Dünya çempionatının talismanı oktyabrda təqdim olunacaq

Rusiyada təşkil ediləcək futbol üzrə dünya çempionatının talismanı oktyabrın 26-da ictimaiyyətə təqdim olunacaq. Azərtac xəbər verir ki, talisman seçimi ilə bağlı mərasim Rusiyanın birinci kanalı ilə canlı yayımlanacaq. Turnirin təşkilat komitəsinin mətbuat xidmətinin məlumatında bildirilib ki, bununla bağlı yaxın günlərdə ümumxalq səsverməsi keçiriləcək. Səsvermə gedişatında seçicilər mundialın rəmzini seçmək hüququ əldə edəcəklər. 2018-ci il dünya çempionatının talismanının seçilməsi müsabiqəsi ilə bağlı final mərhələdə canavar, pələng və pişik təqdim olunacaq. İlk mərhələdə 10 variant təklif olunsa da, sonradan üçünün üzərində seçim edilməsi məqsədəuyğun sayılıb. Məlum olub ki, son üç animasiya peşəkar müəlliflər tərəfindən işlənib. Yekun variant FİFA-nın təsdiqini də almalıdır. Qeyd edək ki, 2018-ci ildə Rusiyada təşkil ediləcək dünya çempionatı 11 şəhərin 12 stadionunda keçiriləcək. Nəhəng turnirin yarımfinalı Moskva və Sankt-Peterburq, açılış mərasimi, start və final mərhələ isə Rusiya paytaxtının “Lujniki” stadionunda oynanılacaq.xeber100.com

UEFA-nın konqresi keçiriləcək

Bu gün Yunanıstanın paytaxtı Afinada UEFA-nın konqresi keçiriləcək. Azərtac xəbər verir ki, UEFA prezidenti vəzifəsinə seçkinin keçiriləcəyi konqresdə AFFA-nın prezidenti Rövnəq Abdullayev, vitse-prezident Elşad Nəsirov və baş katib Elxan Məmmədov iştirak edəcəklər.xeber100.com

Şahmat Olimpiadasının bağlanış mərasimi keçirilib

Bakıda təşkil olunan 42-ci Ümumdünya Şahmat Olimpiadasının sentyabrın 13-də Milli Gimnastika Arenasında təntənəli bağlanış mərasimi keçirilib. Azərtac xəbər verir ki, mərasimdə Azərbaycan Repsublikası Baş nazirinin birinci müavini, Bakı Şahmat Olimpiadasının Təşkilat Komitəsinin sədri Yaqub Eyyubov, Beynəlxalq Şahmat Federasiyasının (FIDE) prezidenti Kirsan İlyumjinov və təşkilatın digər nümayəndələri, şahmat üzrə dünya çempionları, dövlət və hökumət rəsmiləri iştirak edirlər. Bakının ev sahibliyi etdiyi və sentyabrın 2-dən start götürən Olimpiada indiyədək Azərbaycanda keçirilən ən kütləvi yarış kimi tarixə düşüb. Bu mötəbər yarışda 175 ölkədən 181 kişi və 142 qadın komandası mübarizə aparıb. Bu, iştirakçı ölkələrin sayına görə Olimpiada tarixində rekord göstəricidir. Azərbaycan bu Olimpiadada üç kişi və üç qadın komandası ilə təmsil olunub. On bir turdan ibarət yarışlarda kişilərin mübarizəsində aktivində 20 xal olan ABŞ millisi çempion adını qazanıb. Eyni xala malik Ukrayna isə ikinci yeri tutub. Rusiya millisi isə 17 xalla bürünc medal qazanıb. Hesabında 15 xal olan əsas komandamız yarışı 12-ci sırada tamamlayıb. İkinci yığmamız 14 xalla 26-cı, üçüncü komandamız isə 13 xalla 49-cu pillədə yer alıb. Qadınların yarışında qalib adını 20 xalla Çin şahmatçıları qazanıblar. Hesabında 17 xal olan Polşa ikinci, Ukrayna isə üçüncü pillədə yer alıb. Azərbaycanın əsas komandası yarışı 16 xalla 8-ci pillədə başa vurub. On üç xal toplayan üçüncü komandamız 30-cu, ikinci yığmamız isə 32-ci olub.xeber100.com

