Basketbol üzrə 40-cı Avropa çempionatında

Sentyabrın 13-də basketbol üzrə 40-cı Avropa çempionatının sonuncu iki yarımfinalçısının adları məlum olub.Azərtac xəbər verir ki, İstanbuldakı Sinan Erdem arenasında keçirilən dörddəbir final mərhələsinin sonuncu iki görüşündə Yunanıstan və Rusiya, İtaliya və Serbiya milli komandaları üz-üzə gəliblər.Gərgin idman mübarizəsi şəraitində keçən görüşdə Rusiya millisi birinci periodda hesabda geri düşsə də, əzmkar oyun nümayiş etdirərək matçı qələbə ilə başa vura bilib - 74:69. Rusiya millisinin heyətində Aleksey Şved 26 xalla gecənin ən məhsuldar oyunçusu olub. Yunanıstan yığmasının heyətində isə Nik Kalates 25 xal və 5 ribaundla yadda qalıb.Çempionatın yarımfinal mərhələsinə sonuncu vəsiqənin sahibi İtaliya yığmasını 83:67 hesabı ilə məğlub edən Serbiya millisi olub. Serbiya yığmasının heyətində Boqdanoviç 22 xal, İtaliya millisində isə Belinelli 18 xalla ən məhsuldar oyunçu kimi yadda qalıblar.Beləliklə, İspaniya və Sloveniyadan sonra, Rusiya və Serbiya milliləri də yarımfinala vəsiqə qazanıblar. Yarımfinal qarşılaşmaları sentyabrın 14-də və 15-də keçiriləcək. İlk matçda İspaniya və Sloveniya, bir gün sonra isə Rusiya və Serbiya yığma komandaları finala vəsiqə uğrunda güclərini sınayacaqlar.Qitə birinciliyində üçüncü yer uğrunda görüş və final matçı sentyabrın 17-də keçiriləcək.Xatırladaq ki, dörd ölkənin – Finlandiya, İsrail, Rumıniya və Türkiyənin ev sahibliyi ilə keçirilən basketbol üzrə 40-cı Avropa çempionatında dörd qrupda 24 komanda mübarizəyə qoşulmuşdu.xeber100.com

2017-2018-ci il mövsümünün birinci turuna yekun vurulub

Sentyabrın 13-də futbol üzrə UEFA Çempionlar Liqasının 2017-2018-ci il mövsümünün qrup mərhələsinin birinci turuna yekun vurulub.Azərtac xəbər verir ki, turun ikinci günündə “E”, “F”, “G” və “H” qruplarında yer alan komandalar qarşılaşıblar.“E” qrupunda İngiltərə təmsilçisi "Liverpul" doğma meydanda İspaniyanın "Sevilya" (2:2), Sloveniyanın "Maribor" klubu isə evdə "Spartak" ilə (Rusiya) heç-heçə edib (1:1).“F” qrupunda isə “Mançester Siti” (İngiltərə) "Feyenoord"u (Hollandiya) (4:0), "Şaxtyor" (Ukrayna) isə "Napoli"ni (İtaliya) məğlub edib (2:1).İstanbulun "Beşiktaş" klubunun yer aldığı “G” qrupunda isə Türkiyə təmsilçisi səfərdə Portuqaliyanın "Portu"nu məğlub edib - 3:1. "Monako" (Fransa) isə "Leyptsiq" komandası ilə qarşılaşdığı Almaniya səfərində bir xal əldə edib (1:1).“H” qrupunda isə "Tottenhem" (İngiltərə) klubu "Borussiya"ya (Dortmund, Almaniya) (3:1), İspaniyanın Real Madrid komandası isə APOEL-ə (Kipr) qalib gəlib (3:0).xeber100.com

Azərbaycan milli komandasının baş məşqçisi müəyyənləşib

Məşqçilər Komitəsinin təklifinə əsasən, 21 yaşadək futbolçulardan ibarət Azərbaycan milli komandasının baş məşqçisi müəyyənləşib.AFFA-dan Azərtac-a bildirilib ki, Avropa çempionatının seçmə qrup mərhələsi çərçivəsində oktyabr və noyabr aylarında keçirəcəyi oyunlar üçün baş məşqçisi vəzifəsi müvəqqəti olaraq Samir Ələkbərova həvalə olunub.Baş məşqçinin qərarına əsasən, bu müddət üçün Aslan Kərimov və Cahangir Həsənzadə köməkçi-məşqçi vəzifəsinə təyin ediliblər.xeber100.com

