Voleybol üzrə Avropa çempionatının qrup mərhələsinə yekun vurulacaq

Sentyabrın 25-də Azərbaycanda və Gürcüstanda təşkil edilən qadın voleybolçular arasında Avropa çempionatının final mərhələsi çərçivəsində “A” və “C” qruplarında mübarizəyə yekun vurulacaq.Azərtac xəbər verir ki, “A” qrupunda yer alan Azərbaycan milli komandası çempionatın dördüncü günündə Almaniya voleybolçuları ilə qarşılaşacaq. Görüş saat 18:00-da başlayacaq. Altı xalla qrupun lideri olan komandamız Macarıstan və Polşa yığmalarını 3:0 hesabı ilə məğlub edib. Dörd xalla qrupda üçüncü yerdə qərarlaşan Almaniya təmsilçiləri isə Polşa yığmasına 2:3 hesabı ilə məğlub olub, Macarıstan millisinə qalib gəliblər – 3:1. Aktivində 5 xal olan Polşa voleybolçuları hələ ki qrupda ikinci sıradadırlar. Polşalılar Azərbaycan-Almaniya oyununun nəticəsindən asılı olmayaraq, mübarizəni pley-off mərhələsində davam etdirəcəklər. Qrupun sonuncusu olan Macarıstan millisi isə çempionatı xalsız tərk edib.“C” qrupunda güclü Rusiya millisi Bolqarıstan yığması ilə üz-üzə gələcək. Görüş saat 15:30-da başlayacaq. İki oyundan sonra qrup lideri olan Rusiya kollektivinin 5, ikinci yerdə qərarlaşan Bolqarıstan komandasının isə 4 xalı var. Rusiyalı voleybolçular ukraynalı rəqiblərinə 3:2, Türkiyə yığmasına 3:1 hesabı ilə qalib gəliblər. Bolqarıstan yığması isə Ukrayna və Türkiyə millilərini eyni hesabla (3:2) məğlub edib. Rusiya və Bolqarıstan təmsilçiləri dörddəbir finala birbaşa vəsiqə uğrunda güclərini sınayacaqlar.Bu qrupun digər görüşündə Türkiyə və Ukrayna komandaları üz-üzə gələcəklər. Oyun saat 20:30-da start götürəcək. Ukrayna təmsilçisi 2 xalla qrupda üçüncü, Türkiyə yığması isə 1 xalla sonuncu pillədə qərarlaşıb. Hər iki komanda pley-off mərhələsinə yüksəlmək uğrunda mübarizə aparacaq.Qeyd edək ki, Avropa çempionatında “B” və “D” qruplarında mübarizəyə yekun vurulub, dörddəbir finalçılar və pley-off mərhələsinin iştirakçıları müəyyənləşib. Tbilisidə Yeni İdman Kompleksində keçirilən “B” qrupunun oyunları çərçivəsində səkkiz xalla birinci yeri tutan İtaliya millisi dörddəbir finala birbaşa vəsiqə qazanıb. İtaliyalılar Gürcüstan voleybolçularına 3:0, Belarusa 3:1, Xorvatiyaya isə 3:2 hesabı ilə qalib gəliblər. Beş xalla ikinci-üçüncü yerləri bölüşən Belarus və Xorvatiya milliləri isə pley-offda yarışacaqlar. Ev sahibi Gürcüstan milli komandası isə xal qazana bilməyərək mübarizəni dayandırıb.“D” qrupunun lideri 9 xal toplayan Serbiya millisi olub. Dörddəbir finala birbaşa vəsiqə qazanan Serbiya kollektivi Çexiya və Niderland komandalarına 3:0, Belçika millisinə isə 3:1 hesabı ilə qalib gəlib. Altı xalla qrupda ikinci olan Hollandiya voleybolçuları və üç xalla üçüncü pillədə qərarlaşan Çexiya təmsilçiləri pley-offda mübarizə aparacaqlar. Keçirdiyi bütün oyunlarda məğlub olan belçikalılar isə turnirlə vidalaşıblar.xeber100.com  

