“Avro-2016”da ikinci yarımfinal qarşılaşması keçiriləcək

İyulun 7-də “Avro-2016”da ikinci yarımfinal qarşılaşması keçiriləcək. Bakı vaxtilə saat 23:00-da başlayacaq oyunda meydan sahibləri Fransa millisi Almaniya kollektivi ilə üz-üzə gələcək. İtaliya yığmasını penaltilər seriyasında məğlub etməyi bacaran Bundestimin heyətində müdafiəçi Mats Hummels cəza səbəbindən oyunu buraxacaq, yarımmüdafiəçi Sami Kediranın və hücumçu Mario Qomesin isə zədə ucbatından meydana çıxmayacaqları gözlənilir. Bu itkilərə baxmayaraq çoxları hazırda dünyada ən güclü heyətlərdən birinə malik olan Almaniyanı bu qarşılaşmanın, ümumiyyətlə isə çempionatın favoriti hesab edirlər. Keçən turda çempionatın sürprizlərindən olan İslandiyanı böyük hesabla məğlub edən Didye Deşamın komandasında isə zədəli və cəzalı futbolçular yoxdur. Eyni zamanda, fransızların meydan sahibləri olması onlar üçün əlavə stimuldur. Bu maraqlı qarşılaşma Marselin “Velodrom” stadionunda keçiriləcək. Oyunun baş hakimi Nikola Ritsoli olacaq.xeber100.com

Beynəlxalq Şahmat Festivalı başlayıb

Batumidə Şəhər Bələdiyyəsi Kuboku Beynəlxalq Şahmat Festivalı davam edir. Azərtac xəbər verir ki, “A” turnirində 43 şahmatçı, o cümlədən doqquz qrossmeyster iştirak edir. Azərbaycan idmanının şərəfini FIDE ustası Maqomed Muradlı, Murad Nuri, Xanım Balacayeva və ustalığa namizəd Kənan Qarayev qoruyur. Dörd turdan sonra hərəyə 3,5 xal toplayan üç şahmatçı liderlik edir, dörd şahmatçı isə onlardan O,5 xal geri qalır. Azərbaycan təmsilçisi Maqomed Muradlının 2,5 xalı, Murad Nurinin 2 xalı, Xanım Balacayeva və Kənan Qarayevin aktivində isə hərəyə 1 xal var. Şəhər Bələdiyyəsi Kuboku Beynəlxalq Festivalı İsveçrə sistemi üzrə 9 turda keçirilir.xeber100.com

“Neftçi” ictimai idman təşkilatı yaradılıb

İsveç Azərbaycanlıları Konqresinin sədri (İAK) Emil Mirzəyev və futbol üzrə Azərbaycan yığmasının sabiq məşqçisi İqor Ponomaryov Stokholmda “Neftçi” ictimai idman təşkilatının yaradılması haqqında müqavilə imzalayıblar. İsveç Azərbaycanlıları Konqresindən AZƏRTAC-a bildiriblər ki, idman təşkilatı həmvətənlərimizin İsveçin ictimai, mədəni və siyasi həyatına inteqrasiyasına və cəlb olunmasına yönələn layihəsi çərçivəsində yaradılıb. Sənədin imzalanması mərasimində 28 diaspor təşkilatını bir araya gətirən İsveç Azərbaycanlıları Konqresinin idarə heyəti şurasının üzvləri iştirak ediblər. “Neftçi” ictimai idman təşkilatının sədri 1988-ci il Seul Olimpiadasının çempionu, SSRİ-nin Əməkdar İdman Ustası, 1988-cu ildə İsveçin futbol üzrə çempionu İqor Ponomaryovdur. İctimai təşkilatı yaratmaqda məqsəd bu ölkədə yaşayan gənc həmvətənlərimizi idmana, ilk növbədə futbola cəlb etmək, habelə onlarda İsveçin idman həyatına maraq oyatmaqdır. Təşkilata Azərbaycan və sovet futbolunun əfsanəsi İqor Ponomaryovun rəhbərlik etməsi klub üzvlərinə peşəkar futbolçu kimi təlim keçmək şansı verir, onların İsveçdə idman karyerası qurmalarına yol açır. “Neftçi” idman təşkilatı İsveç Azərbaycanlıları Konqresi nəzdində ictimai birlik kimi fəaliyyət göstərəcək.xeber100.com

PFL prezidenti postuna seçki keçiriləcək

Peşəkar Futbol Liqasının (PFL) prezidenti postuna seçki keçiriləcək. Azərtac xəbər verir ki, mərasim iyulun 5-də baş tutacaq. AFFA-nın inzibati binasında təşkil olunacaq tədbir saat 11:00-da başlayacaq. Seçkidə AFFA prezidenti Rövnəq Abdullayev və Premyer Liqa klublarının nümayəndələri də iştirak edəcəklər.xeber100.com

