digər təqdimatlarla davam edib.xeber100.com