“The Telegraph”ın məlumatına görə…

İngiltərənin “Mançester Yunayted” futbol komandasında köklü oyunçu dəyişikliyi baş verəcək. "The Telegraph” xəbər verir ki, qış transferində klubda 9 futbolçunun satılması nəzərdə tutulub. Məlum olub ki, bu təşəbbüs bilavasitə baş məşqçi Joze Mourinyodan gəlib. Hətta vəziyyət o yerə çatıb ki, portuqaliyalı mütəxəssis müqaviləsi mövsümün sonunadək qüvvədə olan və bu il heyətə cəlb olunan hücumçu Zlatan İbrahimoviçlə də yolların ayrılmasını istəyib. Onun qənaətinə görə, komandanın son oyunlardakı uğursuzluğu məhz heyətə transfer olunan zəif futbolçuların alınmasından qaynaqlanır. Yayda dörd oyunçu - Zlatan İbrahimoviç, Henrik Mxitaryan, Erik Bayi və Pol Poqbanın alınmasına 145,7 milyon funt sterlinq xərclənib. Mourinyonun vidalaşmaq istədikləri isə müdafiəçi Matteo Darmian, Markus Roho, Fil Cons, yarımmüdafiəçi Bastian Şvaynştayger, Morqan Şnayderlin, Maykl Kerrik, Eşli Yanq, habelə hücumçu Memfis Depay və Zlatan İbrahimoviçdir. Qeyd edək ki, “Mançester Yunayted” oktyabrın 23-də “Çelsi”yə 0:4 hesabı ilə uduzub. Bu, Joze Mourinyonun İngiltərə karyerası ərzində ən böyük hesablı məğlubiyyəti olub. Noyabrın 3-də isə “qırmızı şeytanlar” Avropa Liqasının qrup mərhələsinin IV turunda İstanbulda “Fənərbağça”ya yenilib - 1:2. Hazırda Mourinyonun komandası Premyer Liqada 10 oyundan 15 xalla səkkizinci, Avroliqada isə 6 xalla üçüncü pillədə qərarlaşıb.xeber100.com

Topaz Premyer Liqasında XI tura start verilib

Noyabrın 5-də futbol üzrə Topaz Premyer Liqasında XI tura start verilib. Azərtac xəbər verir ki, milli komandaların oyunları ilə əlaqədar yaranacaq iki həftəlik fasilə öncəsi keçirilən tur iki gün davam edəcək. Turun açılış matçı Gəncədə oynanılıb. “Kəpəz” klubu “Sumqayıt”ı qəbul edib. Komandaların hücum qurmaq cəhdlərinə baxmayaraq görüş qolsuz heç-heçə başa çatıb. Bu görüşdən sonra Gəncə klubunun 12 xalla beşinci pillədəki mövqeyi dəyişməyib. Hesabında 10 xal olan “Sumqayıt” isə turnir cədvəlində altıncı pillədə yer alıb.xeber100.com

“Qarabağ” komandası UEFA-nın reytinq cədvəlində mövqeyini dəyişib

Futbol üzrə Avropa Liqasının qrup mərhələsinin IV turunda Yunanıstanın “PAOK” klubunu 1:0 hesabı ilə məğlub edən Ağdamın “Qarabağ” komandasının UEFA-nın reytinq cədvəlində mövqeyi dəyişib. Azərtac xəbər verir ki, komandamız 13 pillə irəliləyərək 18.050 xalla 99-cu yerdə qərarlaşıb. “Qarabağ” bununla da ilk yüzlükdə qərarlaşan birinci Azərbaycan klubu olub.xeber100.com

