2016-cı ilin ən yaxşı futbolçuları müəyyənləşib

“Qızıl top” mükafatına daha 15 namizədin adı açıqlanıb. Azərtac xəbər verir ki, “France Football”un 2016-cı ilin ən yaxşı futbolçusu adına yekun “30-luğ”u müəyyənləşib. Namizədlər aşağıdakılardır: Serxio Aquero (Argentina / “Mançester Siti”) Pyerr-Emerik Obameyanq (Qabon / “Borussiya” Dortmund) Qaret Beyl (Uels / “Real”) Canluici Buffon (İtaliya / “Yuventus”) Kriştianu Ronaldo (Portuqaliya / “Real”) Kevin de Bruyne (Belçika / “Mançester Siti”) Paulo Dibala (Argentina / “Yuventus”) Dieqo Qodin (Uruqvay / “Atletiko”) Antuan Qrizmann (Fransa / “Atletiko”) Qonzalo İquain (Argentina / “Yuventus”) Zlatan İbrahimoviç (İsveç / “Mançester Yunayted”) Andres İnyesta (İspaniya / “Barselona”) Koke (İspaniya / “Atletiko”) Toni Kroos (Almaniya / “Real”) Robert Levandovski (Polşa / “Bavariya”) Uqo Lloris (Fransa / “Tottenhem”) Riyad Mahrez (Əlcəzair / “Lester”) Lionel Messi (Argentina / “Barselona”) Luka Modriç (Xorvatiya / “Real”) Tomas Müller (Almaniya / “Bavariya) Manuel Noyer (Almaniya / “Bavariya”) Neymar (Braziliya / “Barselona”) Dmitri Paye (Fransa / “Vest Hem”) Pol Poqba (Fransa / “Mançester Yunayted”) Pepe (Portuqaliya / “Real”) Rui Patrisio (Portuqaliya / “Sportinq”) Serxio Ramos (İspaniya / “Real”) Luis Suares (Uruqvay / “Barselona”) Ceymi Vardi (İngiltərə / “Lester”) Arturo Vidal (Çili / “Bavariya”) Xatırladaq ki, bu il ilk dəfə olaraq “Qızıl top”un sahibi yalnız jurnalistlərin səsverməsinə əsasən seçiləcək. “Qızıl top”a bu il əsas namizəd “Real”la Çempionlar Liqası və Portuqaliya yığması ilə Avropa çempionluğunu qazanan 31 yaşlı Ronaldo sayılır. Bu mükafatı son dəfə Messi qazanıb.xeber100.com

Avropa çempionatına yekun vurulub

Parisdə velosiped idmanının trek növü üzrə Avropa çempionatına yekun vurulub. Azərtac xəbər verir ki, yarışda ölkəmiz bir idmançı ilə - keyrin növündə mübarizə aparan Sergey Omelçenko ilə təmsil olunub. Otuz iki idmançının iştirak etdiyi bu növdə Sergey Omelçenko birinci mərhələni uğurla adlayıb. O, Litva, Fransa, Hollandiya və Belarus təmsilçiləri ilə eyni xətdə yer alıb və hamını qabaqlamaqla qrup birincisi kimi birbaşa yarımfinala vəsiqə qazanıb. Finala çıxmaqla medallar uğrunda mübarizə aparmaq üçün Sergey Omelçenkoya yarımfinal yürüşündə cəmi bir neçə santimetr çatmayıb. Polşa, İspaniya, Fransa, həmçinin Çexiyanın 2 idmançısı ilə mübarizənin yekununda ilk üçlükdən kənar qalan təmsilçimiz 4-cü olub və bununla da 7-12-ci yerlər uğrunda yarışmalı olub. Son yürüşdə Böyük Britaniya və Çexiya idmançılarından geri qalan, amma İspaniya və Yunanıstanın 2 velosipedçisini qabaqlayan S.Omelçenko bununla da Avropa çempionatını 9-cu pillədə başa vurmaqla aktivinə 300 reytinq xalı yazdırıb. Qeyd edək ki, reytinq xalları idmançımıza gələn ay başlayacaq və 4 mərhələdən ibarət olacaq dünya kuboku yarışlarında iştirak baxımından olduqca böyük əhəmiyyət daşıyır.xeber100.com