“Qarabağ” komandası ilk oyununu keçirib

Sentyabrın 12-də UEFA Çempionlar Liqasının 2017-2018-ci il mövsümünün qrup mərhələsinə start verilib.Azərtac xəbər verir ki, qrup mərhələsinin “C” qrupunda yer alan Ağdamın “Qarabağ” komandası qitənin ən nüfuzlu klub turnirində keçirdiyi ilk oyunda Londonda “Çelsi” klubunun qonağı olub. Oyun “Çelsi” komandasının 6:0 hesablı qələbəsi ilə başa çatıb.“Stamford Bridc” stadionunda keçirilən matçı yunanıstanlı Tasos Sidiropoulosun başçılıq etdiyi hakimlər briqadası idarə edib.Ağdam təmsilçisinin start heyətində İbrahim Şehiç, Qara Qarayev, Maksim Medvedev, Miçel, Dino Ndlovu, Pedro Enrike, Rəşad Sadıqov, Riçard Almeyda, Yakub Jezniçak, Bədavi Hüseynov və Donald Gerye yer alıblar.xeber100.com

Avropa çempionatının final mərhələsinin ilk görüşü keçirilib

Sentyabrın 12-də basketbol üzrə Avropa çempionatının dörddəbir final mərhələsinin ilk iki görüşü keçirilib.Azərtac xəbər verir ki, ilk oyunda İspaniya və Almaniya yığma komandaları üz-üzə gəliblər. Çempionatda qrup mərhələsində keçirdiyi bütün görüşlərdə qalib gələn Pireney təmsilçisi qələbə seriyasını bu oyunda da qoruyub. Səkkizdəbir finalda Türkiyə millisini mübarizədən kənarlaşdıran İspaniya basketbolçuları görüşü 84:72 hesablı qələbə ilə başa vuraraq yarımfinala yüksəliblər.Dörddəbir final mərhələsinin ikinci görüşündə qrup mərhələsində yüz faizli nəticə göstərən digər komanda – Sloveniya yığması Latviya seçməsi ilə qarşılaşıb. Gərgin idman mübarizəsi şəraitində keçən oyunda sloveniyalılar 103:97 hesabı ilə qələbə qazanaraq adlarını yarımfinala yazdırıblar. Sloveniya yığma komandası yarımfinalda İspaniya millisi ilə görüşəcək.Avropa çempionatında digər yarımfinalçılar Yunanıstan-Rusiya və İtaliya-Serbiya oyunlarından sonra müəyyənləşəcək.Dörd ölkənin – Finlandiya, İsrail, Rumıniya və Türkiyənin ev sahibliyi ilə keçirilən basketbol üzrə 40-cı Avropa çempionatında dörd qrupda 24 komanda mübarizəyə qoşulmuşdu.xeber100.com

2017-2018-ci il mövsümünün növbəti oyunları keçiriləcək

Bu gün futbol üzrə UEFA Çempionlar Liqasının 2017-2018-ci il mövsümünün qrup mərhələsinin birinci turu çərçivəsində növbəti oyunlar keçiriləcək.Azərtac xəbər verir ki, turun ikinci günündə “E”, “F”, “G” və “H” qrupunda yer alan komandalar qarşılaşacaqlar.İlk turun bütün qarşılaşmaları Bakı vaxtı ilə saat 22:45-də başlayacaq.“E” qrupunda İngiltərə təmsilçisi “Liverpul” doğma meydanda İspaniyanın “Sevilya”, Sloveniyanın “Maribor” klubu isə “Spartak”ı (Rusiya) qəbul edəcək.“F” qrupunda isə “Feyenoord” (Hollandiya) -“Mançester Siti” (İngiltərə) və “Şaxtyor” (Ukrayna) – Napoli (İtaliya) oyunları keçiriləcək.“Beşiktaş” klubunun yer aldığı “G” qrupunda isə Türkiyə təmsilçisi Portuqaliyanın “Portu” klubunun, “Monako” (Fransa) isə Almaniyanın “Leyptsiq” komandasının qonağı olacaq.“H” qrupunda isə “Tottenhem” (İngiltərə) klubu “Borussiya” (Dortmund, Almaniya), İspaniyanın “Real Madrid komandası isə APOEL (Kipr) qəbul edəcək.xeber100.com