Messi beynəlxalq karyerasını başa çatdırmaq fikrindən daşınıb

Argentina yığmasının və İspaniyanın “Barselona” klubunun hücumçusu Lionel Messi beynəlxalq karyerasını başa çatdırmaq fikrindən daşınıb və milli komandanın heyətində qalmaq niyyətindədir. Bu barədə məlumatı “La Nacion” nəşri L.Messinin adı hələ açıqlanmayan keçmiş komanda yoldaşına istinadla yayıb. Həmin adam bildirib ki, adlı-sanlı futbolçu sadəcə müvəqqəti fasilə götürüb və yaxın vaxtlarda Argentina yığmasına qayıtmalıdır. Qeyd edək ki, iyunun 27-də Amerika Kuboku çempionatının finalında Argentina Çili yığmasına uduzandan sonra 29 yaşlı futbolçu karyerasının başa çatdığını bəyan edib. O bildirib ki, çıxıb getməsi hamı üçün və ilk növbədə onun özü üçün ən yaxşı variant olacaq. Argentina Prezidenti Maurisio Makri daha əvvəl Messiyə özü zəng vuraraq milli komandanı tərk etməməsini ondan xahiş edib. L.Messinin milli yığmada debütü 2005-ci ildə olub. Hücumçu milli yığmanın heyətində 112 oyunda iştirak edib, 55 qol vurub. Bu, qolların sayına görə Argentina yığması üçün rekord göstəricidir. Forvard 2014-cü il dünya çempionatının gümüş mükafatçısıdır, 2008-ci ildə Olimpiya Oyunlarında qızıl medal qazanıb. Lionel Messi futbol tarixində “Qızıl top”a beş dəfə sahib olan yeganə futbolçudur. O, bu mükafata 2009, 2010, 2011, 2012 və 2015-ci illərdə layiq görülüb. Messi “Barselona”nın heyətində 26 mükafat qazanıb.xeber100.com

Dünya Şahmat Olimpiadasının açılışına 60 gün qalır

Dünyanın ən böyük şahmat tədbirinin, Bakıda keçiriləcək Dünya Şahmat Olimpiadasının açılışına 60 gün qalır. Xatırladaq ki, komandaların qeydiyyatı iyulun 15-dək davam edəcək. Azərtac “R-Sport” agentliyinə istinadla xəbər verir ki, yarışların favoritlərindən biri olan Rusiyanın kişi və qadınlardan ibarət komandalarının tərkibi açıqlanıb. Rusiya Şahmat Federasiyasının (RŞF) icraçı direktoru Mark Qluxovski deyib: “Bakıda hər iki komanda maksimal vəzifələri həll etməli olacaq. Rusiyanın qadın komandasında məqsəd sadədir: əvvəlki üç turnirdə qalib gələn qızlar Şahmat Olimpiadasında da birinci yer uğrunda mübarizə aparmalıdır. Başqa cür ola da bilməz. Kişilərdən ibarət komandaya gəlincə, Olimpiya qızıl medalı istisna olmaqla, son illərdə onlar bütün turnirlərdə qalib gəliblər. Buna görə də bu komanda üçün əsas məqsəd məlum vəziyyəti düzəltməyə çalışmaqdır. Federasiyasının prezidenti Andrey Filatov maksimalistdir və birinci yerdən başqa istənilən digər pillə çətin ki, onu sevindirsin”. Mark Qluxovski fikirlərinin davamında bildirib: “Dünya Şahmat Olimpiadasına hazırlıq planı var. Hazırda şahmatçılar fərdi qaydada məşq edirlər. Avqustun sonunda, Olimpiada ərəfəsində, yarışlara 7-10 gün qalmış onlar Soçidəki məşq bazasına toplaşacaq”. Qeyd edək ki, Dünya Şahmat Olimpiadasında iştirak edəcək Rusiya komandalarının tərkibinə Vladimir Kramnik, Sergey Karyakin, Aleksandr Qrişşuk, Yevgeni Tomaşevski, Yan Nepomnyaşi, Aleksandra Kostenyuk, Yekaterina Laqno, Valentina Qunina, Aleksandra Qoryaçkina və Nataliya Poqonina daxildir.xeber100.com

Almaniya millisi yarımfinalda

İyulun 2-də futbol üzrə XV Avropa çempionatının dörddəbir final mərhələsinin üçüncü oyunu keçirilib. Azərtac xəbər verir ki, Bordo şəhər stadionunda Almaniya və İtaliya yığma komandaları qarşılaşıblar. Macarıstanlı baş hakim Viktor Kassainin idarə etdiyi oyunun ilk hissəsində komandaların cəhdinə baxmayaraq hesab açılmayıb. Görüşün 65-ci dəqiqəsində Məsud Özil Almaniya millisini hesabda önə çıxarıb. Jeromi Boatenqin əllə oyunu nəticəsində matçın 78-ci dəqiqəsində Almaniya millisinin qapısına təyin olunan penalti zərbəsini Leonardo Bonucci dəqiq yerinə yetirib və oyunun sonunadək hesab dəyişməyib. Beləliklə, görüşün əsas vaxtı 1:1 hesablı heç-heçə ilə başa çatıb. Qalibi müəyyənləşdirmək üçün görüşdə əlavə vaxt oynanılıb. Ancaq yenə də hesab dəyişməyib. Qalib penalti seriyasında müəyyənləşib. Rəqibi 6:5 hesabı ilə məğlub edən Almaniya millisi yarımfinala yüksəlib. Almaniya və İtaliya yığma komandaları indiyədək 33 matçda üç-üzə gəliblər. Bu qarşılaşmaların 8-də almanlar, 15-də isə italiyalılar qalib gəliblər. On oyun isə heç-heçə başa çatıb. Ümumi top fərqi də italiyalıların xeyrinədir: 40-49. Bu oyunda qələbə qazanan komanda yarımfinalda Fransa-İslandiya qarşılaşmasının qalibi ilə üz-üzə gələcək. İyulun 6-da Lion şəhər stadionunda keçiriləcək birinci yarımfinal oyununda isə Portuqaliya və Uels yığma komandaları finala vəsiqə uğrunda mübarizə aparacaqlar.xeber100.com