Şahmat üzrə beynəlxalq turnir başa çatıb

Özbəkistan Mədəniyyət və İdman İşləri Nazirliyinin ölkənin Şahmat Federasiyası ilə birgə böyük sərkərdə Əmir Teymurun 680 illiyi ilə bağlı Daşkənddə keçirdiyi sürətli şahmat üzrə beynəlxalq turnir başa çatıb. Yarışda Şəhriyar Məmmədyarov (Azərbaycan), Rüstəm Qasımcanov (Özbəkistan), Boris Qelfand (İsrail) və Ruslan Panamaryov (Ukrayna) kimi tanınmış qrossmeysterlər iştirak edib. Beynəlxalq turnirin yekunlarına görə Şəhriyar Məmmədyarov səkkiz xalla birinci, Boris Qelfand 6 xalla ikinci, Rüstəm Qasımcanov isə beş xalla üçüncü yeri tutub.xeber100.com

Premyer Liqasında IX tura start verilib

Sentyabrın 23-də futbol üzrə Azərbaycan Premyer Liqasında IX tura start verilib. Azərtac xəbər verir ki, günün yeganə qarşılaşması Gəncədə baş tutub. “Kəpəz” klubu “İnter"i qonaq edib. Soyuq və çiskinli hava şəraiti üzündən ot örtüyü qənaətbəxş vəziyyətdə olmayıb. Bütün bu amillərə baxmayaraq, matç gərgin və qol epizodları ilə bol olub. Tərəflərin səylərinə baxmayaraq qapılar toxunulmaz qalıb. Beləliklə, 0:0 hesablı heç-heçə Gəncə və paytaxt komandalarının hərəsinə bir xal qazandırıb. “Kəpəz” 11 xalla dördüncü, “İnter” isə 17 xalla ikinci pillədə qalıb. Tur oktyabrın 24-də AZAL – “Zirə” oyunu ilə davam edəcək.xeber100.com

“Böyük İpək Yolu” Beynəlxalq Gənclər İttifaqının təşkilati dəstəyi ilə…

Azərbaycanın dövlət müstəqilliyinin bərpa edilməsinin 25-ci ildönümü münasibətilə Bakıda veloyürüş keçirilib. Azərtac xəbər verir ki, 200-dən çox peşəkar və həvəskar velosipedçinin iştirak etdiyi veloyürüş Dövlət Bayrağı Meydanından start götürüb, Heydər Əliyev Mərkəzinin binasının qarşısında başa çatıb. “İrəli” İctimai Birliyinin sədri Mirhəsən Seyidov jurnalistlərə müsahibəsində dövlət müstəqilliyimizin bərpa olunmasının 25 illiyi ilə əlaqədar silsilə tədbirlərin keçirildiyini söyləyib. Veloyürüşün “Müstəqilliyimiz əbədidir, dönməzdir, sarsılmazdır” adı altında keçirildiyini diqqətə çatdıran İctimai Birliyin sədri gənclərin belə tədbirlərdə fəallıq göstərməsinin əhəmiyyətini qeyd edib. O bildirib ki, müstəqilliyimizin bərpa edilməsinin 25-ci ildönümü ilə əlaqədar idman, mədəniyyət sahələrində təşkil olunan tədbirlər həm də gənclərin asudə vaxtlarını səmərəli keçirmələri baxımından xüsusi önəm kəsb edir. Qeyd edək ki, “İrəli” İctimai Birliyi veloyürüşü Azərbaycan Velosiped İdmanı Federasiyasının, Nazirlər Kabineti yanında Dənizkənarı Bulvar İdarəsinin və “Böyük İpək Yolu” Beynəlxalq Gənclər İttifaqının təşkilati dəstəyi ilə keçirib.xeber100.com

