Cüdo üzrə Avropa açıq çempionatına start verilib

Serbiyanın paytaxtı Belqradda cüdo üzrə Avropa açıq çempionatına start verilib.Azərtac xəbər verir ki, yarışın birinci günündə Azərbaycan milli komandası aktivinə üç medal yazdırıb. Beynəlxalq turnirdə ölkəmizi təmsil edən Elbrus Zamanov (60 kq), Telman Vəliyev (73 kq) və Gültac Məmmədəliyeva (48 kq) bürünc medallara sahib olublar.Otuz ölkədən 240 cüdoçunun (157 oğlan, 83 qız) mübarizə apardığı turnirdə Azərbaycan milli komandası 17 idmançı (13 oğlan, 4 qız) ilə təmsil olunur.xeber100.com

“Qəbələ” komandası “Neftçi” ilə qarşılaşacaq

Sentyabrın 24-də futbol üzrə Azərbaycan Premyer Liqasının altıncı turuna yekun vurulacaq.Azərtac xəbər verir ki, turun sonuncu oyununda “Qəbələ” komandası öz meydanında “Neftçi” ilə qarşılaşacaq. Baş hakim Fariz Yusifovun idarə edəcəyi görüş saat 18:00-da Qəbələ şəhər stadionunda başlayacaq.Beş oyundan sonra “Qəbələ” 10 xalla üçüncü, “Neftçi” isə bir xalla yeddinci pillədə qərarlaşıb. Roman Qriqorçukun yetirmələri çempionluq iddialarını davam etdirmək üçün bu görüşdə qalib gəlməlidirlər. Paytaxt komandası isə bu mövsüm ilk dəfə üç xal qazanmaq və altıncı pillədəki “Səbail”lə xal fərqini minimuma endirmək üçün meydana çıxacaq.Bu matç hər iki komanda arasında yubiley – 40-cı görüş olacaq. Bu görüşlərdən üçü Azərbaycan kuboku uğrunda mübarizədə, 36-sı isə milli çempionatda oynanılıb. Premyer Liqadakı qarşılaşmaların 13-də “Qəbələ”, 15 oyunda “Neftçi” qalib gəlib, səkkiz görüş heç-heçə yekunlaşıb. Son üç qarşılaşmada meydan sahibləri qalib gəliblər. “Neftçi” son altı görüşdə cəmi bir dəfə qələbə qazanıb.Qeyd edək ki, turun əvvəlki oyunlarında Ağdamın “Qarabağ” komandası “Sumqayıt”ı 4:1, paytaxtın “Səbail” klubu “Kəpəz”i (Gəncə) 1:0 hesabı ilə məğlub edib. Payatxtın “Zirə” və “İnter” kollektivlərinin qarşılaşması isə heç-heçə başa çatıb – 1:1.xeber100.com

Avropa çempionatının final mərhələsi çərçivəsində

Sentyabrın 24-də Azərbaycanın və Gürcüstanın birgə ev sahibliyi etdikləri qadın voleybolçular arasında Avropa çempionatının final mərhələsi çərçivəsində üçüncü günün ilk oyunu Bolqarıstan və Türkiyə yığmaları arasında keçirilib.Azərtac xəbər verir ki, Bakıda Milli Gimnastika Arenasında "C" qrupunda qərarlaşan komandaların görüşü tay-brekə qədər davam edib.Matçın ilk setində Bolqarıstan yığması çətinlik çəkmədən qalib gəlib - 25:17. Oyunun ikinci setində Türkiyə voleybolçuları üstünlüyü tam ələ alaraq seti 25:10 hesabı ilə öndə tamamlayıblar. Qarşılaşmanın üçüncü setində Bolqarıstan təmsilçiləri qalib gələrək hesabı öz xeyirlərinə dəyişiblər - 25:16. Matçın dördüncü setində Türkiyə təmsilçiləri oyunda bərabərliyi yenidən təmin ediblər - 25:20. Qarşılaşmanın qalibi 5-ci setdə müəyyənləşib. Gərgin idman mübarizəsi şəraitində keçən tay-brekdə daha dəqiq oynayan Bolqarıstan voleybolçuları 20:18 hesabı ilə qalib gəldilər.Beləliklə, ümumi nəticədə rəqibini 3:2 hesabı ilə məğlub edən Bolqarıstan yığması turnirdə ardıcıl ikinci qələbəsini qazanıb. Türkiyə millisi qrupda sonuncu oyununda Ukrayna kollektivi, Bolqarıstan yığma komandası isə Rusiya voleybolçuları ilə qarşılaşacaq.xeber100.com

