“Zirə” futbol klubunda dəyişiklik olub

“Zirə” klubunun rəhbərliyində dəyişiklik olub.Azərtac xəbər verir ki, bu barədə klubun rəsmi saytı məlumat yayıb.Məlumatda bildirilir ki, 2014-cü ildə təsis edilmiş “Zirə” peşəkar futbol klubu qısa zamanda futbol ictimaiyyətinin və azarkeşlərin etimadını doğruldub və onların rəğbətini qazana bilib. Əldə edilmiş nailiyyətlərin qorunması, daha böyük uğurların qazanılması, eləcə də Azərbaycan futbolunun inkişafına davamlı töhfə vermək kimi hədəflər hazırkı mərhələdə klubun daha da yüksək peşəkarlıq prinsipləri əsasında idarə olunmasını zəruri edir. Bu məqsədlə klubdaxili məsləhətləşmələrin nəticəsində Orxan Məmmədov “Zirə” klubunun fəxri prezidenti seçilib. Klubun yaradılmasının əsas təşəbbüskarı olan O.Məmmədovun əldə edilən uğurlarda böyük rolu var.Bu vaxtadək icraçı direktor vəzifəsində çalışan Natiq İsmayılov isə “Zirə” klubunun prezidenti təyin olunub.İcraçı direktor vəzifəsini isə Cahangir Məmmədov yerinə yetirəcək.xeber100.com

Avropa liqasının qrup mərhələsində mübarizəyə start verilib

UEFA Çempionlar Liqasının 2017-2018-ci il mövsümünün Avropa liqasının qrup mərhələsində mübarizəyə start verilib.Azərtac xəbər verir ki, 12 qrupda yer alan 48 komanda arasında oyunlar keçirilib. Avroliqada Türkiyə iki komanda ilə təmsil olunub. “C” qrupunda yer alan “Başakşehir” klubu doğma meydanda Bolqarıstan “Lüdoqorets”ini qəbul edib. Oyun heç-heçə başa çatıb. “İ” qrupunda mübarizə aparan “Konyaspor” isə səfərdə Fransa “Marsel” klubunun qonağı olub. Oyun ev sahibinin xeyrinə 1:0 hesabı ilə başa çatıb.xeber100.com

Dünya Çempionatının püşkatma tarixi müəyyənləşib

FIFA-nın Sürixdəki mənzil qərargahında qurumun İcraiyyə Komitəsinin iclası olub.Azərtac FIFA-nın saytına istinadla xəbər verir ki, əsas müzakirə edilən məsələ 2018-ci ildə Rusiyada keçiriləcək futbol üzrə dünya çempionatının püşkatma qaydaları olub.Qaydalara əsasən, bütün komandalar reytinqlərinə görə dörd səbətə bölünəcəklər. Hər səbət səkkiz yığma komandadan ibarət olacaq. Səbətlərə bölünərkən millilərin FIFA-nın oktyabr ayı üzrə dünya reytinq cədvəlindəki sıralaması əsas götürüləcək.Birinci səbətdə dünya çempionatının final mərhələsində iştirak etməyə vəsiqə qazanmış 32 komandadan ən yüksək reytinqə malik yeddisi və ev sahibi olaraq Rusiya yer alacaq. Beləliklə, A, B, C, D, E, F, G, H olmaqla səkkiz qrup formalaşdırılacaq ki, burada Avropadan iki, digər konfederasiyaların hər birindən yalnız bir komanda olacaq.Dünya çempionatının püşkatma mərasimi bu il dekabrın 1-də Moskvada keçiriləcək.xeber100.com