“XX Corsican Circuit 2016” beynəlxalq şahmat turniri başlayıb

Bu gün Fransanın Bastiya şəhərində “XX Corsican Circuit 2016” beynəlxalq şahmat turniri başlayıb. Azərtac xəbər verir ki, əvvəlcə “Open Corsica Maestri” yarışı keçiriləcək. Yarışda 61 şahmatçı, o cümlədən 19 qrossmeyster iştirak edəcək. Turnir İsveçrə sistemi üzrə 9 turda keçiriləcək. Yarışın yekununa əsasən turnirin rapid üzrə 1/8 finalının 12 iştirakçısı müəyyən ediləcək və azərbaycanlı qrossmeyster Teymur Rəcəbov, hindistanlı sabiq dünya çempionu Vişvanatan Anand, yerli şahmatçı Maksim Vaşye-Laqrav və qadınlar arasında dünya çempionu, çinli şahmatçı Xou İfan onlara qoşulacaq. Oktyabrın 30-da turnirin final mərhələsi keçiriləcək.xeber100.com

“Barselona” müqaviləni yeniləyib

“Barselona” futbol klubunun rəhbərliyi komandanın braziliyalı hücumçusu Neymar Junior ilə müqaviləni yeniləyib. Azərtac xəbər verir ki, 24 yaşlı futbolçu ilə müqavilənin müddəti 2021-ci ilədək uzadılıb. “Sambaçı”nın təzminat qiyməti birinci il 200 milyon, ikinci il 220, üçüncü il isə 250 milyon avro olacaq. Müqavilənin müddəti 2021-ci il iyunun 30-da başa çatacaq. Rio-de-Janeyroda keçirilən XXXI Yay Olimpiya Oyunlarının çempionu olan Neymar “Barselona”nın əsas heyətində keçirdiyi 150 oyunda 91 qol vurub. O, bu müddətdə 62 məhsuldar ötürmə edib.xeber100.com

UEFA Avropa Liqasında həftənin ən yaxşı futbolçusu seçilib

“Qarabağ”ın yarımmüdafiəçisi Dani Kintana UEFA Avropa Liqasının qrup mərhələsində həftənin ən yaxşı futbolçusu seçilib. Azərtac xəbər verir ki, UEFA-nın rəsmi saytında azarkeşlər arasında keçirilən sorğuda 69 faiz səs toplayan ispaniyalı yarımmüdafiəçi bütün rəqiblərini qabaqlayıb. O, Kevin Monne Poke (“Sent-Etyen”, 8 faiz), Viktor İbarbo (“Panatinaikos”, 8 faiz), Pol Poqba (“Mançester Yunayted”, 7 faiz), Raul Rusesku (“Osmanlıspor”, 4 faiz), Antonio Kandreva (“İnter”, 2 faiz), Yevgeni Konoplyanka (“Şalke”, 2 faiz) və Nikola Kaliniçi (“Fiorentina”, 1 faiz) böyük səs çoxluğu ilə geridə qoyub. D.Kintana “Qarabağ”–PAOK (2:0) oyununda ilk qolun müəllifi olub.xeber100.com