Futbolun inkişafı ilə bağlı festival keçiriləcək

Sentyabrın 24-də Bakı Olimpiya Stadionunda AFFA-nın təşkilatçılığı ilə 6-16 yaşlı qızlar arasında “Öz məqsədlərini yaşat” (“Live your goals”) festivalı təşkil olunacaq.AFFA-dan Azərtac-a bildirilib ki, FIFA-nın bayrağı altında təşkil olunan layihə ilk dəfə 2011-ci ildə Almaniyada keçirilən FIFA qadınlar arasında futbol üzrə dünya kuboku ərəfəsində reallaşıb. Layihənin məqsədi qadın futbolunun kütləviliyinin artırılması, qızların futbola cəlb olunması, onların futbolla mütəmadi şəkildə məşğul olmalarına zəmin yaradılması, xüsusilə bölgələrdə qadın futboluna marağın gücləndirilməsidir.“Öz məqsədlərini yaşat” layihəsi çərçivəsində Azərbaycanda ilk dəfə silsilə tədbirlər 2012-ci ildə 17 yaşadək qadınlar arasında dünya çempionatı ərəfəsində keçirilib. Həmin vaxt festival Bakı, Sumqayıt, Zaqatala, Quba, Şəki, Masallı, Qax, Xaçmaz, Qəbələ və digər şəhərlərdə müvəffəqiyyətlə keçirilib. Silsilə tədbirlərdə beynəlxalq futbol qurumlarının nümayəndələri ilə yanaşı, tanınmış qadın futbol veteranları da iştirak ediblər.xeber100.com

Premyer Liqasının VI turu çərçivəsində

Sentyabrın 23-də Azərbaycan Premyer Liqasının VI turu çərçivəsində “Səbail” komandası Kəpəz” klubu ilə qarşılaşıb.Azərtac xəbər verir ki, “Dalğa Arena”da keçirilən görüşü baş hakim Rəhim Həsənov idarə edib.Matçın ilk hissəsində hesab açılmayıb. Görüşün ikinci hissəsində ev sahibləri istəklərinə çatıblar. Oyunun 60-cı dəqiqəsində Elman Taqayev hesabı açıb və görüş “Səbail” klubunun 1:0 hesablı qələbəsi ilə başa çatıb.Bu qələbədən sonra “Səbail” klubu 6 xalla altıncı sırada qərarlaşıb. Aktivində 1 xal olan “Kəpəz” isə sonuncu sıradadır.xeber100.com

“Zirə” komandası “İnter” klubu ilə görüşüb

Sentyabrın 23-də Azərbaycan Premyer Liqasının altıncı turu çərçivəsində “Zirə” komandası “İnter” klubu ilə görüşüb.Azərtac xəbər verir ki, Zirə İdman Kompleksinin stadionunda keçirilən görüşün ilk hissəsinin 21-ci dəqiqəsində Sertan Taşkın başla zərbə ilə hesabı açıb. Baş hakim İnqilab Məmmədovun idarə etdiyi oyunun ikinci hissəsində “İnter” komandası hesabı bərabərləşdirib. Cavab topunu 67-ci dəqiqədə Yovan Krneta vurub. Beləliklə görüş 1:1 hesabı ilə yekunlaşıb.“İnter”in futbolçusu İlkin Qırtımov 43-cü dəqiqədə qırmızı vərəqə ilə cəzalandırılıb.“Zirə” klubu 14 xalla turnir cədvəlində ikinci pillədə yer alır. Hesabında 8 xal olan “İnter” isə dördüncü yerdədir. Xatırladaq ki, günün ilk oyununda “Səbail” klubu “Kəpəz”i minimal hesabla məğlub edib – 1:0.xeber100.com

