XV Avropa çempionatının final görüşü keçirilib

İyunun 10-da futbol üzrə XV Avropa çempionatının final görüşü keçirilib. Azərtac xəbər verir ki, Parisin Sen-Deni rayonunun “Stade de Frans” stadionunda keçirilən Portuqaliya-Fransa matçından əvvəl möhtəşəm şou nümayiş etdirilib. Daha sonra final görüşü start götürüb. Portuqaliyanın start heyətində Rui Patrisio, Sedrik, Pepe, Fonte, Qerrero, Renato Sançes, Adrien Silva, Uilyam Karvalyo, Joao Mari, Ronaldo və Nani meydana çıxıb. Fransa millisinin ilk onbirliyində isə Loris, Sanya, Kosielni, Ümtiti, Evra, Poqba, Matuidi, Sissoko, Qrizman, Paye və Jiru yer alıb. Matçı ingiltərəli Mark Klattenburqun rəhbərlik etdiyi hakimlər briqadası idarə edib. Final qarşılaşmasında ilk hissədə hesab açılmayıb. İlk yarıda Fransa millisinin müəyyən ərazi üstünlüyü olsa da bu hesabda əksini tapmayıb. İlk hissədə ən yaddaqalan hadisə isə Portuqaliya yığmasının kapitanının zədələnərək meydanı tərk etməsi olub. Oyunun 25-ci dəqiqəsində Kristiano Ronaldonu Rikardo Quaresma əvəzləyib. İlk hissədə olduğu kimi, ikinci hissədə də Fransa millisi daha çox hücum edən tərəf olub. Lakin Portuqaliya millisinin qapıçısı Rui Patrisionun inamlı oyunu nəticəsində fransızlar qol vura bilməyiblər. Oyunun sonlarına yaxın isə fransızların heyətində Andre-Pyer Jinyakın vurduğu zərbə qapı dirəyinə dəyib. Oyunda qalibi müəyyən etmək üçün iki 15 dəqiqədən ibarət əlavə vaxt oynanılıb. İlk 15 dəqiqədə qapılara qol vurulmayıb. İkinci on beş dəqiqəyə Portuqaliya millisi hücumlarla başlayıb. Nəticədə oyunun 109-cu dəqiqəsində Portuqaliya millisinin heyətində Eder fərqlənib. Onun uzaq məsafədən vurduğu zərbə qarşısıalınmaz olub. Qoldan sonra Fransa millisi çox cəhd göstərsə də bu, heç nəyi dəyişməyib. Beləliklə, Portuqaliya yığması tarixində ilk dəfə olaraq Avropa çempionu olub. Oyundan sonra qalibin mükafatlandırılması mərasimi olub. Gümüş medallar Fransa yığmasının üzvlərinə təqdim edilib. Sonra kürsüyə Portuqaliya millisinin üzvləri çıxıblar. Qızıl medallar və Avropa çempionatının kuboku qalib komandaya təqdim edilib. Qeyd edək ki, Fransa millisinin üzvü Qrizman altı qolla çempionatın bombardiri olub.xeber100.com

Avropa çempionatı 2016-nın final matçı…

Bu gün AÇ-2016-nın final matçı oynanılacaq. Apasport.az saytının məlumatına görə, turnir Portuqaliya – Fransa matçı ilə yekunlaşacaq. Sayca 15-ci qitə çempionatı olan budəfəki yarışın qalibi həm də tarixə düşmüş olacaq. Belə ki, Portuqaliya yığması qələbə qazansa, ilk dəfə qızıl medalları əldə edəcək. Bununla da pireneylilər Avropa çempionları sırasına daxil olacaq. İndiyədək buna 9 yığma nail olduğundan Fernandu Santuşun yetirmələri 10-cu Avropa çempionu olacaq.xeber100.com    

“Rio-2016” Olimpiya Oyunları üçün heyət müəyyənləşib

Rio-de-Janeyro Yay Olimpiya Oyunlarında çıxış edəcək Azərbaycan cüdoçularının heyəti açıqlanıb. Azərbaycan Cüdo Federasiyasının mətbuat xidmətindən AZƏRTAC-a bildirilib ki, baş məşqçi Peter Zayzenbaxer iki çəki dərəcəsində seçimini Beynəlxalq Cüdo Federasiyasının reytinqində daha yüksək mövqedə qərarlaşanların xeyrinə edib. Avstriyalı mütəxəssis Olimpiadaya 60 kiloqram çəki dərəcəsində Orxan Səfərovu, 100 kiloqram çəkidə isə Elmar Qasımovu aparmağı qərara alıb. Nəticədə İlqar Müşkiyev və Elxan Məmmədov dörd illiyin zirvə yarışından kənarda qalıb. Digər çəkilərdə Azərbaycanı Nicat Şıxəlizadə (66 kq), Rüstəm Orucov (73 kq), Məmmədəli Mehdiyev (90 kq) və Uşangi Kokauri (100 kq-dan yuxarı) təmsil edəcəklər. Qeyd edək ki, XXXI Yay Olimpiya Oyunlarının proqramına əsasən cüdo yarışları iyulun 6-12-də keçiriləcək.xeber100.com

