Avropa çempionatının final mərhələsi çərçivəsində

Sentyabrın 25-də Azərbaycanda və Gürcüstanda təşkil edilən qadın voleybolçular arasında Avropa çempionatının final mərhələsi çərçivəsində günün və qrup mərhələsinin sonuncu oyunu Türkiyə və Ukrayna komandaları arasında keçirilib.Azərtac xəbər verir ki, Bakıda, Milli Gimnastika Arenasında keçirilən oyunda “C” qrupunda qərarlaşan komandalardan pley-off mərhələsinə sonuncu vəsiqənin sahibi məlum olub.Matçın birinci və ikinci setində Türkiyə millisi rəqibini 25:20 və 25:19 hesabı ilə məğlub edib. Görüşün üçüncü setində təşəbbüsü ələ alan Ukrayna yığması hesab arasındakı fərqi azaltmağa nail olub - 25:20. Lakin ukraynalı voleybolçuların bundan artığına gücü çatmayıb. Qarşılaşmanın dördüncü setində Türkiyə kollektivi rəqibin müqavimətinə baxmayaraq, 25: 23 hesabı ilə qalib gəliblər.Beləliklə, ümumi nəticədə Ukrayna millisindən 3:1 hesabı ilə üstün olan Türkiyə yığması turnirdə ilk qələbəsini qazanıb. Bununla da xallarının sayını 4-ə çatdıran qardaş ölkə təmsilçisi pley-off mərhələsinə sonuncu vəsiqənin sahibi olub.Ukrayna komandası isə yarışı 2 xalla qrup sonuncusu kimi başa vurub.xeber100.com

UEFA Çempionlar Liqasının ikinci turun oyunlarına start veriləcək

Sentyabrın 26-da UEFA Çempionlar Liqasının qrup mərhələsində ikinci turun oyunlarına start veriləcək.Azərtac xəbər verir ki, ikinci turun ilk günündə “E”, “F”, “G” və “H” qruplarında yer alan komandalar qarşılaşacaqlar. “G” qrupunda yer alan İstanbulun “Beşiktaş” komandası doğma meydanda Almaniyanın “Leyptsiq” klubunu qəbul edəcək.Oyunlar Bakı vaxtı ilə 22:45-də başlayacaq.İkinci tur çərçivəsində aşağıdakı görüşlər keçiriləcək: “E” qrupu "Sevilya" (İspaniya) - "Maribor" (Sloveniya) "Spartak" (Moskva, Rusiya) - "Liverpul" (İngiltərə) “F” qrupu “Napoli” (İtaliya) – “Feyenoord” (Hollandiya) “Mançester Siti” (İngiltərə) – “Şaxtyor” (Donetsk, Ukrayna) “G” qrupu “Beşiktaş” (Türkiyə) – “Leyptsiq” (Almaniya) “Monako” (Fransa) – “Porto” (Portuqaliya) “H” qrupu “Borussiya Dortmund” (, Almaniya) – “Real Madrid” (İspaniya) APOEL (Kipr) – “Tottenhem” (İngiltərə).xeber100.com

Boksçular arasında Avropa birinciliyi başa çatıb

Bolqarıstanın Albena şəhərində keçirilən yeniyetmə boksçular arasında Avropa birinciliyi başa çatıb. Azərbaycan millisi yarışda iki bürünc medal qazanıb.Azərtac xəbər verir ki, Vaqif Kazımovun rəhbərlik etdiyi komandada Səlim Səlimov (63 kq) və Murad Allahverdiyev (75 kq) fəxri kürsüdə yer alıblar.Səlim Səlimov Miçak Jarlinski (Polşa) və Elvin Əliyevə (Ukrayna) qalib gələrək yarımfinala yüksəlib. Bu mərhələdə ingiltərəli Cek Olifantla qarşılaşan boksçumuz finala adlaya bilməyib.Murad Allahverdiyev isə moldovalı Pavel Platonu, belaruslu Denis Lapuşanskini və ermənistanlı Rafael Hovannisyanı mübarizədən kənarlaşdırıb. Azərbaycan təmsilçisi yarımfinalda bolqarıstanlı Daniel Lyubenov səddini keçə bilməyərək bürünc medalla kifayətlənməli olub.Birincilikdə 32 ölkədən 260 boksçu qüvvəsini sınayıb.xeber100.com