Şahmat Olimpiadasında X turun təqvimi müəyyənləşib

Bakıda keçirilən 42-ci Ümumdünya Şahmat Olimpiadasında X turun təqvimi müəyyənləşib. Azərtac xəbər verir ki, sentyabrın 12-də kişilərdən ibarət əsas millimiz İngiltərə ilə qarşılaşacaq. İkinci komandamız Serbiya, üçüncü yığmamız isə Yaponiya millisi ilə üz-üzə gələcək. Doqquz turdan sonra hesabında 13 xal olan əsas komandamız turnir cədvəlində 8-ci sırada qərarlaşıb. İkinci yığmamız 11 xalla 33-cü, üçüncü komandamız isə 10 xalla 71-cı pillədədir. Turnir cədvəlinə hər birinin hesabında 16 xal olan ABŞ və Ukrayna komandaları başçılıq edirlər. Rusiya yığması isə 15 xalla üçüncü pillədə qərarlaşıb. Qadınlardan ibarət əsas yığmamız X turda Kolumbiya ilə üz-üzə gələcək. İkinci komandamız İsveçrə, üçüncü yığmamız isə Belarus ilə görüşəcək. Qadınların turnirində əsas komandamız hazırda 12 xalla 19-cu pillədədir. On bir xal toplayan ikinci komandamız 27-ci, üçüncü yığmamız isə 33-cü sırada yer alırlar. Çin şahmatçıları 16 xalla birinci, Polşa millisi 15 xalla ikinci pillədədir. Ukrayna, Rusiya, Hindistan və ABŞ şahmatçıları 14 xalla 3-6-cı yerləri bölüşürlər.xeber100.com

Şahmat Olimpiadasının doqquzuncu turuna start verilib

Sentyabrın 11-də saat 15:00-da Bakıda keçirilən 42-ci Ümumdünya Şahmat Olimpiadasının doqquzuncu turuna start verilib. Azərtac xəbər verir ki, kişilərdən ibarət əsas millimiz Rusiya ilə qarşılaşır. İkinci komandamız Vyetnam, üçüncü yığmamız isə Honduras millisi ilə üz-üzə gəlir. Qadınlardan ibarət əsas yığmamızın bu turdakı rəqibi Ukrayna millisidir. İkinci komandamız Fransa, üçüncü yığmamız isə Əlcəzair ilə görüşür. Yarışlarda rekord sayda komanda iştirak edir. Kişilərin turnirində 181, qadınların yarışlarında isə 142 milli komanda mükafatlar uğrunda mübarizə aparır. Xatırladaq ki, Azərbaycan Olimpiadada üç kişi və üç qadın komandası ilə təmsil olunur. Kişilərdən ibarət birinci komandada Şəhriyar Məmmədyarov, Teymur Rəcəbov, Rauf Məmmədov, Eltac Səfərli və Arkadi Naydiç yer alıblar. İkinci komandanın tərkibinə Vasif Durarbəyli, Namiq Quliyev, Qədir Hüseynov, Nicat Abasov və Ülvi Bacarani daxil ediliblər. Üçüncü komanda isə Nail Bəşirli, Məhəmməd Muradlı, Vüqar Əsədli, Pərviz Qasımov və Abdulla Qədimbəylidən ibarətdir. Qadın şahmatçılardan ibarət birinci komandanın heyətinə Zeynəb Məmmədyarova, Günay Məmmədzadə, Aydan Höcətova, Gülnar Məmmədova və Nərmin Kazımova cəlb olunub. İkinci komandaya Türkan Məmmədyarova, Nərgiz Umudova, Xəyalə Abdulla, Ülviyyə Fətəliyeva və Nərmin Xələfova, üçüncü komandanın heyətinə isə Nərmin Məmmədova, Xanım Balacayeva, Gövhər Beydullayeva, Ayan Allahverdiyeva və Aynur Kətanova daxildir.xeber100.com

FIDE-nin Baş Assambleyasının iclası işə başlayıb

Sentyabrın 11-də Bakıda Beynəlxalq Şahmat Federasiyasının (FIDE) 87-ci konqresi çərçivəsində Baş Assambleyanın iclası işə başlayıb. Azərtac xəbər verir ki, Azərbaycanın gənclər və idman naziri Azad Rəhimov iclası açaraq 42-ci Ümumdünya Şahmat Olimpiadasının Bakıda keçirilməsinin önəmini vurğulayıb: “Azərbaycanda mötəbər idman yarışlarının keçirilməsi artıq ənənə halını alıb. Ötən il Bakı ilk Avropa Oyunlarına, şahmat üzrə Dünya Kubokuna ev sahibliyi etdi. Bu il paytaxtımızda Formula-1 Avropa Qran-Prisi kimi nüfuzlu yarış təşkil olundu. İndi isə Bakı şahmat dünyasının diqqət mərkəzinə çevrilib. Şahmat Olimpiadasının Bakıda keçirilməsi böyük hadisədir. Bu etimada görə FIDE-yə təşəkkür edirik”. Azərbaycanın və FIDE-nin himnlərinin səsləndirilməsindən sonra gündəlikdə duran məsələlər müzakirə edilib. FIDE-nin 87-ci konqresi işini sentyabrın 13-də başa çatdıracaq.xeber100.com