UEFA qrup mərhələsinin dördüncü turuna yekun vurulub

Noyabrın 3-də UEFA Avropa Liqasında qrup mərhələsinin dördüncü turunun oyunları keçirilib. Tur çərçivəsində 12 qrupda ümumilikdə 24 matç oynanılıb. Azərtac xəbər verir ki, azərbaycanlı futbol azarkeşləri üçün maraqlı oyunlardan biri İstanbulda baş tutub. “A” qrupunda Türkiyənin “Fənərbağça” klubu İngiltərənin “Mançester Yunayted” komandasını qəbul edib və 2:1 hesabı ilə qalib gəlib. Qrupun digər görüşündə isə Ukraynanın “Zorya” və Hollandiyanın “Feyenoord” klubları “sülh” bağlayıblar – 1:1. Bu nəticələrdən sonra “Feyenoord” və “Fənərbağça” klubları 7 xalla qrupda ilk iki pilləni bölüşür. “Mançester Yunayted” 6 xalla üçüncü, “Zorya” isə 2 xalla sonuncudur. “Qəbələ”nin çıxış etdiyi “C” qrupunda keçirilən “Anderlext” (Belçika)-“Maynts” (Almaniya) görüşündə meydan sahibləri rəqiblərini darmadağın ediblər - 6:1. Dörd oyundan sonra “Anderlext” və “Sent-Etyen”in aktivində 8 xal var. “Maynts” 5 xalla üçüncü pillədədir. “Qəbələ” isə hələ də xal qazanmayıb. “Qarabağ”ın mübarizə apardığı “J” qrupunda isə “Fiorentina” (İtaliya) komandası öz meydanında Çexiyanın “Slovan Libereç” komandasını 3:0 hesabı ilə məğlub edərək qrupda liderliyini qoruyub. Səfərdə Yunanıstanın “PAOK” klubunu 1:0 hesabı ilə məğlub edən “Qarabağ” 7 xalla ikinci pillədədir. “PAOK” 4 xalla üçüncü, “Slovan Libereç” isə 1 xalla sonuncu pillədə qərarlaşıb. “H” qrupunda keçirilən “Braqa”-“Konyaspor matçında meydan sahibləri 2:1 hesablı qələbə qazanıblar. Belçikada keçirilən “Gent”–“Şaxtyor” (Ukrayna) görüşündə isə əsl qol şousu yaşanıb. “Şaxtaçılar” səfərdə rəqiblərini 5:3 hesabı ilə məğlub ediblər. Digər qruplarda aşağıdakı nəticələr qeydə alınıb: “B” qrupu “Astana” (Qazaxıstan) - “Olimpiakos” (Yunanıstan) – 1:1 APOEL (Kipr) - “Yanq Boyz” (İsveçrə) - 1:0 “D” qrupu “Makkabi” (Təl-Əviv, İsrail)-“AZ Alkmaar” (Hollandiya) - 0:0 “Zenit” (Rusiya)-“Dundalk" (İrlandiya) - 2:1 “E” qrupu “Austriya” (Avstriya)-“Roma” (İtaliya) – 2:4 “Astra” (Rumıniya)-“Viktoriya” (Çexiya) - 1:1 “F” qrupu “Atletik” (İspaniya)-“Genk” (Belçika) – 5:3 “Sassuolo” (İtaliya)-“Rapid” (Avstriya) – 2:2 “G” qrupu “Panatinaikos” (Yunanıstan)-“Standart” (Belçika) – 0:3 “Ayaks” (Hollandiya)-“Selta” (İspaniya) – 3:2 “I” qrupu “Şalke” (Almaniya)-“Krasnodar” (Rusiya) – 2:0 “Nitsa” (Fransa)-“Zalsburq” (Avstriya) – 0:2 “K” qrupu “Southempton” (İngiltərə)-“İnter” (İtaliya) – 2:1 “Sparta” (Çexiya)-“Hapoel” (Bir Şeva, İsrail) – 2:0 “L” qrupu “Sürix” (İsveçrə)-“Styaua” (Rumıniya) – 0:0 “Vilyarreal” (İspaniya)-“Osmanlıspor” (Türkiyə) – 1:2 UEFA Avropa Liqasının qrup mərhələsinin beşinci turunun oyunları noyabrın 24-də keçiriləcək.xeber100.com

FIFA “Ən yaxşı kişi baş məşqçi” nominasiyası üzrə on namizədi elan edib

FIFA 2016-cı il üçün “Ən yaxşı kişi baş məşqçi” nominasiyası üzrə on namizədi elan edib. Namizədlərdən üçü klubların, yeddisi isə milli komandaların baş məşqçisidir. Azərtac FIFA-nın saytına istinadla xəbər verir ki, ilk onluqda Kris Koleman (Uels), Didye Deşam (Fransa), Pep Qvardiola (“Bavariya” və “Mançester Siti”), Yürgen Klopp (“Liverpul”), Luis Enrike (“Barselona”), Maurisio Poçettino (“Tottenham”), Klaudio Ranieri (“Lester Siti”), Fernando Santos (Portuqaliya), Dieqo Simeone (“Atletiko Madrid”) və Zinəddin Zidan (“Real Madrid”) yer alıblar. “Ən yaxşı kişi baş məşqçi” nominasiyası üzrə qalib qarışıq səsvermə prosesi nəticəsində məlum olacaq. Belə ki, səslərin yarısı milli komandaların baş məşqçilərinin və kapitanlarının qərarlarını əks etdirəcək. Digər yarısı isə azarkeşlərin və altı qitəni təmsil edən 200 media nümayəndəsinin səslərindən ibarət olacaq. Bu nominasiyanın qalibi yanvarın 9-da Sürixdə mükafatlandırılacaq.xeber100.com