UEFA Çempionlar Liqasının qrup mərhələsinin ikinci turunda

Futbol üzrə UEFA Çempionlar Liqasının qrup mərhələsinin ikinci turunda “C” qrupunda yer alan Ağdamın “Qarabağ” komandası ilə İtaliyanın “Roma” klubu arasında keçiriləcək oyunu portuqaliyalı hakimlər briqadası idarə edəcək.Azərtac UEFA-nın saytına istinadla xəbər verir ki, sentyabrın 27-də Bakı Olimpiya Stadionunda oynanılacaq görüşün baş hakimi Artur Dias olacaq. Ona həmyerliləri - yan xətt hakimləri Rui Tavares və Paulo Soares kömək edəcəklər. Dördüncü hakim funksiyasını Bruno Rodriges yerinə yetirəcək. Matçın hakim-inspektoru Haim Yakov (İsrail), UEFA nümayəndəsi estoniyalı Oleq Xarlamovdur.Bu qrupun digər oyununda “Atletiko Madrid” klubu “Çelsi”ni qəbul edəcək.xeber100.com

Premyer Liqasının altıncı turu başa çatıb

Bu gün Azərbaycan Premyer Liqasının altıncı turu "Qəbələ" - "Neftçi" oyunu ilə yekun vurulub.Azərtac xəbər verir ki, turun son oyununda Qəbələ şəhər stadionunda keçirilən matçı baş hakim Fariz Yusifov idarə edib.Görüşün dördüncü dəqiqəsində "Qəbələ"nin oyunçusu Stiven Jozef Monroz hesabı açıb. Oyunun 40-cı dəqiqəsində Baqali Dabo meydan sahiblərinin ikinci qolunu vurub - 2:0. İlk hissə bu hesablada yekunlaşıb.Matçın ikinci hissəsində "Neftçi" klubu istəyinə nail olub. Oyunun 48-ci dəqiqəsində paytaxt təmsilçiləri Namiq Ələsgərovun vurduğu qolla hesab arasındakı fərqi minimuma endirib. Oyunda başqa qol vurulmayıb. Görüş "Qəbələ"nin 2:1 hesablı qələbəsi ilə başa çatıb.Beləliklə altıncı turun yekun oyunundan sonra "Qarabağ" 15 xalla turnir cədvəlində liderdir. "Zirə" klubu 15 xalla ikinci, "Qəbələ" isə 14 xalla üçüncü pillədədir. Turnir cədvəlində komandalar müvafiq olaraq "İnter" (8 xal), "Sumqayıt" (7 xal), "Səbail" (6 xal), "Neftçi" və "Kəpəz" hərəyə bir xalla sonuncu yerləri bölüşürlər.xeber100.com