V Asiya Oyunları davam edir

Türkmənistanın paytaxtı Aşqabadda qapalı məkanlarda və döyüş növləri üzrə V Asiya Oyunları davam edir.Azərtac-ın Aşqabada ezam olunan müxbiri xəbər verir ki, Oyunların səkkizinci günündə - sentyabrın 24-də idmançılar basketbol 3x3, bilyard, boulinq, şahmat, futzal, tennis, sambo, üzgüçülük, kikboksinq, ağırlıqqaldırma və güləş yarışlarında mübarizə aparırlar.“Aşqabad-2017”nin medal sıralamasında Türkmənistan millisi liderliyini davam etdirir.Hesabında 77 qızıl, 54 gümüş və 62 bürünc medal olan Türkmənistan yığması birinci pillədə qərarlaşıb. İlk üçlüyü İran (19-15-43) və Özbəkistan (16-26-47) yığmaları tamamlayır. Tailand (16-17-21) dördüncü, Çin (16-16-15) beşinci, Qazaxıstan (15-13-21) altıncı, Koreya Respublikası (9-5-8) yeddinci, Honkonq (8-4-9) səkkizinci, Vyetnam (7-6-15) doqquzuncu və Qırğızıstan (6-13-21) isə onuncu pillədə yer alıb.İndiyədək 34 ölkənin idmançıları "Aşqabad-2017"də medal qazanıblar.xeber100.com

Cüdo üzrə Avropa açıq çempionatına start verilib

Serbiyanın paytaxtı Belqradda cüdo üzrə Avropa açıq çempionatına start verilib.Azərtac xəbər verir ki, yarışın birinci günündə Azərbaycan milli komandası aktivinə üç medal yazdırıb. Beynəlxalq turnirdə ölkəmizi təmsil edən Elbrus Zamanov (60 kq), Telman Vəliyev (73 kq) və Gültac Məmmədəliyeva (48 kq) bürünc medallara sahib olublar.Otuz ölkədən 240 cüdoçunun (157 oğlan, 83 qız) mübarizə apardığı turnirdə Azərbaycan milli komandası 17 idmançı (13 oğlan, 4 qız) ilə təmsil olunur.xeber100.com

“Qəbələ” komandası “Neftçi” ilə qarşılaşacaq

Sentyabrın 24-də futbol üzrə Azərbaycan Premyer Liqasının altıncı turuna yekun vurulacaq.Azərtac xəbər verir ki, turun sonuncu oyununda “Qəbələ” komandası öz meydanında “Neftçi” ilə qarşılaşacaq. Baş hakim Fariz Yusifovun idarə edəcəyi görüş saat 18:00-da Qəbələ şəhər stadionunda başlayacaq.Beş oyundan sonra “Qəbələ” 10 xalla üçüncü, “Neftçi” isə bir xalla yeddinci pillədə qərarlaşıb. Roman Qriqorçukun yetirmələri çempionluq iddialarını davam etdirmək üçün bu görüşdə qalib gəlməlidirlər. Paytaxt komandası isə bu mövsüm ilk dəfə üç xal qazanmaq və altıncı pillədəki “Səbail”lə xal fərqini minimuma endirmək üçün meydana çıxacaq.Bu matç hər iki komanda arasında yubiley – 40-cı görüş olacaq. Bu görüşlərdən üçü Azərbaycan kuboku uğrunda mübarizədə, 36-sı isə milli çempionatda oynanılıb. Premyer Liqadakı qarşılaşmaların 13-də “Qəbələ”, 15 oyunda “Neftçi” qalib gəlib, səkkiz görüş heç-heçə yekunlaşıb. Son üç qarşılaşmada meydan sahibləri qalib gəliblər. “Neftçi” son altı görüşdə cəmi bir dəfə qələbə qazanıb.Qeyd edək ki, turun əvvəlki oyunlarında Ağdamın “Qarabağ” komandası “Sumqayıt”ı 4:1, paytaxtın “Səbail” klubu “Kəpəz”i (Gəncə) 1:0 hesabı ilə məğlub edib. Payatxtın “Zirə” və “İnter” kollektivlərinin qarşılaşması isə heç-heçə başa çatıb – 1:1.xeber100.com