Voleybol Federasiyasının məlumatı

Azərbaycan Voleybol Federasiyasının (AVF) prezidenti Cavid Qurbanov milli komandamızın üzvləri ilə görüşüb.Federasiyadan Azərtac-a bildiriblər ki, AVF rəhbəri əvvəlcə təlim-məşq toplanışından qayıdan komandanın hazırkı durumu ilə maraqlanıb.Azərbaycanın sentyabrın 22-də start götürəcək qadın voleybolçular arasında Avropa çempionatına yüksək səviyyədə hazırlaşdığını vurğulayan C.Qurbanov komandamızın mükafatçılar sırasında yer alacağına əminliyini bildirib.Federasiya rəhbəri deyib ki, təcrübəli baş məşqçi Faiq Qarayevin rəhbərliyi ilə komanda mükafatçılar sırasında yer almaq gücündədir: “Avropa çempionatına ev sahibliyi etmək Azərbaycanın növbəti böyük uğurudur. Çalışırıq ki, bu mötəbər yarışı yüksək səviyyədə təşkil edək. Amma əsas yük sizin üzərinizdədir. Yaxşı nəticə qazanmağa çalışmaq lazımdır. Yığmamız mükafatçılar sırasında yer almağa qadirdir. Komandada Faiq Qarayev kimi böyük mütəxəssis olduğundan bunu bacaracağınıza inanıram”.AVF-in vitse-prezidenti və yığmanın baş məşqçisi Faiq Qarayev komandanın hazırkı durumundan danışıb. Maribordakı hazırlıq prosesinin və yoxlama oyunlarının milli komandanın voleybolçuları üçün faydalı olduğunu vurğulayan Faiq Qarayev deyib: “Sloveniyada uzun müddət təlim-məşq toplanışı keçdik. Komandamızda bəzi zədəli oyunçular var idi. Onların formaya düşməsi üçün xüsusi proqram tərtib etdik. Azərbaycanın Avropa çempionatına ev sahibliyi etməsi bizim üçün böyük məsuliyyətdir. Qarşıda komandamızı yoxlama matçları gözləyir. Milli komandamızın yaxşı nəticə əldə etməsi üçün var gücümüzlə çalışacağıq”.Qadınlar arasında voleybol üzrə Avropa çempionatı Azərbaycanda və Gürcüstanda təşkil olunacaq. Millimiz Polşa, Almaniya və Macarıstan yığmaları ilə birlikdə “A” qrupunda yer alıb.xeber100.com  

“Baku Cup-2017” turnirində…

“Neftçi İdman Klubu”nun 11 yaşadək futbolçulardan ibarət komandası AFFA-nın və “Leon” klubunun təşkilatçılığı ilə Azərbaycan Dövlət Bədən Tərbiyəsi və İdman Akademiyasının stadionunda keçirilən “Baku Cup-2017” turnirində iştirak edib.Azərtac xəbər verir ki, AFFA-nın təşkil etdiyi U-11 Liqasına hazırlıq məqsədi daşıyan turnirdə “Neftçi İdman Klubu” ilk görüşlərdə "Səbail”ə 8:1, "İnter”ə isə 5:2 hesabı ilə qalib gəlib. Sonrakı turlarda “Vətən”ə 2:5 məğlub olan komandamız “Leon”la heç-heçə edib – 1:1. Yarımfinalda "Qarabağ” komandasını 8:1 hesabı ilə məğlub edən “Neftçi İdman Klubu” finala yüksəlib. Bu mərhələdə “Vətən” klubu ilə üz-üzə gələn komanda 0:5 hesabı ilə məğlub olub və ikinci yeri tutub.xeber100.com

Şahmat üzrə Avropa çempionatında 7-ci turun oyunları keçirilib

Rumıniyanın Mamaya şəhərində yeniyetmələrin və gənclərin şahmat üzrə Avropa çempionatında 7-ci turun oyunları keçirilib.Bu barədə Azərtac-a Azərbaycan Şahmat Federasiyasından məlumat verilib.On iki yaşlı oğlanların turnirində Aydın Süleymanlı Rusiya nümayəndəsi Vladimir Murzinə qalib gələrək 7 görüşdən 6 xal yarım toplayaraq turnir cədvəlinə başçılıq edir. Eyni yaş qrupunda yarışan qızların mübarizəsində Azərbaycan təmsilçisi Ayan Allahverdiyeva gürcüstanlı Diana Lomayaya qalib gələrək liderliyi ələ ala bilib.On dörd yaşlı qızların turnirində Gövhər Beydullayeva ukraynalı Mariya Berdniki məğlub edərək liderliyini daha da möhkəmləndirib.xeber100.com

Tennis üzrə Avropa çempionatı keçiriləcək

Sentyabrın 13-17-də Lüksemburqda stolüstü tennis üzrə Avropa çempionatı keçiriləcək.Azərbaycan Stolüstü Tennis Federasiyasından Azərtac-a bildirilib ki, çempionat ərəfəsində ümumi konqres və Avropa Stolüstü Tennis İttifaqının 60 illik ildönümünə həsr olunmuş tədbir keçiriləcək.Azərbaycanı çempionatda bir qadın və bir kişi komandası təmsil edəcək. Həmçinin federasiya rəsmilərinin konqresdə və yubiley tədbirində iştirakı nəzərdə tutulub.xeber100.com