Voleybol üzrə Avropa çempionatının qrup mərhələsinə yekun vurulacaq

Sentyabrın 25-də Azərbaycanda və Gürcüstanda təşkil edilən qadın voleybolçular arasında Avropa çempionatının final mərhələsi çərçivəsində “A” və “C” qruplarında mübarizəyə yekun vurulacaq.Azərtac xəbər verir ki, “A” qrupunda yer alan Azərbaycan milli komandası çempionatın dördüncü günündə Almaniya voleybolçuları ilə qarşılaşacaq. Görüş saat 18:00-da başlayacaq. Altı xalla qrupun lideri olan komandamız Macarıstan və Polşa yığmalarını 3:0 hesabı ilə məğlub edib. Dörd xalla qrupda üçüncü yerdə qərarlaşan Almaniya təmsilçiləri isə Polşa yığmasına 2:3 hesabı ilə məğlub olub, Macarıstan millisinə qalib gəliblər – 3:1. Aktivində 5 xal olan Polşa voleybolçuları hələ ki qrupda ikinci sıradadırlar. Polşalılar Azərbaycan-Almaniya oyununun nəticəsindən asılı olmayaraq, mübarizəni pley-off mərhələsində davam etdirəcəklər. Qrupun sonuncusu olan Macarıstan millisi isə çempionatı xalsız tərk edib.“C” qrupunda güclü Rusiya millisi Bolqarıstan yığması ilə üz-üzə gələcək. Görüş saat 15:30-da başlayacaq. İki oyundan sonra qrup lideri olan Rusiya kollektivinin 5, ikinci yerdə qərarlaşan Bolqarıstan komandasının isə 4 xalı var. Rusiyalı voleybolçular ukraynalı rəqiblərinə 3:2, Türkiyə yığmasına 3:1 hesabı ilə qalib gəliblər. Bolqarıstan yığması isə Ukrayna və Türkiyə millilərini eyni hesabla (3:2) məğlub edib. Rusiya və Bolqarıstan təmsilçiləri dörddəbir finala birbaşa vəsiqə uğrunda güclərini sınayacaqlar.Bu qrupun digər görüşündə Türkiyə və Ukrayna komandaları üz-üzə gələcəklər. Oyun saat 20:30-da start götürəcək. Ukrayna təmsilçisi 2 xalla qrupda üçüncü, Türkiyə yığması isə 1 xalla sonuncu pillədə qərarlaşıb. Hər iki komanda pley-off mərhələsinə yüksəlmək uğrunda mübarizə aparacaq.Qeyd edək ki, Avropa çempionatında “B” və “D” qruplarında mübarizəyə yekun vurulub, dörddəbir finalçılar və pley-off mərhələsinin iştirakçıları müəyyənləşib. Tbilisidə Yeni İdman Kompleksində keçirilən “B” qrupunun oyunları çərçivəsində səkkiz xalla birinci yeri tutan İtaliya millisi dörddəbir finala birbaşa vəsiqə qazanıb. İtaliyalılar Gürcüstan voleybolçularına 3:0, Belarusa 3:1, Xorvatiyaya isə 3:2 hesabı ilə qalib gəliblər. Beş xalla ikinci-üçüncü yerləri bölüşən Belarus və Xorvatiya milliləri isə pley-offda yarışacaqlar. Ev sahibi Gürcüstan milli komandası isə xal qazana bilməyərək mübarizəni dayandırıb.“D” qrupunun lideri 9 xal toplayan Serbiya millisi olub. Dörddəbir finala birbaşa vəsiqə qazanan Serbiya kollektivi Çexiya və Niderland komandalarına 3:0, Belçika millisinə isə 3:1 hesabı ilə qalib gəlib. Altı xalla qrupda ikinci olan Hollandiya voleybolçuları və üç xalla üçüncü pillədə qərarlaşan Çexiya təmsilçiləri pley-offda mübarizə aparacaqlar. Keçirdiyi bütün oyunlarda məğlub olan belçikalılar isə turnirlə vidalaşıblar.xeber100.com  

V Asiya Oyunları davam edir

Türkmənistanın paytaxtı Aşqabadda qapalı məkanlarda və döyüş növləri üzrə V Asiya Oyunları davam edir.Azərtac-ın Aşqabada ezam olunan müxbiri xəbər verir ki, Oyunların səkkizinci günündə - sentyabrın 24-də idmançılar basketbol 3x3, bilyard, boulinq, şahmat, futzal, tennis, sambo, üzgüçülük, kikboksinq, ağırlıqqaldırma və güləş yarışlarında mübarizə aparırlar.“Aşqabad-2017”nin medal sıralamasında Türkmənistan millisi liderliyini davam etdirir.Hesabında 77 qızıl, 54 gümüş və 62 bürünc medal olan Türkmənistan yığması birinci pillədə qərarlaşıb. İlk üçlüyü İran (19-15-43) və Özbəkistan (16-26-47) yığmaları tamamlayır. Tailand (16-17-21) dördüncü, Çin (16-16-15) beşinci, Qazaxıstan (15-13-21) altıncı, Koreya Respublikası (9-5-8) yeddinci, Honkonq (8-4-9) səkkizinci, Vyetnam (7-6-15) doqquzuncu və Qırğızıstan (6-13-21) isə onuncu pillədə yer alıb.İndiyədək 34 ölkənin idmançıları "Aşqabad-2017"də medal qazanıblar.xeber100.com