Dünya birjalarında neftin qiyməti…

Dünya birjalarında neftin qiyməti yenidən ucuzlaşıb. Nyu-Yorkun NYMEX (“New York Mercantile Exchange”) birjasında “Layt” markalı neftin bir barrelinin qiyməti 1,74 dollar azalaraq 44,32 dollar təşkil edib. Azərtac xəbər verir ki, Londonun ICE (“InterContinental Exchange Futures”) birjasında “Brent” markalı neftin bir barrelinin qiyməti isə 1,98 dollar azalaraq 46,40 dollar olub.xeber100.com

Dünya Kuboku yarışlarında ikinci turun oyunları keçirilib

Bakıda, Binə Atçılıq Mərkəzindəki “Elit Atçılıq və Polo” klubunda keçirilən “CBC Sport” Arena Polo üzrə Dünya Kuboku yarışlarının ikinci günündə - sentyabrın 10-da ilk oyunda “Badrutt Palace St. Moritz” klubu ilə qədim polo məktəblərindən hesab olunan “İtaldizain Group” komandası qarşılaşıb. Azərtac xəbər verir ki, gərgin idman mübarizəsi şəraitində keçən görüşdə “İtaldizain Group” komandası rəqibini 6:4 hesabı ilə məğlub edib. Günün ikinci matçında İspaniyanın “Bogner” və Azərbaycanın “Gilan Holding” komandaları qarşılaşıb. Gərgin idman mübarizəsi şəraitində keçən görüş İspaniya təmsilçisinin xeyrinə başa çatıb - 6,5:6. Yarışda 4 beynəlxalq peşəkar komanda -“Gilan Holding” (Azərbaycan) “İtaldizain Group” (Argentina), “Badrutt Palace St. Moritz” (İsveçrə) və “Bogner” (İspaniya) mübarizə aparır. Turnirdəki komandalar məşhur “Evviva Polo Club St.Moritz” (İsveçrə), “Santa Maria Polo Club Sotogrande” (İspaniya), “Alegria Polo Club Buenos Ayres” (Argentina) və “Elit Atçılıq və Polo klub Bakı” (Azərbaycan) klublarını təmsil edirlər. İki turdan sonra yarışın final görüşündə və 3-cü yer uğrunda oyununda mübarizə aparacaq komandalar müəyyənləşib. Sentyabrın 11-də saat 18:00-da keçiriləcək üçüncü yer uğrunda görüşdə meydana “Badrutt's Palace” və “İtaldizain Group” komandaları çıxacaq. Final görüşündə isə “Gilan Holdinq” və “Bogner” kollektivləri yenidən üz-üzə gələcək. Final qarşılaşması saat 19:15–də başlayacaq. Xatırladaq ki, oyunlar hər biri 7 dəqiqə 30 saniyə olmaqla dörd hissədən ibarətdir. Yarışı Almaniya, İsveçrə, Argentina və İngiltərədən dəvət olunan hakimlər idarə edirlər. Azərbaycan Dövlət İnformasiya Agentliyi (AZƏRTAC) də Arena Polo üzrə Dünya Kuboku yarışının rəsmi media tərəfdaşıdır.xeber100.com

Şahmat Olimpiadasında VIII tura start verilib

“Baku Crystal Hall”da 42-ci Ümumdünya Şahmat Olimpiadasının səkkizinci turu başlayıb. Azərbaycanın kişilərdən ibarət əsas yığma komandası Latviya millisi ilə qarşılaşır. İkinci yığmamızın rəqibi Finlandiyadır. Üçüncü millimiz isə Dominikan Respublikası ilə üz-üzə gəlir. Yeddi turdan sonra hesabında 11 xal olan əsas komandamız turnir cədvəlində səkkizinci sırada qərarlaşıb. İkinci yığmamız 9 xalla 27-ci, üçüncü komandamız isə 6 xalla 98-ci pillədədir. Azərbaycanın qadınlardan ibarət əsas millisi isə səkkizinci turda güclü Çin yığması ilə üz-üzə gəlir. İkinci komandamız Sinqapur, üçüncü yığmamız isə Peru ilə görüşür. Yeddinci turdan sonra qadınların yarışında 5 komanda 12 xalla liderdir. Rusiya birinci, Çin ikinci, Azərbaycanın əsas komandası üçüncü, ABŞ dördüncü, Hollandiya isə beşincidir. Doqquz xal toplayan ikinci komandamız 24-cü, üçüncü yığmamız isə 32-ci yeri tutur.xeber100.com

“FİFA dünya kuboku-2017”…

Çimərlik futbolu üzrə “FİFA dünya kuboku-2017” turnirinin İtaliyanın Yezolo şəhərində təşkil olunmuş Avropa komandaları arasında seçmə mərhələsinin ikinci raundunda Azərbaycan milli komandası üçüncü oyununu keçirib. Azərtac xəbər verir ki, Türkiyə yığması ilə qarşılaşan millimiz 3:1 hesabı ilə qələbə qazanıb. Komandamızın qollarını Vaqif Şirinbəyov, Asif Zeynalov və Əbdül Əliyev vurublar.xeber100.com