Şahmat Federasiyasının məlumatı

Rumıniyada yeniyetmələrin və gənclərin Avropa çempionatı Azərbaycanın gənc şahmatçılarının parlaq qələbəsilə başa çatıb.Azərbaycan Şahmat Federasiyasından Azərtac-a bildirilib ki, təmsilçilərimiz 2 qızıl, 2 gümüş və 1 bürünc medal qazanıblar. 12 yaşlı oğlanlar arasında Aydın Süleymanlı və 14 yaşlı şahmatçı qızların turnirində Gövhər Beydullayeva qızıl medal qazanıblar. 10 yaslı qızlar arasında Səmra Qasımova və 10 yaşlı oğlanlar arasında Read Səmədov gümüş, 12 yaşlı qızlar arasında Ayan Allahverdiyeva bürünc medala layiq görülüblər.Daha bir qələbə isə komanda hesabında qazanılıb. Avropanın 49 ölkəsi arasında yalnız Rusiyadan geri qalan komandamız 2-ci olub.xeber100.com

Basketbol üzrə 40-cı Avropa çempionatında

Basketbol üzrə 40-cı Avropa çempionatının ilk finalçısı Sloveniya millisi olub.Azərtac xəbər verir ki, İstanbuldakı Sinan Erdem arenasında keçirilən yarımfinal mərhələsinin ilk oyununda İspaniya yığmasını 92:72 hesabı ilə məğlubiyyətə uğradan Sloveniya milli komandası adını finala yazdırıb. İspaniyalılar ilk periodda 19:25 hesabı ilə məğlub olsalar da, ikinci periodda çətinliklə də olsa qalib gələ biliblər – 26:24. Bundan sonra oyunda üstünlüyü tamamilə ələ alan Sloveniya yığma komandası üçüncü və dördüncü periodları 24:12 və 19:15 hesabı ilə üstün başa vurub.Oyunda Sloveniya millisinin heyətində Luka Donçiç 11 xal və 12 ribaund, ispaniyalı basketbolçulardan isə Mark Qasol 12 xal və 10 ribaund ilə matçın ən yaxşı oyunçuları olublar.Bu qələbə sayəsində finala yüksələn Sloveniya yığma komandası həlledici görüşdə Rusiya-Serbiya qarşılaşmasının qalibi ilə üzləşəcək. Həmin qarşılaşma bu gün keçiriləcək. İspaniya millisi isə üçüncü yer uğrunda mübarizə aparacaq.“Eurobasket 2017”də üçüncü yer uğrunda görüş və final matçı sentyabrın 17-də keçiriləcək.Dörd ölkənin – Finlandiya, İsrail, Rumıniya və Türkiyənin ev sahibliyi ilə keçirilən basketbol üzrə 40-cı Avropa çempionatında dörd qrupda 24 komanda mübarizəyə qoşulmuşdu.xeber100.com