Cüdo üzrə Avropa açıq çempionatına start verilib

Serbiyanın paytaxtı Belqradda cüdo üzrə Avropa açıq çempionatına start verilib.Azərtac xəbər verir ki, yarışın birinci günündə Azərbaycan milli komandası aktivinə üç medal yazdırıb. Beynəlxalq turnirdə ölkəmizi təmsil edən Elbrus Zamanov (60 kq), Telman Vəliyev (73 kq) və Gültac Məmmədəliyeva (48 kq) bürünc medallara sahib olublar.Otuz ölkədən 240 cüdoçunun (157 oğlan, 83 qız) mübarizə apardığı turnirdə Azərbaycan milli komandası 17 idmançı (13 oğlan, 4 qız) ilə təmsil olunur.xeber100.com

“Qəbələ” komandası “Neftçi” ilə qarşılaşacaq

Sentyabrın 24-də futbol üzrə Azərbaycan Premyer Liqasının altıncı turuna yekun vurulacaq.Azərtac xəbər verir ki, turun sonuncu oyununda “Qəbələ” komandası öz meydanında “Neftçi” ilə qarşılaşacaq. Baş hakim Fariz Yusifovun idarə edəcəyi görüş saat 18:00-da Qəbələ şəhər stadionunda başlayacaq.Beş oyundan sonra “Qəbələ” 10 xalla üçüncü, “Neftçi” isə bir xalla yeddinci pillədə qərarlaşıb. Roman Qriqorçukun yetirmələri çempionluq iddialarını davam etdirmək üçün bu görüşdə qalib gəlməlidirlər. Paytaxt komandası isə bu mövsüm ilk dəfə üç xal qazanmaq və altıncı pillədəki “Səbail”lə xal fərqini minimuma endirmək üçün meydana çıxacaq.Bu matç hər iki komanda arasında yubiley – 40-cı görüş olacaq. Bu görüşlərdən üçü Azərbaycan kuboku uğrunda mübarizədə, 36-sı isə milli çempionatda oynanılıb. Premyer Liqadakı qarşılaşmaların 13-də “Qəbələ”, 15 oyunda “Neftçi” qalib gəlib, səkkiz görüş heç-heçə yekunlaşıb. Son üç qarşılaşmada meydan sahibləri qalib gəliblər. “Neftçi” son altı görüşdə cəmi bir dəfə qələbə qazanıb.Qeyd edək ki, turun əvvəlki oyunlarında Ağdamın “Qarabağ” komandası “Sumqayıt”ı 4:1, paytaxtın “Səbail” klubu “Kəpəz”i (Gəncə) 1:0 hesabı ilə məğlub edib. Payatxtın “Zirə” və “İnter” kollektivlərinin qarşılaşması isə heç-heçə başa çatıb – 1:1.xeber100.com

Avropa çempionatının final mərhələsi çərçivəsində

Sentyabrın 24-də Azərbaycanın və Gürcüstanın birgə ev sahibliyi etdikləri qadın voleybolçular arasında Avropa çempionatının final mərhələsi çərçivəsində üçüncü günün ilk oyunu Bolqarıstan və Türkiyə yığmaları arasında keçirilib.Azərtac xəbər verir ki, Bakıda Milli Gimnastika Arenasında "C" qrupunda qərarlaşan komandaların görüşü tay-brekə qədər davam edib.Matçın ilk setində Bolqarıstan yığması çətinlik çəkmədən qalib gəlib - 25:17. Oyunun ikinci setində Türkiyə voleybolçuları üstünlüyü tam ələ alaraq seti 25:10 hesabı ilə öndə tamamlayıblar. Qarşılaşmanın üçüncü setində Bolqarıstan təmsilçiləri qalib gələrək hesabı öz xeyirlərinə dəyişiblər - 25:16. Matçın dördüncü setində Türkiyə təmsilçiləri oyunda bərabərliyi yenidən təmin ediblər - 25:20. Qarşılaşmanın qalibi 5-ci setdə müəyyənləşib. Gərgin idman mübarizəsi şəraitində keçən tay-brekdə daha dəqiq oynayan Bolqarıstan voleybolçuları 20:18 hesabı ilə qalib gəldilər.Beləliklə, ümumi nəticədə rəqibini 3:2 hesabı ilə məğlub edən Bolqarıstan yığması turnirdə ardıcıl ikinci qələbəsini qazanıb. Türkiyə millisi qrupda sonuncu oyununda Ukrayna kollektivi, Bolqarıstan yığma komandası isə Rusiya voleybolçuları ilə qarşılaşacaq.xeber100.com