Avropa çempionatının final mərhələsi çərçivəsində

Sentyabrın 24-də Azərbaycanın və Gürcüstanın birgə ev sahibliyi etdikləri qadın voleybolçular arasında Avropa çempionatının final mərhələsi çərçivəsində üçüncü günün ilk oyunu Bolqarıstan və Türkiyə yığmaları arasında keçirilib.Azərtac xəbər verir ki, Bakıda Milli Gimnastika Arenasında "C" qrupunda qərarlaşan komandaların görüşü tay-brekə qədər davam edib.Matçın ilk setində Bolqarıstan yığması çətinlik çəkmədən qalib gəlib - 25:17. Oyunun ikinci setində Türkiyə voleybolçuları üstünlüyü tam ələ alaraq seti 25:10 hesabı ilə öndə tamamlayıblar. Qarşılaşmanın üçüncü setində Bolqarıstan təmsilçiləri qalib gələrək hesabı öz xeyirlərinə dəyişiblər - 25:16. Matçın dördüncü setində Türkiyə təmsilçiləri oyunda bərabərliyi yenidən təmin ediblər - 25:20. Qarşılaşmanın qalibi 5-ci setdə müəyyənləşib. Gərgin idman mübarizəsi şəraitində keçən tay-brekdə daha dəqiq oynayan Bolqarıstan voleybolçuları 20:18 hesabı ilə qalib gəldilər.Beləliklə, ümumi nəticədə rəqibini 3:2 hesabı ilə məğlub edən Bolqarıstan yığması turnirdə ardıcıl ikinci qələbəsini qazanıb. Türkiyə millisi qrupda sonuncu oyununda Ukrayna kollektivi, Bolqarıstan yığma komandası isə Rusiya voleybolçuları ilə qarşılaşacaq.xeber100.com

Futbolun inkişafı ilə bağlı festival keçiriləcək

Sentyabrın 24-də Bakı Olimpiya Stadionunda AFFA-nın təşkilatçılığı ilə 6-16 yaşlı qızlar arasında “Öz məqsədlərini yaşat” (“Live your goals”) festivalı təşkil olunacaq.AFFA-dan Azərtac-a bildirilib ki, FIFA-nın bayrağı altında təşkil olunan layihə ilk dəfə 2011-ci ildə Almaniyada keçirilən FIFA qadınlar arasında futbol üzrə dünya kuboku ərəfəsində reallaşıb. Layihənin məqsədi qadın futbolunun kütləviliyinin artırılması, qızların futbola cəlb olunması, onların futbolla mütəmadi şəkildə məşğul olmalarına zəmin yaradılması, xüsusilə bölgələrdə qadın futboluna marağın gücləndirilməsidir.“Öz məqsədlərini yaşat” layihəsi çərçivəsində Azərbaycanda ilk dəfə silsilə tədbirlər 2012-ci ildə 17 yaşadək qadınlar arasında dünya çempionatı ərəfəsində keçirilib. Həmin vaxt festival Bakı, Sumqayıt, Zaqatala, Quba, Şəki, Masallı, Qax, Xaçmaz, Qəbələ və digər şəhərlərdə müvəffəqiyyətlə keçirilib. Silsilə tədbirlərdə beynəlxalq futbol qurumlarının nümayəndələri ilə yanaşı, tanınmış qadın futbol veteranları da iştirak ediblər.xeber100.com

Premyer Liqasının VI turu çərçivəsində

Sentyabrın 23-də Azərbaycan Premyer Liqasının VI turu çərçivəsində “Səbail” komandası Kəpəz” klubu ilə qarşılaşıb.Azərtac xəbər verir ki, “Dalğa Arena”da keçirilən görüşü baş hakim Rəhim Həsənov idarə edib.Matçın ilk hissəsində hesab açılmayıb. Görüşün ikinci hissəsində ev sahibləri istəklərinə çatıblar. Oyunun 60-cı dəqiqəsində Elman Taqayev hesabı açıb və görüş “Səbail” klubunun 1:0 hesablı qələbəsi ilə başa çatıb.Bu qələbədən sonra “Səbail” klubu 6 xalla altıncı sırada qərarlaşıb. Aktivində 1 xal olan “Kəpəz” isə sonuncu sıradadır.xeber100.com

