Dünya Kuboku yarışlarında ikinci turun oyunları keçirilib

Bakıda, Binə Atçılıq Mərkəzindəki “Elit Atçılıq və Polo” klubunda keçirilən “CBC Sport” Arena Polo üzrə Dünya Kuboku yarışlarının ikinci günündə - sentyabrın 10-da ilk oyunda “Badrutt Palace St. Moritz” klubu ilə qədim polo məktəblərindən hesab olunan “İtaldizain Group” komandası qarşılaşıb. Azərtac xəbər verir ki, gərgin idman mübarizəsi şəraitində keçən görüşdə “İtaldizain Group” komandası rəqibini 6:4 hesabı ilə məğlub edib. Günün ikinci matçında İspaniyanın “Bogner” və Azərbaycanın “Gilan Holding” komandaları qarşılaşıb. Gərgin idman mübarizəsi şəraitində keçən görüş İspaniya təmsilçisinin xeyrinə başa çatıb - 6,5:6. Yarışda 4 beynəlxalq peşəkar komanda -“Gilan Holding” (Azərbaycan) “İtaldizain Group” (Argentina), “Badrutt Palace St. Moritz” (İsveçrə) və “Bogner” (İspaniya) mübarizə aparır. Turnirdəki komandalar məşhur “Evviva Polo Club St.Moritz” (İsveçrə), “Santa Maria Polo Club Sotogrande” (İspaniya), “Alegria Polo Club Buenos Ayres” (Argentina) və “Elit Atçılıq və Polo klub Bakı” (Azərbaycan) klublarını təmsil edirlər. İki turdan sonra yarışın final görüşündə və 3-cü yer uğrunda oyununda mübarizə aparacaq komandalar müəyyənləşib. Sentyabrın 11-də saat 18:00-da keçiriləcək üçüncü yer uğrunda görüşdə meydana “Badrutt's Palace” və “İtaldizain Group” komandaları çıxacaq. Final görüşündə isə “Gilan Holdinq” və “Bogner” kollektivləri yenidən üz-üzə gələcək. Final qarşılaşması saat 19:15–də başlayacaq. Xatırladaq ki, oyunlar hər biri 7 dəqiqə 30 saniyə olmaqla dörd hissədən ibarətdir. Yarışı Almaniya, İsveçrə, Argentina və İngiltərədən dəvət olunan hakimlər idarə edirlər. Azərbaycan Dövlət İnformasiya Agentliyi (AZƏRTAC) də Arena Polo üzrə Dünya Kuboku yarışının rəsmi media tərəfdaşıdır.xeber100.com

Şahmat Olimpiadasında VIII tura start verilib

“Baku Crystal Hall”da 42-ci Ümumdünya Şahmat Olimpiadasının səkkizinci turu başlayıb. Azərbaycanın kişilərdən ibarət əsas yığma komandası Latviya millisi ilə qarşılaşır. İkinci yığmamızın rəqibi Finlandiyadır. Üçüncü millimiz isə Dominikan Respublikası ilə üz-üzə gəlir. Yeddi turdan sonra hesabında 11 xal olan əsas komandamız turnir cədvəlində səkkizinci sırada qərarlaşıb. İkinci yığmamız 9 xalla 27-ci, üçüncü komandamız isə 6 xalla 98-ci pillədədir. Azərbaycanın qadınlardan ibarət əsas millisi isə səkkizinci turda güclü Çin yığması ilə üz-üzə gəlir. İkinci komandamız Sinqapur, üçüncü yığmamız isə Peru ilə görüşür. Yeddinci turdan sonra qadınların yarışında 5 komanda 12 xalla liderdir. Rusiya birinci, Çin ikinci, Azərbaycanın əsas komandası üçüncü, ABŞ dördüncü, Hollandiya isə beşincidir. Doqquz xal toplayan ikinci komandamız 24-cü, üçüncü yığmamız isə 32-ci yeri tutur.xeber100.com

“FİFA dünya kuboku-2017”…

Çimərlik futbolu üzrə “FİFA dünya kuboku-2017” turnirinin İtaliyanın Yezolo şəhərində təşkil olunmuş Avropa komandaları arasında seçmə mərhələsinin ikinci raundunda Azərbaycan milli komandası üçüncü oyununu keçirib. Azərtac xəbər verir ki, Türkiyə yığması ilə qarşılaşan millimiz 3:1 hesabı ilə qələbə qazanıb. Komandamızın qollarını Vaqif Şirinbəyov, Asif Zeynalov və Əbdül Əliyev vurublar.xeber100.com