Ağır atletika üzrə yarışı keçirilib

Moldovanın paytaxtı Kişineunun İvança qəsəbəsindəki “AAAF Park Moldova” idman və əyləncə kompleksində ağır atletika üzrə 10-cu “Zirvə kuboku” yarışı keçirilib.Azərbaycan Ağır Atletika Federasiyasından (AAAF) Azərtac-a bildiriblər ki, ənənəvi turnir bu dəfə açıq havada qurulan yarış körpücüyündə təşkil edilib. Yarış həm kompleksdəki idman zalların açılışı, həm də Azərbaycan millisinin sabiq üzvü, Olimpiya Oyunlarının bürünc mükafatçısı, bir müddət əvvəl vəfat edən Veliçko Çolakovun xatirəsinə həsr olunub.Turnirdə Sinkleyr cədvəli üzrə iki qrupda – qadınlar və kişilər arasında qalib və mükafatçılar müəyyənləşib.Kişilərin mübarizəsində moldovalı Sergey Çekir toplam 299 kq (134+165) nəticə və 389,07 xalla qızıl medala sahib olub. Tribunalara toplaşan tamaşaçılar ikinci yer uğrunda maraqlı idman mübarizəsini izləyiblər. Belə ki, gümüş medalın sahibi 0,01 xal fərqlə müəyyənləşib. Polşa təmsilçisi Mateuş Sova 323 kq (145+178) nəticə ilə 384,13 xal toplayıb. O, Azərbaycan atleti, 292 kq (132+160) nəticə ilə 384,12 xal toplayan Paşa İbrahimlini cüzi fərqlə üstələyib.Qadınların mübarizəsində Gürcüstanı təmsil edən ukraynalı atlet Anastasiya Qotfrid qızıl medal qazanıb. O, toplam 270 kq (125+145) nəticə ilə 293,86 Sinkleyr xalı toplayıb. Gümüş medala 190 kq (83+107) nəticə ilə 240,19 xal toplayan türkiyəli Zeynep Atakan layiq görülüb. Bürünc medalı isə Azərbaycan atleti, IV İslam Oyunlarının bürünc mükafatçısı Elnarə Abbasova aktivinə yazdırıb. Toplam 173 kq (76+97) nəticə göstərən idmançımız 228,96 xal toplayıb.Böyük marağa səbəb olan yarışı AAAF-in vitse-prezidenti Tofiq Heydərov, Moldova Ağır Atletika Federasiyasının prezidenti Tudor Kasapu, bu ölkənin gənclər və idman nazirinin müavini Pavel Yanets, Azərbaycanın Moldovadakı səfirliyinin birinci katibi Leyla Orucova və ictimaiyyətin nümayəndələri, idmansevərlər izləyiblər.Yarışın bağlanış mərasimində Tudor Kasapu, Pavel Yanets və AAAF-in baş katibi Rizvan Rəsulov çıxış edərək belə yarışların təşkilinin idmanın bu növünün təbliği və kütləviləşməsi baxımından önəmini vurğulayıblar. Həmçinin bu cür təşəbbüslərin ölkələrimiz arasında idman sahəsində səmərəli əməkdaşlığın göstəricisi olduğu diqqətə çatdırılıb.Azərbaycanın və Moldovanın dövlət himnlərinin səsləndirilməsindən sonra tədbir bədii hissə ilə davam edib.xeber100.com

Futbol üzrə müraciətlərə baxılıb

AFFA-nın və PFL-in birgə komissiyası I divizionda çıxış etmək istəyən klublardan daxil olan müraciətlərə baxıb.AFFA-dan Azərtac-a bildirilib ki, komissiyanın iclasında klubların təqdim etdikləri sənədlər, onların peşəkarlığı və ötən mövsüm danışılmış oyunlarla bağlı UEFA-dan daxil olan məlumatlar nəzərə alınaraq I divizionda iştirak edəcək komandalar təsdiqlənib. Beləliklə, I divizionda “Mil-Muğan”, “Qaradağ Lökbatan”, “Turan-Tovuz”, “Ağsu”, “Zaqatala”, “Vətən”, “Şüvəlan”, MOİK klublarından başqa, “Binə” və “Xəzər” komandalarının da iştirakına icazə verilib.I divizionda çıxış etmək hüququ qazana bilməyən komandaların çıxış etməsi üçün həvəskar statuslu “Region Liqası” nın yaradılması ilə bağlı layihənin İcraiyyə Komitəsinə təqdim olunması planlaşdırılır.xeber100.com