“Qarabağ” – “F91 Düdelanj” qarşılaşmasının biletləri satışa çıxarılıb

Futbol üzrə Çempionlar Liqasının II təsnifat mərhələsinin ilk matçları çərçivəsində keçiriləcək “Qarabağ” (Ağdam) – “F91 Düdelanj” (Lüksemburq) qarşılaşmasının biletləri satışa çıxarılıb. Azərtac  xəbər verir ki, azarkeşlər biletləri matçın keçiriləcəyi Tofiq Bəhramov adına Respublika stadionun kassalarından əldə edə bilərlər. Biletlərin qiyməti nömrəli sektorlara görə 1-5, VİP sektoruna isə 30 manatdır. Qeyd edək ki, “Qarabağ”-“F91 Düdelanj” matçı iyulun 12-si saat 21:00-da start götürəcək.xeber100.com

“Avro-2016”da ikinci yarımfinal qarşılaşması keçiriləcək

İyulun 7-də “Avro-2016”da ikinci yarımfinal qarşılaşması keçiriləcək. Bakı vaxtilə saat 23:00-da başlayacaq oyunda meydan sahibləri Fransa millisi Almaniya kollektivi ilə üz-üzə gələcək. İtaliya yığmasını penaltilər seriyasında məğlub etməyi bacaran Bundestimin heyətində müdafiəçi Mats Hummels cəza səbəbindən oyunu buraxacaq, yarımmüdafiəçi Sami Kediranın və hücumçu Mario Qomesin isə zədə ucbatından meydana çıxmayacaqları gözlənilir. Bu itkilərə baxmayaraq çoxları hazırda dünyada ən güclü heyətlərdən birinə malik olan Almaniyanı bu qarşılaşmanın, ümumiyyətlə isə çempionatın favoriti hesab edirlər. Keçən turda çempionatın sürprizlərindən olan İslandiyanı böyük hesabla məğlub edən Didye Deşamın komandasında isə zədəli və cəzalı futbolçular yoxdur. Eyni zamanda, fransızların meydan sahibləri olması onlar üçün əlavə stimuldur. Bu maraqlı qarşılaşma Marselin “Velodrom” stadionunda keçiriləcək. Oyunun baş hakimi Nikola Ritsoli olacaq.xeber100.com

Beynəlxalq Şahmat Festivalı başlayıb

Batumidə Şəhər Bələdiyyəsi Kuboku Beynəlxalq Şahmat Festivalı davam edir. Azərtac xəbər verir ki, “A” turnirində 43 şahmatçı, o cümlədən doqquz qrossmeyster iştirak edir. Azərbaycan idmanının şərəfini FIDE ustası Maqomed Muradlı, Murad Nuri, Xanım Balacayeva və ustalığa namizəd Kənan Qarayev qoruyur. Dörd turdan sonra hərəyə 3,5 xal toplayan üç şahmatçı liderlik edir, dörd şahmatçı isə onlardan O,5 xal geri qalır. Azərbaycan təmsilçisi Maqomed Muradlının 2,5 xalı, Murad Nurinin 2 xalı, Xanım Balacayeva və Kənan Qarayevin aktivində isə hərəyə 1 xal var. Şəhər Bələdiyyəsi Kuboku Beynəlxalq Festivalı İsveçrə sistemi üzrə 9 turda keçirilir.xeber100.com

“Neftçi” ictimai idman təşkilatı yaradılıb

İsveç Azərbaycanlıları Konqresinin sədri (İAK) Emil Mirzəyev və futbol üzrə Azərbaycan yığmasının sabiq məşqçisi İqor Ponomaryov Stokholmda “Neftçi” ictimai idman təşkilatının yaradılması haqqında müqavilə imzalayıblar. İsveç Azərbaycanlıları Konqresindən AZƏRTAC-a bildiriblər ki, idman təşkilatı həmvətənlərimizin İsveçin ictimai, mədəni və siyasi həyatına inteqrasiyasına və cəlb olunmasına yönələn layihəsi çərçivəsində yaradılıb. Sənədin imzalanması mərasimində 28 diaspor təşkilatını bir araya gətirən İsveç Azərbaycanlıları Konqresinin idarə heyəti şurasının üzvləri iştirak ediblər. “Neftçi” ictimai idman təşkilatının sədri 1988-ci il Seul Olimpiadasının çempionu, SSRİ-nin Əməkdar İdman Ustası, 1988-cu ildə İsveçin futbol üzrə çempionu İqor Ponomaryovdur. İctimai təşkilatı yaratmaqda məqsəd bu ölkədə yaşayan gənc həmvətənlərimizi idmana, ilk növbədə futbola cəlb etmək, habelə onlarda İsveçin idman həyatına maraq oyatmaqdır. Təşkilata Azərbaycan və sovet futbolunun əfsanəsi İqor Ponomaryovun rəhbərlik etməsi klub üzvlərinə peşəkar futbolçu kimi təlim keçmək şansı verir, onların İsveçdə idman karyerası qurmalarına yol açır. “Neftçi” idman təşkilatı İsveç Azərbaycanlıları Konqresi nəzdində ictimai birlik kimi fəaliyyət göstərəcək.xeber100.com