Cüdo üzrə Avropa çempionatı keçiriləcək

Sentyabrın 16-dan 18-dək İspaniyanın Malaqa şəhərində gənclər arasında cüdo üzrə Avropa çempionatı keçiriləcək. Fərdi və komanda şəkilində keçiriləcək yarışlarda cüdo üzrə Azərbaycan milli komandası da mübarizə aparacaq. Azərtac xəbər verir ki, Bakıda baş məşqçi Rəşad Məmmədovun başçılığı altında təlim-məşq toplanışını davam etdirən milli komandamız sentyabrın 13-də İspaniyaya yola düşəcək. Mötəbər yarışda Azərbaycanı Natiq Qurbanlı, Kəramət Hüseynov (hər ikisi 55 kq), Tofiq Məmmədov, Murad Heydərli (hər ikisi 60 kq), Hidayət Heydərov, Hasil Cəfərov (hər ikisi 73 kq), Rüfət İsmayılov (81 kq), Aslan Mirzəyev, Azər Yaqubov (hər ikisi 90 kq), Etibar Zeynalov (100 kq), Şəfəq Həmidova (44 kq), Leyla Alıyeva (48 kq), Səkinə Zayırova və Leyla Şahin (hər ikisi 57 kq) təmsil edəcəklər. Qeyd edək ki, 43 ölkədən 409 idmançının (225 oğlan, 184 qız) qatıldığı Avropa çempionatında milli komandamız 14 cüdoçu ilə (10 oğlan, 4 qız) mübarizə aparacaq.xeber100.com

Şahmat Olimpiadasında VII tura start verilib

42-ci Ümumdünya Şahmat Olimpiadasında VII tura start verilib. Kişilərdən ibarət əsas millimiz Xorvatiya ilə qarşılaşır. İkinci komandamız Venesuela, üçüncü yığmamız isə eşitmə qabiliyyəti zəif olan şahmatçılar ittifaqının (ICCD) komandası ilə münasibətlərini aydınlıq gətirir. Olimpiadanın vahid lideri Hindistan ABŞ-la, Hollandiya Latviya ilə, Rusiya Çexiya ilə, Çin İngiltərə ilə, Ukrayna Kanada ilə, Gürcüstan Rumıniya ilə üz-üzə gəlir. Qadınlardan ibarət əsas yığmamızın VII turda rəqibi Hindistandır. İkinci komandamız Belarusla, üçüncü yığmamız isə Boliviya ilə görüşür. Favoritlərdən Rusiya Polşa ilə, Çin Ukrayna ilə, ABŞ Rumıniya ilə, Gürcüstan Hollandiya ilə, Macarıstan Filippin ilə mübarizə aparır.xeber100.com

Səyyar futbol meydançası quraşdırılıb

Bakı şəhəri, Xətai rayonundakı məhəllələrin birində AFFA tərəfindən səyyar futbol meydançası quraşdırılıb. AFFA-dan Azərtac-a bildiriblər ki, meydança təmənnasız olaraq məhəllə sakinlərinin ixtiyarına verilib. Səyyar meydança 2 həftə ərzində həmin ünvanda olacaq. Qeyd edək ki, səyyar meydança AFFA-nın “Facebook” səhifəsinə daxil olmuş müraciət əsasında quraşdırılıb.xeber100.com

“Qarabağ”ın “Slovan” ilə keçirəcəyi oyunun stadionu məlum olub

Futbol üzrə UEFA Avropa Liqasının qrup mərhələsinin ilk matçları çərçivəsində Ağdamın “Qarabağ” klubunun Çexiya təmsilçisi “Slovan” ilə keçirəcəyi oyunun stadionu məlum olub. Azərtac xəbər verir ki, qarşılaşma “Dalğa Arena”da oynanılacaq. Bir neçə gün əvvəl UEFA-dan ölkəmizə göndərilən nümayəndə heyətinin rəyindən sonra bu qərar verilib. Qeyd edək ki, qarşılaşma sentyabr 15-də saat 19:00-da start götürəcək.xeber100.com