Avropa Liqasında üçüncü tura yekun vurulub

Oktyabrın 20-də UEFA Avropa Liqasında qrup mərhələsinin üçüncü turunun oyunları keçirilib. Tur çərçivəsində 12 qrupda ümumilikdə 24 görüş oynanılıb. Azərtac xəbər verir ki, azərbaycanlı futbol azarkeşləri üçün maraqlı oyunlardan biri İngiltərənin Mançester şəhərində olub. “A” qrupunda Türkiyənin “Fənərbağça” klubunu qəbul edən “Mançester Yunayted” komandası 4:1 hesabı ilə qalib gəlib. Qrupun digər görüşündə isə Hollandiyada “Feyenoord” komandası “Zarya”nı (Ukrayna) 1:0 hesabı ilə məğlub edib. Bu nəticə ilə “Mançester Yunayted” və “Feyenoord” 6 xalla qrupda ilk iki pilləni bölüşür. “Qəbələ”nin çıxış etdiyi “C” qrupunda “Anderlext” (Belçika)-“Maynts” (Almaniya) görüşündə qalib müəyyənləşməyib - 1:1. Fransada “Qəbələ”ni 1:0 hesabı ilə məğlub edən “Sent-Etyen” xal ehtiyatını artırıb. Üç oyundan sonra “Anderlext”, “Sent-Etyen” və “Maynts”ın aktivində 5 xal var. “Qarabağ”ın mübarizə apardığı “J” qrupunda isə “Fiorentina” (İtaliya) komandası Çexiyanın “Slovan Liberek” komandasının qonağı olub. Qarşılaşma Florensiya təmsilçisinin 3:1 hesablı qələbəsi ilə başa çatıb. “Qarabağ” isə Bakıda Yunanıstanın PAOK kollektivini 2:0 hesabı ilə məğlub edib. Bu qrupda xallarının sayını 7-yə çatdıran “Fiorentina” vahid liderdir. Hər birinin dörd xalı olan “Qarabağ” ikinci, PAOK isə üçüncüdür. “Slovan Liberek”in isə aktivində 1 xal var. Azərbaycanlı FIFA referisi Əliyar Ağayevin idarə etdiyi “Konyaspor”–“Braqa” (Portuqaliya) matçında qalib müəyyənləşməyib - 1:1. “H” qrupunun digər görüşündə Ukraynanın “Şaxtyor” klubu ev oyununda Belçikanın “Gent” komandasını 5:0 hesabı ilə darmadağın edib. Digər qruplarda aşağıdakı nəticələr qeydə alınıb: “B” qrupu “Olimpiakos” (Yunanıstan)–“Astana” (Qazaxıstan) - 4:1 “Yanq Boyz” (İsveçrə)-APOEL (Kipr) - 3:1 “D” qrupu “AZ Alkmaar” (Hollandiya)–“Makkabi” (Təl-Əviv, İsrail) - 1:2 “Dundalk" (İrlandiya)–“Zenit” (Rusiya) - 1:2 “E” qrupu “Roma” (İtaliya)–“Austriya” (Avstriya) - 3:3 “Viktoriya” (Çexiya)–“Astra” (Rumıniya) - 1:2 “F” qrupu “Genk” (Belçika)–“Atletik” (İspaniya) - 2:0 “Rapid” (Avstriya)–“Sassuolo” (İtaliya) - 1:1 “G” qrupu “Standart” (Belçika)–“Panatinaikos” (Yunanıstan) - 2:2 “Selta” (İspaniya)–“Ayaks” (Hollandiya) - 2:2 “I” qrupu “Krasnodar” (Rusiya)–“Şalke” (Almaniya) - 0:1 “Zalsburq” (Avstriya)–“Nitsa” (Fransa) - 0:1 “K” qrupu “İnter” (İtaliya)–“Southempton” (İngiltərə) - 1:0 “Hapoel” (Bir Şeva, İsrail)–“Sparta” (Çexiya) - 0:1 “L” qrupu “Styaua” (Rumıniya)–“Sürix” (İsveçrə) - 1:1 “Osmanlıspor” (Türkiyə)–“Vilyarreal” (İspaniya) - 2:2 UEFA Avropa Liqasının qrup mərhələsinin dördüncü turunun oyunları noyabrın 3-də keçiriləcək.

Dünya İdman və Mədəniyyət Forumu işə başlayıb

Oktyabrın 19-da Yaponiyanın Kioto şəhərində Dünya İdman və Mədəniyyət Forumu işə başlayıb. Yaponiya Təhsil, Mədəniyyət, İdman, Elm və Texnologiyalar Nazirliyinin təşkilatçılığı ilə keçirilən bu beynəlxalq tədbirə 60 ölkədən 300-dən çox nümayəndə qatılıb. Tədbirdə Beynəlxalq Olimpiya və Paralimpiya komitələrinin, Beynəlxalq Reqbi Federasiyasının rəhbərləri də iştirak edirlər. Forumda Azərbaycan gənclər və idman naziri Azad Rəhimovun rəhbərlik etdiyi nümayəndə heyəti ilə təmsil olunur. Nümayəndə heyətinin tərkibinə nazirliyin beynəlxalq əlaqələr şöbəsinin müdiri İlham Mədətov və Azərbaycanın Yaponiyadakı səfiri Gürsel İsmayılzadə daxildir.xeber100.com