Güləş üzrə 32-ci dünya çempionatında

Müdafiə Nazirliyinin Mərkəzi Ordu İdman Klubunun (MOİK) idmançıları sentyabrın 18-dən 25-dək Litva Respublikasının Klaypeda şəhərində hərbçilər arasında güləş üzrə 32-ci dünya çempionatında iştirak edəcəklər.Azərtac xəbər verir ki, komandamızı sərbəst güləş yarışlarında Əfqan Xaşalov (57 kq), Qalib Əliyev (61 kq), Ağahüseyn Mustafayev (65 kq), Coşqun Əzimov (70 kq), Rəşad Yusifli (74 kq) və Əşrəf Əliyev (86 kq) təmsil edəcək.Yunan-Roma güləşçilərinin mübarizəsində Murad Məmmədov (59 kq), Kərim Cəfərov (66 kq), Sənan Əlmirzəyev (71 kq), Həsən Əliyev (75 kq), İslam Abbasov (85 kq), Orxan Nuriyev (98 kq) və Cavid Feyziyev (130 kq) ölkəmizi təmsil edəcəklər.Çempionatda qadın güləşçilərimizdən Türkan Nəsirova (48 kq) və Tatyana Varantsova (53 kq) mübarizə aparacaqlar.Yüksək səviyyəli yarışlara pəhləvanlarımızı beynəlxalq dərəcəli idman ustası, Əməkdar məşqçi, mayor Nazim Əlicanov və beynəlxalq dərəcəli idman ustası, mayor Taleh İsrafilov hazırlayırlar.Növbəti dəfə dünya arenasında uğur qazanmaq üçün MOİK yarışlara klubun rəisi, Beynəlxalq Hərbi İdman Şurasında (CİSM) Azərbaycan nümayəndə heyətinin rəhbəri polkovnik-leytenant Rəşad Quliyevin rəhbərliyi ilə qatılacaq.Dünya çempionatının görüşlərində hakimlik etmək məqsədilə komandamızın tərkibində beynəlxalq dərəcəli hakimlər Elman İsmayılov və Tural Əliyev də Litvaya yola düşəcəklər.Qeyd edək ki, çempionatda iştirak edəcək komandamızın heyətində dünya və Avropa çempionları, eləcə də Olimpiya Oyunlarının, respublika birinciliklərinin qalibi olan idmançılar yer alır.xeber100.com

Futbol həftəsi festivalı keçiriləcək

Sentyabrın 26-da və 27-də Təhsil Respublika İdman Mərkəzinin Gəncə şəhərindəki filialında, ayın 30-da isə Heydər Əliyev Mərkəzində (Bakı şəhəri) AFFA tərəfindən kütləvi futbol həftəsi festivalı keçiriləcək.Azərtac AFFA-ya istinadla xəbər verir ki, festivalda 6-13 yaş arası uşaqlar iştirak edəcəklər.Qeyd edək ki, bu layihənin həyata keçirilməsində məqsəd futbolun kütləviliyini artırmaq, uşaqların və yeniyetmələrin asudə vaxtlarının səmərəli təşkili, onlarda futbola və digər idman növlərinə maraq yaratmaq, sağlam həyat tərzini təbliğ etməkdir.xeber100.com

Taekvando üzrə turnir keçiriləcək

Sentyabrın 16-da Sumqayıt Olimpiya İdman Kompleksində Azərbaycan Taekvando Federasiyasının (ATF) və Koreya Respublikasının ölkəmizdəki səfirliyinin təşkilatçılığı və dəstəyi ilə taekvando üzrə gənclər arasında üçüncü “Koreya səfiri kuboku” turnirinə start veriləcək.Azərtac xəbər verir ki, yarışın təşkilində məqsəd ölkədə taekvandonun təbliği, bölgələrdə idmanın bu növünün inkişafına təkan vermək, idmançıların yarış təcrübəsini və ustalığını artırmaqdır. Ümumilikdə, yeniyetmələrin sağlam həyat tərzi üçün idmanla məşğul olması da əsas məqsədlər sırasına daxildir.Turnirdə respublikamızda fəaliyyət göstərən taekvando bölmələrinin və klublarının üzvləri, 2000-2003-cü il təvəllüdlü gənc idmançılar mübarizə aparacaqlar.İki gün davam edəcək yarışlara hər gün saat 09:00-dan etibarən start veriləcək.“DAEDO” beynəlxalq taekvando qaydaları üzrə keçiriləcək turnirin sonunda ilk üç yeri tutan idmançılar ATF və Koreya səfirliyinin təsis etdiyi kubok, müvafiq diplom və medallarla mükafatlandırılacaqlar.Xatırladaq ki, turnir 2015-ci ildə Qubada, ötən il isə Qəbələdə keçirilib.xeber100.com