Çexiya və Belçika komandaları qarşılaşıblar

Sentyabrın 23-də Göygöl Olimpiya İdman Kompleksində qadınlar arasında voleybol üzrə Avropa çempionatının “D” qrupunda yer alan Çexiya və Belçika komandaları qarşılaşıblar.Azərtac xəbər verir ki, hər iki komanda qrup mərhələsinin ilk turunda məğlub olduqları üçün bu görüş onlar üçün mühüm əhəmiyyət daşıyıb. Çexiya yığma komandası gərgin idman mübarizəsi şəraitində keçən oyunun ilk setində 19:25 hesabı ilə məğlub olub. Lakin bundan sonra ardıcıl üç setdə qalib gəliblər - 25:23, 28:26, 25:19).Beləliklə, maraqlı qarşılaşmada 3:1 hesabı ilə qələbə qazanan Çexiya voleybolçuları ilk oyunda məğlubiyyətdən sonra çempionatda qələbə qazana biliblər. Belçika millisi isə ikinci görüşdə də məğlub olub.“D” qrupunun digər görüşündə Serbiya və Niderland komandaları üz-üzə gələcəklər. Hər iki komanda çempionata qələbə ilə başlayıblar.xeber100.com

Döyüş növləri üzrə V Asiya Oyunları davam edir

Aşqabadda qapalı məkanlarda və döyüş növləri üzrə V Asiya Oyunları davam edir.Azərtac-ın Aşqabada ezam olunan müxbiri xəbər verir ki, Oyunların altıncı günündə - sentyabrın 22-də idmançılar 3x3 basketbol, kəmər güləşi, bilyard, boulinq, şahmat, atçılıq, tennis, kuraş, üzgüçülük, taekvondo, velosiped idmanı və ağırlıqqaldırma yarışlarında mübarizə aparırlar.Bu gün 40 dəst medal sahibini tapacaq.Qeyd edək ki, sentyabrın 27-dək davam edəcək qapalı məkanlarda və döyüş növləri üzrə V Asiya Oyunlarında 6 min atlet 21 idman növündə gücünü sınayır. Oyunlarda Asiya (45) və Okeaniya (19) ölkələrini təmsil edən 65 komanda, habelə qapalı məkanlarda və döyüş növləri üzrə Asiya Oyunları tarixində ilk dəfə Asiya Olimpiya Şurasının bayrağı altında çıxış edən qaçqınlar komandası mübarizə aparır. Yarışların keçiriləcəyi 12 gün ərzində 347 mükafatlandırma mərasimi olacaq və atletlər 1844 medal uğrunda mübarizə aparırlar.xeber100.com

Topaz Premyer Liqasının VI turu çərçivəsində

Topaz Premyer Liqasının VI turu çərçivəsində “Neftçi” ilə oyuna hazırlaşan “Qəbələ” heyətinə daha bir futbolçu cəlb edib.Klubdan Azərtac-a bildiriblər ki, “Qırmızı-qaralar” nigeriyalı hücumçu Ekiqo Ehiosun ilə heyətini gücləndirib. Azad agent statusu ilə komandaya qoşulan 27 yaşlı futbolçu ilə birillik müqavilə imzalanıb.2014-2015-ci il mövsümündə icarə əsasında “Qəbələ”də çıxış edən Ehiosun “qırmızı-qaralar”ın forması ilə 32 oyunda 6 qol vurub. Bütün qollarını çempionatda vuran legioner Premyer Liqada 29, ölkə kubokunda 3 matçda forma geyib.Futbolçu Azərbaycana ilk gəlişinə qədər vətənində “Varri Volves” (2008-2011), Türkiyədə “Samsunspor” (2011-2012) və “Gənclərbirliyi” (2012-2015) klublarında çıxış edib. 2013-2014-cü illərdə “Samsunspor”, 2014-2015-ci illərdə “Qəbələ”yə icarəyə verilən Ekiqo iki il əvvəl Türkiyəyə qayıdıb. O, “Samsunspor” (2015-2016) və “Qazişehir Qaziantep” (2016) komandalarında çıxış edib.Ehiosun 2011-ci ildə debüt etdiyi Nigeriyanın əsas yığmasında 6 oyunda 1 qol vurub.xeber100.com