“Qarabağ” klubu PAOK-unun qonağı olacaq

Bu gün futbol üzrə UEFA Avropa Liqasının qrup mərhələsinin IV turunda “Qarabağ” klubu səfərdə Yunanıstan PAOK-unun qonağı olacaq. Azərtac xəbər verir ki, komandamız qarşılaşmanın keçiriləcəyi “Toumba” stadionunda oyunöncəsi son məşqinə çıxıb. Məşq təxminən 1 saat davam edib. Qeyd edək ki, PAOK-“Qarabağ” oyunu Bakı vaxtı ilə saat 00:05-də start götürəcək.xeber100.com

Cüdoçular arasında Avropa çempionatı başlayır

Noyabrın 11-də Təl-Əvivdə 23 yaşadək cüdoçular arasında Avropa çempionatı start götürəcək. Azərtac xəbər verir ki, iki gün davam edəcək yarışa Azərbaycan yığması da qatılacaq. Məşqçilər korpusu İsraildə Mehman Sadıqov, Davud Məmmədsoy (hər ikisi 60 kq), Telman Vəliyev (66 kq), Hidayət Heydərov, Fəqan Quluzadə (hər ikisi 73 kq), Rüfət İsmayılov (81 kq), Firudin Dadaşov, Vasif Sərbətli (hər ikisi 90 kq) və Cəlil Şükürovu (100 kq) sınamağı qərara alıb. Qitə çempionatında 40 ölkədən 341 cüdoçunun iştirakı gözlənilir.xeber100.com

Messi növbəti rekorda imza atıb

“Barselona” komandasının argentinalı ulduzu Lionel Messi UEFA Çempionlar Liqasının qrup mərhələsində “Mançester Siti” ilə qarşılaşmada vurduğu qolla növbəti rekorda imza atıb. Azərtac xəbər verir ki, görüşün 21-ci dəqiqəsində fərqlənən argentinalı hücumçu Çempionlar Liqasının qrup mərhələlərində vurduğu qolların sayını 54-ə çatdırıb. Bununla da o, “Real Madrid”in sabiq futbolçusu Raul Qonzalezin 53 qolluq rekordunu yeniləyib. L.Messi qitənin ən nüfuzlu turnirində indiyədək rəqib qapılarından 90 top keçirib. Turnirin ən çox qol vuran futbolçusu isə 94 qolla “Real Madrid”in portuqaliyalı forvardı Kriştiano Ronaldodur.xeber100.com

Ən çox qazanc əldə edən klubların siyahısı açıqlanıb

UEFA 2015-2016-cı illər mövsümündə Çempionlar Liqasında göstərdiyi nəticələrə və yayım hüququna görə ən çox qazanc əldə edən klubların siyahısını açıqlayıb. Azərtac xəbər verir ki, siyahıya 83 milyon 853 min avro gəlirlə “Mançester Siti” klubu başçılıq edir. İlk onluqda sonrakı yerləri “Real Madrid” (80 milyon 67 min avro), “Yuventus” (76 milyon 256 min avro), “Pari-Sen-Jermen” (70 milyon 803 min avro), “Atletiko Madrid” (69 milyon 665 min avro), “Çelsi” (69 milyon 174 min avro), “Roma” (68 milyon 461 min avro), “Bavariya” (64 milyon 391 min avro), “Barselona” (56 milyon 552 min avro) və “Arsenal” (53 milyon 423 min avro) klubları tutur.xeber100.com  

UEFA Avropa Liqasının qrup mərhələsində IV turun oyunları başlayır

Bu gün futbol üzrə UEFA Avropa Liqasının qrup mərhələsində IV turun oyunları keçiriləcək. Azərtac xəbər verir ki, Ağdamın “Qarabağ” klubu səfərdə Yunanıstanın PAOK komandasının qonağı olacaq. Bakıda keçirilən oyunda rəqibini məğlub edən (2:0) komandamız bunu Salonikidə də təkrarlamağa çalışacaq. “Qarabağ” heç-heçə sayəsində də qrupdakı vəziyyətini yaxşılaşdıra bilər. Komandamız səfərdə qazanılan bir xal sayəsində də PAOK-u qabaqlayaraq ikinci pilləyə yüksələ bilər. Qrupun digər oyununda “Fiorentina” İtaliyada “Slovan”ı (Çexiya) qəbul edəcək. Qeyd edək ki, PAOK-“Qarabağ” oyunu noyabrın 3-də Salonikidəki “Toumba” stadionunda Bakı vaxtı ilə saat 00:05-də start götürəcək.xeber100.com