Şahmat Olimpiadasında VI turunun oyunları keçiriləcək

Bakıda keçirilən 42-ci Ümumdünya Şahmat Olimpiadasında bu gün VI turunun oyunları keçiriləcək. Bakı Şahmat Olimpiadasının mətbuat xidmətindən Azərtac-a bildiriblər ki, kişilərdən ibarət əsas millimiz Yunanıstanla qarşılaşacaq. İkinci komandamız Rumıniya, üçüncü yığmamız Qana ilə üz-üzə gələcək. Favoritlərdən Hindistan Hollandiya ilə, ABŞ Ukrayna ilə, Rusiya Almaniya ilə, Çin Argentina ilə, Gürcüstan Çexiya ilə qarşılaşacaq. Beş turdan sonra kişilərdən ibarət əsas millimiz 8 xalla 9-cu pillədə qərarlaşıb. Eyni xala malik ikinci komandamız 11-ci, 4 xalla üçüncü yığmamız isə 99-cudur. Turnir cədvəlinə maksimum nəticə göstərən Hollandiya, Ukrayna və Hindistan milliləri başçılıq edir. Qadınlardan ibarət əsas yığmamızın VI turdakı rəqibi Gürcüstandır. İkinci millimiz Çexiya, üçüncü komandamız isə Çili ilə qarşılaşacaq. Qadınların yarışında bu gün əsas diqqətlər Ukrayna - Rusiya görüşünə yönələcək. Favoritlərdən Çin Rumıniya ilə, Hindistan Latviya ilə, ABŞ Türkiyə ilə, Polşa Vyetnamla görüşəcək. Qadınlardan ibarət əsas millimiz 5 turdan sonra 9 xalla beşinci pillədədir. İkinci komandamız 6 xalla 39-cu, üçüncü yığmamız isə 5 xalla 61-ci yeri tutur. Xanımların mübarizəsində 5 turdan sonra maksimum nəticə göstərən Ukrayna və Rusiya yığmaları ilk 2 yeri bölüşdürürlər. Əsas millimiz kimi 9 xal toplayan Rumıniya üçüncü, Çin dördüncüdür.xeber100.com

Azərbaycanın 7 idmançısı mübarizəyə qoşulacaq

Rio-de-Janeyroda keçirilən XV Yay Paralimpiya Oyunlarının ilk günündə - sentyabrın 8-də Azərbaycanın 7 idmançısı mübarizəyə qoşulacaq. Az'rtac xəbər verir ki, ilk olaraq Azərbaycan cüdoçuları tatami üzərinə çıxacaqlar. Millimizin üzvü Ramin İbrahimov (60 kq) argentinalı Eduardo Qauto ilə qarşılaşacaq. Bayram Mustafayev (66 kq) isə Migel Vieyra (Portuqaliya) – Halison Oliviera Boto (Braziliya) qarşılaşmasının qalibi ilə üz-üzə gələcək. Atletika yarışlarında isə üç idmançımız çıxış edəcək. Elçin Muradov uzunluğa tullanma, Elmir Cəbrayılov 400, Yelena Çebanu isə 100 metr məsafəyə qaçış yarışlarında güclərini sınayacaqlar. Dmitri və Roman Saley qardaşları isə üzgüçülüyün batterflay növündə yarışacaqlar.xeber100.com

Şahmat Olimpiadasında V turun təqvimi müəyyənləşib

Bakıda keçirilən 42-ci Ümumdünya Şahmat Olimpiadasında V turun təqvimi müəyyənləşib. Azərtac xəbər verir ki, beşinci turda kişilərdən ibarət əsas milli komandamız Hindistanla qarşılaşacaq. Dörd turdan sonra hər iki komanda itkisiz irəliləyir. İkinci komandamız Türkmənistanla, üçüncü yığmamız isə Zimbabve ilə qarşılaşacaq. Daha əvvəl Zimbabve əsas yığmamıza uduzub. Türkmənistan isə üçüncü millimizə qalib gəlib. Qadınlardan ibarət əsas yığmamızın rəqibi Almaniya olacaq. İkinci millimiz İspaniyanı, üçüncü komandamız isə Özbəkistanı sınağa çəkəcək. Üçüncü turda qadınlardan ibarət ikinci komandamız Almaniya ilə heç-heçə oynayıb. Azərbaycanın kişilərdən ibarət əsas komandası 8 xalla Çin, Hollandiya, Hindistan, Belarus və Ukrayna ilə birgə 1-6-cı yerləri bölüşür. “Azərbaycan-2” komandası 27-ci, “Azərbaycan-3” isə 71-ci pillədə qərarlaşıb. Qadınlardan ibarət birinci komandamız 11-ci, “Azərbaycan-2” 34-cü, “Azərbaycan-3” isə 39-cu pillədə qərarlaşıb. Qadınların mübarizəsində Ukrayna, Serbiya, Rusiya və Qazaxıstan 8 xalla 1-4-cü yerləri bölüşür.xeber100.com