Uels Portuqaliya yığması ilə qarşılaşacaq

“Avro-2016″nın 1/4 final mərhələsində Britaniya təmsilçisi olan Uels millisi Belçika ilə üz-üzə gəlib. Faktinfo.az xəbər verir ki, oyunda çoxları Belçikadan asan qələbə gözləsə də, Uels rəqibini darmadağın edib.Baxmayaraq ki, oyunda hesabı Belçikalı Naynqolan 13-cü dəqiqədə gözəl zərbəylə açıb. Ancaq 30-cu dəqiqədə günc zərbəsindən Eşli Uilyams baş zərbəsi ilə hesaba tarazlıq gətirib. İkinci hissənin 54-cü dəqiqəsində isə Robson-Kanu fərqi 2-yə çatdırıb – 2:1. Bu qoldan sonra rəqib qapısına yüklənən Belçikalılar 85-ci dəqiqədə qapılarında daha bir qol görüblər. Vouks baş zərbəsiyə fərqi 3-ə çatdırıb – 3:1. Onu da qeyd edək ki, 1/2 finalda Uels Portuqaliya yığması ilə qarşılaşacaq.xeber100.com

Sərbəst güləş üzrə ənənəvi beynəlxalq turnir başlayıb

İyulun 1-dən 3-dək Mahaçqalada beşqat dünya çempionu Əli Əliyevin xatirəsinə həsr olunmuş sərbəst güləş üzrə ənənəvi beynəlxalq turnir keçiriləcək. Bu barədə Azərtac-a Azərbaycan Güləş Federasiyasından bildiriblər. Məşqçi Siracuddin Eldarovun rəhbərliyi altında turnirdə sərbəst güləş üzrə yığma komandamızın 23 üzvünün iştirakı planlaşdırılıb. Heyətdə Georgi Edişeraşvili, Ruslan Qasımov, Cəlal Süleymanov, Tofiq Sadıqlı, Pərviz İbrahimov, Qadisa Geriya (hamısı 57 kq), Zəlimxan Vəliyev, Məhəmməd Abdullayev, Əhmədnəbi Qvarzatilov, Qalib Əliyev (hamısı 61 kq), Coşqun Əzimov, Orxan Abbasov, Teymur Məmmədov, Məhəmməd Müslümov, Ənvərbəy Dalqatov (hamısı 65 kq), Hacımurad Ömərov (70 kq), Məhəmmədhacı Muxutov, İsmayıl Abdullayev (hər ikisi 74 kq), Məhəmmədhacı Xatiyev, Aleksandr Qostiyev (hər ikisi 86 kq), Aslanbek Alborov (97 kq), Əli İsayev və Umar İsrailov (hər ikisi 125 kq) yer alıb. Görüşlərin idarə edilməsində ölkəmizi beynəlxalq dərəcəli hakimlər Elman İsmayılov, Zaur Şərifov, Vaqif Zeynallı və Babək Allahverdiyev təmsil edəcək.xeber100.com

Avropa çempionatında 1/4 final mərhələsinə start veriləcək

Bu gün AÇ-2016-da 1/4 final mərhələsinə start veriləcək. Apasport.az saytının məlumatına görə, ilk yarımfinalçının adı Polşa və Portuqaliya yığmaları arasında keçiriləcək matçdan sonra müəyyənləşəcək. Qrup mərhələsində xal baxımından Almaniyadan geri qalmayan polyaklar iddialarını davam etdirmək arzusundadırlar. 1/8-də İsveçrəni penaltilər seriyasında üstələyən Polşa millisində özünəinam hissi artıb. Komanda oyununa güvənən polşalılar Portuqaliyaya problem yarada bilər. Öz növbəsində, Portuqaliya da matça qələbə üçün çıxacaq. Avro-2004-də gümüş medallara sahib çıxan pireneylilər AÇ-2012-də bürünc medallara yiyələnmişdilər. Kriştianu Ronaldo və komanda yoldaşları bu dəfə qızıl mükafata iddialıdırlar. Portuqaliya yığması qrup mərhələsini yaxşı keçirməsə də, hələ AÇ-2016-da məğlubiyyət acısı dadmayıb. 1/8 finala qrup üçüncüsü kimi adlayan “Avropanın Braziliyası” bu mərhələdə güclü Xorvatiya yığmasını mübarizədən kənarlaşdırıb.