“Zirə” komandası “İnter” klubu ilə görüşüb

Sentyabrın 23-də Azərbaycan Premyer Liqasının altıncı turu çərçivəsində “Zirə” komandası “İnter” klubu ilə görüşüb.Azərtac xəbər verir ki, Zirə İdman Kompleksinin stadionunda keçirilən görüşün ilk hissəsinin 21-ci dəqiqəsində Sertan Taşkın başla zərbə ilə hesabı açıb. Baş hakim İnqilab Məmmədovun idarə etdiyi oyunun ikinci hissəsində “İnter” komandası hesabı bərabərləşdirib. Cavab topunu 67-ci dəqiqədə Yovan Krneta vurub. Beləliklə görüş 1:1 hesabı ilə yekunlaşıb.“İnter”in futbolçusu İlkin Qırtımov 43-cü dəqiqədə qırmızı vərəqə ilə cəzalandırılıb.“Zirə” klubu 14 xalla turnir cədvəlində ikinci pillədə yer alır. Hesabında 8 xal olan “İnter” isə dördüncü yerdədir. Xatırladaq ki, günün ilk oyununda “Səbail” klubu “Kəpəz”i minimal hesabla məğlub edib – 1:0.xeber100.com

Çexiya və Belçika komandaları qarşılaşıblar

Sentyabrın 23-də Göygöl Olimpiya İdman Kompleksində qadınlar arasında voleybol üzrə Avropa çempionatının “D” qrupunda yer alan Çexiya və Belçika komandaları qarşılaşıblar.Azərtac xəbər verir ki, hər iki komanda qrup mərhələsinin ilk turunda məğlub olduqları üçün bu görüş onlar üçün mühüm əhəmiyyət daşıyıb. Çexiya yığma komandası gərgin idman mübarizəsi şəraitində keçən oyunun ilk setində 19:25 hesabı ilə məğlub olub. Lakin bundan sonra ardıcıl üç setdə qalib gəliblər - 25:23, 28:26, 25:19).Beləliklə, maraqlı qarşılaşmada 3:1 hesabı ilə qələbə qazanan Çexiya voleybolçuları ilk oyunda məğlubiyyətdən sonra çempionatda qələbə qazana biliblər. Belçika millisi isə ikinci görüşdə də məğlub olub.“D” qrupunun digər görüşündə Serbiya və Niderland komandaları üz-üzə gələcəklər. Hər iki komanda çempionata qələbə ilə başlayıblar.xeber100.com

Döyüş növləri üzrə V Asiya Oyunları davam edir

Aşqabadda qapalı məkanlarda və döyüş növləri üzrə V Asiya Oyunları davam edir.Azərtac-ın Aşqabada ezam olunan müxbiri xəbər verir ki, Oyunların altıncı günündə - sentyabrın 22-də idmançılar 3x3 basketbol, kəmər güləşi, bilyard, boulinq, şahmat, atçılıq, tennis, kuraş, üzgüçülük, taekvondo, velosiped idmanı və ağırlıqqaldırma yarışlarında mübarizə aparırlar.Bu gün 40 dəst medal sahibini tapacaq.Qeyd edək ki, sentyabrın 27-dək davam edəcək qapalı məkanlarda və döyüş növləri üzrə V Asiya Oyunlarında 6 min atlet 21 idman növündə gücünü sınayır. Oyunlarda Asiya (45) və Okeaniya (19) ölkələrini təmsil edən 65 komanda, habelə qapalı məkanlarda və döyüş növləri üzrə Asiya Oyunları tarixində ilk dəfə Asiya Olimpiya Şurasının bayrağı altında çıxış edən qaçqınlar komandası mübarizə aparır. Yarışların keçiriləcəyi 12 gün ərzində 347 mükafatlandırma mərasimi olacaq və atletlər 1844 medal uğrunda mübarizə aparırlar.xeber100.com