Millətlər Liqasının loqosu təsdiqlənib

UEFA İcraiyyə Komitəsi 2018-2019-cu il mövsümündə ilk dəfə keçiriləcək Millətlər Liqasının reqlamentini, qaydalarının son versiyasını və loqosunu təsdiqləyib.Azərtac UEFA-nın saytına istinadla xəbər verir ki, turnirin ilk matçı gələn il sentyabrın 6-da keçiriləcək. Yarışda UEFA-ya üzv olan 55 assosiasiyanın hamısı təmsil olunacaq. Yığma komandalar 2018-ci il dünya çempionatının seçmə qrup mərhələsindən sonra formalaşacaq reytinqə əsasən “A”, “B”, “C” və “D” liqalarına bölünəcək.“A” və “B” liqalarının hər birində 12, “C” liqasında 15, “D” liqasında isə 16 komanda yer alacaq. Liqaların yekun tərkibi 2018-ci il dünya çempionatının seçmə mərhələsi yekunlaşdıqdan sonra – bu il noyabrın 15-də açıqlanacaq.“A” və “B” liqaları hər birində üç komanda olmaqla dörd qrupa bölünəcək. “C” liqasında üç komandadan ibarət bir, dörd komandadan ibarət üç qrup olacaq. “D” liqasında isə hər biri dörd komandadan ibarət dörd qrup formalaşacaq.Püşkatma proseduru hələlik təsdiqlənməyib. Ev və səfər oyunları 2018-ci ilin sentyabr, oktyabr və noyabr aylarında keçiriləcək.“A” liqasındakı dörd qrupun qalibləri 2019-cu ilin iyununda keçiriləcək final mərhələsinə vəsiqə qazanacaq. Burada yarımfinallar, üçüncü yer uğrunda oyun və final olacaq. Meydan sahiblərini 2018-ci ilin dekabrında UEFA-nın İcraiyyə Komitəsi iştirakçılar arasından müəyyənləşdirəcək. Millətlər Liqasında eniş və yüksəliş prinsipləri tətbiq olunacaq. “B”, “C” və “D” liqalarının qrup qalibləri səviyyə baxımından yüksəliş qazanacaqlar. “A”, “B” və “C” liqalarının qruplarında zəif nəticə göstərənlər isə aşağı liqaya düşəcəklər.Avropa komandaları Millətlər Liqasında qələbə qazanmaq, yuxarı liqaya düşmək və ya öz yerlərini möhkəmləndirmək üçün mübarizə aparacaqlar.Millətlər Liqasının qrup mərhələsinin püşk atması 2018-ci yanvarın 24-də keçiriləcək. Sonra isə turnirin kuboku təqdim olunacaq.“Avro-2020”nin seçmə mərhələsi böyük dəyişikliklərə məruz qalmayacaq. Millətlər Liqasında 16 qrupun qalibləri 2020-ci il Avropa çempionatının seçmə mərhələsinə vəsiqə qazanmaq şansı əldə edəcəklər. Bu kollektivlər dörd qrupa bölünəcəklər. “Dördlər finalı”da isə “pley-off” xarakterli iki yarımfinal və bir final matçı keçiriləcək. Hər bir qrupdan qalib komanda qitə birinciliyinə vəsiqə qazanacaq.Qrup qaliblərindən hansısa seçmə mərhələ vasitəsilə “Avro-2020”yə düşərsə, onun vəsiqəsi Millətlər Liqasının növbəti ən yaxşı komandasına nəsib olacaq. Seçmə mərhələdən vəsiqə əldə edən olarsa, vakant yerləri, reytinq nəzərə alınmaqla, aşağı divizion komandaları tutacaqlar.xeber100.com