PFL prezidenti postuna seçki keçiriləcək

Peşəkar Futbol Liqasının (PFL) prezidenti postuna seçki keçiriləcək. Azərtac xəbər verir ki, mərasim iyulun 5-də baş tutacaq. AFFA-nın inzibati binasında təşkil olunacaq tədbir saat 11:00-da başlayacaq. Seçkidə AFFA prezidenti Rövnəq Abdullayev və Premyer Liqa klublarının nümayəndələri də iştirak edəcəklər.xeber100.com

Messi beynəlxalq karyerasını başa çatdırmaq fikrindən daşınıb

Argentina yığmasının və İspaniyanın “Barselona” klubunun hücumçusu Lionel Messi beynəlxalq karyerasını başa çatdırmaq fikrindən daşınıb və milli komandanın heyətində qalmaq niyyətindədir. Bu barədə məlumatı “La Nacion” nəşri L.Messinin adı hələ açıqlanmayan keçmiş komanda yoldaşına istinadla yayıb. Həmin adam bildirib ki, adlı-sanlı futbolçu sadəcə müvəqqəti fasilə götürüb və yaxın vaxtlarda Argentina yığmasına qayıtmalıdır. Qeyd edək ki, iyunun 27-də Amerika Kuboku çempionatının finalında Argentina Çili yığmasına uduzandan sonra 29 yaşlı futbolçu karyerasının başa çatdığını bəyan edib. O bildirib ki, çıxıb getməsi hamı üçün və ilk növbədə onun özü üçün ən yaxşı variant olacaq. Argentina Prezidenti Maurisio Makri daha əvvəl Messiyə özü zəng vuraraq milli komandanı tərk etməməsini ondan xahiş edib. L.Messinin milli yığmada debütü 2005-ci ildə olub. Hücumçu milli yığmanın heyətində 112 oyunda iştirak edib, 55 qol vurub. Bu, qolların sayına görə Argentina yığması üçün rekord göstəricidir. Forvard 2014-cü il dünya çempionatının gümüş mükafatçısıdır, 2008-ci ildə Olimpiya Oyunlarında qızıl medal qazanıb. Lionel Messi futbol tarixində “Qızıl top”a beş dəfə sahib olan yeganə futbolçudur. O, bu mükafata 2009, 2010, 2011, 2012 və 2015-ci illərdə layiq görülüb. Messi “Barselona”nın heyətində 26 mükafat qazanıb.xeber100.com

Dünya Şahmat Olimpiadasının açılışına 60 gün qalır

Dünyanın ən böyük şahmat tədbirinin, Bakıda keçiriləcək Dünya Şahmat Olimpiadasının açılışına 60 gün qalır. Xatırladaq ki, komandaların qeydiyyatı iyulun 15-dək davam edəcək. Azərtac “R-Sport” agentliyinə istinadla xəbər verir ki, yarışların favoritlərindən biri olan Rusiyanın kişi və qadınlardan ibarət komandalarının tərkibi açıqlanıb. Rusiya Şahmat Federasiyasının (RŞF) icraçı direktoru Mark Qluxovski deyib: “Bakıda hər iki komanda maksimal vəzifələri həll etməli olacaq. Rusiyanın qadın komandasında məqsəd sadədir: əvvəlki üç turnirdə qalib gələn qızlar Şahmat Olimpiadasında da birinci yer uğrunda mübarizə aparmalıdır. Başqa cür ola da bilməz. Kişilərdən ibarət komandaya gəlincə, Olimpiya qızıl medalı istisna olmaqla, son illərdə onlar bütün turnirlərdə qalib gəliblər. Buna görə də bu komanda üçün əsas məqsəd məlum vəziyyəti düzəltməyə çalışmaqdır. Federasiyasının prezidenti Andrey Filatov maksimalistdir və birinci yerdən başqa istənilən digər pillə çətin ki, onu sevindirsin”. Mark Qluxovski fikirlərinin davamında bildirib: “Dünya Şahmat Olimpiadasına hazırlıq planı var. Hazırda şahmatçılar fərdi qaydada məşq edirlər. Avqustun sonunda, Olimpiada ərəfəsində, yarışlara 7-10 gün qalmış onlar Soçidəki məşq bazasına toplaşacaq”. Qeyd edək ki, Dünya Şahmat Olimpiadasında iştirak edəcək Rusiya komandalarının tərkibinə Vladimir Kramnik, Sergey Karyakin, Aleksandr Qrişşuk, Yevgeni Tomaşevski, Yan Nepomnyaşi, Aleksandra Kostenyuk, Yekaterina Laqno, Valentina Qunina, Aleksandra Qoryaçkina və Nataliya Poqonina daxildir.xeber100.com